O le Perofeta o Iosefa Samita na mauaina le faaaliga o loo tusia i le Mataupu Faavae ma Feagaiga 88:1–126 i le aso 27 ma le 28 Tesema, 1832. Pe tusa ma le vaiaso mulimuli ane, i le aso 3 o Ianuari, 1833, sa faalau mai ai e le Perofeta le faaaliga o loo faamaumau i le Mataupu Faavae ma Feagaiga 88:127–37 ina ua uma ona tatalo le au faitaulaga sili i se konafesi ia iloa le finagalo o le Alii e faatatau i le faatuina o Siona. Sa faasino e le Perofeta i le faaaliga o se “’lau olive’ … na tau mai le Laau o le Parataiso” (MFF 88, faaulutala o le vaega) atonu ona o se savali o le filemu ma le faamoemoe e faaleleia ai lagona le lelei o nisi o le Au Paia i Misuri i taitai o le Ekalesia i Katelani, Ohaio (tagai MFF 84:76). E fa fuaiupu faaopoopo (MFF 88:138–41) sa faaopoopo a o lei lomia le lomiga o le 1835 o le Mataupu Faavae ma Feagaiga.
O le lesona lona lua lenei o lesona e lua e talanoaina ai le Mataupu Faavae ma Feagaiga 88. I le vaega o le faaaliga o loo talanoaina i lenei lesona, sa faatonu ai e le Alii ia toeaina o le Ekalesia e aoao e le tasi le isi ma ia saunia e auauna atu o ni faifeautalai. Sa Ia faaalia mai foi ia faailoga o le Afio Mai Faalua, o le faatulagaga masani o le a toetutu mai ai tagata uma, ma nisi o mea e tutupu i le taimi o le toe taua ma Satani i le faaiuga o le Meleniuma. E faaopoopo atu i ai, sa poloaiina e le Alii le Au Paia e fausia se fale o le Atua i Katelani ma sa poloaiina ia toeaina e faatulaga “le aoga a perofeta” (MFF 88:127) i lalo o le taitaiga a Iosefa Samita. O i latou e auai i le aoga sa tatau ona aoao faatasi e ala i le suesue ma le faatuatua, ma faaali atu le alofa ma le faauo i le tasi ma le isi.
Iuni 1832–Ianuari 1833Sa faaauau pea feeseeseaiga i le va o taitai o le Ekalesia i Misuri ma taitai o le Ekalesia i Ohaio.
5 Ianuari, 1833Na valaauina ia Frederick G. Viliamu e ala i faaaliga e suitulaga ia Jesse Gause e fai ma fesoasoani i le Au Peresitene o le Perisitua Maualuga.
Ua poloaiina e le Alii ia toeaina o le Ekalesia e nonofo ai pea ma tapenapena mo la latou auaunaga.
Fai i tagata aooga e mafaufau i se mea sa latou faia talu ai nei sa manaomia ai se tapenaga. Valaaulia ni nai tagata aooga e faamatala mai mea sa latou faia ma pe na faapefea ona latou tapena i ai.
Na faapefea e lau tapenaga po o le le lava o lau tapenaga ona tosinaina ai lou faamanuiaina?
Faamalamalama atu e finagalo le Alii ia tatou tapenapena mo mea taua e faavavau. Valaaulia tagata aooga e vaavaai mo aoaoga faavae ma mataupu faavae a o latou suesueina le vaega o totoe o le Mataupu Faavae ma Feagaiga 88 ia o le a fesoasoani latou te malamalama ai i mea e finagalo le Alii ia i latou e tapenapena i ai ma pe aisea e manaomia ai le tapenapena.
Faamanatu i tagata aooga i le taimi o se konafesi a le au faitaulaga sili i Katelani, Ohaio i le aso 27--28 o Tesema, 1832, sa avatu ai e le Alii le faaaliga o i le Mataupu Faavae ma Feagaiga 88:1–126. Sa sailia e i latou sa auai ai ia iloa le finagalo o le Alii e faatatau i le fausiaina o Siona.
Valaaulia se tagata aoga e faitau leotele le Mataupu Faavae ma Feagaiga 88:70 . Fai atu i le vasega e vaavaai mo le mea na finagalo le Alii e fai e toeaina.
O le a le mea na poloaiina e le Alii ia toeaina e fai?
