Ia Setema 1832, na toe foi atu ai faifeautalai i Katelani, Ohaio, mai le talaiina o le talalelei i le itu sasae o le Iunaite Setete ma lipotia o latou manuia ia Iosefa Samita. I le taimi o le latou tuufaatasiga, na fesili ai le Perofeta i le Alii ma sa mauaina le faaaliga o loo faamaumauina i le Mataupu Faavae ma Feagaiga 84. I lenei faaaliga, na faamatala ai e le Alii le auala e saunia e le perisitua le Au Paia e ulufale i le afioaga o le Atua ma maua uma mea ua ia te Ia. Na aoao e le Alii le taua o le faalogo i Ana upu ma aoaiina le Au Paia i le Itumalo o Siakisone, Misuri, mo le taulimaina ma le mama (manatu mama) o le Tusi a Mamona ma Ana poloaiga. Na ia poloaiina foi le Au Paia e talai le talalelei i le lalolagi ma tuuina mai faatonuga i le ala e faia ai.
Faaiuga o Iuni 1832Na toe taliu mai Iosefa Samita i Katelani, Ohaio mai Initipene, Misuri.
12 Setema, 1832Sa masii atu Iosefa ma Ema Samita mai i Hairama i Katelani, Ohaio, e nonofo ai i le faleoloa a Niueli K. Uitini
Amataga o Oketopa 1832Na malaga Iosefa Samita ma Newel K. Whitney i Boston, Masatusa; Albany, Niu Ioka; ma le Aai o Niu Ioka e talai atu le talalelei ma faatau mai oloa mo le faleoloa i Katelani
Ua tautino mai e le Alii o le a fausia se malumalu i Ierusalema Fou ma faamatala mai faamoemoega o le perisitua
Valaaulia tagata aoga e mafaufau e i ai se latou uo e talitonu e mafai e tagata ona ola faaleagaga ma latalata i le Atua e aunoa ma se lotu po o sauniga o le perisitua. Fai atu i tagata aoga e mafaufau loloto i fesili nei a o latou mafaufau pe faapefea ona latou tali atu i le latou uo:
Aisea e manaomia ai ona tatou avea ma tutumau o ni tagata faamaoni o le Ekalesia a Iesu Keriso o le Au Paia o Aso e Gata Ai?
Aisea e manaomia ai ona tatou mauaina sauniga o le perisitua ma tausi feagaiga e fesootai i ai ina ia mafai ona latalata i le Atua?
Valaaulia tagata aoga a o latou suesue le Mataupu Faavae ma Feagaiga 84 e vaavaai mo aoaoga faavae ma mataupu faavae e mafai ona fesoasoani ia i tatou e malamalama pe aisea e manaomia ai ona avea i tatou ma tagata toaaga o le Ekalesia ma manaomia ona auai i sauniga o le perisitua.
Faamatala atu o Iosefa Samita na toe me’i ese mai Hairama i Katelani, Ohaio, i le aso 12 o Setema, 1832. I le masina lava lea, na toe foi mai ai nisi faifeautalai mai le talaiga i le itu sasae o le Iunaite Setete ma asiasi atu ia Iosefa Samita e lipoti atu a latou auaunaga faamisiona. I le aso 22–23 Setema, a o i ai Iosefa Samita ma nisi o nei faifeautalai, na ia fesili i le Alii ma maua ai le faaaliga o loo faamaumauina i le Mataupu Faavae ma Feagaiga 84.
Valaaulia se tagata aoga e faitau leotele le Mataupu Faavae ma Feagaiga 84:1–2 . Fai i le vasega e mulimuli i le faitauga, ma vaavaai pe aisea na faavae ai e le Alii le Ekalesia i aso e gata ai.
Aisea na faavae ai e le Alii le Ekalesia i aso e gata ai?
Faamalamalama atu o le fuaitau “toefuataiga o ona tagata” i le fuaiupu 2 e faasino i le faapotopotoina o Isaraelu ma le latou toe foi i feagaiga ma folafolaga na faia e le Alii ma Isaraelu anamua.
Valaaulia se tagata aoga e faitau leotele le Mataupu Faavae ma Feagaiga 84:3--6 . Fai atu i le vasega e mulimuli i le faitauga, ma vaavaai mo mea na manaomia e le Alii le Au Paia faapotopoto ona faia. Valaaulia tagata o le vasega e lipoti mai mea ua latou mauaina.
O le a le mea na folafola atu e le Alii e faia pe a fausia e le Au Paia le malumalu?
