Lesona 47: Mataupu Faavae ma Feagaiga 121:11–46

“Lesona 47: Mataupu Faavae ma Feagaiga 121:11–46,” Tusi Lesona a le Faiaoga o Mataupu Faavae ma Feagaiga (2017)

“Lesona 47,” Tusi Lesona a le Faiaoga o Mataupu Faavae ma Feagaiga

Lesona 47

Mataupu Faavae ma Feagaiga 121:11–46

Faatomuaga ma le Faasologa o Taimi

I le aso 31 Oketopa, 1838 sa aveina ai faapagota e le au fitafita a le setete o Misuri le Perofeta o Iosefa Samita ma isi taitai o le Ekalesia i Fa Uesi, Misuri. O nei alii sa iu ina faafalepuipuiina i le Falepuipui o Liperate i le Itumalo o Clay, ma sa matua puapuagatia ai mo le fa masina na lokaina ai. A o i ai i le Falepuipui o Liperate, sa faalauina ai e le Perofeta se tusi i tagata o le Ekalesia i le aso 20 Mati, 1839, ma le tusi lona lua pe tusa e lua aso mulimuli ane, lea sa ia faamatalaina ai ia faamasinoga o le a pagatia ai e amioleaga faapea foi faamanuiaga ua folafola mai i e “tumau ma le lotototoa” (MFF 121:29). Sa aoao atu foi e le Perofeta o Iosefa Samita ia mataupu faavae e uiga i le pule ma le mana o le perisitua. O vaega o nei tusi o loo tusia i le Mataupu Faavae ma Feagaiga 121:11–46.

Aokuso--Oketopa 1838O le le malamalama ma vesiga i le va o tagata o le Ekalesia ma isi tagata o Misuri sa matuai faateteleina ma iu ai ina tau faaauupegaina.

27 Oketopa, 1838Sa faatagaina e Kovana o Lilburn W. Boggs le fasiotia po o le tutulieseina uma o le Au Paia o Aso e Gata Ai mai le setete o Misuri.

30 Oketopa, 1838Sa osofaia e le au faaooosala le talitonu i Mamona ia tagata o le Ekalesia i pitonuu o Hawn’s Mill, e tu i le 12 maila i sasae o Fa Uesi, ma sa fasiotia ai tamaloloa e 17 ma tama ma manunu’a ai le isi 13.

31 Oketopa, 1838Sa ave faapagotaina ai le Perofeta o Iosefa Samita ma isi e le au fitafita a le setete o Misuri i Fa Uesi, Misuri.

1 Tesema, 1838Sa faafalepuipuiina le Perofeta o Iosefa Samita ma ana soa i le Falepuipui o Liperate i le Itumalo o Clay, Misuri.

20--22 Mati, 1839Sa faalau mai ai e le Perofeta o Iosefa Samita ni tusi mai le Falepuipui o Liperate, o loo tusia ni vaega i le Mataupu Faavae ma Feagaiga 121–23 121–23.

6 Aperila, 1839Sa aveina le Perofeta o Iosefa Samita ma ana soa mai le Falepuipui o Liperate i Gallatin, Misuri, mo se tolaulauga i le faamasinoga. I le aso 16 Aperila, 1839 na faatagaina ai i latou e sosola mai le falepuipui, ma sa latou toe faatasia ma le Au Paia i Ilinoi.

Fautuaga mo le Aoaoina Atu

Mataupu Faavae ma Feagaiga 121:11-25

Ua faamatala e le Faaola ia faamasinoga o le a oo mai i luga o i latou o e tetee i Lana galuega.

Valaaulia tagata aooga e mafaufau e uiga i se tagata o le Ekalesia latou te iloa sa oo i ni faiga tuga ae sa filifili e tumau faamaoni.

Aisea e te manatu ai na filifili e lenei tagata e tumau faamaoni e oo lava i taimi o puapuaga?

Valaaulia tagata o le vasega e vaavaai mo aoaoga faavae ma mataupu faavae a o latou suesueina le Mataupu Faavae ma Feagaiga 121 e mafai ona fesoasoani ia i latou e tumau faamaoni ai i taimi o faigata.