Faamalamalama atu o lenei poloaiga e pei o le poloaiga sa tuu atu e le Aiii i Ana Aposetolo anamua. Sa poloaiina e le Alii Ana Aposetolo e folafola atu le talalelei i nuu uma, ae sa tatau ona latou nonofo ai pea i Ierusalema seia faaeeina i latou i le mana mai luga (tagai Luka 24:47–49). Faamalamalama atu e ui o le poloaiga e nonofo ai i Katelani o le a tuuitiitia ai le galuega faafaifeautalai mo se taimi, ae sa faamautinoa atu e le Alii i toeaina o le a alu i luma le galuega.
Valaaulia se tagata aoga e faitau le Mataupu Faavae ma Feagaiga 88:72–73. Fai atu i le vasega e mulimuli i le faitauga, ma vaavaai mo le mea na ta’u mai e le Alii i toeaina.
O a ni fasifuaitau i nei fuaiupu e tulaga ese ia te oe? Aisea?
Valaaulia tagata aooga e faitau le leoa le Mataupu Faavae ma Feagaiga 88:74–76, , ma vaavaai mo mea na poloai atu le Alii i toeaina e fai a o nonofo ai i Katelani.
O le a le mea na poloaiina e le Alii ia toeaina e fai a o nonofo ai pea i Katelani?
E tusa ai ma le fuaiupu 75, aisea na poloaiina ai i latou e le Alii e faia nei mea? (Ina ia mafai ai ona Ia faataunuuina le “folafolaga tele ma le mulimuli” sa Ia faia ia i latou.)
Ina ia fesoasoani i tagata aooga ia malamalama i le uiga o lenei “folafolaga tele ma le mulimuli,” valaaulia se tamaitiiti e faitau leotele le Mataupu Faavae ma Feagaiga 88:67–68 . Fai atu i le vasega e mulimuli i le faitauga, ma vaavaai mo le folafolaga na tuuina mai e le Alii i le Au Paia.
O le a le folafolaga o le a faataunuu e le Alii pe afai e tausia e le Au Paia le poloaiga e nonofo ai pea i Katelani ma sauniuni, faapaia, faamama, ma ia mama i latou lava? (O le folafolaga o le a latou vaai i le Alii i Lona lava taimi ma Lana lava ala. O lenei folafolaga sa fesootai i le poloaiga e fausia le Malumalu i Katelani, o le valaau e faia se potopotoga paia [tagai fuaiupu 70], ma le folafolaga na muamua atu a le Alii e faaeeina le Au Paia i le mana mai luga [tagai MFF 38:32; 95:8–9].)
Valaaulia se tagata aoga e faitau leotele le Mataupu Faavae ma Feagaiga 88:77–79 . Fai atu i le vasega e mulimuli i le faitauga, ma vaavaai po o a isi mea na faatonuina e le Alii nei toeaina e fai ia saunia ai i latou lava ia faaeeina i le mana.
O le a le mea na poloaiina e le Alii ia toeaina e fai i le fuaiupu 77?
E tusa ai ma le fuaiupu 78, o le a le mea na folafola atu e le Alii o le a tuu pe afai latou te aoao atu ma le filiga le tasi ma le isi i mataupu o le malo? (Faamalamalama atu o le fasifuaitau ‘o le a i ai loʼu alofa tunoa ia te outou” e faasino i le mauaina o le fesoasoani faalelagi po o le malosi.)
E faavae i le folafolaga a le Alii i le fuaiupu 78, o le a le mea o le a tupu a o tatou aoao atu ma le filiga le tasi ma le isi le mataupu o le malo? (A uma ona tali mai tagata aooga, tusi le mataupu faavae lea i le laupapa: A o tatou aoao ma le filiga le tasi ma le isi i mataupu o le malo, o le a fesoasoani le Alii ia i tatou ia malamalama atoatoa i Lana mataupu.)
O a ni auala na fesoasoani ai le aoao atu o le talalelei i isi ua atili ai ona e malamalama lelei i ai?
Valaaulia tagata aooga e faitau le leoa le Mataupu Faavae ma Feagaiga 88:80 , ma vaavaai pe aisea na poloaiina ai e le Alii ia toeaina e aoao atu ma aoao mai nei mea. Fai i ni nai tagata aooga e lipoti atu mea sa latou maua.
E faapefea e le aoao atu ma le filiga e le tasi ma le isi le mataupu o le malo ona saunia ai i tatou e auauna atu i le Atua?