Faasino atu le fuaitau “atalii a Mose” i le fuaiupu 6, ma faamatala o lenei fuaitau e faatatau ia i latou o umia le Perisitua Mekisateko. Fai atu i se tagata o le vasega e faitau leotele le faamatalaga lenei:
“O lenei [fuaitau] o le amataga o se fuaiupu o loo faaauau i le [fuaiupu] 31. O mea uma e faalavelave e faatatau i ai, o loo i ai se faamatalaga e faatatau i le gafa lea na oo mai ai le Perisitua ia Mose ma Arona, ma le ala na toefuatai mai ai i o tatou aso” (Ailama M. Samita ma Janne M. Sjodahl, Doctrine and Covenants Commentary [1972], 498).
Ina ia fesoasoani i tagata aoga ia iloa pe faapefea ona faitau le fuaiupu e aunoa ma le faamalamalamaga o loo i totonu o fuaiupu 6--31, mafaufau e valaaulia tagata aoga e faailoga le vaega muamua o le fuaiupu i le fuaiupu 6 (“Ma atalii o Mose”) ma le vaega o totoe o le fuaiupu i le fuaiupu 31 (o loo amata i upu ia “ma atalii foi o Arona, o le a osia”). Faamatala atu o le fuaitau “atalii o Arona” e faatatau ia i latou o umia le Perisitua Arona. Valaaulia se tagata aoga e faitau leotele le fuaiupu atoa mai le fuaiupu 6 ma le 31 . Faamatala atu o lenei fuaiupu e fesoasoani ia i tatou e malamalama o le toefuataiga o le perisitua, pei ona faamatalaina i fuaiupu i pa puipui, na talafeagai mo le faataunuuina o sauniga o le malumalu.
Aotele le Mataupu Faavae ma Feagaiga 84:6--16 e ala i le faamatalaina o nei fuaiupu o loo i ai le gafa o le pule o le perisitua a Mose sei oo i tua ia Atamu.
Valaaulia se tagata aoga e faitau leotele le Mataupu Faavae ma Feagaiga 84:17-21 . Fai i le vasega e mulimuli i le faitauga, ma vaavaai mo mea na faaali mai e le Alii e uiga i le perisitua.
O le a le mea na faaalia e le Alii e uiga i le perisitua i le fuaiupu 7?
O le a le uiga o lena (fuaitau) “le perisitua tele,” po o le Perisitua Mekisateko, e umia “le ki o mealilo o le malo, o le ki lava lea o le malamalama e uiga i le Atua” (fuaiupu 19)? (Atonu e te manao, e faamatala atu e faapea, “o mealilo” o “upumoni faaleagaga e na o faaaliga e iloa ai” [Taiala i Tusitusiga Paia, Mealilo a le Atua,” scriptures.lds.org].)
A uma ona tali mai tagata aoga, faamatala atu na aoaoina e Iosefa Samita o le Perisitua Mekisateko “ma o le auala lea o le poto uma, aoaoga faavae uma, le ata o le faaolataga ma mataupu taua uma taitasi e faaalia mai le lagi” (Aoaoga a Peresitene o le Ekalesia: Iosefa Samita [2007], 108).
O le a le aoaoga faavae e mafai ona tatou iloa mai le fuaiupu 20 e uiga i sauniga o le Perisitua Mekisateko? (Fesoasoani i tagata aoga ia iloa le aoaoga faavae lea: O le mana o le amioatua e faaalia i sauniga o le Perisitua Mekisateko.)
Faamalamalama atu o le mana o le amioatua o le mana o le amiotonu, lea tatou te iloa ai le Atua ma avea ai e faapei o Ia (tagai Bruce R. McConkie, The Promised Messiah [1978], 589).
E tusa ai ma fuaiupu 21--22, o le a le mea e tupu pe afai e le i ai sauniga ma le pule o le Perisitua Mekisateko?
O a sauniga e faatinoina e ala i le pule o le Perisitua Mekisateko?
Faaali atu ia saunoaga ia mai ia Elder D. Todd Christofferson ma Elder David A. Bednar o le Korama a Aposetolo e Toasefululua, ma valaaulia se tamaitiiti aoga e faitau leotele: Valaaulia le vasega e vaavaai mo mea latou te aoao atu e uiga i le mana o le amioatua.