Faamanatu i tagata aooga o le Perofeta o Iosefa Samita ma ni nai taitai o le Ekalesia sa onosaia puapuaga matautia a o faafalepuipuiina i latou i le Falepuipui o Liperate mai le aso 1 Tesema 1838, i le aso 6 Aperila, 1839. I le taimi lena, sa matuai mafatia ai foi tagata o le Ekalesia i Misuri. Ina ua uma ona faatonuina e Kovana Lilburn W. Boggs le tutulieseina o Mamona uma mai le setete o Misuri ia Oketopa 1838, sa lafoai e tagata o le Ekalesia o latou fale ma le tele o a latou meatotino ae o atu ma sopoia le Vaitafe o Misisipi i se taumalulu maatiati. O le toatele o nei Au Paia na iu i nai pitonuu laiti i Ilinoi, lea sa latou tauivi ai e sue ni meaai ia lava ma ni malutaga. Ia Mati 1839, a o i ai pea lava i le falepuipui, sa tusia ai e le Perofeta ni tusi se lua i tagata o le Ekalesia ia sa aofia ai ana tatalo e faatatau i o latou puapuaga ma tali sa ia mauaina i na tatalo, faatasi ai ma ana fautuaga i “Au Paia mafatia” (MFF 121:6). O vaega o nei tusi o loo tusia i le Mataupu Faavae ma Feagaiga 121:11–46.

Valaaulia se tagata aoga e faitau leotele le Mataupu Faavae ma Feagaiga 121:1–3 . Fai i le vasega e mulimuli i le faitauga, ma vaavaai mo fesili na fai atu e Iosefa Samita i le Alii.

E faapefea ona e aoteleina mea na fesili atu ai le Perofeta i le Alii?

Faamalamalama atu e pei ona faamaumauina i le Mataupu Faavae ma Feagaiga 121:7–25, sa ofoina atu e le Alii le faamafanafanaga ma le faamautinoaga i le tali atu i fesili a le Perofeta. Sa faamatala atu foi i ai e le Alii le mea o le a tupu ia i latou o e sauaina le Au Paia. Valaaulia ni tagata e auauai i le faitauina leotele o le Mataupu Faavae ma Feagaiga 121:16–20, 23–25. Fai i le vasega e mulimuli i le faitauga, ma vaavaai po o a mea na ta’u atu e le Alii o le a tupu ia i latou o e sauaina le Au Paia.

O le a le mea na fetalai le Alii o le a tupu ia i latou o e sauaina le Au Paia?

Mataupu Faavae ma Feagaiga 121:26-33

Ua aoao mai e le Perofeta e faapea o le a faaali mai e le Alii upumoni e faavavau e ala i le Agaga

Ta’u i ai e na o ni nai vaega o tusi a le Perofeta o Iosefa Samita ia Mati 1839 o loo aofia ai i le Mataupu Faavae ma Feagaiga 121–23. I se vaega o lenei tusi o le aso 30 Mati, 1839, lea e le o tusia i le Mataupu Faavae ma Feagaiga121–23 ae o lea na tamua vave mai i le folafolaga o loo faamaumauina i le Mataupu Faavae ma Feagaiga 121:26, na fautua mai ai le Perofeta i le Au Paia ia tumau faamaoni i o latou mafatiaga ma faaauau pea i le tatalo ma le lotofaamaoni (tagai The Joseph Smith Papers, Documents, Volume 6: February 1838–August 1839, ed. Mark Ashurst-McGee and others [2017], 369; sipelaga, faailoga, ma le faamataitusi tetele ua faalaugatasia). O le mulimuli ai i lenei fautuaga, o le a agavaa ai le Au Paia mo le faamanuiaga folafolaina o loo tusia i le fuaiupu 26.

Valaaulia ni nai tagata o le vasega e feauauai i le faitauina leotele mai le Mataupu Faavae ma Feagaiga 121:26–32. Fai atu i le vasega e mulimuli i le faitauga, ma vaavaai mo mea na folafola atu i tagata faamaoni o le Ekalesia.

