1 Áádóó baa hoolzhiizh Alma Gideon kéyahdóó shadiʼaahjigo dahdiiyá, Manti kéyahjigo, áko shooh, yaa tsídeesyiz, tʼah ńtʼę́ę́ʼ Mosiah biyeʼké Zarahemlajigo yííkahgo yikʼíníyá.

2 Áko díí Mosiah biyeʼké Alma Diyin yá naalʼaʼí tʼóó yiyiiłtsʼą́yę́ędą́ą́ʼ yił naaldeeh ńtʼę́ę́ʼ; éí bąą Alma bikʼis yiyiiłtsʼą́ą́góó yéego bił hóózhǫǫd; dóó tʼah nááyíwohdi yaa bił hóózhǫǫdígíí éiyá bikʼis tʼahdii Diyin Bóhólníihii yikééʼ deiyíkááh; aooʼ, dóó tʼáá aaníinii bił béédahózingo yéego yee dabidziilgo ádaʼbiilaa; háálá diné bił éédahózinii danilį́ dóó Diyin God bizaad bee akʼedaʼashchínígíí yéego yidadeilkaalgo nideiskááʼ, áko Diyin God bizaad bił béédahódoozįįł.

3 Ákondi doo díí tʼéiyá da; yéego sodizin choodeiyoosʼįįd, dóó chʼiyáán adąąhdeitʼį́į́ ńtʼę́ę́ʼ; éí bąą diyingo áhodooníłígíí, dóó diyingo ił ííshją́ą́ ályaaígíí bee dahólǫ́, dóó ndaʼnitingo, Diyin God bibeʼadziil dóó bee óhólnííh yee ndaʼneeztą́ą́ʼ.

4 Áádóó Laman dineʼé bitahgóó Diyin God bizaad yee ndaʼniłtingo dį́į́ʼtsʼáádah nááhai, ląʼí nizhónígo tʼáá aaníinii bił béédahózingo adeilyiilaa; aooʼ, dóó bizaad dabidziilgo ląʼída Diyin God bikááʼnaaʼiiniihjįʼ ndeiyizheezh, bidááhdóó bibąąhági ádaatʼéii bandaʼdidootʼááłgo bízhiʼ yee yichʼįʼ sodadoolzin.

5 Áko díí kótʼáo bił ádahootʼéhígíí bił dahólǫ́ǫgo tádookai, háálá ląʼígo bichʼįʼndahwiisʼnááʼ; yéego tihdahoozniiʼ, atsʼíís dóó ániʼ yee, dichin, dibááʼ dóó adąąh nahóókaad, dóó yéego iiʼsizʼį́kʼeh naʼanish ałdóʼ.

6 Áko díí kótʼáo tádookai: bizheʼí, Mosiah, yitsʼą́ą́dóó dahdiikai, áłtsé náhááh góneʼ andahwiiʼaahii dahnaháaztʼą́ągo, óʼhóólniih bił hazʼą́ bizhéʼé beidiníʼą́ yę́ęʼ doo deinízin da, dóó díí ałdóʼdiné binitsédakees ńtʼę́ę́ʼ.

7 Ákótʼée ndi Zarahemla kéyahdóó dahdiikai, dóó bibéésh hał, dóó bitsiikʼidétáán, dóó beʼaltį́į́h, dóó beʼakʼaaʼ, dóó bee adiltłʼį́hí, dóó diné doo kééhatʼinídi chʼiyáán bee dahólǫ́ǫ dooleełgo biniinaa díígiʼ átʼáo ídaʼiilaa.

8 Áádóó diné doo kééhatʼinígo diné ndeiyizláʼígíí yił dahdiiná, Nephi bikéyahgódeʼ dahdiiná, Laman dineʼé Diyin God bizaad yee ndeidínóotʼį́į́ł biniyé.

9 Áádóó baa hoolzhiizh diné doo kééhatʼinídi deiyíkahgo ląʼída dabiiską́, áádóó hózhǫ́ chʼiyáán adąąh déítʼį́įgo dóó sodadilzin áko Bóhólníihii biʼIiʼ Sizį́ Diyinii łahdoo yee yáhoołʼą bił nilį́įgo deiyíkááh, dóó bił hólǫ́ǫgo, áko Diyin God bilákʼéédóó binaʼanishí danilį́įgo, bohoneidzą́ą́dą́ą́ʼ, bikʼéí, Laman dineʼé, tʼáá aaníinii bił béédahodoozįįł, dabizází bibee ádaʼoolʼįįł doo áko daatʼéhígíí bił béédahodoozįįł, éi éíi doo ákodaatʼée da.

