1 Áko Alma, Amulek bizaad Zeezrom yidííłheelígíí yiyiiłtsą́ągo, Amulek Zeezrom biyoochʼííd dóó bidiyoołhéełgo binííʼaaʼígíí yiyiiłtsą́ągo, dóó asiihígíí yaa ákoniizį́įʼgo bitah hoditsxiz áboolíłígíí yiyiiłtsą́ągo, bizééʼ ąą áyiilaa dóó yichʼįʼ haadzííʼ, dóó Amulek bizaad bił nilį́įgo, dóó bighą́ąʼjįʼ dooleełígíí, éí doodago Diyin bizaad bee akʼedaʼashchínígíí Amulek yee haadzíʼígíí biláahgo ííshją́ą́ íidoolííł.

2 Áko Alma bizaad Zeezrom yee yichʼįʼ haadzíʼígíí diné binaagóó kéédahatʼínígíí deidiiztsʼą́ą́ʼ; háálá ląʼída diné hólǫ́, dóó kótʼéego díí saad yee haadzííʼ:

3 Áko Zeezrom, niyoochʼííd dóó ninaʼadloʼígíí bee haʼndoolʼį́ʼígíí yiiltsą́, háálá doo diné tʼéiyá bichʼįʼ niyoochʼíid da ákondi Diyin God bichʼįʼ niyoochʼííd; háálá áko shooh, nintsékees tʼáá átʼé bił bééhózin, dóó nintsékees biʼIiʼ Sizį́ Diyinii binahjįʼ nihił bééhoozingo yiiniłtsą́;

4 Áádóó yiiniłtsą́ ninahatʼaʼ tsʼídá tʼáá íiyisíí naʼadloʼ nahatʼaʼ átʼéhígíí nihił bééhózin, biʼiiníziinii binaʼadloʼígi átʼáo, háálá díí diné bichʼįʼ niyoochʼííd dóó nihikʼijįʼ danilį́į dooleełgo naniloʼ, áko danihódziih dóó chʼídanihidínóołchééł—

5 Áko díí nihitsʼą́ą́jí nilíinii binahatʼaʼ átʼéé ńtʼééʼ, dóó beʼadziilii niiʼ hólǫ́ǫgo yee nihinaashnish. Kʼad díí béénílniih bee nił hashneʼígíí éí tʼáá ałtso nihokááʼ dineʼé bídeitiʼ.

6 Áádóó áko shooh tʼáá ánółtso ánihidishní díí anaaʼí chʼį́įdii bibee ódleeh átʼé, díí diné yiihdidooltałgo yá niiníʼą́, áko nanihiloʼ dooleeł biniyé, áko bibéésh daʼahólzhaʼí yee nihidaʼaztłʼǫ́, beʼiłnaʼiideeł bidziilígíí bikʼehgo.

7 Alma díí saad yee haadzíiʼgo, Zeezrom tʼáá íiyisíí bitah ahodiʼniitłid, Diyin God bibee adziilii hózhǫ́ dóó hózhǫ́ yaa ákoniizį́ʼígíí biniinaa; dóó Alma dóó Amulek shíniʼ bił bééhózin nízingo ałdóʼ yaa ákoniizį́į́ʼ, áko bintsékees dóó bijéí yinízinígíí bił bééhózin nízingo yaa ákoniizį́į́ʼ; háálá adziilii tʼáá áłah beiyílyá áko diyingo áhodooníłígíí yee bił béédahózin doo.

8 Áádóó Zeezrom tʼáá íiyisíí naʼídííníłkid, áko Diyin God bił hazʼą́ądi hózhǫ́ baa ákodínéesįįł ádahodooníiłiijí adziilii binahjįʼ díí bił bééhodoozįįł biniyé nízingo. Dóó Alma iiłní: Díí daneeznánígíí náádahiidooʼnaał Amulek yaa haadzíʼígíí haʼátʼíísh ááh yiłní, éí tʼáá ałtso daneeznáádę́ę́ʼ náádahiidooʼnaał, tʼáá ákogi dóó doo tʼáá ákogi ádaatʼéii tʼáá áła, dóó Diyin God bidááhdóó nihidookahgo naanish ádayiilaayę́ę bikʼehgo bá ndahodootʼááł?

9 Áádóó áko Alma díí yee hózhǫ́ yił ahoʼniilneʼ, kóníigo: Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii ląʼída bił béédahodoozįįłígíí hólǫ́; ákó tʼáá íiyisíí bizaad bił dahóóneʼ ndi bizaad nihokááʼ dineʼé baʼáłchíní kʼad bá dooleełígíí tʼéiyá bił ííshją́ą́ ádoolnííł, tʼáá íiyisíí dabíistsʼą́ʼígíí bikʼehgo.

