1 Hom nyɛ aso, O m’asɔr mu mba, Ewuradze hom Nyankopɔn na ɔse, na hom ntsie Ewuradze n’asɛm a ɔfa hom ho—

2 Ewuradze ^arebɛba ne temple mu awerɛfir mu; Ewuradze dze ndom besian aba wiadze ^bebobu atsɛn; nyew, ɔreba aman nyina a hɔn werɛ efir Nyame, nye hɔn a wɔnnyɛ atseneneefo wɔ hom mu nyina do.

3 Na obeyi ^an’abasa krɔnkrɔn no ho akyerɛ aman nyina, na asaase n’ano nyina bohu hɔn Nyankopɔn no ^bnkwagye.

4 Dɛm ntsi, hom nsiesie, hom nsiesie homho, O mo nkorɔfo; hom ntsew homho; O m’asɔr mu mba, hom a mannhyɛ hom dɛ hom ntsimtsim no, hom mboa hom ano na hom nkɔ Zion asaase do.

5 Hom mfi ^aBabylon. Hom ^bntsew homho, hom a hom soso Ewuradze no nkuraba.

6 Hom mfrɛ hom nhyiamu krɔnkrɔn no, na hom ^ankasa nkyerɛ homho nkorkor. Na hom mma obiara mbɔ Ewuradze ne dzin.

7 Nyew, nokwar, mese hom dɛ, mber asõ a Ewuradze ne ndze rese hom dɛ: Hom mfi Babylon; hom ^amboa hom ano mfi aman no mu, hom mfi ^bmframa anan no mu, hom mfi sor n’ano kor nkɔ kor.

8 Hom ^ansoma m’asɔr mu elderfo no ma wɔnkɔ aman a ɔwɔ ekyirekyir no mu; na wɔnkɔ po ^bn’esupruw do; hom nsoma hɔn ma wɔnkɔ anana nsaase do; hom mfrɛ aman nyina, odzi kan, hom mfrɛ ^cAmanamamfo no, nkyii hom mfrɛ ^dJewfo so.

9 Na hwɛ, na hu, dɛm nye hɔn frɛ no, na Ewuradze ne ndze a ɔkɔ nkorɔfo nyina hɔ nye dɛ: Hom nkɔ Zion asaase do, ama mo nkorɔfo hɔn ahe aatserɛw, ama ne ^astake no mu aayɛ dzen, na ama ^bZion aakɔ mbeambea a woetwa ho ehyia no.

10 Nyew, hom mma hom frɛ nkɔ nkorɔfo nyina mu dɛ: Hom nnyan na hom nsoɛr nkehyia Ayeforkun no kwan; hwɛ na hu, ^aAyeforkun no reba; hom mfi nkehyia no kwan. Hom nsiesie homho mma ^bEwuradze ne da kɛse no.

11 Dɛm ntsi, hom ^anweɔn, na hom ^bnnyim da no nye dɔn no.

12 Dɛm ntsi, hom mma hɔn a ^awɔwɔ Amanamamfo mu no nguan nkɔ ^bZion.

13 Na hom mma hɔn a wɔwɔ ^aJudah no nguan nkɔ ^bJerusalem, wɔnkɔ ^cmbepɔw do Ewuradze ne ^dfi no mu.

14 Hom mfi aman mu, hom mfi Babylon mpo, hom mfi emumuyɛ mu, dza ɔyɛ sunsum mu Babylon no.

15 Mbom, nokwar, dɛm na Ewuradze se, mma hom nkɔree no nnyɛ ^antsɛntsɛm, mbom hom mma wonsiesie ndzɛmba nyina wɔ hom enyim; na nyia ɔrokɔ no, mma ^bɔnnhwɛ n’ekyir amma ɔsɛɛ aammba no do awerɛfir mu.

16 Hom nyɛ aso ntsie, O hom asaase do mba. M’asɔr mu elderfo, hom nyina mbɔ mu ^antsie, na hom ntse Ewuradze ne ndze; na ɔfrɛ nyimpa nyina, na ɔhyɛ nyimpa nyina a wɔwɔ beebiara dɛ ^bwonnu hɔnho.

