1 Áádóó baa hoolzhiizh ałtso diné yichʼįʼ haadzíiʼgo ląʼí bizaad deiyoosdląąd, dóó ádaa ńdaʼookąąh, dóó Diyin bizaad bee akʼedaʼashchínígíí nideiłkaah daazlį́į́ʼ.

2 Ákondi ląʼí da éí Alma dóó Amulek ndadiiltsxił danízin ńtʼę́ę́ʼ; háálá Alma deiyoołchʼį́į́d, Zeezrom saad tʼáá bééhózinígó yee yichʼįʼ haadzííʼ yę́ę biniinaa; áádóó Amulek nihínaʼazloʼ ałdóʼ dadííniid, dóó bibee hazʼáanii yikʼijįʼ haadzííʼ dóó biʼaghadaʼdiitʼaahii dóó ándahwiiʼaahii ałdóʼ.

3 Áádóó Alma dóó Amulek ałdóʼ deijoołá; háálá bąąhági ádaatʼínígíí tʼáá bééhózínígo yee yikʼijįʼ haadzííʼ, dóó nahónitingo ndabidiʼdooltsxił.

4 Ákondi baa hoolzhiizh tʼáadoo ádaadzaaí da; ákondi deitsxił dóó tłʼóół ditsʼidígíí yee yeʼdaʼaztłǫ́ʼ, dóó kéyah biʼaláahdi ánahwiiʼaahii yidááh nideizlóóz.

5 Áádóó diné ákǫ́ǫ́ níjééʼ dóó yikʼijįʼ hadahaasdzííʼ—bee hazʼáanii dóó biʼaghadaʼdiitʼaahii dóó kéyahdóó biʼándahwiiʼaahii, yikʼijįʼ haadzííʼ dadííniid, dóó diné tʼáá ałtso ákǫ́ǫ́ kéédahatʼínígíí ałdóʼ, dóó tʼááłáʼí Diyin God ałdóʼ dadííniid, dóó biYe diné bitahgóó iidoołʼaał, ákondi doo yisdéidoonił da; dóó ląʼí da diné Alma dóó Amulek yee yikʼijįʼ hadahaasdzííʼ áko díí éí kéyahdoo aláahdi ánahwiiʼaahii bidááhdóó ádadííniid.

6 Áádóó baa hoolzhiizh Zeezrom saad bee hadaʼíísdzíʼígíí yikʼee tsídoolyiz; dóó ániʼ doo yee daʼooʼínígíí ałdóʼ yaa ákónízin, éí diné yitahgóó saad yee yinaʼazloʼ; áádóó biiʼ sizíinii asiihígíí yaa ákoniizį́įʼgo bee bichʼįʼ nahwiiʼná silį́į́ʼ; aooʼ, chʼį́įdiitah bikʼeʼayeeʼ bináztʼiʼ silį́į́ʼ.

7 Áádóó baa hoolzhiizh diné yichʼįʼ dilwoshgo yaa nídiidzá, kóníigo, Áko shooh, tʼáá shí ádíhodiishtʼiʼ, dóó díí hastóí Diyin God bidááhdóó chin bąąh ádaadin. Áádóó yá náʼookąąhgo hahoolzhiizh; ákondi yikʼijįʼ hadaasdzííʼ, kódaaníigo: Daʼ biʼiiníziiniiísh nanihiloʼ? Áádóó yikʼi dahidiizhééʼ, dóó bitahdóó chʼídeiyiistłʼííd, dóó tʼáá ałtso Alma dóó Amulek yee hahaasdzííʼ yę́ę deiyoosdląądígíí ałdóʼ; dóó chʼídeiyiistłʼííd, dóó hastóí hachʼįʼ adeisʼaʼgo tsé yee ndahwiineesneʼ.

8 Áádóó bizáanii dóó baʼáłchíní ałhanideiyiizhʼeezh, áádóó tʼáá háí shį́į́ daʼoosdląąd éí doodago Diyin God bizaad bee nidabidiʼneestą́ąʼgo daʼoosdląądígíí éí tsídziʼ adeiyiistłʼííd, áádóó bindaʼasdzoh éí Diyin bizaad dílzingo bee akʼedaʼashchínígíí dabiyiʼę́ę, áádóó éí ałdóʼ tsídziʼ ádeiyiistłʼííd, áko adadidookʼą́ą́ł dóó kǫʼ bee ádadooldįįł.

9 Áádóó baa hoolzhiizh Alma dóó Amulek, dah deidiiʼeezh bidiʼyoolyéełjįʼ biʼdítʼeezh, áko kǫʼ bee ádabidiʼdooldįįłígíí yidoołtsééł biniyé.

10 Áádóó Amulek sáanii dóó áłchíní tiʼdahooníihgo kǫʼ bee ndabiʼdiltseedgo yiyiiłtsą́, bídóʼ yikʼee tiʼhoozniiʼ; dóó Alma íidííniid: Haaléítʼáo díí tiʼhooniih tʼóó nihinááł áhoonííł? Éí bąą bichʼįʼ dahdidiilnih, dóó Diyin God bibeʼadziilii nihiyiʼ hólónígíí choidiilʼįįł, dóó dahnidinood bitsʼą́ą́dóó yisdádiiʼnił.