10 Áádóó baa hoolzhiizh áko Bóhólníihii biʼIiʼ Sizį́ Diyinii yee yaa níyá, dóó ábídííniid: Hadaʼíínólní. Áádóó hadaʼoolní daazlį́į́ʼ.

11 Áádóó Bóhólníihii: Laman dineʼé, nihikʼéí bitahgóó dohkááh, dóó shizaad hashtʼedaołééh; yéego hadaʼíínółní dóó tiʼhoonííh, áko shí shinahjį́ yáʼádaatʼééhii bee bánisoozį́į doo, dóó shilákʼeedóóʼ bee naʼanishí danohłį́įgo ląʼída yisdádahidoohkah.

12 Áádóó baa hoolzhiizh Mosiah biyeʼké, dóó bił naaldeehígíí ałdóʼ, bijéí haʼoolnih daazlį́į́ʼ Laman dineʼé yaa dookahiiʼ Diyin God bizaad yee ndeidínóótįįł.

13 Áádóó baa hoolzhiizh Laman dineʼé bikéyah nineelʼą́ąjįʼ yíkaigo, ałtsákai dóó daʼniłtsʼą́ąjigo dahdiikai, Bóhólníihii daneestʼą́ ałtsojįʼ ahínéidookah yadaʼólíigo; háálá naanish ayóó átʼé daniizį́į́ʼ.

14 Áádóó tʼáá aaníí ayóó átʼé, háálá diné doo daastiʼígíí, dóó bijéí daastłʼisígíí, dóó doo tsʼííd ádaatʼįįłʼígíí Diyin God bizaad yee ńdeidíníítą́ą́ʼ; Nephi dineʼé ndeiłtseedgo yidaneedlį́, áádóó yee daʼniʼįįh dóó chʼídaʼiijááh, dóó bijéí daʼatʼį́įgo tʼéí deinízin, doodago béésh óola dóó béésh łigaii, dóó tsé daʼílíinii; áko ndaʼałtseed dóó chʼídaʼiijááh, áko bilaʼ doo yee ndaalnish da doo biniyé.

15 Áko tʼáá íiyisíí doo ndaalnishii danilį́, laʼída tʼóó ádaalyáii yichʼįʼ sodadilzin, dóó Diyin God hóyéego bá haadzííʼ yę́ę bikʼihooleʼ háálá dabizází bibeʼádaʼoolʼįįł biniinaa; azhą́ ákótʼée ndi ádaańdaʼooskango tʼéiyá Diyin Bóhólníihii biʼádééh haadzííʼyę́ę bichʼįʼ kódoolnííł.

16 Áko, díí biniinaa Mosiah biyeʼké naanish yíká ádáátʼįįd, ádaańdaʼdookąął biniyéʼ áko nináʼílyáago hootʼááł yaa áko dadínóozįįł biniyé.

17 Éí bąą ałtsʼáákai daʼníłtsʼą́ąjigo, dóó yitahgóó dahdiikai, tʼáá daasáhí deikááhgo, Diyin God bizaad dóó beʼadziilii baadahaasyáhígíí bikʼehgo.

18 Áko Ammon bitah aláahdi naatʼáanii nilį́įgo, yíkáʼaalwodgo, dóó éí yitsʼą́ą́ʼdóó dahdiiyá, bikʼihdahoodiiniiʼígíí yikʼehgo yikʼidahojisdliʼ, éí Diyin God bizaad yiłchʼííníʼą́, tʼah doo dahdiikááhgóóʼ yíkáʼaalwod, áádóó daʼniłtsʼáágóó dahdiiná.

19 Áádóó Ammon Ishmael kéyahgóó níyá, kéyah Ishmael biyeʼké binahjįʼ wóójiʼ, éí ałdó Laman dineʼé daazʼlį́į́ʼ.

