I le aso 16 o Fepuari, 1832, sa galulue ai Iosefa Samita ma Sini Rikitone i toe iloiloga musuia o le Tusi Paia (ua ta’ua o le Faaliliuga a Iosefa Samita). A o faaliliuina e Iosefa Samita le Ioane 5:29, sa manatunatu loloto i la’ua ma Sini i le uiga o le fuaiupu ma sa faaali mai ia i la’ua se faaaliga, lea o loo tusia i le Mataupu Faavae ma Feagaiga- 76. I lea faaaliga, na faamautu mai ai e le Faaola Lona moni ma le paia, na aoao mai ai e uiga i le pau o Satani ma atalii o le malaia, ma sa faaalia mai ai le natura o malo e tolu o le mamalu ma i latou o le a fai mo latou tofi.
O leMataupu Faavae ma Feagaiga 76 o le a aoaoina i ni lesona se lua. O le lesona lenei e aofia ai le Mataupu Faavae ma Feagaiga 76:1–49, lea e aofia ai faamanuiaga folafolaina a le Alii i e faamaoni, ua molimauina e Iosefa Samita ma Sini Rikitone le Tama ma le Alo, ma se tala i le pau o Lusifelo ma atalii o le malaia.
25 Ianuari, 1832Na faauuina Iosefa Samita o le Peresitene o le Perisitua Maualuga i le taimi o se konafesi a le Ekalesia i Amherst,Ohaio.
Faaiuga o Ianuari 1832Na toe foi Iosefa Samita ma Sini Rikitone i Hairama, Ohaio, e galulue ai i le faaliliuga musuia o le Feagaiga Fou.
24--25 Mati, 1832Na aveina ai Iosefa Samita ma Sini Rikitone e se au faatupu faalavelave, sasaina faamo’amo’a, ma valitaina ma faapipii i ai fulumanu i Hairama, Ohaio.
Ua folafola mai e le Alii faamanuiaga ia i latou o e auauna atu ia te Ia
Valaaulia le tagata aoao e mafaufau i se taimi na latou faitau ai pe ta’uina atu foi i ai se mea e faapea sa latou manatu e sa’o ae iloa mulimuli ane e leai. Fai atu i se tagata se toatasi pe toalua o le vasega e faamalamalama mai o la’ua aafiaga.
O le a se mea e mafai ona tatou faia e aoao ai ma iloa le upumoni?
Faamatala atu sa i ai se aafiaga faapena o le Perofeta o Iosefa Samita i lona malamalama i mea e tutupu ia i tatou pe a mavae lenei olaga. Sa soifua le Perofeta i se taimi o le toatele lava o lotu Kerisiano sa talitonu i se olaga i tua atu o lenei olaga e aofia ai na o le lagi po o seoli: o e amiotonu e o i le lagi ae o e amioleaga e o i seoli. A o toe amata e Iosefa Samita ma Sini Rikitone le faaliliuga o le Tusi Paia i Hairama, Ohaio, sa la manatunatu loloto i lenei talitonuga o le na o le lagi po o seoli.
Valaaulia se tagata aoao e faitau leotele le faaulutala o le Mataupu Faavae ma Feagaiga 76 Fai i le vasega e vaavaai mo mea na afua ai ona fesili le Perofeta i lenei manatu faavae o le olaga i tua atu o le olaga nei, ma valaaulia le vasega e lipoti mai mea latou te maua.
Faamatala atu a o manatunatu loloto le Perofeta, sa faaali atu ia te ia ma Sini Rikitone e le Alii se faaaliga e faailoa atu ai auiliiliga e uiga i le ata o le faaolataga (tagai MF&F 76:11--112). A o folasia mai e le Alii lenei faaaliga mamalu, sa Ia folafola atu faamanuiaga maoae i tagata o le Ekalesia o e faamaoni ma faatuatua (tagai MF&F 76:1--10).
Aotele le Mataupu Faavae ma Feagaiga 76:1--5 i le faamatala atu o nei fuaiupu o loo faamatala mai ai uiga o le Alii, e aofia ai Lona poto, mana, natura e faavavau, alofa mutimutivale, ma le alofa tunoa.
Valaaulia se tagata aoao e faitau leotele le Mataupu Faavae ma Feagaiga 76:5--6 Fai i le vasega e mulimuli ai, ma vaavaai pe o ai o le a maua le alofa mutimutivale ma le alofa tunoa ma pe o ai e fiafia le Alii e faamamaluina.
