Ia Mati 1832 sa faaauau ai e Iosefa Samita lana faaliliuga o le Feagaiga Fou. A o suesue le Perofeta i le tusi o Faaaliga, na faaalia e le Alii le uiga o nisi o faailoga ma mea na tutupu lea na faamatalaina e le Aposetolo o Ioane. O lenei faaaliga o loo tusia i le Mataupu Faavae ma Feagaiga 77.
Ia Mati 1, 1832 i le faaaliga lea na faamauina i le Mataupu Faavae ma Feagaiga 78, na taitaia ai e le Alii le perofeta e faatulaga se kamupani (na mulimuli ane faaigoa o le Kamupani Tuufaatasi) e puleaina le faleteuoloa a le Ekalesia ma taumafaiga tau lomitusi. Na faamatala mai foi e le Alii ia faamanuiaga o le a maua e le Au Paia pe afai latou te usiusitai i le poloaiga e faatulaga lenei kamupani. Mulimuli ane ia Mati, na maua ai e le Perofeta ni faaaliga o loo faamauina i le Mataupu Faavae ma Feagaiga 79--80, lea na valaauina ai e le Alii ia Iareto Carter, Setefano Burnett, ma Etena Samita e tala’i atu le talalelei.
Fepuari–Mati, 1832Sa faaauau pea le iloiloga musuia o le Feagaiga Fou e Iosefa Samita ma Sini Rikitone.
Ua faaali mai e le Alii tali i fesili a Iosefa Samita e uiga i le tusi o Faaaliga
A o lei amataina le vasega, tusi le faamatalaga lenei i luga o le laupapa:
E le manaomia e le Atua ona saunoa mai i aso nei, aua ua lava ma totoe Lana upu o loo ia i tatou.
E le mafai ona toe i ai nisi tusitusiga paia faatagaina i tua atu o le Tusi Paia.
A amata le vasega, faamatala atu e i ai nisi o tagata e faia mea nei po o isi faamatalaga talitutusa. Fesili atu i tagata aoga pe faapefea ona latou tali atu i nei faamatalaga.
Valaaulia ni tagata aoga e toalua e auaua’i e faitau leotele mai le palakalafa 1 ma le 3 o le faatomuaga i le Mataupu Faavae ma Feagaiga. Fesili atu i le vasega e mulimuli i le faitauga, ma vaai pe faapefea ona fesoasoani le Mataupu Faavae ma Feagaiga e tali atu i ia faamatalaga.
O a upu po o fasifuaitau na e mauaina o faaali mai ai le sese o faamatalaga i luga le laupapa?
E faatatau i le palakalafa 1 ma le 3, aisea e taua ai mo i tatou ona suesue i faaaliga o aso e gata ai o loo maua i le Mataupu Faavae ma Feagaiga?
Fai atu i se tagata aoga e faitau leotele le fuaiupu muamua o le palakalafa 6 o le faatomuaga o le Mataupu Faavae ma Feagaiga. Fesili atu i le vasega e vaai mo tulaga na masani ona taitai atu ai i faaaliga o loo faamaumauina i le Mataupu Faavae ma Feagaiga.
O le a le mea e masani ona taʻitaʻi atu ai i faaaliga o loo faamaumauina i le Mataupu Faavae ma Feagaiga?
Faaali atu le saunoaga lenei a Elder M. Russell Ballard o le Korama a Aposetolo e Toasefululua, ma fai i se tamaitiiti aoga e faitau leotele:
Ata
Elder M. Russell Ballard
“E i ai se lesona e tatau ona aoaoina mai le suesue o le Mataupu Faavae ma Feagaiga. O faaaliga e masani lava o tali ia i fesili. E le’i afio mai le Alii ma eu le tau’au o Iosefa ma faapea mai, ‘E i ai la’u faaaliga mo oe.’ Ae nai lo lena na alu atu Iosefa i le Alii ma fesili atu ia maua se tali. O lea taimi ma lea taimi sa faamatala mai ai e Iosefa pe faapefea ona ia fesili atu ma pe faapefea, i le tali, ona oo mai le faaaliga. Talu ai nei na faalauteleina ai e Elder Russell M. Nelson le mataupu faavae taua lenei. Ua ia saunoa mai, ‘Ua na o se mafaufau e fia iloa e mafai ona aoaoina e le Alii’”(M. Russell Ballard, “What Came from Kirtland” [Brigham Young University fireside, Nov. 6, 1994], 8, speeches.byu.edu).
