1 Áádóó nááná, shikʼéí, Bóhólníihii Diyin God baʼáłchíní bibee hazʼáanii yeiníláháádą́ą́ éí baa ntsídaahkees; dóó beedaałniih Bóhólníihii Diyin God ląʼí da priest yiyíísį́į́ʼ, diyingo óʼoolʼįįł bikʼehgo, éí biYeʼ bikʼehgo, háálá éí díí diné yee ndeidinóotįįł.

2 Áádóó éí priest danilínígíí éí biYeʼ bibee óʼoolʼįįł bikʼehgo bee dabiʼdiilzį́į́ʼ, diné éí Diyin biYeʼ nináʼnídlá yee yichʼįʼ dadéezʼį́įʼgo bił béédahózin dooleeł biniyé.

3 Áádóó díí bikʼehgo éí dabiʼdoolzį́į́ʼ—Diyin God tʼáá íídą́ą́ʼ bił bééhózingo nahasdzáán hadilyaadą́ą́ʼ bikʼihdaʼhoodiiniiʼ dóó bee ndahodiistʼą́, bidaʼoodląʼ yee dabidziil dóó nizhónígo Diyin yá nidaalnish, aláahji éí yáʼátʼéehii éí doodago bąąhági átʼéii ńdeididoolééł; éí bąą yáʼátʼéehii ńdeidiilá, dóó bidaʼoodląʼ yee dabidziilgo yee ádáátʼįįd, dóó diyingo bikʼidahodiiniiʼ, aooʼ, éí diyingo hashtʼedabiʼdiilyáago bikʼidahodiiniiʼ, dóó éí bikʼehgo, éí bá nináʼdoolyeełgo tʼáá bilą́ąjįʼ bá hashtʼeelyaa.

4 Áádóó áko bidaʼoodląʼígíí bikʼehgo diyingo bikʼidahoodiiniiʼ, łaʼ éí Diyin God biʼIiʼ Sizį́ Diyinii doo deinizin da háálá bijéí deistłʼis dóó doo yikʼidaʼdiitįįh da, áko, díí doo kótʼéégóó éí bikʼiské nahalingo ayóó átʼáo bá bohonéédzą́ą doo ńtʼę́ę́ʼ.

5 Éí doodago áłtsogo, nigháídę́ę́ʼ bikʼéí tʼáá yił ahéłtʼéego bił hazʼą́ą́ ńtʼę́ę́ʼ; áko díí diyingo akʼi dahoodiiniiʼ tʼah doo nahasdzáán hadilnééhyę́ędą́ą́ʼ hashtʼedaalyaa háálá íídą́ą́ʼ doo bijéí deistłʼis da, aYeʼ Tʼáá Éí Tʼéiyá Yizhchíinii bąąhági átʼéii yikʼé nináʼídláhígíí bił danilį́į́ ńtʼę́ę́ʼ, éí bee hadilyaa—

6 Áádóó díí diyingo akʼidahodiiniih bee bikʼihodiiniiʼgo, dóó hódahgo Diyin God bibeʼadziilii diyingo bee bikʼihodiiniiʼ, bibee hazʼáanii nihokááʼ dineʼé baʼáłchíní yee neidínóotįįłgo, áko da Diyin bibee ił hózhǫ́ǫdi yił yah anídookah—

7 Díí hódahgo Diyin God bibeʼadziilii biYeʼ bikʼehgo óʼoolʼįįł, éí óʼoolʼįįł nahasdzáán hadilnééh yę́ędą́ą́ʼ hashtʼeilyaa; éí doodago kótʼáo ááhdishní, niyiiłkaah éí doodago nináháhááh ádindą́ą́ʼ, ahoolʼáádę́ę́ʼ dóó ahoolʼáágóó hashtʼeelyaadę́ę́ʼ, alą́ąjįʼ tʼáá ałtsojįʼ ééhózin bikʼehgo—

8 Áko kótʼéego bikʼidahodiiniiʼ—diyingo akʼidahodiinííh bee bikʼidahodiiniiʼ; dóó diyingo ádaʼoolʼįįł bee dabiʼdiilzį́į́ʼ, dóó hódahgo Diyin God bibeʼadziilii bee diyingo óʼoolʼįįł ńdeidiilá, éí bee bikʼidahodiiniiʼígíí, dóó diyinkʼehgo óʼoolʼįįł, dóó hódahgo Diyin God bibeʼadziilii, éí doo bił hahoolzhiizh da éí doodago doo ninítʼiʼ da—

9 Áko ahoolʼáágóó high priest daazlį́į́ʼ, éí aYeʼ bikʼehgo óʼoolʼįįł, éí nihiTaaʼ Tʼáá Éí Tʼéiyá Bá Yizhchíinii nilį́, éí éí niyiiłkaah éí doodago nináháhááh bąąh ádinii nilį́, éí tʼáá íiyisíí bibee ajoobaʼ, tʼáá ahiniiltʼéego nihá hasʼą́, dóó tʼáá aaníinii biiʼ hólǫ́. Áádóó díí éí ákótʼée doo. Amen.