11 Ákondi Alma ábidííniid: Iiʼ Sizį́ Diyinii shigaan bee dahdideeshnihgo tʼą́ą́ʼ kóshósin; háálá áko shooh Bóhólníihii tʼáá bí ádił yah ayiizhʼeezh, ayóó átʼéii bee; dóó díí adeidoolííłgo yee hoołʼaʼ, éí doodago díí diné kódabidoolíłígíí, bijéí deistłʼisígíí bikʼehgo, áko báhachʼįʼgo yee yánáhodooʼáłígíí tʼáá ákogi átʼéii doo, dóó tʼáá ákogi ádaaníiłii bidił yá daʼooʼíinii nilį́įgo bikʼijįʼ ndadootʼááł, aooʼ, dóó nihoníyáadi yéego bikʼijįʼ hadahidoodzih.

12 Áko Amulek Alma íidííniid: Áko shoosh, nihí daatsʼí ałdóʼ adanihidoołkʼą́ą́ł?

13 Áádóó Alma ání: bíniʼdii Bóhólníihii iinízinígíí bikʼehgo áhodoonííł. Ákondi, shooh, nihinaanish éí tʼah doo ałtso íilnééh da; éí bąą doo ádanihidiʼdoolkʼą́ął da.

14 Áko baa hoolzhiizh bitsʼíís kǫʼ biih daheestłʼííd adahideezkʼą́ąʼgo, dóó haneʼ ndaháasdzoh bił adahaastłʼid yę́ę ałdóʼ, kéyahdóó aláahdi ánihwiiʼaahii Alma dóó Amulek yaa níyá dóó yidááhdóó sizį́ʼ dóó yeʼaztłʼǫ́ dóó bílaʼ biniitsįʼgi neidiiłtsʼin, áádóó íidííniid: Díí bikééʼdóó woołtsą́ągo, díí dinéʼísh nináádínóohtįįł, áko łeetsoii dookʼą́ą́ł dah sikaad biihidoołtłʼił.

15 Áko shooh, baa ákonoozį́į́ʼ shį́į́ kǫʼ biihdabiʼdiistłʼídígíí adziilii bee yisdádoohniłgo doo bínoołʼą́ą da; éí doodago daʼ Diyin God yisdáyínil háálá niheʼoodląʼjí daʼatahígíí biniinaa. Dóó bá nahwiitʼaahii biniitsįʼ ninaanéidííłtsʼin, dóó ání: Haítʼáó ádahadoohdzih?

16 Áko díí ánahwiiʼaahii Nehorjí ádaʼoolʼįįł dóó daʼoodlą́ą́jí atah nilį́, éí Gideon yiyiisxį́.

17 Áádóó baa hoolzhiizh Alma dóó Amulek tʼáadoo yee yił hoolneʼé da; dóó nínáánéidííłtsʼin, dóó awáalyah yá naazíinii yeiníʼeezh awáalyah góneʼ yah iidoonił biniyé.

18 Áádóó tááʼ yiską́ awáalyah sikéego ląʼí da aghadaʼdiitʼaahii, dóó ándahwiiʼaahii, dóó priest danilínígíí, dóó ndaʼnitiní, éí Nehor deiyoodlą́ągo yikééʼ deíkááh ńtʼę́ę́ʼ, dóó deidínóółʼįįłgo awáalyahdi baa heeskai, dóó saad ląʼí da yíndaʼídééłkid; ákondi tʼáadoo haadzííʼ da.

19 Áádóó baa hoolzhiizh ándahwiiʼaahii bidááh deizįʼ, dóó ádaaní: Haʼátʼíí lá biniyé díí diné bindaʼídíkid doo baa hoołneʼ da? Dooʼísh nihił bééhózin da kǫʼ danaanood biih nihideeshniłgo bee shóhólnííh? Áádóó haodziih yidííniid; ákondi tʼáadoo haadzííʼ da.

20 Áádóó baa hoolzhiizh ałtsʼá haaskai dóó daʼníłtsʼą́ąjigo dahdahidiikai ákondi biiskání ninááheeskai; dóó ánahwiiʼaahii biniitsʼįʼ yéego nídéídííkaad. Áádóó ląʼí da ałdóʼ yichʼįʼ nahaaskai, dóó nídeidííłtsʼin, kódaaníigo: Daʼ náánéidoosįįł dóó díí diné bá nínááhoohʼááł, dóó nihibeehazʼáanii bikʼijįʼ hanáádoohdzih? Tsʼídá ayóó átʼáo nihidziilgo haʼátʼíí biniyé doo bee yisdáóʼaash or yisdáʼádohníił da?

21 Áádóó ląʼí da yee yichʼįʼ hadahaasdzííʼ, biwooʼ yikʼijįʼ ahídeiłkʼashgo, dóó yikʼi dahidiizheehgo, dóó kódaaníigo: Haash éí da niitʼée doo biʼiiníziiniitah yiikaigo?