17 Na hwɛ, Ewuradze Nyankopɔn ^aasoma ɔbɔfo a ɔretsẽatsẽa mu wɔ sor dɛ: Hom nsiesie Ewuradze no kwan, na hom mma n’atsempɔn ^bntsentsen, na ne ^cmbae no abɛn—

18 Nkyii ^aEguambaa no begyina ^bBepɔw Zion do, na ^cmpem ɔha eduanan anan no a wɔakyerɛw n’Egya ne dzin wɔ hɔn momapɔw do no bɛkã no ho.

19 Dɛm ntsi, hom nsiesie homho mma ^aAyeforkun ne ^bmbae no; hom mfi, hom mfi nkehyia no kwan.

20 Na hwɛ, ^aobegyina bepɔw Olivet do, wɔ po kɛse no do, bun kɛse no mu mpo, na oegyina po n’esupruw do, nye Zion asaase do.

21 Na ɔdze ne ^andze bɛkasa fi ^bZion, na ɔbɛkasa efi Jerusalem na wɔbɛtse ne ndze wɔ nkorɔfo nyina mu;

22 Na ndze no bɛyɛ dɛ esu pii ^andze, na tse dɛ ^bsenaman kɛse ndze, dza ^cobobubu mbepɔw egu famu, na wonnkohu mbɔnsa koraa.

23 Na ɔbɛhyɛ bun kɛse no, na wobepĩa no akɔ ekyir dze akɔ etsifi aman no mu, na ^aesupruw no bɛyɛ asaase kor;

24 Na ^aJerusalem asaase nye Zion asaase bɛsan hɔn ekyir akɔ hɔnankasa hɔn bea do, na asaase bɛyɛ dɛ mbrɛ ɔtse dada ansaana ^bwɔrekyekyɛ mu no.

25 Na Ewuradze, Agyenkwa no mpo, begyina no nkorɔfo hɔn finimfin, na ^aoedzi hen wɔ honam nyina do.

26 Na hɔn a wɔwɔ ^aetsifi aman do no bɛkaa Ewuradze na wɔaba n’enyim; na hɔn nkɔnhyɛfo bɛtse ne ndze, na wɔnnkɛfa hɔnho esie bio; na wɔbɔbɔ mbotan no, na esukwankyɛba bɛpem esian wɔ hɔn enyim.

27 Na wɔbɔtow ^aatsempɔn wɔ bun kɛse no finimfin.

28 Wɔbɛhyɛ hɔn atamfo do.

29 Na ^asar kɛsɛɛ do na nkwa nsu bɛpem; na asaase a etwee no nnkɛyɛ asaase kwawee bio.

30 Na wɔdze hɔn akoradze mapa no bɛbrɛ mo nkowaa, ^aEphraim ne mba.

31 Na ^aakoko a ɔwɔ hɔ daapem ahe do bɔwosow wɔ hɔn enyim.

32 Na hɔ na wɔbɔhwe ase, na Ewuradze no nkowaa dze hɔn nsa, Ephraim ne mba no mpo, dze enyimnyam ahenkyɛw bɛhyɛ hɔn, wɔ Zion mpo.

33 Na wɔdze daapem enyigye ^aadwontow bɛhyɛ hɔn mã.

34 Hwɛ, iyi nye nhyira a Nyankopɔn a ɔwɔ hɔ daapem dze bogu ^aIsrael ebusuakuw do, na ɔdze nhyira soronko bogu ^bEphraim na ne mfɛfo hɔn tsir do.

35 Na hɔn a wɔyɛ ^aJudah n’ebusua so, hɔn yaw ekyir no wɔdze ^bkrɔnkrɔnyɛ bɛtsew hɔn ho wɔ Ewuradze n’enyim, ma wɔaatsena n’enyim adzekyee na adzesaa, afebɔɔ kesi afebɔɔ.

36 Na afei, nokwar, Ewuradze na ɔse, ama hom eehu dɛm ndzɛmba yinom wɔ hom mu, O hom a wɔtse asaase do, masoma mo ^abɔfoe ma ɔdze ^basɛmpa a ɔwɔ hɔ daapem no rikyin sor, na ɔada noho edzi akyerɛ binom na ɔdze ama adasa, na ɔbɛda noho edzi akyerɛ dodow biara a wɔtse asaase do.