Ata
Elder D. Todd Christofferson
“O la tatou tautinoga o le feagaiga ia te Ia e faatagaina ai lo tatou Tama Faalelagi e tuu atu Lana uunaiga paia, ‘le mana o le faale-atua’ (MFF 84:20), e oo mai i o tatou olaga. E mafai ona Ia faia lena mea ona o tatou faatinoga o sauniga o le perisitua ua tatou faaaoga ai lo tatou faitalia ma filifili ai e talia. …
“I sauniga uma lava, aemaise o sauniga i le malumalu, e faaeeina ai i tatou i le mana mai luga. O lenei ‘mana o le faaleatua’ e sau i le tagata ma e ala i le tosinaga a le Agaga Paia” D. Todd Christofferson, “O Le Mana o Feagaiga,” Ensign po o le Liahona, Me 2009, 22).
Ata
Elder David A. Bednar
“O feagaiga e mauaina ma faamamaluina i le amiosa’o faapea ma sauniga e faatinoina i le pule tatau ai o le perisitua, e taua lea ina ia maua ai faamanuiaga uma ua avanoa e ala mai i le Togiola a Iesu Keriso. Ma o ona sauniga o le perisitua, ua faaalia mai ai le mana faaleatua i alii ma tamaitai i la le tino, e aofia ai faamanuiaga o le Togiola (tagai MF&F 84:20–21)” (David A. Bednar, “Tauave ma le Faigofie a Latou Avega,” Ensign po o le Liahona, Me 2014, 88).
E tusa ai ma le saunoaga a Elder Christofferson, o le a le mana o le amioatua?
O le a se mea e mafai ona tatou faia ina ia maua ai le mana o le amioatua i o tatou olaga?
E tusa ai ma le saunoaga a Elder Bednar, o a faamanuiaga e oo mai i o tatou olaga pe a tatou mauaina sauniga o le Perisitua Mekisateko ma faamamalu a tatou feagaiga?
Fai atu i tagata aoga e mafaufau loloto pe na faapefea ona faaalia le mana o le amioatua i o latou olaga ao latou mauaina ia sauniga o le Perisitua Mekisateko ma tausia a latou feagaiga. Valaaulia ni nai tagata aoga e faasoa mai o latou manatu ma aafiaga i le vasega. (Faamanatu atu i tagata aoga e aua nei faasoa maia ni mea e patino tele pe paia). Fuafua foi e faasoa atu sau aafiaga.
Uunaia tagata aoga e taumafai e maua uma sauniga o le perisitua latou te mafaia ma tausi ma le faamaoni a latou feagaiga ina ia mafai ai e le mana o le amioatua ona faaali atu i o latou olaga.
Valaaulia tagata aoga e faitau le leoa le Mataupu Faavae ma Feagaiga 84:23--24 , vaavaai mo le auala na faaalia ai e le Alii le taua o le mauaina o sauniga o le Perisitua Mekisateko.
O le a le mea na faia e le fanauga a Isaraelu e lafoai ai le mauaina o le mana o le amioatua i o latou olaga?
Aotele fuaiupu 25--32 e ala i le faamatalaina ona o le maaa o loto o le fanauga a Isaraelu, na aveesea ai ki o le Perisitua Mekisateko ma ona sauniga mai i tagata. Ae peitai, na faatagaina i latou e le Alii e tausia le Perisitua Arona. Na faamalamalama mai foi e le Alii o atalii o Mose ma atalii o Arona, po o i latou o umia le perisitua, o le a auauna atu i le malumalu lea o le a fausia i Siona (tagai MFF 84:31--32).
Tusi upu nei Feagaiga ma le Folafolaga o ulutala i luga o le laupapa. Fai atu i ni nai tagata aoga e auauai i le faitauina leotele o le Mataupu Faavae ma Feagaiga 84:33--44. Fai atu i le afa o le vasega e vaavaai mo feagaiga e ulu atu i ai se tasi e avea o se vaega o le tautoga ma le feagaiga o le perisitua. Fai atu i le isi afa e vaavaai mo folafolaga e faia e le Alii ia i latou o e faamaoni i lenei tautoga ma le feagaiga. Valaaulia ni nai tagata aoga e tusi mea na latou mauaina i luga o le laupapa i lalo o le ulutala talafeagai.
E faapefea ona e aoteleina nei feagaiga ma folafolaga o se mataupu faavae? (E mafai e tagata aʻoga ona faʻaaoga upu eseese, ae ia mautinoa latou te iloa se mataupu faavae e pei o lea: Afai o i latou o e mauaina ma le faamaoni le perisitua o le a faalauteleina o latou valaauga, talia le Alii ma Ana auauna, ma gauai atu i upu o le ola e faavavau, ona faapaiaina lea o i latou e le Atua ma tuuina atu ia te i latou mea uma ua ia te Ia. Tusi le mataupu faavae lenei i luga o le laupapa.)
