1 Áko éí Mosiah bibee hazʼáanii biyiʼ yisdzoh diné tʼáá ałtso bee hazʼáanii bee ánihwiiʼaah danilínígíí, éí doodago ándahwiiʼaahgo bikʼidahodiiniiʼígíí, baa dahwiinítʼínígíí haa nízahjįʼ baa dahwiinístʼįįdígíí bikʼehgo bichʼįʼ ndaʼiilyé.

2 Áko índa diné nááná łaʼ yąąh haʼííłʼáago, dóó doo naʼílééhgóó, ánihwiiʼaahii bee bił hóóneʼ; dóó ánihwiiʼaahii bibee óhólníihii choyoosʼįįdgo, dóó siláo yichʼįʼ ayííłʼaad bidááhdóó niidlóozgo; dóó bikʼijįʼ yisdzohígíí dóó bee hazʼáanii bikʼehgo yá nináháʼááh, áko diné bąąh hááʼáhígíí yikʼé náʼálééh, éí doodago éí tʼáá ałtso bee hólóonii bighaaʼnił, éí doodago éí aniʼįįhii dóó diné yighayiníiłii nilį́įgo diné bitahdóó chʼíbidiʼyoolghą́ą́ł.

3 Áádóó ánihwiiʼaahii ndaalnishígíí bíighahgo bichʼįʼ naʼalyééh—łaʼajį́ naashnishgo béésh óola senine wolyéhígíí bíighahgo bichʼįʼ niilyééh, éí doodago béésh łigaii senum wolyéhígíí bíighahgo, éí béésh óola senine bił aheełtʼé; dóó díí éí bee hazʼáanii bikʼehgo ályaa.

4 Áko díí éí bibéésh óola, dóó bibéésh łigaii ałʼąą ádaatʼéhígíí, dóó bą́ą́h daʼílínígíí bikʼehgo dabízhiʼ. Dóó Nephi dineʼé éí bízhiʼ ádayiilaa, háálá doo éí Jew dineʼé Jerusalemdi kééhatʼínígíí bikʼehgo béeso dayółtaʼ da; dóó ałdóʼ doo éí Jew dineʼé bikʼehgo ídaʼneełʼąąh da; ndi bibéeso wóltaʼ dóó beʼídaʼneelʼąąh éí łahgo ádayiilaa, diné bintsékees dóó bił ádahootʼéhígíí bikʼehgo, tʼáá ałtso daʼíchíídę́ę́ʼ, ándahwiiʼaahii á naazį́ silį́įʼjįʼ, éí aláahdi naatʼáanii Mosiah haidiilaa.

5 Áko ákótʼáo bibéeso ałʼąą bą́ą́h daʼílį́—béésh óola senine, béésh óola seon, béésh óola shum, dóó béésh óola limnah daolyé.

6 Béésh łigaii senum, béésh łigaii amnor, béésh łigaii ezrom, dóó béésh łigaii onti.

7 Béésh łigaii senum éí béésh óola senine yił aheełtʼéego bą́ą́h ílį́, dóó tʼáá ałchʼishjí éí tłʼoh naadą́ą́ʼ adeeʼé bee bíʼneelʼąądgo bą́ą́h ílį́, dóó tʼáá ałtso tłʼoh naadą́ą́ʼ átʼéii ałʼąą bíʼneelʼąądgo.

8 Áko béésh óola seon éí senine ałhą́ą́h nániilyáago bą́ą́h ílį́.

9 Áádóó béésh óola shum éí seon ałhą́ą́h nániilyáago bą́ą́h ílį́.

10 Áádóó béésh óola limnah éí tʼáá ałtso ahidiiʼnilgo bą́ą́h ílį́.

11 Áádóó béésh łigaii amnor éí senum naakigo bą́ą́h ílį́.

12 Áádóó béésh łigaii ezrom éí senum dį́įʼgo bą́ą́h ílį́.

13 Áádóó béeso onti éí tʼáá ałtso biláahgo bą́ą́h ílį́.

14 Áko díí éí hóyahgo bibéeso ndaachʼidígíí átʼé—

15 Shiblon éí senum ałnííʼdóó átʼé; éí bąą, shiblon éí tłʼoh naadą́ą́ʼ adeeʼé ałníʼnéélʼąądgo bą́ą́h ílį́.

16 Áádóó shiblum éí shiblon ałnííʼdóó átʼé.

17 Áádóó leah éí shiblum ałnííʼdóó átʼé.

18 Áko díí éí kótʼáo, bibéeso tʼáá ałtso dayółtaʼ ńtʼééʼ.

19 Áko béésh óola antion éí shiblon táaʼgo bił aheenéeltʼeʼ.

20 Áko, yee daʼatʼį́į dooleeł biniyé lá, háálá ndaalnishígíí bikʼehgo bichʼįʼ ndaʼiilyé, éí bąą, dahojíłchįʼ dóó ląʼída ałʼąą átʼéego aa náhátʼį́, dóó bąąhági ádaatʼéii hazlį́į́ʼ, áko hózhǫ́ binaanish dahólǫ́ǫ dooleeł biniyé, áko aadahwiinítʼį́ bidááhdóó nahatʼéhígíí binahjįʼ béeso ádeidoolííł; éí bąą kótʼáo diné Alma dóó Amulek yikʼijįʼ dahóółchįįd.