22 Áádóó tʼáá ahayóí, aooʼ, tʼóó ahayóí ałʼąą átʼáo yee yichʼįʼ hadahaasdzííʼ; dóó yándahałtiʼgo ląʼí yiską́. Áádóó doo yadaʼáłtsóód da dichin dadooleeł biniyé, dóó tó ałdóʼ doo yaa deíkaah da dibááʼ dadooleeł biniyé, dóó biʼééʼ yighadeeznil tʼáá daalchííʼ doo biniyé; áádóó tłʼóół ditsʼidígíí yee yedaʼaztłʼǫ́ dóó awáalyah góneʼ yah adeiznil.

23 Áádóó baa hoolzhiizh tiʼhooníihgo ląʼí yiską́, (áádóó naakitsʼáadah yoołkááł, dóó neeznáágóó yiziłgo, dóó Nephi bidineʼé ándahwiiʼaahii yikʼidahéeʼaah neeznáá yihah góneʼ) aláahdi ánahíiʼaahii Ammonihah bikéyahdi dóó ląʼí bándaʼnitiní dóó biʼaghadaʼdiitʼaahii awáalyahdi yíkai áadi Alma dóó Amulek tłʼóół bee beʼestłʼǫ́.

24 Áádóó aláahdi ánahwiiʼaahii bidááh yiizįʼ, dóó ninááyidííłtsʼin, dóó ííłní: Diyin God bibeʼadziilii nihee hólǫ́ǫgo díí tłʼóół náóhʼáád, dóó ákohgo índa daʼiidiidląął éí Bóhíolníihii díí diné íídoołdįįł bizaad bikʼehgo.

25 Áádóó baa hoolzhiizh tʼáá átʼé yaa yíkai dóó ndeidííłtsʼin, dóó tʼáá éí saad ánáádooʼniid, azhą́ tʼáá átʼé; dóó ałtso hachʼįʼ hadahaasdzíiʼgo Diyin God bibeʼadziil Alma dóó Amulek bił hoolneʼ, áádóó de kódzaa dóó bikeeʼ yee yiizįʼ.

26 Áádóó Alma yéego sodoolzin, kóníigo haadzííʼ: Haanízáágóóʼísh ayóó átʼáo tiʼhwiiʼnííh doo, O Bóhólníihii? O Bóhólníihii, nihidziilgo ánihílééh Christ yiniidlánígíí bikʼehgo, azhą́ yisdánihiʼdeiniljįʼ ndi; áko díí diné deiyiiłtsą́ągo, dah dadínéezchą́ą́ʼ, háálá ábidiʼdooldįįł bí bikʼi dahooleʼ.

27 Áádóó baa hoolzhiizh ayóó átʼáo nídaaldzidígíí biniinaa naaʼahineezdeeʼ, awáalyah bichʼeʼátin tʼáá bichʼįʼgi; dóó nahasdzʼáan bidziilgo hidiisnááʼ, dóó kin bee ályaayę́ę ałtsʼá haastǫʼ, áko niʼjįʼ nááłdááz; dóó aláahdi ánahwiiʼaahii, dóó aghadaʼdiitʼaahii, dóó priest, dóó ndaʼnitiní danilínígíí, Alma dóó Amulek atídabiilaayę́ę, kin bikʼinááłdzááz.

28 Áádóó Alma dóó Amulek awáalyahdę́ę́ʼ chʼíníʼáázh, dóó tʼáadoo atídzaa da; háálá Bóhólníihii adziilii beenílá Christ yoodlánígíí bikʼehgo. Áádóó awáalyahdę́ę́ʼ tʼáá hooshchʼįʼ chʼíníʼáázh; dóó tłʼóół bee beʼastłʼónée náostʼah; dóó awáalyah yę́ę niʼjįʼ nááłdzááz, dóó tʼáá ałtso diné kin biyiʼyę́ę daneezná, tʼáá hazhóʼó Alma dóó Amulek éí tʼáadoo da; dóó tʼáá hooshchʼįʼ kintahjįʼ níʼáázh.

29 Áko diné ayóó átʼáo hodiiztsʼą́ąʼgo tʼáá átʼé dah deíkááhgóó nidahaazhjééʼ háálá hóótʼįįd daniizį́įʼgo; áádóó Alma dóó Amulek awáalyahdę́ę́ʼ hááʼáázhgo deiyiiłtsą́ągo, dóó kin niʼjįʼ nááłdzáazgo, ayóó átʼáo yikʼee nídaasdzííd, dóó Alma dóó Amulek yitsʼą́ą́dóó dah dadínéezhchą́ą́ʼ, tłʼízí dóó biyázhí naaki náshdóítsoh bitsiiʼjįʼ dadiʼilígíí yitsʼą́ąjįʼ danéechééh nahalingo; áko kótʼáo Alma dóó Amulek yitsʼą́ą́dóó dah dadínííchą́ą́ʼ.