Aotele le Mataupu Faavae ma Feagaiga 88:81–82 e ala i le faamalamalama atu sa ta’u atu e le Alii i toeaina ua Ia auina atu i latou “e molimau atu ma lapataia tagata” ma ua faamoemoe o tagata uma sa lapataia ia latou lapatai atu i isi.
Valaaulia se tagata aoga e faitau leotele le Mataupu Faavae ma Feagaiga 88:83–86 . Fai i le vasega e mulimuli i le faitauga, ma vaavaai mo se fautuaga faaopoopo na avatu e le Alii i toeaina e fesoasoani ai e saunia i latou e folafola atu le talalelei ma pe aisea e taua tele ai lenei fautuaga.
O le a le fautuaga na tuuina mai e le Alii i toeaina? Aisea e taua ai?
E tusa ai ma fuaiupu 84–85, o le a le mea o le a fesoasoani molimau a le Au Paia i le lalolagi e sauniuni i ai?
Ua faaalia mai e le Alii mea e tutupu a o loma Lona Afio Mai Faalua
Valaaulia ni nai tagata aoga e auauai e faitau leotele mai le Mataupu Faavae ma Feagaiga 88:87–91. Fai atu i le vasega e mulimuli i le faitauga, ma vaavaai mo le mea na ta’u mai e le Alii o le a sosoo ma molimau a le Au Paia.
O a ituaiga o molimau o le a sosoo ma molimau a le Au Paia a o lei oo i le Afio Mai Faalua o le Alii?
Valaaulia tagata aoga e faitau le leoa le Mataupu Faavae ma Feagaiga 88:92, , ma vaavaai mo mea o le a ta’u mai e agelu. Fai atu ia i latou e lipoti mai mea na latou mauaina.
Aotele le Mataupu Faavae ma Feagaiga 88:93–116 e ala i le faamalamalama atu i le taimi o le Afio Mai Faalua, o le a saisaitia le ekalesia tele ma le inosia sa sauaina le Au Paia. O le Au Paia o loo nonofo i le lalolagi pe ua maliliu foi o le a o a’e e faafetaiai le Faaola ma o ifo faatasi ai ma Ia. O le a toetutu e ua oti i se faatulagaga, e tusa ma lo latou amiotonu. A mavae lo latou toetutu, o le a maua e e amiotonu le mamalu o le Alii ma lo latou tofi. O le a saisaitia Satani i le taimi o le Meleniuma ae ona tatala lea mo se vaitau. O le a faatoilalo e Mekaeli (Atamu) ma ana ‘au ia Satani ma ana ‘au, ma o le a le toe i ai ia Satani se mana i luga o le Au Paia.
Ua poloaiina e le Alii i latou e umia le perisitua e fausia le faatuatua o isi, saili e aoao e ala i le faatuatua, faatu se fale o le Atua, ma faatulaga se aoga
Faamalamalama atu ina ua uma ona faamalamalama mai e le Alii nisi o mea e tutupu a o loma Lona Afio Mai Faalua, sa Ia ta’u atu i le Au Paia mea e manaomia ona latou faia e sauniuni ai i latou lava ma isi mo na mea o le a tutupu.
Valaaulia se tagata aoga e faitau leotele le Mataupu Faavae ma Feagaiga 88:117–18 . Fai i le vasega e vaavaai mo mea na ta’u atu e le Alii i Ana auauna e fai e sauniuni ai mo nei mea e tutupu.
O le a le mea na ta’u atu e le Alii i Ana auauna e fai i le fuaiupu 117?
Faasino i le fasifuaitau “ma talu ai ona ua lē i ai i tagata uma le faatuatua” i le fuaiupu 118.
O le a le mea na ta’u atu e le Alii i Ana auauna e fai ina ia faateleina ai lo latou faatuatua ma le faatuatua o isi i le fuaiupu 118?
O le a se mataupu faavae e mafai ona tatou aoao mai le fuaiupu 118 e uiga i le auala e faateleina ai lo tatou faatuatua? (A uma ona tali mai tagata aooga, tusi ia le mataupu faavae nei i le laupapa: A o tatou aoao atu ma le filiga le tasi ma le isi, e mafai ona tatou faateleina lo tatou lava faatuatua ma fesoasoani e faamalolosia le faatuatua o isi. Ua poloaiina e le Alii i tatou e saili e aoao e ala i le suesue ma i le faatuatua.)
O le a sou manatu i le uiga o le aoao “i le suesue ma le faatuatua foi” (fuaiupu 118)?