21 Áádóó díí Zeezrom Amulek neídíłkid, kóníigo: Díí áłtsʼíísígo nanídíshkid nátʼą́ą́ʼ shił náhólneʼgóósh tʼáá áko? Kʼad Zeezrom éí diné biʼiiníziinii bikʼehgo saad náhooʼniłígíí tʼáá íiyisíí bił bééhózin, áko yáʼátʼéehii yidoołchxǫǫłígíí éí yíighah, éí bąą, Amulek kóyidííniid: Nanídíshkidígíísh nátʼą́ą́ʼ shił náhodíílnih?

22 Áádóó Amulek áhodííniid: Aooʼ, Diyin Bóhólníihii biʼIiʼ Sizį́ Diyinii áshiłníigo, éí shiiʼ hólǫ́; háálá Diyin Bóhólníihii biʼIiʼ Sizį́ Diyinii tsʼídá doo bitsʼą́ą́jí hadeesdzih da. Dóó Zeezrom áhodííniid: Áko shooh, kǫ́ǫ́ béésh łigaii onti hastą́ą́, dóó díí tʼáá átʼé naa deeshnił Diyin God doo hólǫ́ǫ da dííníniidgo.

23 Áko Amulek ání: O chʼį́įdiitah beʼawééʼ, haʼátʼíísh biniyé shííníʼááh? Doo hanii nił bééhózin da diné diyin yikééʼ yigáałii éí díí doo yinízin da?

24 Diyin God doo hólǫ́ǫ́góósh yínídlą́? Ándishníigo, Ndagaʼ, Diyin God hólǫ́ǫgo nił bééhózin, ndi naadeełii Diyin God biláahgo ayóí ííníʼní.

25 Ákohgo Diyin God bidááhdóó shichʼįʼ niyoochʼííd. Áshidíní—díí onties hastą́ągo níníłʼį́, tʼáá íiyisíí daʼílį́, naadeeshnił—ákondi nijéí biyiʼdóó tʼáá ní nanijaah dóó doo shaa dííniłgo íʼdiinilyaa; dóó Diyin God tʼáá aaníinii dóó hinánígíí doo hólǫ́ǫ da dideeshniiłgo shá nínízin ńtʼééʼ, áko biniyé shidiyííłhééł ninizį́į́ʼ. Áádóó áko shooh, díí doo yáʼáshóonii biniinaa bikʼehgo naʼdoolyééł.

26 Áádóó Zeezrom ábiłní: Daʼ Diyin God tʼáá aaníí hólǫ́ dóó hiiná diní?

27 Áádóó Amulek ání: Aooʼ, Diyin God tʼáá aaníí hólǫ́ dóó hiiná.

28 Áko Zeezrom ání: Daʼ Diyin Godísh tʼóó ahayóí dahólǫ́?

29 Áádóó ání, Ndagaʼ.

30 Áko Zeezrom ánáábiłní: Haash yitʼáo díí nił bééhózin?

31 Áádóó ání: Diyin yá naalʼaʼí shił ííshją́ą́ áyiilaa.

32 Áádóó Zeezrom ánáádíʼní: Háísh éí doogááł? Daʼ Diyin God biYeʼísh?

33 Áádóó áyidííniid, Aooʼ.

34 Áádóó Zeezrom ánáádíʼní: Daʼ bidineʼéish bąąhági ádaatʼį́įgo yisdéidoonił? Dóó Amulek yił chʼiiníʼą́ dóó iiłní: Bee nił hashneʼ doo ádooníił da, háálá bizaad yikʼijįʼ dooleełgo doo bá bíighah da.

35 Áko Zeezrom diné iiłní: Díí tʼáadoo leʼé béédaohłniih; háálá Diyin God éí tʼááłáʼí ní; ákondi Diyin God biYeʼ éí doogááł ní, ndi bidineʼé éí doo yisdáyidoonił da—Diyin God neiłʼaʼ bee bíhólnííh nahalingo.

36 Áko Amulek ánáánéíłʼní: Jó niyoochʼííd, áko Diyin God naashʼaʼgo bee shíhólnííh shidííníniidígíí háálá bidineʼé doo beʼiinaʼ łahgo áńdeidlééhgóó éí doo yisdáyidoonił da.

37 Áádóó ánáándishní bąąhági ádaatʼį́įgo éí doo yisdéidoonił da; háálá bizaad łahgo ádeeshłíiłgo doo bííníshghah da, dóó tʼáá bí ání yáʼąąsh bił hazʼą́ądi doo łaʼ chin bąąhgo bá hwiidooʼáał da; éí bąą, haash yitʼáo éí yisdádíínááł, tʼáá hazhóʼó yáʼąąsh bił hazʼą́ądi náhooʼaʼgo tʼéiyá? Éí bąą, bąąhági ánítʼį́įgo éí doo yisdádíínáał da.

