I le taumalulu o le 1830, na malaga ai Sini Rikitone ma Eteuati Paterika mai Ohaio i Niu Ioka e feiloai ma Iosefa Samita. Na taufai faalogo nei alii i le talalelei toefuataiina o folafola atu e Oliva Kaotui, Parley P. Pratt, Ziba Peterson, ma Pita Uitimera le Itiiti i Katelani, Ohaio. E lei leva ona taunuu Sini ma Eteuati i Faiete, ae maua e Iosefa Samita ia faaaliga mo i laua taitoatasi. I le faaaliga o loo tusia i le Mataupu Faavae ma Feagaiga 35, na tuuina atu ai e le Alii ia Sini Rikitone ni tiutetauave patino i totonu o le Ekalesia faatoa fuataiina. I le faaaliga o loo tusia i le Mataupu Faavae ma Feagaiga 36, na valaauina e le Alii ia Eteuati Paterika e folafola le talalelei.
Ina ua mavae ni vaiaso mulimuli ane, sa asiasi atu ai James Covel o le sa faifeau Metotisi mo le tusa ma le 40 tausaga, i le Perofeta o Iosefa Samita ma osifeagaiga ai ma le Alii e usitai i soo se poloaiga e tuuina atu ia te ia e ala i le Perofeta. O lea, i le aso 5 o Ianuari, 1831, na maua ai e le Perofeta le faaaliga ua tusia i le Mataupu Faavae ma Feagaiga 39. I lea faaaliga, sa poloaiina ai e le Alii ia James Covel ina ia papatiso ma folafola atu le talalelei toefuataiina. Peitai, o le aso na sosoo ma le mauaina o le faaaliga, na tuua ai e James ia Faiete, Niu Ioka, e aunoa ma le papatisoina ma “toe foi atu ai i ana mataupu faavae ma ona tagata” (Manuscript History of the Church, vol. A-1, p. 92, josephsmithpapers.org). Ona tuuina atu ai lea e le Alii ia Iosefa Samita le faaaliga o loo tusia i le Mataupu Faavae ma Feagaiga 40, e faamalamalama atu ai o le “fefe o [James Covel] i sauaga ma mea o le lalolagi ua mafua ai ona ia teena le afioga a le [Atua]” (MF&F 40:2).
29 Oketopa, 1830Sa folafola atu e Oliva Kaotui, Parley P. Pratt, Ziba Peterson, ma Pita Uitimera le Itiiti le talalelei i matusasae o Ohaio mo ni vaiaso.
Amataga o Tesema 1830Sa malaga mai Sini Rikitonu ma Eteuati Paterika mai Ohaio i Niu Ioka e feiloai ma le Perofeta o Iosefa Samita.
Ua valaauina e le Alii ia Sini Rikitone mo se galuega tele
A o lei amataina le vasega, tusi le fesili lenei i luga o le laupapa: O le a se mea na e oo i ai ua fesoasoani e te iloa ai, o loo silafia oe e le Alii ma e naunau i le fuafuaga o lou olaga?
Pe a amata le vasega, valaaulia ni nai tagata aoga e faasoa mai a latou aafiaga i le vasega.
A o suesue e tagata aooga le Mataupu Faavae ma Feagaiga 35 i le aso, valaaulia i latou e vaavaai mo se upumoni e faapupula ai e silafia i latou e le Alii ma e naunau o Ia i fuafuaga o o latou olaga.
Faamatala o le tautoulu o le 1830, na agai atu ai Oliva Kaotui, Parley P. Pratt, Ziba Pererson, ma Pita Uitimera le Itiiti mai Niu Ioka i la latou misiona i Misuri sisifo (tagai MF&F 32). Sa uunaia e Parley P. Pratt le vaega e malolo i le eria o Katelani, Ohaio, i la latou malaga. A o i ai i latou iina, sa latou faasoa atu le talalelei toefuataiina ia Sini Rikitone, o se uo a Parley ma o se faifeau o le Lotu Papatiso Toeliuliu, ma tagata o lana aulotu. I se taimi puupuu, sa papatiso ai Sini Rikitone ma le silia ma le 120 tagata i le eria o Katelani, pe tusa ua faaluaina le aofai o tagata auai o le Ekalesia. I le naunau ai e feiloai i le Perofeta o Iosefa Samita, o lea sa malaga ai Sini Rikitone ma lana uo o Eteuati Paterika i Faiete, Niu Ioka, ma taunuu ai i le amataga o Tesema 1830. Ina ua la taunuu atu i Faiete, sa faailoa atu e Sini lona naunauga ia iloa le finagalo o le Alii mo ia. O le tali atu i lana talosaga, na maua ai e Iosefa Samita le faaaliga ua tusia i le Mataupu Faavae ma Feagaiga 35.