10 Áádóó éí bąą, bijéí yistłʼisígíí, saad áłtsʼíísígo baa doolyééł; dóó doo bijéí yistłʼisígíí, saad ląʼígo baa doolyééł, wónáásdóó tʼáá ałtso Diyin God bitsʼą́ą́dóó tʼáá aaníinii tʼahdoo ííshją́ą́ ádaalnéehii baa doolyééł.

11 Áádóó bijéí deiłtłʼisígíí, Diyin God bizaad tʼáá achʼįʼgo baa doolyééł wónáásdóó Diyin God binaʼnitin tʼahdoo ííshją́ą́ álnéehii doo bił béédahózin da dooleeł; dóó biʼiiníziinii dabidoosił, dóó yikééʼ deíkáahgo dadínóonééł. Áko díí óolyé chʼį́įdiitah bibéésh daʼahólzhaʼii.

12 Áádóó Amulek anoonééł doo nanitłʼahgóó yaa hoolneʼ, dóó díí nahasdzáán bikááʼ iiná anoonééł bidééłníinii atsʼíís doo anoonééł bidééłniidjįʼ haadaałté ńdadoodleeł, dóó Diyin God dah sidáajįʼ ndahidoodlóós, dóó Diyin yikʼehgo ndaashnishę́ę bee bá ndahidiyootʼááł.

13 Índa nihijéí dáátłʼisgo, aooʼ, saad bikʼijįʼ nihijéí dáátłʼisgo, nihiyiʼdóó siláago hádeilʼį́įʼgo, índa éí tʼóó baaʼihgo nihił hazʼą́ą doo, háálá índa nihá nihodootʼááł.

14 Háálá nihizaad nihá nihodooʼááł, aooʼ, nihinaanish tʼáá ałtso nihá nihodooʼááł; doo chin nihąąh ádin da dooleeł; dóó nihintsékees ałdóʼ nihá nihodooʼááł; dóó kóniitʼéego Diyin God bichʼįʼ dídíitʼįįłgo doo bííníigah da dooleeł; dóó nihił hózhǫ́ǫ dooleeł dził dóó tsé nihikʼiiłdáás bidiiʼníigo nanihiniłʼin dooleeł.

15 Ákondi díí éí dooda; beʼayóó átʼéii, dóó beʼadziilii, dóó beʼatsxeʼii, dóó beʼaláahdi átʼéii, dóó bibee bíhólníihii, bee bidááhdóó deidiidzįįł, dóó hoolʼáágóó baa yá niidzin dooleeł tʼáá ałtso yee nahwiiʼaahii tʼáá ákogi ádaatʼéego; dóó tʼáá ałtso binaanish tʼáá ákogi átʼáo ííłʼį́, dóó nihokááʼ dineʼé baʼáłchíní yaa joobaʼ, dóó diné tʼáá ałtso bízhiʼ dayoodlánígíí dóó beʼiinaʼ yaa ádaańdaʼooskango bináłtʼéhígíí yisdéidooniłgo bidziil.

16 Áádóó áko shooh, índa anoonééł bá hooʼaʼ nihidishní, éí naakigo anoonééł wolyé, éí iiʼ siziíniikʼeh anoonééł; ákohgo háiida tʼáá doo ádaanáʼooskangóó ádin dooleeł, atsʼíískʼeh anoonééłjígo, éí ałdóʼ iiʼsizį́kʼehgo ádin dooleeł; aooʼ, tʼáá ákogo éʼélʼíinii bikʼehgo ádin dooleeł.

17 Índa ahodoolzhish bichʼįʼ nahwiiʼnánígíí łeetsoii dookʼą́ą́ł bił beʼekʼid nahalin dooleeł, éí kǫʼ ahoolʼá dóó hoolʼáágóó dego dookʼą́ą́ł; dóó índa dah dabiʼdiistłʼǫ́ǫgo hoolʼáágóó ádaadin dooleeł, Chʼį́įdii biʼiiníziinii bibee adziilii dóó beʼasnááh bikʼehgo, háálá íinízinígíí bikʼehgo ndabididloʼgo áyiilaa.

18 Índa, ándishní, tʼáadoo nináʼílyáa da nahalin dooleeł; háála éí Diyin God yee átʼéii doo bee bá nináʼdooyéeł da; dóó doo dínóonéeł da, háálá ádoochxʼǫǫł adin doo.