Aisea e te manatu ai e manaomia e se tasi se mafaufau fia iloa ina ia maua ai upumoni ma faaaliga mai le Alii?
Faamatala atu o lenei vasega o le a talanoaina ai le Mataupu Faavae ma Feagaiga 77–138 ma le Folafolaga Aloaia 1 ma le 2. Uunaia tagata aoga e faatu se sini e suesue anotusi o mau mo lenei vasega. Valaaulia i latou e vaai i mau o loo latou suesue ai mo se faataitaiga o loo tuuina mai e le Alii faaaliga e tali ai i fesili faamaoni, ma faamalosi’au i tagata aoga e saili upumoni o loo i totonu o na faaaliga e mafai ona fesoasoani e tali ai a latou fesili.
Faamatala atu ia Mati 1832 sa nofo ai le Perofeta i le fale o Ioane ma Alisi (Elsa) Johnson i Hiram, Ohio, e tusa ma le 30 maila i saute o Katelani. I le taimi lea, o le toatele o le Au Paia sa nonofo i Ohaio ma le Itumalo o Siakisone, Misuri, lea na faaalia mai e le Alii o le a fausiaina ai le aai o Siona. Ia Fepuari ma Mati 1832, sa faaauau ai e le Perofeta lana faaliliuga musuia o le Tusi Paia, lea ua iloa nei o le Faaliliuga a Iosefa Samita. A o galue Iosefa Samita i le Faaaliga a Sagato Ioane le Paia (po ua lauiloa o le tusi o Faaaliga), na faaalia mai e le Alii le uiga o nisi faailoga ma mea na tutupu e pei ona faamatalaina e Ioane le Aposetolo. O lenei faaaliga o loo faamaumauina i le Mataupu Faavae ma Feagaiga 77.
Vaevae tagata aoga i ni paga. Tusi fuaitau o mau nei i luga le laupapa, ma tofi atu i paga taitasi se tasi o mau atofaina nei:
Fai atu i tagata aoga e faitau muamua ma a latou paga a latou mau atofaina i le tusi o Faaaliga, ma vaavaai mo faailoga po o mea na tutupu lea na faamatala e Ioane. Ona fesili atu lea i tagata aoga e faitau ma a latou paga a latou mau atofaina mai le Mataupu Faavae ma Feagaiga 77, ma vaavaai pe faapefea e le faamatalaga a le Alii ona fesoasoani e faamanino le uiga o faailoga ma mea na tutupu e pei ona faamatala mai i le tusi o Faaaliga. Fesili i nai tagata aoga e lipoti mai mea sa latou mauaina.
O le a se mea e mafai ona tatou aoao mai i le Mataupu Faavae ma Feagaiga 77 e uiga i le matafaioi a se perofeta e fesoasoani ia tatou malamalama i le uiga o tusitusiga paia? (E tatau i tagata aoga ona faailoa mai se aoaoga faavae e talitutusa ma mea nei: E faaalia e le Alii le faamatalaga o mau e ala i Ana perofeta.)
Aisea e te manatu ai e taua ona malamalama o e faaalia e le Alii le faamatalaga o mau e ala i Ana perofeta, tagata vaai ma tali faaaliga?
E faapefea ona tatou faatusaina le mea na faia e Iosefa Samita ina ia malamalama ai i tusitusiga paia i a tatou suesuega patino (o tusitusiga paia)? (E ui e mafai ona faaaoga e tagata aoga ni upu eseese, e tatau ona latou faailoa mai se mataupu faavae e talitutusa ma mea nei: A o tatou fesili atu i le Atua, o le a Ia fesoasoani ia tatou malamalama i tusitusiga paia.)
Ina ia fesoasoani i tamaiti aoga ia malamalama i lenei mataupu faavae, ia faaali atu le faamatalaga lenei mai ia Elder Dallin H. Oaks o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder Dallin H. Oaks
“O le mea e tulaga ese ai i tatou mai le tele o tagata Kerisiano i le auala tatou te faitau ai ma faaaoga le Tusi Paia ma isi tusitusiga paia o le tatou talitonuga o loo faaauau pea ona maua faaaliga. Mo i tatou, o tusitusiga paia e le o le pogai tupito lea o le malamalama, ae o le mea e tamua mai i le faapogai tupito. O le malamalama tupito e maua mai faaaliga. …
“O le afioga a le Alii i tusitusiga paia e faapei o se sulu e taiala ai o tatou vae (tagai Sal. 119:105), ma o faaaliga e faapei o se malosiaga maoae e faateleina ai le malamalama o le sulu. Matou te fautuaina tagata uma ina ia faia se suesuega ma le faaeteete o tusitusiga paia ma aoaoga faaperofeta e faatatau i ai, ma ia sailia ma le agaga tatalo ia faaaliga patino ia iloa ai faauigaga mo i latou lava” (Dallin H. Oaks, “Scripture Reading and Revelation,” Ensign, Jan. 1995, 7).