Valaaulia tagata aooga e faitau le leoa le Mataupu Faavae ma Feagaiga 35:1–3 ma vaavaai po o le a le fetalaiga a le Alii ia Sini Rikitone.
O a upu po o fasifuaitau e faaalia ai sa silafia e le Alii ia Sini?
O le a le mea o aoao mai e le fuaiupu 3 e uiga i mea ua silafia e le Alii ma o le a faia mo i tatou? (A o tali mai tagata aooga, tusi le aoaoga faavae lenei i luga o le laupapa: E silafia i tatou e le Alii ma e fesoasoani e saunia i tatou mo le galuega Na te tofia i tatou e fai.)
Ina ia fesoasoani i tagata aooga ia malamalama atili ma lagonaina le taua o lenei aoaoga faavae, faaali atu le saunoaga lea a Peresitene Henry B. Eyring o le Au Peresitene Sili, ma valaaulia se tagata e faitauina leotele:
Ata
Peresitene Henry B. Eyring
“O lou olaga o loo vaavaaia ma le faaeteete, e pei foi o a’u. E silafia e le Alii mea uma e finagalo o Ia e te faia ma mea e manaomia ona e iloa. E agalelei o Ia ma Na te silafia mea uma. O lea, e mafai ona e faamoemoe ma le mautinoa ua Ia saunia ni avanoa mo oe e te aoao ai e sauniuni ai mo le auaunaga o le a e tuuina atu. O le a e le iloaina lelei na avanoa e pei foi ona sa ou le iloa. Ae a e faamuamuaina mea faaleagaga i lou olaga, o le a faamanuiaina oe ia e lagonaina le taitaiina atu o oe i ni aoaoga faapitoa, ma o le a uunaia foi oe e te galue malosi atu. O le a e iloaina mulimuli ane sa faateleina lou mana e auauna atu ai, ma o le a tumu oe i le faafetai” (Henry B. Eyring, “Education for Real Life,” Ensign, Oct. 2002, 18–19).
E tusa ai ma Peresitene Eyring, o a ni nai auala e mafai e le Alii ona saunia ai i tatou mo le galuega ua Ia valaauina i tatou e faataunuu?
O le a se mea e mafai ona tatou faia ia maua ai le taitaiga faaopoopo mai le Alii ina ia mafai ai ona tatou saunia e faia Lana galuega?
Valaaulia se tagata aoga e faitau leotele le Mataupu Faavae ma Feagaiga 35:4–6 . Fai i le vasega e mulimuli ai, ma vaavaai mo le vaega o le “galuega tele”(MF&F 35:3) na saunia e le Alii ia Sini Rikitone e faataunuu.
E tusa ai ma le fuaiupu e 4, na faapefea ona pei Sini o Ioane le Papatiso? (Faamalamalama atu e faapei o Ioane, sa saunia e Sini ia tagata e ala i lana galuega e faalogo ma talia le atoaga o le talalelei a Iesu Keriso. O le toatele lava, pe afai e le o tagata uma, o le tusa ma le 120 tagata na uluai papatiso i le eria o Katelani o tagata o le aulotu a Sini o le Lotu Papatiso Toeliuliu.)
E tusa ai ma le fuaiupu 6, o le a le vaega o le “galuega tele” na valaau ai e le Alii ia Sini e fai?
Aotele le Mataupu Faavae ma Feagaiga 35:7–12 i le faamalamalama atu na ta’u atu e le Alii ia Sini Rikitone le galuega tele o le Toefuataiga o le talalelei. Na aoao atu e le Alii o Ana galuea o “vavega, faailoga, ma mea ofoofogia” e tusa ai ma le faatuatua o i “latou o e talitonu i [Lona] suafa” (fuaiupu 8).