E tusa ai ma le fuaiupu 26, o le a le mea na folafola atu i tagata faamaoni o le Ekalesia?
E faavae i mea na folafola atu i le Au Paia, o le a le aoaoga faavae e mafai ona tatou faailoa mai e tusa ai ma le auala o le a faaalia mai ai e le Alii le upumoni ia i tatou? (A uma ona tali mai tagata o le vasega, tusi le aoaoga faavae lenei i luga o le laupapa: E faaalia mai e le Alii le upumoni e ala i le Agaga Paia.)
E tusa ai ma fuaiupu 27–32, o le a le mea o le a faaali ia i “latou uma o e na tumau ma le lototoa mo le talalelei a Iesu Keriso” (verse 29)? (A uma ona tali mai tagata o le vasega, tusi le mataupu faavae lea i le laupapa: O le a faaalia upumoni uma ia i laotu o e sa tumau ma le lotototoa mo le talalelei a Iesu Keriso.)
Na mafai faapefea e le iloaina o lenei mataupu faavae ona fesoasoani i le Au Paia e tumau faamaoni ai i le taimi o o latou puapuaga?

Valaaulia tamaiti e faitau le leoa le Mataupu Faavae ma Feagaiga 121:33 ma vaavaai mo le talafaatusa sa faaaoga e faamamafa mai ai e leai se tasi e mafai ona taofia le Alii mai le “sasaa mai i lalo o le malamalama … i luga o ulu o le Au Paia.”

O le a le talafaatusa o loo faaaoga e faamamafa mai ai faapea e leai se tasi e mafai ona taofia le Alii mai le “sasaa mai i lalo o le malamalama … i luga o ulu o le Au Paia.”

Molimau atu o le a faaalia mai e le Alii upumoni e ala i le Agaga Paia ma afai tatou te tumau ma le lotototoa, o le a faaalia mai e le Alii mea uma ia i tatou.

Mataupu Faavae ma Feagaiga 121:34-46

Ua aoao mai e le Perofeta o Iosefa Samita o aia tatau o le perisitua e fesootai ma mana o le lagi

Faaali atu le fuaitau lenei a Peresitene Russell M. Nelson o le Korama a Aposetolo e Toasefululua, ma valaaulia se tamaitiiti aoga e faitau leotele:

“E lei leva atu, sa ma i ai ma Wendy i se sauniga lea sa malualii ma saunia ai le taokeni e ta le viiga amata. Sa pulatoa atu ona mata i le musika, ma o ona tamatamailima sa i luga o ki. Sa amata ona ia oomiina ki, ae sa leai se leo. Sa ou musumusu atu ia Wendy, ‘E leai sona mana.’ Sa ou manatu e i ai se mea ua taofia le alu atu o le eletise i lena okeni.

“Ia, uso e, i se tulaga foi faapena, ou te fefe ua toatele naua alii o e ua tuuina atu i ai le pule o le perisitua ae e leai se manao le perisitua” (Russell M. Nelson, “O Le Tau o le Mana o le Perisitua,” Ensign po o le Liahona, Me 2016, 67).

E faapefea ona e faamatalaina le eseesega i le va o le pule o le perisitua ma le mana o le perisitua?
O le a se mea e ono afua ai ona “leai se mana o le perisitua” i e o umia le perisitua?

Faamalamalama atu e pei ona faamaumauina i le Mataupu Faavae ma Feagaiga 121:34–46, sa aoao mai ai e le Perofeta o Iosefa Samita i latou e umia le perisitua le auala e agavaa ai mo le mana o le perisitua. Ona o tagata uma o le Ekalesia, tane ma fafine, e mauaina le pule ma le mana o le perisitua a o latou auauna atu ma le amiotonu i le malo, o nei fuaiupu o loo i ai mataupu faavae e faatatau i tagata uma o le Ekalesia.

Valaaulia se tagata e faitau leotele le Mataupu Faavae ma Feagaiga 121:34–36 . Fai i le vasega e mulimuli i le faitauga, ma vaavaai mo mea na aoao mai e le Perofeta e uiga i le mana o le perisitua.