O le a le mea e tatau ona tatou faia e valaaulia ai le alofa mutimutivale ma le alofa tunoa o le Alii? (Faamalamalama atu i le talaaga lea, o le matau i le Alii o lona uiga ia migao, faaaloalo, ma alolofa ia te Ia.)
O le a le mea na fetalai mai le Alii e fiafia o Ia e faamamaluina?
Tusi le fasifuaitau lea i luga o le laupapa: Afai tatou te migao i le Alii ma auauna atu ia te Ia i le amiotonu ma i le upumoni, o le a Ia …
Valaaulia tagata o le vasega e faitau le leoa le Mataupu Faavae ma Feagaiga 76:7–9 ma vaavaai mo faamanuiaga e tuu atu e le Alii ia i latou o e migao ma auauna atu ia te Ia. Mafaufau e valaaulia tagata o le vasega e maka mea latou te maua ia latou tusitusiga paia.
E tusa ai ma nei fuaiupu, o a faamanuiaga e oo mai ia i latou o e migao ma auauna atu i le Alii? (Atonu e te manao e faamatala atu i tagata o le vasega o le upu mealilo i le fuaiupu e 7 e faatatau i upumoni faaleagaga ia e na o faaaliga e iloa ai.)
E faavae i nei fuaiupu, e mafai faapefea ona tatou faamaeaina le mataupu faavae o i luga o le laupapa? (A uma ona tali mai le vasega, faamaea le faamatalaga o i le laupapa ina ia avatu ai le mataupu faavae lea: Afai tatou te migao i le Alii ma auauna atu ia te Ia i le amiotonu ma i le upumoni, o le a Ia faaali mai ia i tatou le upumoni.)
Valaaulia se tagata aoga e faitau leotele le Mataupu Faavae ma Feagaiga 76:10 . Fai i le vasega e mulimuli i le faitauga, ma vaavaai pe faapefea ona faaalia mai e le Alii upumoni ia i latou o e migao ma auauna atu ia te Ia.
E faapefea ona faaalia e le Alii le upumoni ia i latou o e migao ma auauna atu ia te Ia?
Ta’u atu i ai le tulaga ese o le faatomuaga a le Alii o lenei faaaliga maoae i le faavavau e ala i le aoao mai o le matafaioi tutotonu a le Agaga i le mauaina o faaaliga. Valaaulia le vasega e mafaufau i taimi na aoao ai i latou ma faamalamalamaina e le Agaga. Valaaulia ni nai tagata o le vasega e faasoa mai o latou aafiaga i le vasega. Atonu e te manao e faamanatu i tagata o le vasega e aua nei faasoa maia se mea e paia pe patino i le tagata lava ia.
Na vaai Iosefa Samita ma Sini Rikitone i le Tama Faalelagi ma Iesu Keriso
Valaaulia se tagata o le vasega e faitau leotele le Mataupu Faavae ma Feagaiga 76:11-14 . Fai i le vasega e mulimuli i le faitauga, ma vaavaai mo se faataunuuga o folafolaga o loo ta‘ua i fuaiupu e 5–10.
O a ni auala na avea ai le aafiaga o Iosefa Samita ma Sini Rikitone o se faataunuuga o folafolaga o loo ta‘ua i le fuaiupu 5–10?
E tusa ai ma le fuaiupu 12, o le a le aafiaga na i o latou luga ona o le mana o le Agaga?
Valaaulia se tagata aoao e faitau leotele le Mataupu Faavae ma Feagaiga 76:15--19 Fai i le vasega e vaavaai mo mea na faia e Iosefa Samita ma Sini Rikitone e saunia ai i latou lava ia maua ia le faaaliga.
O a mea na faia e Iosefa Samita ma Sini Rikitone na saunia ai i laua e maua le faaaliga? (Sa la mafaufau loloto e uiga i le faaliliuga musuia o le Ioane 5:29.)
O le a le uiga o le manatunatu loloto i tusitusiga paia? (O tali e ono aofia ai le manatunatu loloto po o le mafaufau e uiga i mea o loo e faitauina, faia o fesili e uiga i mea o loo e faitauina, ma mafaufau pe faapefea ona fesootai i lou olaga ia upumoni na e maua.)
O le a le mataupu faavae e mafai ona tatou aoao mai le faataitaiga a Iosefa Samita ma Sini Rikitone e uiga i le mea e mafai ona tatou faia ia maua ai faaaliga e ala mai i le Agaga Paia? (E tatau i tagata o le vasega ona faailoa mai se mataupu faavae e pei o lea: A o tatou suesue ma mafaufau loloto i tusitusiga paia, ua tatou saunia i tatou lava e maua faaaliga mai le Alii e ala i le Agaga Paia.)