38 Áko Zeezrom ánáábiłní: Daʼ Diyin God biYeʼísh éí tʼáá aaníí Hoolʼáágóó nihiTaaʼ nilíinii átʼį́?

39 Áádóó Amulek ábiłní: Aooʼ, tsʼídá nahasdzáán dóó yáʼąąsh, dóó tʼáá ałtso biiʼ hólóonii Hoolʼáágóó yiTaaʼ nilíinii átʼį́; éí éí bee hahóóyá dóó bee nahoníyá, tsʼídá áłtséii dóó tsʼídá akéeʼdii nilíinii átʼį́;

40 Áádóó nihokááʼ doogááł bidineʼé yá nináʼdoodlééł biniyé; bízhiʼ dayoodláanii bee hazʼáanii kʼídayiiztiʼígíí ákʼiididootʼááł; dóó díí éí hoolʼáágóó iiná bee dahólǫ́ǫ dooleeł, dóó doo éí nááná łaʼ díí yisdáʼiildééh baa doolyéeł da.

41 Éí bąą diné doo yáʼádaatʼéehii éí doo bá ninaʼílyá nahalingo bił hazʼą́ą da doo, tʼáá hazhóʼó ánoonééł bitłʼóól náostʼahgo tʼéiyá; háálá áko shooh, tʼáá ałtso daneeznánée náádahiidoonaałjįʼ yoołkááł dóó Diyin God yidááhdóó deidoozįįł, dóó naanish ádayiilaayę́ę bikʼehgo bá ndahodootʼááł.

42 Áko, łaʼ anoonééł atsʼíískʼeh anoonééł wolyé; dóó Christ náádiilyáhígíí atsʼíískʼeh anoonééł beʼástłʼó náostʼahgo áyiilaa, tʼáá ałtso díí atsʼíískʼeh anoonééł yitsʼą́ą́dóó náádahiidooʼnaał.

43 Atsʼíís dóó iiʼ sizíinii tsʼídá hadaałtʼéego tʼááłáʼí ńdoodleeł; atsʼádaazʼáí dóó dah daditʼaanii ahidadiiʼáhę́ęgi átʼáo ádadoolnííł, tsʼídá kʼad ániitʼéhígi átʼáo; dóó Diyin God bidááhdóó nanihidiʼdoodlóós, kʼad tʼáá ałtso nihił bééhózinígíí baa ákoniidzin, dóó daʼsiilzihę́ę tʼáá ałtso doo nanitłʼahgóó bénéilniih dooleeł.

44 Áko, díí nááʼdaʼiidoonaałígíí tʼáá ałtso yaa hidookah, ániid ndaakai dóó hadaastihii tʼáá áłah, hastóí dóó sáanii tʼáá áłah, doo yáʼádaatʼéehii dóó tʼáá ákogi ádaatʼéii tʼáá áłah; dóó tsʼídá bitsiiʼ tʼááłáʼí ndi doo łaʼ yóó adoodił da; ndi tʼáá ałtso hadaałtʼé ńdadoodleeł, kʼad átʼéhígi átʼáo, éí doodago atsʼíseekʼehgo, Christ aYeʼ nilíinii, dóó Diyin God nihiTaaʼ nilíinii, dóó Iiʼ Sizį́ Diyiinii éí Hoolʼáágóó tʼááłáʼí Diyin God danilį́, dah naháaztą́ą́dóó tʼáá ałtso diné ndahidoodlóós dóó ádá hadahidoodzih, naanish ádayiilaayę́ę bikʼehgo bá ndahodiyootʼááł, yáʼádaatʼéehgo éí doodago doo yáʼádaatʼééhgóó.

45 Áko, shooh, atsʼíís náádiilyé bee nichʼįʼ haasdzííʼ, dóó atsʼíís náádahiidooʼnaałígíí ałdóʼ. Ánidishní díí atsʼíís anoonééł bidééłníinii doo anoonééł bidééłníiniigóó náádidoodááł, anoonééł yitsʼą́ą́dóó náádidoodááł, tsʼídá áłtsé anoonééł bitsʼą́ą́dóó dóó iináajįʼ, áko tsʼídá doo náádadootsxaał da; biiʼ naazíinii bitsʼíís yił tʼááłáʼí ńdadoodleeł, tsʼídá doo ałtsʼánahidookah da; ákótʼáo atsʼíís iiʼ sizíinii diyin dóó anoonééł doo bidééłníinii nilį́į dooleeł; áko bąąhági ádaatʼéii tsʼídá doo yiiʼ nínáádookah da.

46 Áko, Amulek ałtso haadzíiʼgo diné bił dahóóyééʼ, dóó Zeezrom ałdóʼ bitah ahodiʼniitłid. Dóó kótʼáo Amulek saad yee haadzííʼ, éí doodago tʼáá kóníłtsoígo niʼsézoh.