Tusi i le laupapa le ata lea e leai ni igoa. Valaaulia tagata aooga e tusi le ata lava lea i se fasipepa ma faaigoa e fua i mea sa latou aoao mai le Mataupu Faavae ma Feagaiga 121:34–36. A uma ua lava se taimi, valaaulia se tasi pe sili atu foi o tagata o le vasega e faaaoga mea sa latou tusia ia latou pepa e faaigoa ai le ata o i le laupapa ma faamalamalama mai pe aisea ua latou faaigoa ai faapena. (Atonu o le a o mai tamaiti ma ni mau auala e faaalia ai manatu e maua i fuaiupu nei.)

Ata

ata e lei faaigoaina, mana o le lagi

Afai e tatau ai, mafaufau e faaopoopo i le ata o i le laupapa ia atagia mai ai faamatalaga o loo faaalia i le ata lea ua maea.

Ata

ata ua maea, mana o le lagi

O le a sou manatu o le a le uiga o le fasifuaitau “e toatele e e valaaulia, ae toaitiiti e e filifilia” i le fuaiupu 34 ?

Afai e tatau ai, faamalamalama atu o le matalalaga lenei o le “valaaulia” e mafai ona faasino patino i le mauaina o le pule o le perisitua ma ina ia mafai ona “filifilia”, e tatau i se e umia le perisitua ona agavaa e aumaia “mana o le lagi” [fuaiupu 36] e fesoasoani ai i isi ia maua ia faamanuiaga o le perisitua. Peitai, o le “valaaulia” ma le “filifilia” e mafai foi ona faatatau lautele atu i tagata uma o le Ekalesia o e e “valaauina i le galuega” (MFF 4:3)---e le na o i latou o e umia le perisitua. (Mo nisi faamatalaga, tagai i le faamatalaga mo le tusi lesona a le tagata aoga mo le Mataupu Faavae ma Feagaiga 121:34–35.)

O a filifiliga e ono taofia mai ai se tagata mai le “filifilia”?
Aisea o le a le agavaa ai mo le filifiliaina i latou “ua pupū tele o latou loto i mea o lenei lalolagi” ma e “e saili i viiga a tagata” (fuaiupu 35) ?
(O le a le aoaoga faavae e mafai ona tatou faailoa mai le fuaiupu 36? (A uma ona tali mai tamaiti, tusi ia faamatalaga o le aoaoga faavae i luga ae o le ata i le laupapa: O aia tatau o le perisitua ua fesootai e le mavavaeeseina ma mana o le lagi. Ua na o mataupu faavae lava o le amiotonu e mafai ona puleaina le mana o le perisitua.)

Faamalamalama atu o le fasifuaitau “o aia tatau o le perisitua” (fuaiupu 36) e faasino i avanoa, meaalofa, ma faamanuiaga e maua e ala i ki ma sauniga o le perisitua, ia e avanoa mo tagata agavaa uma o le Ekalesia, tane ma fafine.

Ina ia fesoasoani i tamaiti ia malamalama atili i le ala e mafai ona latou agavaa ai e maua “mana o le lagi” (fuaiupu 36), tusi le siata lea i le laupapa, ma saunia i se tufaaga mo tagata o le vasega.

O auala tatou te le maua ai aia tatau o le perisitua ma mana o le lagi (MFF 121:37–40).	O auala tatou te agavaa ai mo aia tatau o le perisitua ma mana o le lagi(MFF 121:41–45).

Valaaulia tagata o le vasega e saili le leoa le Mataupu Faavae ma Feagaiga 121:37–40 ma vaavaai mo uiga faaleatua ma faatinoga e mafai ona afua ai ona tatou le maua mana o le lagi. A uma ua lava se taimi, fai atu ia i latou e lipoti mai mea sa latou maua. Tusi a latou tali i le koluma agavale o le siata. Fai i tamaiti e faamalamalama mai le uiga o fasifuaitau taitasi ua e tusia. (Afai e tatau ai, faamalamalama atu o le “ufiufi o a tatou agasala” [fuaiupu 37} e aofia ai le alofia o le salamo e ala i le tuua’ia o isi, tuusaunoaina o i tatou lava mai tiutetauave, ma le faafitia ma le le faamaoni sa tatou faia se mea sese. “Ia faamalieina lo tatou faamaualuga, po o le fia lauiloa le aoga” [fuaiupu 37] e aofia ai le sailia o tulaga faalelalolagi i luga atu o isi ma tuu faamuamua o tatou loto ma naunauga i le Alii. “O le faaaoga o le pule po o le puleaga po o le faamalosi … i soo se tikeri o le amioletonu” [fuaiupu 37] e aofia ai le saili e pulea pe taulu isi e ala i faitioga, popole, po o le faamalosi.)