Aisea e te manatu ai e taua ona suesue ma le faaeteete i tusitusiga paia faatasi ma “aoaoga faaperofeta e faatatau ia i latou” a o e saili ma le agaga tatalo mo se malamalamaaga patino? (Faasino atu o le Tusi Lesona a Tagata o le Vasega Mataupu Faavae ma Feagaiga [Church Educational System manual, 2017] o loo i ai le tele o aoaoga a perofeta o aso e gata ai e mafai ona fesoasoani i tagata aoga e malamalama atili ai i upumoni na aoaoina i le Mataupu Faavae ma Feagaiga.)
Fesili atu i tagata aoga e mafaufau i se taimi na fesoasoani ai le Atua ia latou malamalama atili i tusitusiga paia e ala i aoaoga faaperofeta po o faaaliga patino na oo mai ina ua uma ona tatalo. Valaaulia ni nai tagata aoga e faasoa mai o latou aafiaga i le vasega pe afai latou te lagona le to’a e faia lena mea. Atonu foi e te manao e faasoa atu sou lava aafiaga.
Uunai tagata aoga e faitau soo mai le Mataupu Faavae ma Feagaiga ma saili mo se malamalamaaga sili o aoaoga ma mataupu faavae o loo i totonu e ala i le suesueina o aoaoga faaperofeta ma aioi atu i le Atua i le tatalo.
Ua faatonu e le Alii ia Iosefa Samita e faavae le Kamupani Tuufaatasi ma folafola faamanuiaga mo latou e tausia Ana poloaiga
Faamatala atu e faaopoopo i le mauaina o faaaliga e faatatau i le uiga o tusitusiga paia, na maua foi e le Perofeta o Iosefa Samita faaaliga e uiga i mataupu faaletino a le Ekalesia. Valaaulia se tagata aoga e faitau leotele le faatomuaga o le vaega Mataupu Faavae ma Feagaiga 78 . Fai atu i le vasega e mulimuli i le faitauga, ma vaavaai mo le mea na fetalai mai le Alii i le Perofeta e faatulaga ina ia mafai ona fesoasoani e pulea tupe a le Ekalesia. Fai atu i tagata aoga e lipoti mai mea ua latou mauaina.
Faamalamalama atu o taumafaiga tau fefaatauaiga o le a vaaia e le Malo Tuufaatasi e faatatau i le faleteuoloa a le Alii i Katelani, Ohaio, na faagaoioia e Newel K. Whitney, ma le faleteuoloa a le Alii i Initipene, Misuri, na faagaoioia e Sidney Gilbert. O nei faleteuoloa e tatau ona sapalai atu i le Au Paia ia mea e manaomia, ma faaputu ai foi se tupe e faatau mai ai fanua ma faatupeina ai le lolomiga o faaaliga na maua e Iosefa Samita mai le Alii.
Valaaulia se tagata aoga e faitau leotele le Mataupu Faavae ma Feagaiga 78:3–6 . Fai atu i le vasega e mulimuli i le faitauga, ma vaavaai po o a nisi mea o le a fesoasoani ai lenei kamupani i le Au Paia e fai.
E tusa ai ma fuaiupu 3--4, pe faapefea ona manuia le Kamupani Tuufaatasi ma faamanuiaina ai le Au Paia?
E tusa ai ma fuaiupu 5--6, aisea na poloaiina ai e le Alii le Au Paia e fesoasoani i e matitiva?
O le a sou manatu i le uiga o le fuaitau “afai tou te lē tutusa i mea faaletino, e lē mafai ona outou tutusa i le mauaina o mea faalelagi” i le fuaiupu 6 ?
Faamalamalama atu i se faaaliga muamua atu na faamatalaina e le Alii le tutusa i tulaga o aiga o loo i ai ni auala e faamalieina ai o latou manaoga e tusa ai ma o latou tulaga taitoatasi (tagai MF&F 51:3). O lea la, o le tutusa i mea faalelalolagi e le faapea o le a tutusa punaoa e maua e tagata uma.