Faamalamalama atu o le vaaiga na iloa e le Perofeta ma Sini Rikitone o se tasi o faaaliga tulaga ese o le Toefuataiga. Faaali atu le saunoaga lenei mai ia Peresitene Uilifoti Uitilafi (1807–1898), ma valaaulia se tagata o le vasega e faitau leotele:
Ata
Peresitene Wilford Woodruff
“O le a ou talanoa e uiga i le ‘Faaaliga Vaaiga’ [i le vaega 76] na o lea lava, o se faaaliga ua tuuina atu ai se malamalama e sili atu, upumoni e sili atu ma aoaoga faavae e sili atu nai lo se isi lava faaaliga o loo i ai i se isi lava tusi ua tatou faitauina” (Aoaoga a Peresitene o le Ekalesia: Wilford Woodruff [2004], 120).
Fai i ni nai tagata aoao e auauai i le faitauina leotele mai o le Mataupu Faavae ma Feagaiga 76:19--24. Fai i le vasega e mulimuli i le faitauga, ma vaavaai mo le mea na vaai ma faalogo i ai Iosefa Samita ma Sini Rikitone.
O le a le mea na vaai ma faalogo i ai le Perofeta o Iosefa ma Sini Rikitone i le faaaliga vaaia? O le a le mea na la faalogo i ai?
Valaaulia tagata o le vasega e talanoaina ma se paga po o a upumoni faaleaoaoga faavae e faatatau i le Faaola o Iesu Keriso e mafai ona latou faailoa mai i nei fuaiupu. A uma ua lava se taimi, valaaulia ni nai tagata e faasoa mai i le vasega mea sa latou faailoa mai i nei fuaiupu. Valaaulia se tagata e tusi ia upumoni faaleaoaoga faavae i luga o le laupapa a o faailoa mai e le vasega. I upumoni faaleaoaoga faavae e tatau ona faailoa mai e le vasega o nisi nei: O Iesu Keriso o se tagata soifua, ua faamamaluina. O le Tama Faalelagi ma Iesu Keriso, o ni tagata mavaevae ma eseese. O Iesu Keriso o le Foafoa o lenei lalolagi ma isi lalolagi. E ala ia Iesu Keriso, o i tatou o atalii ma afafine na fanaua ele Atua.
Tusi mea ia i luga o le laupapa i lalo o le lisi o upumoni faaleaoaoga faavae:
O fea o nei upumoni e sili ona e faafetai ai? Aisea?
O le a se mea ua e iloa e moni e faatatau i le Faaola o Iesu Keriso?
Valaaulia tagata aoao e filifili se tasi o fesili nei ma faasoa atu a latou tali i a latou paga. A uma se taimi o tagata o le vasega e fefaasoaai ai o latou mafaufauga ma molimau, e mafai ona e mafaufau e valaaulia le vasega e usu le “Ua ou Iloa Lou Faaola” (Viiga, nu. 73) e saga valaaulia ai le Agaga e molimau atu i upumoni sa outou talanoaina.
Sa vaai Iosefa Samita ma Sini Rikitone i le fouvale o Lusifelo i le muai olaga.
Valaaulia se tagata aoao e faitau leotele le Mataupu Faavae ma Feagaiga 76:25–27 Fai i le vasega e mulimuli i le faitauga, ma vaavaai mo le mea na sosoo ai sa vaai i ai Iosefa Samita ma Sini Rikitone i le faaaliga vaaia.
O le a le mea na aoaoina e Iosefa Samita ma Sini Rikitone e uiga ile mea na faia e Lusifelo i le muai olaga?
Faamalamalama atu o le igoa Lusifelo “o lona uiga o le ‘O Le Susulu’ po o le ‘Le e tauaveina le sulu’” (Taiala i Tusitusiga Paia, “Lusifelo,” scriptures.lds.org).
O le a le mea na tupu ia Lusifelo ona sa ia fouvale i le Alo Pele e Toatasi o le Tama Faalelagi, o Iesu Keriso? (Atonu e manaomia ona e faamalamalama atu o le uiga o le igoa Malaia o le faiaina po o le faatafunaga.)
Valaaulia se tagata aoao e faitau leotele le Mataupu Faavae ma Feagaiga 76:28–29 Fai i le vasega e mulimuli ai, ma vaavaai mo mea na poloaiina e le Alii ia Iosefa Samita ma Sini Rikitone e fai ina ua uma ona la vaai i le faaaliga vaaia o le fouvale a Lusifelo i le muai olaga.