10 Áko, diyingo óʼoolʼįįł baa haasdzíʼígíí, éí doodago hódahgo Diyin God bibeʼadziilii, tʼóóʼ ahayóí bee dabiʼdiiszį́į́ʼ dóó Diyin God bihigh priest daazlį́į́ʼ; dóó tʼáá íiyisíí bedaʼoodląʼ binahjįʼ dóó ádaa ńdaʼooskango, dóó Diyin God yichʼįʼ yáʼátʼéehii danilį́, ádaa náʼookąąh yíká ádaatʼį́ dóó yáʼátʼéehii yindaalnish áko doo tíʼdahwiidoonih da.

11 Ákogo diyingo bee óʼoolʼįįł ałkééʼ sinil bee bikʼidahodiiniiʼ, dóó hadaałtʼéego ádaalyaa, dóó dabiʼééʼ Bóhólníihii Dibé Yázhí bidił binikááʼ góneʼ daasgisgo bitsʼádaʼdinílííd daazlį́į́ʼ.

12 Áko, Iiʼ Sizį́ Diyinii hadaałtʼéego ádabiilaago, biʼééʼ łigaigo ádaalyaa, Diyin God bidááhdóó daniłtólí dóó doo bąąh dachin da, bąąhági átʼéii tsʼídá tʼóó bił badaaʼihgo deiníłʼį́. dóó tʼóó ahayóí, tsʼídá ląʼí da, niłtólí ádaalyaa dóó biBóhólníihii Diyin God bee íł hózhǫ́ yiih hikai.

13 Áádóó áko, shikʼéí, Diyin God bidááhdóó hojoobaʼ danohsįįh, dóó ndaʼíiyoosihígíí tsin bineestʼąʼ nahalingo ádaa ńdaʼoohkąąh, áko Diyin bee ił hózhóonii nihidóʼ biih hidoohkááh.

14 Aooʼ, hojoobaʼ danohsįįh Melchizedek bidineʼé ádaatʼé yę́ęgi átʼáo, éí ałdóʼ high priest Diyin bee óʼoolʼįįł ałkééʼ sinil bee bikʼidahodiiniiʼ éí baa haasdzííʼ, éí ałdóʼ hoolʼáágóó hódahgo Diyin God bibeʼadziilii bee daasdzį́į́h.

15 Áádóó Abraham éí Melchizedek tʼáá éí Diyin bibéeso yichʼįʼ neiyiiléé ńtʼę́ę́ʼ; aooʼ; nihizhéʼé Abraham ndi tʼáá ałtso binaadeełii tʼááłáʼí dootłʼizh bíighahgo neiyiiléé ńtʼę́ę́ʼ.

16 Áko díí diyin bee ádaʼoolʼį́įł kótʼao baa dahaasyá, éí yee diné Diyin God biYeʼ nideiyólíi doo, tʼáá bí díigi átʼáo ałkééʼyisnil, éí doodago ałkééʼ óʼoolʼįįł, dóó díí éí bibąąhági átʼéii baa néididooʼáałgo nideiyólí, áko Bóhólníihii bee ił hózhóonii biih diikah danízin.

17 Áko díí Melchizedek éí Salem kéyahdi aláahdi naatʼáanii nilį́įgo; dóó bidineʼé éí tʼáá íiyisíí bąąhági ádaatʼéii dóó doo yaa ádaashoonii yiih yíkai; aooʼ, tʼáá ałtso doo yáʼátʼééhjí dah diikai; bąąhági átʼéii tʼóó ahayóí ałʼąą átʼéego biiʼ dahólǫ́.

18 Ákondi Melchizedek oodląʼ yéego yee naashnish, dóó hódahgo Diyin God bibeʼadziilii beiyílyá Diyin God bihódiyingo ałkééʼ óʼoolʼįįł bikʼehgo, bidineʼé ádaa náʼookąąh yee neineeztą́ą́ʼ. Áádóó áko shooh, ádaa ńdaʼooskan; dóó Melchizedek bikéyahgi hodéezyéél áhósingo beiníłką́; éí bąą hózhǫ́ǫgo yinantʼaʼí wolyéé ńtʼę́ę́ʼ, háálá Salem biʼaláahdi naatʼáanii nilį́į́ ńtʼę́ę́ʼ; áádóó bizhéʼé yił nahaʼáá ńtʼę́ę́ʼ.

19 Áko, ląʼí da bilą́ąjįʼ aheeskai, dóó ałdóʼ ląʼí da bikééʼ adahaaskai, ákondi doo éí łaʼ biláah átʼée da ńtʼę́ę́ʼ; éí bąą, bí éí ayóó baa yáʼátiʼ ńtʼę́ę́ʼ.

20 Áko kʼad díí éí doo baa yá náádeeshtih da; bee haasdzííʼígíí tʼáá bíighah nisin. Áko shooh, Diyin bizaad bee akʼedaʼashchínígíí nihá sinil, tʼáá nihí ndaahgizgo éí bee ádídahodidoołtih.