Valaaulia se tagata o le vasega e faitau leotele le Mataupu Faavae ma Feagaiga 78:7 . Fai atu i le vasega e saili le mea na fetalai mai ai le Alii e tupu i le Au Paia pe a latou usiusitai i Ana poloaiga ia tulaga tutusa i mea faalelalolagi. Fai atu i tagata aoga e lipoti mai mea ua latou mauaina.
E faatatau i le vaega na aoao mai e le Alii i le fuaiupu 7, o le a le mataupu faavae e mafai ona tatou aoaoina e uiga i le usiusitai i poloaiga a le Alii o le a fesoasoani tatou te saunia ai? (E tatau i tagata aoga ona faailoa mai se mataupu faavae tutusa ma le vaega lea: O le usiusitai i poloaiga a le Alii e saunia ai i tatou mo se nofoaga i le malo selesitila.)
Fesili atu i tagata aoga e mafaufau e uiga i nisi o poloaiga a le Alii Valaaulia i latou e faamatala pe faapefea e nei poloaiga, e aofia ai le poloaiga e fesoasoani i e matitiva ona fesoasoani e saunia ai i tatou mo le malo selesitila (tagai MFF 105:3-5).
Otooto le Mataupu Faavae ma Feagaiga 78:8--16 e ala i le faamalamalama atu sa tofia e le Alii ia Joseph Smith, Newel K. Whitney, ma Sidney Rigdon e faatulaga le Malo Tuufaatasi (tagai i le MF&F 82). O sui o le kamupani e tatau ona fusia i latou e ala i feagaiga e pulea tulaga tau-fefaatauaiga ma taumafaiga faasalalauga a le Ekalesia. I le mulimuli ai i faatonuga a le Alii, o le a tutoatasi le Ekalesia mai isi vaega faalelalolagi.
Fai i tagata o le vasega e faitau le leoa le Mataupu Faavae ma Feagaiga 78:17–20 ma vaavaai mo fautuaga faaopoopo na tuuina mai e le Alii i taitai o le Ekalesia.
E faapefea e le savali a le Alii i fuaiupu 17--18 ona faalotomaualalo ma faamafanafana i nei taitai o le Ekalesia?
Fai atu i tagata aoga e mafaufau loloto i faamanuiaga o le malo a le Alii ma oa o le faavavau ua latou mauaina. Valaaulia ni nai tagata o le vasega e faasoa mai pe faapefea ona faamanuiaina e nei mea o latou olaga.
O lea le fautuaga a le Alii i taitai o le Ekalesia e fai i le fuaiupu 19?
Faatatau i le fuaiupu 19, o le a le mea o le a tupu ia i tatou pe a tatou maua mea uma ma le faafetai? (A uma ona tali mai tagata aoga, tusi le mataupu faavae lea i luga le laupapa: Afai tatou te talia mea uma ma le faafetai, o le a faamamaluina i tatou, ma o le a faateleina e le Alii a tatou faamanuiaga. Faamatala atu o le “ia faamamaluina” e mulimuli ane faasino i le mauaina o le faaeaina.)
O le a le uiga ia te oe e talia mea uma ma le faafetai?
Aisea e te manatu ai o mea uma tatou te mauaina mai le Atua, aemaise Ona poloaiga, e tatau ona talia ma le faafetai?
Avatu i tagata aoga se minute e tasi e faia ai se lisi o mea latou te loto faafetai ai. Valaaulia tagata aoga e fuafua po o a ni mea o le a latou faia ina ia maua atoatoa ai mea mai le Atua ma le faafetai.
Ua valaau e le Alii Iareto Carter, Setefano Burnett, ma Etena Samita e auauna atu faamisiona.
Aotele le Mataupu Faavae ma Feagaiga 79--80 e ala i le faamatalaina o le Alii na valaauina Iareto Carter, Setefano Burnett, ma Etena Samita e auauna atu faamisiona. Na folafola atu e le Alii ia Iareto Carter o le a aoao atu le upumoni ma faatonu o ia i le mea e alu ai e Le Faamafanafana (tagai MFF 79:2). Na fetalai atu le Alii ia Setefano Burnett ma Etena Samita e folafola atu mea na la faalogo i ai, na talitonu i ai ma iloa e moni (tagai MFF 80:4).
Faaiu i le molimau atu e uiga i upumoni na aoaoina i lenei lesona.