Valaaulia tagata aooga e faitau leleoa le Mataupu Faavae ma Feagaiga 35:13--14 ma vaavaai mo uiga o i latou o e valaauina e le Alii e fesoasoani i Lana galuega ma mea o le a faia e le Alii e fesoasoani ai ia te i latou. Ao lei faitau tagata aooga, faamalamalama atu o le “soli” o lona uiga o le tuueseeseina o le fatu mai lona ‘au ma le pa’u. Ua faasino lea talafaatusa i taumafaiga a le Alii e ao mai i latou ua saunia e talia le talalelei ma aveesea mai i latou mai e le taliaina. (Manatua: I le lomiga faaPeretania i le 2013 o le Mataupu Faavae ma Feagaiga o le upu thrash i le fuaiupu 13 sa suia i le thresh ia atagia ai le faaupuga o le uluai faaaliga.)
O le a le aoaoga faavae e mafai ona tatou faailoa mai i le fuaiupu 13 e uiga ia i latou o e valaauina e le Alii e faataunuu Lana galuega? (E mafai ona faaaoga e tagata aooga ni upu eseese, ae ia mautinoa ua latou faailoa mai le aoaoga faavae lenei: E valaauina e le Atua i latou e vaivai e faataunuu ai Lana galuega e ala i le mana o Lona Agaga.)
Aisea e te manatu ai e ono mafaufauina auauna a le Atua e vaivai?
E tusa ai ma le fuaiupu 14, o le a le mea na folafola mai le Alii e fai mo i latou o e auauna atu ia te Ia?
O le a sou manatu i upumoni o loo aoao mai i fuaiupu 13–14 atonu na fesoasoani ia Sini Rikitone i lenei taimi o lona soifua? Valaaulia tagata aooga e mafaufau loloto pe o le a le uiga o nei upumoni ia latou i tulaga o loo latou i ai nei.
Aotele le Mataupu Faavae ma Feagaiga 35:17–27 i le faamatala atu na ta’u atu e le Alii ia Sini Rikitone ua Ia faamanuiaina Iosefa Samita i lona vaivai. Sa valaauina foi e le Alii ia Sini Rikitone e vaai le Perofeta, e fesoasoani ia te ia e galue i le faaliliuga o le Tusi Paia, e folafola le talalelei, ma tausia feagaiga sa ia osia.
Ua faamagalo e le Alii ia Eteuati Paterika ma valaauina o ia e talai atu le talalelei
Faamalamalama e faapea ina ua taunuu faifeautalai i Ohaio i le tautoulu o le 1830, o le toatele o tagata o le aulotu a Sini Rikitone, e aofia ai Litia Paterika, sa talitonu i la latou savali ma sa lei pine ae papatisoina. O le toalua o Litia, o Eteuati Paterika, sa masalosalo pea ma sa manao e feiloai ma le Perofeta a o lei ioe atu e papatisoina. Ina ua mavae le malaga atu i Niu Ioka ma feiloai ma le Perofeta, sa manao Eteuati e papatiso. E lua aso a o lei papatiso, sa tuu atu ai e le Alii ia te ia se faaaliga e ala atu ia Iosefa Samita. Aotele le Mataupu Faavae ma Feagaiga 36 i le faamalamalama atu e faapea na faamagalo e le Alii ia agasala a Eteuati ma valaauina o ia e folafola le talalelei. Na Ia ta’u atu ia Eteuati o le a aoaoina o ia e le Agaga Paia i “mea filemu o le malo”MF&F 36:2).
Ua poloaiina e Iesu Keriso ia James Covel ia papatiso ma galue i Lona tovine.
Faaali atu le saunoaga lea a Sister Linda K. Burton, Peresitene Aoao o le Aualofa:
Ata
Linda K. Burton
“O le tausisia o feagaiga e taua mo le fiafia moni” (Linda K. Burton, “O Le Mana, Olioli, ma le Alofa e Maua i le Tausiga o Feagaiga,” Ensign po o le Liahona, Nov. 2013, 113).
Afai o le tausia o feagaiga e aumaia ai le fiafia, aisea e te manatu ai o nisi taimi e soli ai e tagata pe mafaufau foi e soli?
A o suesue e tagata aooga le Mataupu Faavae ma Feagaiga 39–40, valaaulia i latou e vaavaai mo mataupu faavae o le a fesoasoani ia i latou e tumau faamaoni ai i a latou feagaiga ma le Alii.
