1 Hom ntsie, O hom a hom yɛ m’asɔrmba, hom a wɔdze ahenman no ama; hom ntsie, na hom nyɛ aso mma nyia ɔtoow asaase ne fapem no, nyia ɔbɔɔ sor nye dɔmtutuw a wɔwɔ mu nyinara no, nyia wɔnam no do yɛɛ ndzɛmba nyinara a wɔtse ase na wɔkekã hɔn ho, na wɔwɔ hɔ.

2 Na bio, mese, hom ntsie me ndze, amma owu aammfa hom; wɔ dɔn a hom nnsusu mu dɛ ɔhyewber botwa mu, na twaber aba ewiei, na hom akra nnyaa nkwa.

3 Hom ntsie nyia ɔyɛ dzimafo no wɔ Egya n’enyim, nyia ɔserɛ hom asɛm ma hom wɔ n’enyim no—

4 Se dɛ: Egya, hwɛ nyia ɔannyɛ bɔn no n’amandzehu na no wu, ɔno a ɔsɔ w’enyi no; hwɛ wo Ba no bɔgyaa a okyii no, nyia iyii no mae ama woeekyi no bɔgyaa aahyɛ wo enyimnyam;

5 Dɛm ntsi, Egya, gye mo nuanom yinom a wɔgye me dzin dzi no, ama wɔaaba mo hɔ na woeenya daapem nkwa.

6 Hom ntsie, O, mo nkorɔfo a hom yɛ m’asɔrmba, na hom elderfo, hom mbɔ mu ntsie, na hom ntsie me ndze wɔ ber a hom kã dɛ ndɛ yi, na mma hom mmpirim hom akoma;

7 Na nokwar, mese hom dɛ, emi nye Alpha na Omega, ahyɛse nye ewiei no, wiadze kan nye nkwa no—kan a ɔhyerɛn wɔ sum mu na sum no annkyer no.

8 Mebaa mankasa medze hɔ, na mankasa medze anngye me; na mbom dodowara a wɔgyee me no, memaa hɔn tum dɛ wɔmfa nyɛ etumdze pii, na wɔmbɛyɛ Nyame ne mba; na hɔn a wɔgyee me dzin dzii no so mpo memaa hɔn tum ma wɔdze eenya onnyiewiei nkwa.

9 Na masoma m’ahyɛmudzi a ɔwɔ hɔ daapem no so mpo wɔ wiadze dɛ ɔmbɛyɛ kan mfa mma wiadze, na ɔnyɛ esusudze mfa mma mo nkorɔfo, na Amanamamfo mper nhwehwɛ no, na ɔnyɛ ɔsomafo ndzi m’enyim nkesiesie kwan a ɔda m’enyim no.

10 Dɛm ntsi, hom mbra ne nkyɛn, na nyia ɔba no, menye no beyi atsɛn dɛ mbrɛ menye tsetseberdomba no yii atsɛn no, na mebɛma hom ehu mbrɛ me nyansaa mu dɔ.

11 Dɛm ntsi, hom mbɔ mu ntsie na hom mma menkyerɛ hom me nyansaa—nyia hom kã dɛ ɔyɛ Enoch na no nuanom hɔn Nyame ne nyansaa no,

12 Hɔn a wɔpaa hɔn fii asaase do, na megyee hɔn dze maa moho—kuropɔn a wɔdze esie kesi dɛ tseneneeyɛ da no bɛba—da a nyimpa ahotsewfo nyina peree hwehwɛe, na osian emumuyɛ nye ndzeyɛbɔn ntsi woennhu no;

13 Na wɔpaa mu dɛ wɔyɛ anana na akwantufo wɔ asaase do;

14 Mbom wɔbɔɔ hɔn anohoba dɛ wɔnhwehwɛ na wonhu wɔ honam mu.

15 Dɛm ntsi, hom ntsie na menye hom beyi atsɛn, na mebɛkasa akyerɛ hom na mahyɛ nkɔm, dɛ mbrɛ medze yɛɛ tsetseberdomba no.

16 Na medze bɛkyerɛ hom pefee dɛ mbrɛ medze kyerɛɛ m’esuafo no ber a migyinaa hɔn enyim wɔ honam mu, na mekasaa kyerɛɛ hɔn se dɛ: Dɛ mbrɛ hom ebisa me wɔ nsɛnkyerɛdze a ɔfa me mbae ho no, wɔ da a mebɛba wɔ m’enyimnyam mu wɔ sor mununkum mu no, dɛ merebɛhyɛ anohoba a medze bɔɔ hom egyanom mã no.