21 Áádóó áko baa hoolzhiizh Alma díí saad yee yichʼįʼ haadzíiʼgo, yichʼįʼ dahdiilniiʼ dóó bizhí yee ayóó íítsʼaʼgo hadoolgháázh, kóníigo: Ádaa náʼookąąh kʼad baa hoolzhiizh, háálá yisdáʼiildééh kʼadą́ą baa hoolzhíísh;

22 Aooʼ, Diyin Bóhólníihii bizhí bee, Diyin yá nidaalʼaʼí bizééʼdę́ę́ʼ bee, tʼáá ałtso diné dah deíkááhgóó yił halneʼ; aooʼ, bił haneʼgo; tsʼídá aláahdi ił hózhónii haneʼ chódeidoołtʼeeł, aooʼ, díí ił hózhǫ́nii haneʼ diné tʼáá ałtso bitahgóó bił áhozdooltsʼį́į́ł, aooʼ, tʼáá ałtso nihokááʼgóó daʼníłtsʼą́ąjigo ałtsʼádabidiʼneeskaadígíí bichʼįʼ ndi; ákohgo nihídoʼ dasidiitsʼą́ą́ʼ.

23 Áádóó díí tʼáá beehózinígo nihił ííshją́ą́ ádaalyaa, bikʼi daʼdidiitį́į́ł biniyé, áko doo daʼdiilzih da; dóó díí biniinaa kéyah doo bééhózingi naaldeehígíí dasiidlį́įʼgo; éí bąą, tʼáá íiyisíí nihikʼidahojisdlį́į́ʼ, háálá díí ił hózhónii haneʼ bee nihił dahóoneʼ tʼáá ałtso nihidáʼákʼeh bikááʼgóó.

24 Háálá áko shooh, kʼad Diyin yá nidaalʼaʼí ląʼí yił dahoolneʼ nihikéydaayahgóó; dóó díí éí nihokááʼ dineʼé baʼáłchíní bijéí biyiʼdę́ę́ʼ hashtʼeʼ ádaʼdidoolníiłgo binaʼnitin ńdeididoolééł ayóó átʼáo nádaahdí.

25 Áádóó kʼad Diyin yá nidaalʼaʼí bizééʼdę́ę́ʼ bee haneʼ baa hózhóonii yee nihił dahodoolnihgo tʼáá éí tʼéí bikádaʼíísiniiltsʼą́ą́ʼ, doogááłígíí, bichʼįʼ hoolzhish, hahgo shį́į́ éí doo nihił bééhózin da. Diyin God bichʼįʼdíí shí yoołkááł biyiʼ dooleeł nisin, ndi tʼáá tsxiłígo éí doodago tʼah náasdi, beiníłką́ągo shił hózhǫ́ǫ doo.

26 Áádóó hastóí yáʼátʼéehgo deikáhígíí dóó dahodísinígíí bił ííshjání ádadoolnííł, Diyin yá nidaalʼaʼí bizééʼdę́ę́ʼ bee, níyá baa hoolzhiizhdi, áko nihizází bizaad bidahodoolnííł, yaa ndahazneʼę́ę bikʼehgo, éí diyingo áhodooníłígíí biiʼ dahólónée bikʼehgo.

27 Áádóó áko, shikʼéí, shijéí tsʼídá bitłʼááhdę́ę́ʼ laanaa nisin, aooʼ, tʼáá íiyisíí ádiłniisdzííłgo shitah hodíłniih, shizaad dadidoohtsʼį́į́ł nisin, dóó nihibąąhági ádaatʼéii yooʼadahidoohʼaah, dóó ádaa náʼiiníkąąhgo tʼáadoo tʼóó náás bił hoolzhishí.

28 Ákondi Bóhólníihii bichʼįʼ hojoobaʼ ádaʼdoołnééh, dóó bízhiʼ diyinígíí bee sodadołzin, tʼáá áłahjįʼ hadaʼoohsííd dóó sodadołzin, áko nihikʼi naazláhígíí doo bilááhgóó nanihinitaah da dooleeł, dóó áko Iiʼ Sizį́ Diyinii bikééʼ deínóhkááh doo, hojoobaʼ ádaʼdoołnééh, nihaʼátʼé adingo ádaʼdoołnééh, akʼeh dahonołʼį́, haʼdaʼíínółní, ayóó óʼóʼní nihiiʼ dahołé dóó nízaadgóó hadaʼíínółní;

29 Bóhólníihii deinohdlą́; hoolʼáágóó dahinohnáa dooleełgo bíká hadaʼíínółní; Diyin God bibee ayóóʼóʼóní nihijéí biyiʼ dahólǫ́ǫgo; áko nihoníyáadi yisdádoohkah dóó Diyin bibee ił hózhóonii biih dahídoohkah.

30 Áádóó Diyin Bóhólníihii ádaa náʼookąąh yee ná hwiidoołʼaał, áko doo biʼáháchʼįʼ nihikʼi siláa da doo, áko doo chʼį́įdiitah bibéésh daʼahólzhʼaʼí danihótʼąʼ da dooleeł, áko doo anoonééł naaki góneʼígíí bee tiʼdahwiidoohnih da.

31 Áádóó Alma ląʼígo saad diné yee yichʼįʼ hanáánáádzííʼ, éí doo díí béésh tʼą́hí biyiʼ nídaháasdzo da.