19 Áko baa hoolzhiizh éí Alma ałtso saad yee haadzíiʼgo, diné tʼáá íiyisíí biyaa dahodeesyiz;

20 Ákondi ła Antionah, aláahgo naatʼáanii nilį́įgo, haa níyá dóó áháłní: Díí haʼátʼíísh ááłdiní, diné anoonéełdę́ę́ʼ náádidoodááł dóó bitsʼíís naadidoolyééł dóó doo baanáádidoolyééł da, áko iiʼ sizíinii tsʼídá doo náádidoolyééł da?

21 Diyin bizaad bee akʼedaʼashchínígíí haʼátʼíísh ááh yiłní, éí Diyin God bá ndaalʼaʼí dóó béésh hał dookʼą́ąłgo dáʼákʼeh Edendi haʼaʼaahjígo niinílá, tsʼídá áłtsé nihimá dóó nihizhéʼé dáʼákʼehgi dooʼash tsin bee iináanii bineestʼąʼ yidooyį́į́łgóó, dóó hoolʼáágóó hináa dooleeł? Dóó ákótʼáo deiiltsą́ hoolʼáágóó hináa dooleełígíí tsʼídá doo bá bihónéedzą́ą da silį́į́ʼ.

22 Áko Alma áháłní: Díí kʼad baa ahoʼniishneʼ ńtʼę́ę́ʼ. Kʼad Adam tsin bineestʼąʼ doo dííyį́įł da biʼdooʼniid yę́ę yiyííyą́ąʼgo asih, Diyin God bizaad bikʼehgo; dóó ákótʼáo deiiltsą́, díí asiihgo biniinaa, diné tʼáá ałtso yóó eekai dóó niʼdahiisíih daazlį́įʼ.

23 Áádóó áko shooh, nił hashneʼ Adam áadi hoolzhishgo tsin bee iináanii bineestʼąʼ yidooyį́łígíí bee bá hazʼą́ągo, anoonééł ádin doo ńtʼééʼ, dóó Diyin God bizaad éí doo ílį́į da doo ńtʼééʼ, Diyin God biyoochʼííd ńtʼę́ę́ʼ, háálá ádííniid: Yinííyą́ągo tʼáá aaníí dadíítsxaał.

24 Áádóó yiitʼį́ nihokááʼ dineʼé anoonééł yaa hidookah, aooʼ, anoonééł Amulek yee haadzííʼ, eii éí atsʼíískʼehgo ánoonééł átʼé; ákótʼée ndi nihokááʼ dineʼé ádaańdaʼdookąąłgo da bá hooʼaʼgo ályaa; éí bąą díí iiná bee ndahwíínitʼaahgo bił hazʼą́ silį́į́ʼ; Diyin God baaʼ doodáałgo hashtʼeʼádílnééh bee hazʼą́ hazlį́į́ʼ; hoolʼáágóó iiná bichʼįʼ hashtʼeʼádílnéehgo bee hooʼaʼ éí nihí bee haiidzííʼyę́ę, eii éí daneeznáanée náádahiidooʼnaał bikééʼdę́ę́ʼ bá hwiidooʼaał.

25 Áko, nináʼílyáago hootʼááł, éí nahasdzáán álnéhę́ędą́ą́ʼ niilyáhígíí ádingo, daneeznánée náádahiidooʼnaałígíí ádin dooleeł ńtʼééʼ; ndi nináʼílyáago hootʼááł niilyá, éí daneeznánée yinahjįʼ náádahiidooʼnaał, éí bee haʼoodzííʼę́ę átʼé.

26 Áádóó áko shooh, tsʼídá áłtsé nihimá dóó nihizhéʼé tsin bee iináanii bineestʼąʼ yidooyį́łígíí bee bá hazʼą́ągo éí hoolʼáágóó yínííł nilį́į́ ńtʼééʼ, hashtʼeʼádílnéehgo bee hazʼánígíí ádin ńtʼééʼ; dóó áko nináʼílyáago hootʼááł bikʼehdeesdlį́į́ʼ doo ńtʼééʼ, dóó Diyin God bizaad éí doo ílį́į da ńtʼééʼ, dóó doo iʼiilaaʼí da ńtʼééʼ.

27 Ákondi shooh, díí doo ákótʼée da, ndi nihokááʼ dineʼé dínóonéełgo bee nihootʼą́; dóó anoonééł bikééʼdę́ę́ʼ, bá ndahodootʼáałjįʼ nihidookah, éí nihootʼaah bee haidzíʼę́ę átʼé, éí bee nahoníyáa dooleeł.

28 Áádóó Diyin God díí diné baa doolyééł dííniidgo, áko shooh, índa díí diné ádeidoolííł dííniidgo diné bił bééhózin dooleełgo yiyiiłtsą́.