17 Na dɛ mbrɛ hom ahwɛ mber tsentsen a hom esunsum fii hom nyimpadua mu no dɛ ɔyɛ ndɔmmumfa no, mebɛkyerɛ hom mbrɛ ɔpon da no bɛyɛ bɛba, na ber so a Israelmba a wɔabɔ apetse no hɔn nsanananmu.

18 Na sesei, hom hu temple a ɔwɔ Jerusalem yi, dza hom frɛ no Nyankopɔn ne fie, na hom atamfo so kã dɛ fie yi nnkɔhwe ase da,

19 Na nokwar, mese hom dɛ, dɛm amamfoyɛ yi bɛba ebusuasantsen yi do anafua dɛ owifo, na wɔbɛsɛɛ nkorɔfo yinom na wɔabɔ hɔn apetse aman nyina do.

20 Na temple yi a hom hu no sesei yi wonkegya ɔbo kor mpo a ɔda kor do wɔ hɔ a wonnkodwuruw egu famu.

21 Na ɔbɛba dɛ, Jewfo ebusuasantsen yi runntwa mu nnkɔ gyedɛ amamfoyɛ biara a makã ho asɛm akyerɛ hom no ayɛ hɔ ansaana.

22 Hom kã dɛ, hom nyim dɛ wiadze ewiei reba, na hom kã so dɛ hom nyim dɛ ɔsor nye asaase botwa mu;

23 Na dza hom kã wɔ iyinom ho no yɛ nokwar; osiandɛ, ɔtse dɛmara; na mbom nsɛm a makã akyerɛ hom yinom runntwa mu nnkɔ gyedɛ ne nyina ayɛ hɔ ansaana.

24 Na iyi na makã akyerɛ hom fa Jerusalem ho; na sɛ dɛm da no ba a, wɔbɔbɔ nkaa no apetse aman nyinara mu.

25 Mbom wɔbɔboaboa hɔn ano bio; na mbom wɔbɛtsena hɔara ekesi dɛ Amanamamfo hɔn mber no bɛhyɛ mã.

26 Na dɛm da no mu no wɔbɛtse akõkoekõ nye ɔkõ ho nsɛm, na asaase no do nyina bɛyɛ begyabegya, na nyimpa bɔtɔ akɔtɔmborɔnsa, na wɔbɛkã dɛ Christ ekyinkyim ne mbae ho ekesi asaase n’ewiei.

27 Na nyimpa no dɔ bɛyɛ nwin, na emumuyɛ bɔdɔɔ sõ.

28 Na sɛ Amanamamfo hɔn mber no sõ a, kan bopue wɔ hɔn a wɔtse sum mu no do, na ɔbɛyɛ m’asɛmpa ne mãhyɛ.

29 Na mbom wɔnngye; osiandɛ wonnhu kan no, osian nyimpa nkyerɛkyerɛ ntsi wɔdan hɔn akoma fi me nkyɛn.

30 Na dɛm ebusuasantsen no mu na Amanamamfo hɔn mber no bɛhyɛ mã.

31 Na dɛm ebusuasantsen no mu nyimpa binom bɛtsena hɔ na worunntwamu nnkɔ kesi dɛ wobohu ɔhaw mbordo no; osiandɛ amamfoyɛ yarba bɛkata asaase no do.

32 Na mbom m’esuafo begyina mbea krɔnkrɔn do, na worinnhihim; na mbom emumuyɛfo hɔn mu no, nyimpa bɛma hɔn ndze do na wɔakã ndom etsia Nyame na woewu.

33 Na asaasewosow nye ɔsɛɛ pii besi mbea pii do; naaso nyimpa bepirim hɔn akoma dze etsia me, na wɔbɔtwetwe nkrantsee wɔ hɔnankasa hɔn do, na wobokuku hɔnho nkorkor.