20 Áádóó Ammon kéyah Ishmaeldi níyá, Laman dineʼé dabisił dóó beʼdaʼaztłʼǫ́, éí tʼáá átʼé Nephi dineʼé deiyiłtsoʼígíí tʼáá ákodeiłʼį́, dóó aláahdi naatʼáanii yidááhdóó ndeiyiilóós, áádóó aláahdi naatʼáanii ádeinízinígíí bikʼehgo ndeiłtseed, doodago kéyahdóó yedaʼiiłnííh, deinízin dóó bił yáʼádaatʼéhígíí bikʼehgo.

21 Áko Ammon kéyah Ishmael biʼaláahdi naatʼáanii bidááh niidlóóz; dóó Lamoni éí wolyé; éí Ishmael alkééʼ daʼízhchʼį́įdéé hááyá.

22 Áádóó aláahdi naatʼáanii Ammon neidééłkid daʼ kéyah Laman dineʼé bitah kééhanítʼį́įgo nínízin, doodago tʼáá ni nidineʼé bitah.

23 Áádóó Ammon ání: Aooʼ, díí diné bitah kééhashtʼį́įgo nahodoolzhiizhgo nisin; aooʼ, doodago nááshiʼdiilyáajįʼ da.

24 Áádóó baa hoolzhiizh aláahdi naatʼáanii Lamoni Ammon tsʼídá bił yáʼátʼééh, dóó bee beʼastłʼónígíí kʼídeezʼah; áádóó bitsiʼ łaʼ Ammon baa dooltʼééł dííniid.

25 Ákondi Ammon ání: Dooda, ákondi nánááshtʼaʼí nishłį́į doo. Éí bąą Ammon aláahdi naatʼáanii Lamoni yá naalʼaʼí silį́į́ʼ. Áádóó baa hoolzhiizh łaʼ ndaalʼaʼí yił Lamoni bidibé yaa ádahalyą́ daazlį́į́ʼ, Laman dineʼé ádaʼałʼínígiʼ átʼáo.

26 Áádóó aláahdi naatʼáanii yánaalnishgo tʼáá yiską́, łaʼ Laman dineʼé ndaalaʼí yił tadaʼniłkaadgo, éí tó siyį́ Sebus wolyé, dóó Laman dineʼé tʼáá átʼé ákweʼé tandaʼniłka; áko daʼdoodlį́į́ł biniyé.

27 Áko, Ammon dóó aláahdi naatʼáanii bindaalʼaʼí taah daʼniłkaadgo, áko shooh, Laman dineʼé dikwíida, éí tadaʼniłkaadgo, deizį́ʼ dóó Ammon dóó aláahdi naatʼáanii yá ndaalʼaʼígíí bidibé daʼníłtsʼą́ąjigo ałtsʼádeineeskaad, dóó daʼníłtsʼą́ąjigo ałtsʼádeineeskaadgo aheezhjééʼ.

28 Áko aláahdi naatʼáanii bindaalaʼí akʼihjįʼ ayádaʼniiłtiʼ, kódaaníigo: Áko aláahdi naatʼáanii atínihidoolííł, łaʼ nihikʼiské ákóyiilaa háálá díí diné doo yáʼádaashóonii bidibé daʼníłtsʼą́ąjigo ałtsʼádeineeskaad. Áádóó yéego adaʼniichah, kódaaníigo: Áko shooh, nihidibé tʼáá íídą́ą́ʼ daʼníłtsʼą́ąjigo ałtsʼádeineeskaad.

29 Áko háálá ndadootsxiłígíí yéédaaldzid biniinaa daachah. Áko Ammon díí yiyiiłtsʼą́ągo bijéí yéego biłhózhǫ́ ábiilaa; áko ání, díí shił ndaalʼaʼí sheʼadziilii bił ííshją́ą́ʼ ádeeshlííł, doodago adziilii shee hólónígíí, aláahdi naatʼaanii bá díí dibé ahíndínóólkał, áko díí bił ndaashaʼígíí bijéí dinééshnééł, áko shizaad deidoodląąłjįʼ deeshʼish.

30 Áádóó áko, díí Ammon yaa tsiníkeez, bikʼiské yidííniidígíí yikʼee tiʼdahooníhígíí yiyiiłtsʼą́ągo.