Valaaulia se tagata aoga e faitau leotele le faaulutala o le vaega mo le Mataupu Faavae ma Feagaiga 39, ma fai i le vasega e mulimuli ai, ma vaavaai po o ai na tuu mai i ai lea faaaliga ma pe aisea foi na tuu mai ai.
Aotele le Mataupu Faavae ma Feagaiga 39:1–6 i le faamalamalama atu na amata e Iesu Keriso lea faaaliga i le aoao mai o le a Ia tuu mai ia i latou o e talia o Ia le mana e avea ai ma Ona atalii ma afafine e fanaua faaleagaga. Tatou te talia o Ia pe a tatou taliaina Lana talalelei e ala i le salamo, papatiso, ma maua le Agaga Paia.
Valaaulia ni nai tagata aooga e feauauai i le faitauina leotele o le Mataupu Faavae ma Feagaiga 39:7–12. Fai i le afa o le vasega e vaavaai mo le mea na fautuaina e le Alii ia James Covel e fai. Fai i le isi afa e vaavaai mo mea na folafola atu e le Alii ia te ia pe afai e usitai. Valaaulia tagata aooga e lipoti mai mea sa latou mauaina.
O le a sou manatu i le uiga faapea o le loto o James Covel “ua sa’o nei i luma” o le Alii? (fuaiupu 8).
Aisea na atonu ai na manaomia se faatuatua tele mo James Covel e usitai ai i le poloaiga a le Faaola ia talia le talalelei toefuataiina ma papatiso? (Ona o James Covel o se faifeau Metotisi, afai e papatisoina o ia o lona uiga ua tatau ona ia lafoaia le tulaga, mafutaga, ma tupe maua sa ia faavaeina i le silia ma e 40 tausaga ua mavae.)
Aotele le Mataupu Faavae ma Feagaiga 39:13–24, ma valaau e le Alii ia James Covel e folafola le talalelei i Ohaio. Sa faatonuina foi o ia e le Alii e tusa ai ma mea e aoao atu ma le ala e aoao atu ai.
Ua faaali mai e le Alii le mafuaaga na teena ai e James Covel ia Ana afioga
Ta’u i le vasega o le aso na sosoo ma le aso na maua ai e Iosefa Samita le faaaliga o loo tusia i le Mataupu Faavae ma Feagaiga 40, sa tuua ai e James Covel ia Faiete e aunoa ma le papatisoina. E tusa ai ma Iosefa Samita, sa “teena e James le afioga a le Alii, ma toe foi i ana mataupu faavae muamua ma ona tagata” (Manuscript History of the Church, vol. A-1, p. 92, josephsmithpapers.org).
Valaaulia tagata aooga e faitau leleoa le Mataupu Faaavae ma Feagaiga 40:1–3 ma vaavaai pe aisea na lei usitai ai James Covel i le afioga a le Alii. Fai atu i tagata aooga e lipoti mai mea latou te maua.
E faavae i mea ua e aoaoina e uiga ia James Covel, o le a se mea e mafai ona tupu pe afai tatou te faamatuu atu i le fefe ma faatoilaloina i manatu o le lalolagi? (A uma ona tali mai tagata aooga, tusi le mataupu faavae i le laupapa: O le fefe i sauaga ma manatu o le lalolagi e mafai ona afua ai ona tatou teena le afioga a le Atua ma solia a tatou feagaiga ma Ia.)
Fai i tagata aooga e talanoaina ma se soa pe faapefea ona latou tali atu i le fesili lea:
E mafai faapefea ona avea manatu o le lalolagi ma le fefe i sauaga e afua ai ona teena e se tasi aoaoga a le Atua ma solia feagaiga ma Ia?
A uma ua lava se taimi, fai i ni nai tagata aooga e faasoa mai i le vasega a latou tali.
O le a se mea na fesoasoani ia te oe e teena ai le fefe i sauaga ma manatu o le lalolagi ina ia tumau faamaoni ai i le Atua ma au feagaiga?
Valaaulia tagata aooga e mafaufau loloto i mea e mafai ona latou faia e aloese ai mai le faatagaina o le fefe i sauaga po o manatu o le lalolagi e taofia ai i latou mai le ola faamaoni ai i le talalelei. Uunaia i latou e faatino i soo se uunaiga latou te maua.