34 Na afei, ber a emi Ewuradze mekãa nsɛm yinom kyerɛɛ m’esuafo no, ɔhaaw hɔn.

35 Na mesee hɔn dɛ: Mma ɔnnhaw hom, osiandɛ sɛ dɛm ndzɛmba yinom si a, hom bohu dɛ anohoba a wɔdze abɔ hom no bɛhyɛ mã.

36 Na sɛ kan no hyɛ ase dɛ orupue a, ɔbɛyɛ hɔn dɛ abɛbusɛm a merekã akyerɛ hom yi—

37 Hom hwɛ ndɔmbadua, na hom dze hom enyiwa hwɛ na hom hu dɛ ɔrefefɛw, na hɔn nhataw da ho yɛ momon a, nna ɔkyerɛ dɛ ɔhyewber abɛn;

38 Dɛmara na sɛ wohu ndzɛmba yinom a, ɔbɛyɛ wɔ dɛm da no mu, na wobohu dɛ dɔn no abɛn.

39 Na ɔbɛba dɛ nyia osuro me no bɔhwɛ Ewuradze ne da kɛse no a ɔbɛba no kwan, wɔbɔhwɛ Nyimpa Ba no ne mbae ho nsɛnkyerɛdze no mpo.

40 Na wobohu nsɛnkyerɛdze nye anwanwadze, osiandɛ wobeyi akyerɛ wɔ sorsor no sor nye asaase n’ase.

41 Na wobohu bɔgya, na ogya, nye wusiw kumbɔɔ.

42 Na ansaana Ewuradze ne da no bɛba no, ewia bɛdan sum, na bosoom adan bɔgya, na nworaba botutu efi sor atotɔ.

43 Na wɔbɔboaboa nkaa no ano wɔ bea yi do.

44 Na wɔbɔhwehwɛ me, na hwɛ, mebɛba; na wobohu me wɔ sor mununkum mu dɛ medze tum na enyimnyam kɛse, nye abɔfo krɔnkrɔn risian; na nyia ɔannhwɛ me kwan no wobotwa no akyen.

45 Na ansaana Ewuradze n’abasa bɛba famu no, ɔbɔfo bɛhɛn no totorobɛnto no, na ahotsewfo a wɔadeda no bɔsoɛr ebehyia me wɔ mununkum no mu.

46 Dɛm ntsi, sɛ hom daa asomdwee mu a nna nhyira akã hom; na afei hom ehu me na hom nyim dɛ Metse ase yi, dɛmara so mpo na hom bɛba mo hɔ na hom akra bɛtsena ase, na hom ɔpon bedzi mu; na ahotseweefo befi asaase ne mfɛndzanan nyinara aba.

47 Na Ewuradze n’abasa bɔtɔ aman no do.

48 Na Ewuradze dze ne nan besi bepɔw yi do, na no mu bɛpaa ebien, na asaase apopo, na oehimahima fi ha akɔ hɔ, na ɔsorsor so bɔwosow.

49 Na Ewuradze dze ne ndze bɛkasa, na asaase n’ano nyina bɛtse; na aman a wɔwɔ asaase do nyina esi nkrum, na hɔn a wɔserewee no bohu hɔn nkwasea a wɔayɛ.

50 Na mbusu bogu ɔtwetwesifo do, na wɔbɛhyew ɔnokumfo; na wobotwa emumuyɛfo akyen na wɔatow hɔn akyen gya mu.

51 Na nkyii Jewfo no bɔhwɛ me na wɔakã dɛ: Ebɛn epirakur na ɔwɔ wo nsamu nye w’anan ho yi?

52 Nkyii na wobohu dɛ emi nye Ewuradze no; osiandɛ mebɛse hɔn dɛ: Epirakur yinom yɛ epirakur a minyae wɔ m’anyɛnkofo fie. Emi nye nyia wɔmaa no do no. Emi nye Jesus a wɔbɔɔ no mbeamudua mu no. Emi nye Nyame ne Ba no.

53 Na nkyii osian hɔn emumuyɛ ntsi, wobosũ, na ɔnam dɛ wɔyɛɛ hɔn hen ayakayakadze ntsi wobotwa kwadwom.

54 Na nkyii wɔbɔpon aman a wɔyɛ abosonsɔrfo no, na hɔn a wonnyim mbra biara benya kyɛfa wɔ owusoɛr a odzi kan no mu; na wobotum egyina ano.

55 Na wɔbɛkyekyer Satan amma oeennya adasamba hɔn akoma mu kwan.

56 Na dɛm da no, sɛ meba wɔ m’enyimnyam mu a, nna abɛbu a mekãe a ɔfa mbaabun du no ho no bɛhyɛ mã.

57 Na hɔn a wɔyɛ enyansafo na wɔgyee nokwar no, na wɔfaa Sunsum Krɔnkrɔn no dze yɛɛ hɔn kwankyerɛfo, na wɔamma wɔaanndaadaa hɔn no—nokwar, mese hom dɛ worunntwa hɔn nnto famu na wɔnntow hɔn nnkyen ogya mu, mbom, wobotum egyina wɔ da no mu.