Ina ia fesoasoani i tagata aoga ia malamalama i le uiga o le mauaina o le perisitua, faaali atu le faamatalaga lenei a Elder Paul B. Pieper o le Fitugafulu, ma valaaulia se tagata aoga e faitauina leotele:
Ata
Elder Paul B. Pieper
“O faamanuiaga atoa o le perisitua e maua faatasi e se tane ma se ava po o le leai lava.
“E malie i le tautoga ma feagaiga o le perisitua, ua faaaogaina ai e le Alii le veape maua ma le taliaina. Na te le o faaaogaina le veape faauu. O totonu o le malumalu e mafai ai e alii ma tamaitai — faatasi — ona maua ma taliaina ia faamanuiaga ma le mana o le perisitua Arona ma le Mekisateko” (Paul B. Pieper, “O Mea Moni o le Olaga Faaletino ua Faaalia,” Liahona, Ian. 2016, 21).
Tagai i le mataupu faavae o loo i luga o le laupapa.
O le a le uiga o le faalauteleina o valaauga e te mauaina e ala i le pule o le perisitua?
O le a sou manatu o le uiga o le talia o auauna a le Alii? Aisea e le mafai ai ona tatou talia le Alii ae le taliaina Ana auauna?
Na faamatala mai e le Alii le mafuaaga o le i ai o le lalolagi i le pogisa ma apoapoai atu i le Au Paia ia salamo
Valaaulia tagata aoga e faitau le leoa le Mataupu Faavae ma Feagaiga 84:45--48 , vaavaai po o le a le mea o le a tupu ia i latou e maelega e faalogo i le afioga a le Atua.
O le a le mea o le a tupu ia i latou e maelega e faalogo i le afioga a le Atua?
Valaaulia se tagata aoga e faitau leotele le Mataupu Faavae ma Feagaiga 84:49-53 . Fai atu i le vasega e vaavaai mo le fetalaiga a le Alii e uiga ia i latou o e le faalogo i Lona siufofoga.
Na faapefea ona faamatalaina e le Alii i latou o e le faalogo i Lona siufofoga?
Valaaulia tagata aoga e faitau le leoa le Mataupu Faavae ma Feagaiga 84:54--59 , vaai pe o le a le lelei na usitaia ai e le Au Paia i Siona ia upu a le Atua.
E tusa ai ma le fuaiupu 57, o le a le mea na manatu mama i ai le Au Paia?
Faamanino atu “o poloaiga muamua” i le fuaiupu 57 e mafai ona faatatau i faaaliga muamua atu i le Mataupu Faavae ma Feagaiga ma aoaoga mai le Tusi Paia.
O le a le aoaoga faavae e mafai ona tatou iloa mai fuaiupu 54--58 e faatatau i taunuuga o le le talitonu po o le manatu mama i le upu a le Atua? (Fesoasoani i tagata aoga ia iloa le aoaoga faavae lea: Afai tatou te le talitonu i le upu a le Atua pe manatu mama i ai, o le a faapogisaina o tatou mafaufau ma o le a i ai i tatou i lalo o le tausalaga.)
Faamanino atu o le i ai i lalo o le tausalaga o le faamasinoina lea e le Atua ona o le musu e talia ma usiusitai i le malamalama ma le poto na faaalia e Ia (tagai Guide to the Scriptures, “Condemn, Condemnation,” scriptures.lds.org; MF&F 93:31–32).
E mafai faapefea e le le talitonu po o le manatu mama i le upu a le Atua ona mafua ai le faapogisaina o le mafaufau o se tagata?
Ua poloaiina e le Alii le Au Paia e avatu le talalelei i le lalolagi atoa ma faatonuina i latou ua valaauina e talai
Aotele le Mataupu Faavae ma Feagaiga 84:60--120 i le faamatala atu e faapea, na poloaiina e le Alii le Au Paia e folafola atu le talalelei i le lalolagi atoa. Na folafola mai e le Alii afai e mananao le Au Paia “ia teu i o [latou] mafaufau e lē aunoa afioga o le [Atua],” Na te musuia i latou ia iloa le mea e tau atu pe a faasoa atu le talalelei (MFF 85:85). Na poloaiina e le Alii i latou o e malolosi i le Agaga e faamalamalama ma faamalolosia i latou o e vaivai ma faamalamalama atu ao galulue le Au Paia i o latou valaauga eseese, e mafai ona latou faamalosia le Ekalesia ma faagaeetia e le tasi le isi.
Faaiu le lesona e ala i le faasoa atu o lau molimau i upumoni na aoaoina i le Mataupu Faavae ma Feagaiga 84. Valaaulia tagata aoga e faaaoga mea na latou aoaoina.