Faaali atu le saunoaga o loo totoe a Peresitene Russell M. Nelson lea na faaali atu muamua, ma valaaulia se tagata aoga e faitau leotele. Valaaulia le vasega e vaavaai mo nisi filifiliga e faaitiitia ai mana o le lagi.

“Ou te popole ua toatele naua alii ua tuu atu i ai le pule o le perisitua ae ua leai se mana o le perisitua ona ua polokaina le tafe mai o le mana i agasala e pei o le paie, le faamaoni, faamaualuga, ola le mama, po o le soona faaalu o le taimi i mea a le lalolagi.

“Ua ou popole lava i le toatele naua o e umiaina le perisitua ua itiiti ni mea o fai po o le leai foi e atiae ai o latou tomai e maua ai mana o le lagi. Ua ou popole mo i latou uma o e ua le ola mama i o latou mafaufauga, lagona, po o amioga pe ua faalumaina foi o latou taitoalua po o fanau, ma ua motusia ai le mana o le perisitua” (Russell M. Nelson, “O Le Tau o le Mana o le Perisitua,” Ensign po o le Liahona, Me 2016, 67).

E faavae i le saunoaga a Peresitene Nelson, o le a se mea e mafai ona tatou faaopoopo i le lisi o i le laupapa?

Vaevae le vasega i paga. Valaaulia paga taitasi e faitau faatasi le Mataupu Faavae ma Feagaiga 121:41–45 , ma vaavaai mo mataupu faavae o le amiotonu ia e faaagavaaina ai i tatou mo aia tatau o le perisitua ma mana o le lagi. A uma ua lava se taimi, fai atu ia i latou e lipoti mai mea sa latou maua. Tusi a latou tali i le koluma taumatau o le siata. Fai i tamaiti e faamalamalama mai le uiga o fasifuaitau taitasi ua e tusia. (Afai e tatau ai, faamalamalama atu o le fasifuaitau “alofa faamaoni” [fuaiupu 41] o lona uiga o le alofa ma le loto ma le faamaoni a’ia’i i tagata. O le fasifuaitau “aoai atu i taimi e tatau ai ma le maatiati, pe a uunaia ai e le Agaga Paia” [fuaitau 43] o lona uiga ia vave ona faasa’o se tagata, i le taimi tonu lava, ma i le manino pe a musuia ai e le Agaga Paia e fai.)

Valaaulia le vasega e mafaufau i se faataitaiga mai le soifuaga o le Faaola ina ua Ia faaa’oa’o mai se tasi pe sili atu foi o nei mataupu faavae ole amiotonu. Valaaulia ni nai tamaiti aoga e faasoa mai i le vasega le faataitaiga sa latou mafaufau i ai.

Valaaulia se tagata aoga e faitau leotele le Mataupu Faavae ma Feagaiga 121:45-46 . Fai atu i le vasega e mulimuli i le faitauga, ma vaavaai mo faamanuiaga ua folafola mai e le Alii ia i latou o e ola i mataupu faavae o le amiotonu. Fai atu i tamaiti aoga e lipoti mai mea ua latou mauaina.

O le fea o nei faamanuiaga o le a aoga tino ia te oe i le taimi lenei o lou olaga? Aisea?
E faapefea ona feaiaa’i nei faamanuiaga ma le mauaina o le faaeaga?

Molimau atu a o tatou saili e ola e tusa ai ma mataupu faavae o le amiotonu, e mafai ona tatou olioli i aia tatau o le perisitua ma valaaulia mana o le lagi i o tatou olaga faapea olaga o isi. Valaaulia tagata o le vasega e mafaufau pe o le a le lelei o lo latou agavaa mo mana o le lagi. Fautuaina i latou e filifili se mea se tasi mai le itu agavale o le siata o le a latou taumafai e tuu le faia ma se tasi mai le itu taumatau o le siata o le a latou taumafai e fai ia sili atu lona lelei.