Ina ia fesoasoani i tagata aooga ia malamalama i le uiga o le aoao e ala i le faatuatua, valaaulia se tagata aoga e faitau leotele le saunoaga lenei a Elder David A. Bednar o le Korama a Aposetolo e Toasefululua:
Ata
Elder David A. Bednar
“O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia. …
“… O le aoao e ala i le faatuatua e le mafai ona sii mai i se faiaoga i se tamaitiiti aoga e ala i se tautalaga, o se ata faataitai, po o se galuega faatino o aafiaga; nai lo lena e tatau i se tamaitiiti aoga ona faaaoga le faatuatua ma galue ai ina ia maua le malamalama mo ia lava” (David A. Bednar, “Saili e Aoao e Ala i le Faatuatua,”Liahona, Setema. 2007, 64).
E tusa ai ma Elder Bednar, e faapefea ona tatou aoao e ala i le faatuatua?
O a ni nai faataitaiga mai tusitusiga paia o tagata sa faaaogaina lo latou faatuatua ma galulue ai ia maua le malamalama?
O anafea na faateleina ai lou faatuatua o se taunuuga o le galue ia maua le malamalama?
Valaaulia tagata aooga e mafaufau loloto i mea e mafai ona latou faia e galulue lelei atili ai i mea ua latou aoaoina. Fautuaina i latou e mulimuli i soo se uunaiga latou te maua mai le Agaga Paia.
Valaaulia se tagata aoga e faitau leotele le Mataupu Faavae ma Feagaiga 88:119–20 . Fai atu i le vasega e mulimuli i le faitauga, ma vaavaai mo se mea na ta‘u mai e le Alii i le Au Paia e fai e saunia ai mo Lona Afio Mai Faalua ma faateleina ai lo latou faatuatua.
O le a le mea na ta’u atu e le Alii i le Au Paia e fai? (A uma ona tali mai tamaiti, faamalamalama atu sa malamalama le Perofeta o Iosefa Samita o le fuaiupu 119 o se poloaiga e fausia se fale o le Atua e mafai ai e le Au Paia ona faia a latou potopotoga ma aoaoina ai mai luga. I le tali atu i lenei fuaiupu, sa iu ina fauina e le Au Paia le Malumalu i Katelani.)
E tusa ai ma le fuaiupu 120, o a mafuaaga na tuu atu e le Alii i le Au Paia e fausia ai le fale o le Atua?
Valaaulia tagata aooga e faitau ma se paga le Mataupu Faavae ma Feagaiga 88:121–26 ma vaavaai mo fautuaga na tuu atu e le Alii i Ana auauna e saunia i latou ina ia aoaoina i totonu o le malumalu.
E faapefea e le mulimuli i lenei fautuaga ona saunia tagata ia aoaoina i le malumalu?
E mafai faapefea e le mulimuli i lenei fautuaga ona saunia oe ia aoaoina ia tatou sauniga faale-Ekalesia ma i le malumalu?
Faamalamalama atu o le aso 3 o Ianuari, 1833, ua mavae se vaiaso talu ona uma le konafesi a le au faitaulaga sili, sa aumaia e le Alii ni faatonuga faaopoopo e uiga i le ala o le a avea ai le fale o le Atua ma fale o le aoaoga. Aotele le Mataupu Faavae ma Feagaiga 88:127–41 e ala i le faamatala atu na poloaiina e le Alii le Perofeta o Iosefa Samita e faatu le Aoga a Perofeta mo i latou e valaauina i le galuega. O lenei aoga sa mamanuina ia saunia ai i latou mo le galuega faafaifeautalai ma le auaunaga a le Ekalesia i le lumanai. O i latou i le aoga sa faatonuina ia aoao atu ma aoao mai aoaoga faavae o le malo ma saili i le poto mai punaoa sili o loo maua. Sa tuuina mai e le Alii le faatulagaga o le Aoga a Perofeta, e aofia ai le faiga o le faafeiloaiga ma le sauniga o le mulumuluga o vae. O le uluai Aoga a Perofeta na potopoto i le faleoloa o Newel K. Whitney. Faleoloa o Uitini.
Valaaulia tagata aooga e faasoa mai se aoaoga faavae po o se mataupu faavae mai le lesona o le aso sa taua ia i latou ma faamalamalama mai pe aisea. Fautuaina tagata aooga e faatino uunaiga sa latou maua.