31 Áádóó baa hoolzhiizh bizaad tʼáá yáʼátʼéehgo yichʼįʼ haadzííʼ, kóníigo: Shikʼiské, nihił dahoozhǫǫh dóó nidibé hadadíníitaał, dóó ałhąʼádadiilnííł dóó tóojįʼ ndadíníílkał; dóó kótʼáó aláahdi naatʼáanii bidibé ałhiihnídíndóólkał dóó doo tídanihiʼdidoolnííł da.

32 Áádóó baa hoolzhiizh bidibé hadeinitʼáágóó dahdiikai, dóó Ammon yikééʼ yikah, tsxį́į́łgo aláahdi naatʼáanii bidibé yidááh ííjééʼ dóo tó siyį́įdi ahanínádeineeskaad.

33 Áádóó hastóí yę́ę hadááh nínááníjééʼ áko hodibé daʼníłtsʼą́ąjigo ałtsʼánáádeidinóołkał biniyé; ákondi Ammon bikʼiské ííłní: Dibé bináhtʼih áko dóó yóóʼadoojah da; áádóó shí éí díí hastóí nihidibé daʼníłtsʼą́ąjigo ałtsʼádeineeskaad yę́ę bichʼįʼ deeshááł dóó bikʼiideeshwoł.

34 Áko, Ammon ádííniidígíí yedaʼiilaa, dóó tó siyį́ Sebusdi ndaazínígíí yichʼįʼ níyá dóó yikʼiilwod, dóó doo tʼáá díkwíhí da ńtʼę́ę́ʼ.

35 Éí bąą Ammon doo yindaalzid da, háálá bihastóí tʼááłʼáʼí ndi yidiyoołhééłgo yídaneidlį́, háálá doo bił béédahózin da Bóhólníihii Mosiah yił ahaʼdeetʼą́ biyeʼké yilákʼéédóó yisdeidooniłgo; Bóhólníihii ndi doo yaa bił béédahózin da; éí bąą bikʼis deidiyoołhééłgo yaa bił dahózhǫ́; dóó díí biniinaa aláahdi naatʼáanii bidibé daʼníłtsʼą́ąjigo ałtsʼádeidinóołkał danízin.

36 Ákondi Ammon yichʼįʼ yiizįʼ dóó bibeʼadiltłʼį́į́h yee tsé yichʼįʼ yidiyizhchid; aooʼ, yéego bidziilgo tsé yichʼįʼ yidiyizhchid, dóó díkwííshį́į́h neistseed beʼadziilígíí biniinaa yikʼeedadeesgis; ákondi bikʼéí neistseedígíí biniinaa bádahoochįįd, dóó dadiilyééł danizingo yee ndahazʼą́; éí bąą, tsé doo yee ńdeidinoołniiłgóó yaa ákódaniizį́į́ʼ, tsihał yee yił ndaazdołhałgo yichʼįʼ dahdiijééʼ.

37 Ákondi shooh, tʼáá háíshį́į́h Ammon tsihał bichʼįʼ dahyídiitʼánígíí, bibéésh hał yee bigaan kʼíyisxaal; háálá ńdabiniłhał ndi bibéésh hał deeníigo yigaan yee kʼíyisxaal, wónáásii yikʼee bił dahóóʼyééʼgo, bitsʼáníjééʼ; doo tʼáá díkwíhí tʼéiyá da; dóó bigaan ayóó bidziilígíí biniinaa bitsʼáníjééʼ.

38 Áko hastą́ą́ bee adiltłʼíhí yee atʼíhyiilaa, ákondi tʼáadoo łá neitseed da tʼáá hozhóʼí binaatʼáanii tʼéiyá béésh hał yee yiyiisxį́; dóó béésh hał bichʼįʼ dahdeidiitʼánígíí yigaan kʼíyisxal, dóó doo éí tʼáá díkwíhí da.

39 Áádóó nizaadgóó baa ííjééʼgo, nálwod dóó dibé taah deinííyood dóó aláahdi naatʼáanii bidibé chʼil dahólǫ́ǫjįʼ ándeineeskaad, áádóó aláahdi naatʼáanii yił yah ííjééʼ, agaan Ammon béésh hał yee kʼíyisxaał yę́ę yah adeizhjaaʼ, éí atʼídabidoolíłígíí bigaan yę́ę ádaatʼé; éí aláahdi naatʼáanii tʼáá aaníigo ádáátʼįįdígíí bee bił béédahodoozįįł biniyé.