58 Na wɔdze asaase no bɛma hɔn ma ɔaayɛ hɔn egyapadze; na wɔbɔdɔr na hɔn ho bɛyɛ dzen, na hɔn mba benyin na wɔrennyɛ bɔn dze akɔ nkwagye mu.

59 Na Ewuradze bɛtsena hɔn finimfin, na n’enyimnyam bɛba hɔn do, na ɔbɛyɛ hɔn hen na hɔn mbrahyɛfo.

60 Na afei, hwɛ, mese wo dɛ, wɔmmaa wo ho kwan dɛ ebohu dɛm tsir yi mu akɔ ekyir, kesi dɛ wɔbɛkyerɛ Ahyɛmu Fofor no ase, no mu na wɔbɛda ndzɛmba yinom edzi akyerɛ;

61 Dɛm ntsi, mema wo kwan dɛ afei kyerɛ ase, ama eesiesie woho dze ama ndzɛmba a ɔbɛba no.

62 Na nokwar, mese hom dɛ, ndzɛmba akɛse wɔ hɔ rotweɔn hom;

63 Hom tse akõkoekõ wɔ anana asaase do; na hwɛ, mese hom dɛ, ɔabɛn hom, oedu hom abowano mpo, na ɔrennkyɛr na hom atse akõkoekõ wɔ homankasa hom nsaase do.

64 Dɛm ntsi, emi Ewuradze, makã dɛ hom mma hɔn a wɔwɔ boka nsaase do mboa hom ano mbra, na hom nhyia, hom a hom yɛ m’asɔr mu elderfo nyina; hom nkɔ anee nkurow do nkɛse nkorɔfo a wɔwɔ hɔ no dɛ wonnu hɔnho, na mber dodowara a wobonu hɔnho no, hom nkyekyer asɔr mma me.

65 Na hom mfa akoma kor na adwen kor mboaboa hom sika ano ama hom dze aatɔ egyapadze a wɔbɛkyerɛ hom ekyir yi.

66 Na wɔbɛfrɛ no Jerusalem Fofor no, asomdwee asaase, guandɔbea kurow, Ɔsorsor Nyankopɔn n’ahotseweefo hɔn sumabew;

67 Na Ewuradze n’enyimnyam bɛtsena hɔ, na Ewuradze ho suro bɔwɔ hɔ so, dɛm bɛma emumuyɛfo nnkotum aba hɔ, na wɔbɛfrɛ no Zion.

68 Na ɔbɛba wɔ emumuyɛfo no mu dɛ nyimpa biara a ɔnnkɔtwe ne nkrantsee wɔ ne nyɛnko do no boguan akɔ Zion ekosuma.

69 Na nkorɔfo befi ɔman biara a ɔwɔ asaase do akɔboa hɔn ano wɔ hɔ; na hɔn nko nye nkorɔfo a wɔrennye obiara nnkõ.

70 Na wɔbɛkã wɔ emumuyɛfo mu dɛ: Mma wɔmma yɛnye Zion nnkɔkõ, osiandɛ hɔn a wɔwɔ Zion no ho yɛ hu; dɛm ntsi yerunntum hɔn.

71 Na ɔbɛba dɛ wɔbɔboaboa atseneneefo ano efi aman nyinara mu na wɔaba Zion, na wɔbɔtow daapem enyigye ndwom.

72 Na afei, mese hom dɛ, hom mfa ndzɛmba yinom nsie amma aammpetse wiadze kesi dɛ ɔbɛyɛ me pɛ, ama hom etum edzi dwuma yi wɔ nkorɔfo enyim, nye hom atamfo so enyim, amma woeennhu hom ndwuma kesi dɛ hom bowie dza mahyɛ hom dɛ hom nyɛ no;

73 Ama ber a wobohu no, wɔaadwen ndzɛmba yinom no ho.

74 Na ber a Ewuradze bɛba no, no ho bɛyɛ hɔn hu, na suro bekitsa hɔn, na wobegyina ekyirekyir na hɔn ho apopo.

75 Na osian Ewuradze no ho hu nye no tum ahoɔdzen no ntsi, aman nyina bosuro. Ɔnyɛ hɔ dɛm. Amen.