37 Na ^awɔbɛkã ^basɛmpa yi akyerɛ ^cɔman, ebusua, kasa nye nyimpa nyina.

38 Na Nyame no nkowaa bɔkɔ, dze ndze kɛse ase dɛ: Hom nsuro Nyame na hom mfa enyimnyam mma no, osiandɛ n’atsɛmbu ber no aba;

39 Na hom ^ansom nyia ɔyɛɛ sor na asaase, na po, na nsunyiwa no—

40 Hom mbɔ Ewuradze ne dzin adzekyee na adzesaa nse dɛ: O kɛtseankyɛ ^aesunsuan ɔsorsor mu, na nkyɛ esian famu, na ama mbepɔw apem asen wɔ w’enyim.

41 Na wobobua egu hɔn etsifi; na Ewuradze n’enyim hɔ bɛyɛ dɛ ogya a ɔrenan na ɔrehyew, na ɔbɛyɛ dɛ ogya a ɔma esu ^ahur.

42 O Ewuradze, ɔwo ibesian famu na ada wo dzin edzi akyerɛ w’atamfo, na aman nyina ho bɔpopo wɔ w’enyim—

43 Ber a eyɛ ndzɛmba huhuuhu, ndzɛmba a hɔn enyi nnda kwan a;

44 Nyew, sɛ isian famu na mbepɔw pem sen wɔ w’enyim a, ɔwo ^abehyia nyia odzi ehurusi na ɔyɛ ndzeyɛtsenenee, nyia ɔkaa wo wɔ w’akwan mu.

45 Na fi wiadze ahyɛse, nyimpa biara nntsee nna aso biara mmbɔɔ do, eso ɔmmfaa n’enyi nnhun, O Nyankopɔn, kã wo nko, ndzɛmba akɛse a ɔwo ^aesiesie ama nyia ^bɔtweɔn wo.

46 Na wɔbɛse dɛ: ^aWoana nye nyia ofi Nyame ne nkyɛn wɔ sor hyɛ bɔgyaben atar ^bresian ba yi, nyew, ofi mbeambea a wonnyim do a ɔhyɛ n’enyimyam afadze, na orutu kwan wɔ n’ahoɔdzen akɛseyɛ mu yi?

47 Na ɔbɛse dɛ: Emi nye nyia ɔkasaa tsenenee mu, otumfo a ɔgye nkwa no.

48 Na Ewuradze bɛhyɛ afadze ^amemen, na n’atar tse dɛ obi a otsiatsia wenyintwer do ne dze.

49 Na n’enyimnyam bɛyɛ kɛse araa ma ^aewia dze n’enyim esuma wɔ enyimguase mu, na bosoom bɔpow dɛ ɔbɛma ne kan ahyerɛn, na wobohwim nworaba efi hɔn ananmu.

50 Na wɔbɛtse ne ndze dɛ: Mo nko ara na ^ametsiatsia wenyintwer no do, na medze atsɛmbu aba nyimpa nyina do; nna hɔn mu biara nnkã mo ho;

51 Na metsiatsia do wɔ m’ebufuhyew mu, na metsiatsia hɔn do ebufuw mu ara, na misiw hɔn wɔ m’ebufuhyew mu na hɔn bɔgyaa ^aapetse me ntar mu, na ɔakekã m’efuradze nyina mu, osiandɛ ndɛ nye awerdzi da a nna ɔwɔ m’akoma mu no.

52 Na afei, mo nkorɔfo a wɔapon hɔn no hɔn afe asõ; na wɔbɛkã hɔn Ewuradze n’adɔyɛ nye dza ɔdze ama hɔn nyina, dɛ mbrɛ ne papayɛ tse, na n’adɔyɛ tse afebɔɔ kesi afebɔɔ.

53 Hɔn ^aamandzehu nyina mu ohun amandze. Na n’enyim ɔbɔfo no gyee hɔn nkwa, wɔ no ^bdɔ, na ehumbɔbɔr mu, na ^cɔpoon hɔn, na ɔsoaa hɔn, na otuur hɔn wɔ tsetseberdo nda no mu nyina;

54 Nyew, na ^aEnoch so, nye hɔn a wɔnye hɔn wɔ hɔ no; nkɔnhyɛfo a wodzii n’enyim no; na ^bNoah so, nye hɔn a wodzii n’enyim no; na ^cMoses so, nye hɔn a wodzii n’enyim no;

55 Na ofi Moses do kesi Elijah do, na ofi Elijah do kesi John do, nyia nna ɔkã Christ ho wɔ ne ^aowusoɛr mu no, nye asomafo krɔnkrɔn no, nye Abraham, Isaac nye Jacob bɔwɔ Eguambaa no enyim.