29 Éí bąą Diyin yá ndaalʼaʼí yichʼįʼ yádadoołtihgo ayiisʼaʼ, áko diné beʼayóó átʼéii łaʼ yaa ákodanízingo áyiilaa.

30 Áádóó bízhiʼ yee yichʼįʼ sodadilzingo bee hahoolzhiizh; éí bąą Diyin God diné yił halneʼ silį́į́ʼ, dóó nináʼílyáago hootʼááł yił ííshją́ą́ áyiilaa, éí nahasdzáán álnééhę́ędą́ą́ʼ hashtʼeelyaa; dóó díí éí bedaʼoodląʼ dóó ádaańdaʼookąąhgo dóó binaanish diyingo yindaashnishígíí bikʼehgo yił ííshją́ą́ áyiilaa.

31 Ákohgo, bee hazʼáanii diné yaayiizlá, éí áłtsé bee hazʼáanii atsʼíískʼehjí bídéétʼiʼígíí kʼídayiiztiʼ, dóó Diyin God nahalin daazlį́į́ʼ, yáʼátʼéehii dóó doo yáʼáshóonii bił béédahózingo, háajigo dahadiʼdoodááłgo bił hazʼą́ hazlį́į́ʼ, éí doodago háajigo dahadiʼdoodááłgo bá hazʼą́ągo bá ályaa bił danilínígíí dóó deinízinígíí bikʼehgo, éí yáʼátʼéehii doodago doo yáʼáshóonii ádaʼałʼį́įgo—

32 Éí bąą Diyin God bee hazʼáanii baa yizlá, nináʼílyáago hootʼááł yił ííshją́ą́ áyiilaago índa, áko doo yáʼáshóonii doo ádeidoolíił da, naaki góneʼ anoonééł bą́ą́h ílínígíí biniinaa, éí éí hoolʼáágóó anoonééł átʼé tʼáá ákogo átʼéii bídéétʼiʼígíí biniinaa; háálá éí diné éí nináʼílyáago hootʼááł adziilii bá ádin, háálá tʼáá ákogi átʼáo naʼanishii éí doo doolchxǫǫł da, Diyin God tsʼídá aláahdi biyáʼátʼéehii bikʼehgo.

33 Ákondi Diyin God diné yichʼįʼ haadzííʼ, biYeʼ bízhiʼ bee, (díí éí nináʼílyáago hootʼááł áyiilaayę́ę átʼé) kóníigo: Ádaańdaʼsookango dóó tʼáadoo nihijéí daołtłʼisí, áko índa nihaa jiinishbaʼ dooleeł, shiYeʼ Tʼáá Éí Tʼéiyá Shá Yizhchíinii binahjįʼ;

34 Éí bąą, tʼáá háíshį́į́ ádaanáʼooskango, dóó doo bijéí yistłʼisígíí, éí ajoobaʼ baa doolyééł shiYeʼ Tʼáá Éí Tʼéiyá Shá Yizhchíinii binahjįʼ, éí éí bibąąhági ádaatʼéii bee baa ńdidootʼááł; dóó díí éí yáʼąąsh góneʼ yah adoogáał.

35 Áádóó tʼáá háíshį́į́h bijéí yistłʼisígíí dóó bąąhági átʼéii yaa naagháago, áko shooh, tʼáá aaníí ádíshníigo shá háchįʼgo doo yáʼąąsh góneʼ yah adoogáał da.

36 Áádóó áko, shikʼéí, jó ánihidishní, nihijéí dasoołtłʼisgo doo Diyin Bóhólníihii bił hazʼą́ góneʼ yah adookah da; áko nihibąąhági ádaatʼéii biniinaa bá háchįʼ nihichʼįʼ kóyiilaa áłtsé ályaahą́ągi átʼáo, aooʼ, bizaad akéeʼdi dóó alą́ąjįʼ yee nihoníʼánée bikʼehgo, éí nihiiʼ naazíinii hoolʼáágóó ádin dooleeł; éí bąą, akéeʼdi anoonééł nínée áhodoonííł ní, dóó áłtsé anoonééł nínée ałdóʼ áhodoonííł ní.

37 Áádóó áko, shikʼéí, háálá díí nihił béédahózingo biniinaa, dóó tʼáá aaníí ádaatʼéego, ádaańdaʼiikąąhgo, dóó tʼáadoo nihijéí daołtłʼizí, áko Bóhólníihii nihiDiyin God bá háchįʼ doo nihikʼijįʼ kwíidoolííł da naaki góneʼ bibee hazʼáanii nihainíláhígíí doo bikʼeh honiilʼį́į́góó biniinaa; ndi yáʼąąsh góneʼ yah adiikah, éí éí hashtʼehoolyaago yee nihoníʼánígíí bikʼehgo.