O le a le mea na poloaiina e le Alii ia Iosefa ma Sini e fai?
E tusa ai ma le fuaiupu 29, o le a le mea o faia e Satani i le lalolagi e pei foi o le mea sa ia faia i le muai olaga? (Faamalamalama atu o le upu si’o faataamilo o lona uiga ua siomia atoa.)
O a auala o loo siitaua ai Satani i le Au Paia a le Atua i aso nei?
Ua vaai Iosefa Samita ma Sini Rikitone i se faaaliga vaaia i puapuaga o atalii o le malaia
Aotele le Mataupu Faavae ma Feagaiga 76:30 i le faamalamalama atu faapea na vaai Iosefa Samita ma Sini Rikitone i le mea o le a tupu ia i latou o e faatoilaloina e Satani.
Valaaulia ni nai tagata o le vasega e feauauai i le faitauina leotele o le Mataupu Faavae ma Feagaiga 76:31--38. Fai i le vasega e vaavaai mo mea na fetalai ai le Alii e uiga ia i latou o e faatoilaloina e Satani.
I le fuaiupu 32, o le a le igoa na avatu e le Alii ia i latou o e faatoilaloina e Satani?
E tusa ai ma fuaiupu 31 ma le 35, o a filifiliga e tau atu i le avea ma atalii o le malaia?
Ta’u atu i ai, na faamalamalama mai e le Perofeta o Iosefa Samita e faapea ina ia avea o se atalii o le malaia, “e tatau i se tasi ona maua le Agaga Paia, talai atu ia te ia pupuni o le lagi, ma iloa le Atua, ona agasala ai lea ia te ia”(Manuscript History of the Church, vol. E-1, p. 1976, josephsmithpapers.org).
Valaaulia se tamaitiiti aoga e faitau leotele le faamatalaga lenei a Peresitene Spencer W. Kimball: (1895–1985):
Ata
Peresitene Spencer W. Kimball
“O le agasala e faasaga i le Agaga Paia e manaomia ai se ituaiga o malamalama ua iloa lelei le faigata i tagata masani ona faia se agasala faapea” (Spencer W. Kimbll, O Le Vavega o le Faamagaloga Atu [1969], 123).
I fuaiupu 32--38, o le a le mea e tulaga ese mai ia te oe e uiga i le puapuaga o le a oo i ai atalii o le malaia i le faavavau? (Ta’u i ai o le fasifuaitau “ua na o i latou lava ia o e lo le a le togiolaina i le taimi tatau ai a le Alii” [fuaiupu 38] o lona uiga o atalii o le malaia ua na o le pau ia o tagata sa ola i le lalolagi o le a le mauaina se vaega o le mamalu o le Atua pe a uma ona latou toetutu mai [tagai 1 Korinito 15:22; MF&F 88:27--32].)
Ta’u i tagata o le vasega o le Mataupu Faavae ma Feagaiga 76:45--49, na aoao ai e Iosefa Samita ma Sini Rikitone e leai se tasi e mafai ona malamalama atoatoa i mafatiaga o atalii o le malaia vagana ai i latou o e ua i ai le poto masani mo i latou lava.
Valaaulia se tagata e faitau leotele le Mataupu Faavae ma Feagaiga 76:39–43 Fai i le vasega e mulimuli i le faitauga, ma vaavaai mo le mea o le a tupu i isi fanau uma a le Atua.
O le a le mea o le a tupu i isi fanau uma a le Atua?
O le a le mea ua mafai ai le faaolataga o tagata?
O le a se aoaoga faavae e mafai ona tatou aoao mai i nei fuaiupu pe o ai o le a faasaoina e ala i le Togiola a Iesu Keriso? (A uma ona tali mai le vasega, tusi le aoaoga faavae lea i luga o le laupapa: E ala i le Togiola a Iesu Keriso, o le a faasaoina fanau uma a le Atua sei vagana ai atalii o le malaia.)
Faamatala atu i le matalalaga lea, o le upu faasaoina o lona uiga o le agavaa ma mafai ona maua se nofoaga i se malo o le mamalu e ala i le Togiola a Iesu Keriso.
Aisea e te manatu ai o lenei aoaoga faavae ua ta’ua o le “talalelei” (fuaiupu 40)?
Faaiu i le faasoa atu o lau molimau i upumoni sa faailoa mai i lenei lesona.