56 Na ^aahotseweefo hɔn ^bowumaa do ^cbobuebue na wobefifi mu epue; na wɔbɛba ebegyina ^dEguambaa n’abanyimfa, ber a ɔbɛba ebegyina ^eBepɔw Zion nye kurow krɔnkrɔn no do, ^fJerusalem Fofor no; na wɔbɔtow ^gEguambaa no ^hndwom, adzekyee na adzesaa afebɔɔ kesi afebɔɔ.

57 Na dɛm ntsi, ama nyimpa enya kyɛfa wɔ dɛm ^aenyimnyam a wɔrebɛda no edzi no mu, Ewuradze asoma n’asɛmpa ne ^bmãhyɛ no, n’ahyɛmu a ɔwɔ hɔ daapem no, ɔkyerɛkyerɛ mu mberɛw yɛ mu na pefee mu—

58 Dze esiesie mberɛwyɛfo ama dɛm ndzɛmba no a ɔreba asaase do no, nye Ewuradze no soma no wɔ da a ^amberɛwyɛfo bɛhyɛ enyansafo fɛr no mu, na ^bekumaba no abɛyɛ ɔman a ɔyɛ dzen; na nyimpa ^cbeenu bɛma hɔn ɔpedu eguan.

59 Na Ewuradze nam ndzɛmba a ɔyɛ mberɛw do dze no Sunsum no tum no ^aapose aman.

60 Na dɛm ntsi, na wɔdze dɛm mbrasɛm yi mae; wɔhyɛɛ hɔn wɔ da a wɔdze maa hɔn no mu dɛ wɔmfa nsuma wiadze, mbom afei ɔwɔ dɛ ^aɔkɔ honam ^bnyina hɔ—

61 Na iyi yɛ Ewuradze a odzi hen wɔ honam nyina do no n’adwen na ne pɛ.

62 Na nyia ^aonu noho na ^bɔtsew noho wɔ Ewuradze n’enyim no wɔbɛma no ^cnkwa a onnyiewiei.

63 Na hɔn a ^awonntsie Ewuradze ne ndze no, hɔn na dza nkɔnhyɛnyi Moses kyerɛwee, dɛ ^bwobotwa hɔn akyen efi nyimpa mu no bɛyɛ hɔ wɔ hɔn do.

64 Na dza nkɔnhyɛnyi ^aMalachi so kyerɛwee dɛ: Na hwɛ, ^bda no reba, ^cɔbɛhyew dɛ fononoo, na ahopɔwfo nyina, na hɔn a wɔyɛ emumuyɛ nyina bɛyɛ dɛ mburonan; na da a ɔreba no bɛhyew hɔn, dɔm Ewuradze na ɔse, dɛ orinngya hɔn ndwow anaa abaw.

65 Dɛm ntsi, iyi bɛyɛ mbuae a Ewuradze dze bɛma hɔn:

66 Dɛm da no a mebaa mankasa medze hɔ no, obiara nnyi hom mu a ^aɔgyee me, na wɔpaam hom fii hɔ.

67 Ber a mefrɛɛ bio no, hɔn mu biara nnyi hɔ a ɔgyee do; eso ^am’abasa nnyɛ tsia dɛ onnkotum apon, anaadɛ mo ^btum nnkotum agye nkwa.

68 Hwɛ, me nkaenyim ^awew po. Mema esutsen dan sar; hɔn nam bɔn, na osian nsukɔm ntsi wowu.

69 Medze tuntum fura ɔsorsor, na meyɛ hɔn akataho eyitam.

70 ^aIyi na hom benya efi me nsamu—hom bɛda famu awerɛhow mu.

71 Hwɛ, na hu dɛ, obiara nnyi hɔ a ɔbɛgye hom; osiandɛ hom enntsie me ndze ber a mefrɛɛ hom fii ɔsorsor no, hom anngye mo nkowaa enndzi, na ber a ^awɔsomaa hɔn wɔ hom hɔ no hom anngye hɔn.

72 Dɛm ntsi, ^awɔsɔɔw dasegye no ano na wɔkyekyeer mbra no, na woyii hom maa sum.

73 Iyinom bɔkɔ ekyirekyir sum mu, bea a ^asũ na nkekamu nye asetwɛr wɔ.

74 Hwɛ, Ewuradze hom Nyankopɔn no na ɔakã. Amen.