Lesona 49

Mataupu Faavae ma Feagaiga 125–28

Faatomuaga ma le Faasologa o Taimi

E oo atu i le taumafanafana o le 1839, ua toatele le Au Paia sa tutuli faamalosi ese mai o latou fale i Misuri ua faaave o lo latou nofoaga fou i fanua na faatau mai e le Ekalesia i Commerce, Ilinoi, ma i le Teritori o Aioua. Ia Mati 1841, na maua ai e le Perofeta o Iosefa Samita le faaaliga o loo i ai i le Mataupu Faavae ma Feagaiga 125, lea na faaali mai ai e le Alii Lona finagalo e faatatau i le faapotopotoina o le Au Paia i le Teritori o Aioua.

Ina ua maea lona papatisoga ia Aperila 1832, sa faamisiona ia Polika Iaga i Kanata i Luga i matusasae o le Iunaite Setete, ma i Egelani. O lana galuega faafaifeautalai tele naua na manaomia ai o ia ma lona aiga e faia ni osigataulaga iloga. I le aso 1 Iulai, 1841, sa toe taliu mai ai Polika Iaga mai lana misiona i Egelani ina ua mavae lona toesea mo le toeitiiti atoa le lua tausaga. I le aso 9 Iulai, 1841, na maua ai e le Perofeta o Iosefa Samita se faaaliga mo Polika Iaga, ua tusia i le Mataupu Faavae ma Feagaiga 126. I lea faaaliga, sa ta’u atu ai e le Alii ia Polika e le o toe manaomia lona tuua o lona aiga ae alu e faamisiona “e pei o taimi ua mavae” (MF&F 126:1).

I le aso 1 Setema, 1842, sa tusia ai e le Perofeta o Iosefa Samita se tusi i tagata o le Ekalesia e faatonuina ai i latou e tausia ia faamaumauga o papatisoga sa latou faia mo o latou aiga ua maliliu. O lenei tusi o loo tusia i le Mataupu Faavae ma Feagaiga  127. O sailiiliga talu ai nei o loo tau mai ai o le aso 7 Setema, 1842 (ae le o le 6 Setema, e pei ona lipotia mai i le faaulutala o le vaega), na tusia ai e le Perofeta se isi tusi i tagata o le Ekalesia, lea na ia aoao atili atu ai i latou e uiga i le faatautaiga tonu ma le faamaumauina o papatisoga mo e ua maliliu. Sa ia faamalamalamaina ai foi le taua faaleaoaoga faavae o lenei sauniga. O lenei tusi o loo i ai i le Mataupu Faavae ma Feagaiga  128.

15 Aokuso, 1840Sa tuuina atu ai e le Perofeta o Iosefa Samita lana uluai saunoaga faalauaitele e uiga i le papatisoga mo e ua maliliu i le sauniga o le falelauasiga o Seymour Brunson i Navu, Ilinoi.

Amataga o Mati 1841Na maua mai ai leMataupu Faavae ma Feagaiga 125 .

1 Iulai, 1841Sa taunuu ai Polika Iaga i Navu ina ua maea ona auauna faamisiona i Egelani.

9 Iulai, 1841Na maua mai ai leMataupu Faavae ma Feagaiga 126 .

8 Novema, 1841Sa faapaiaina ai se vaipapatiso le tumau mo papatisoga mo e ua maliliu i le fogafale i lalo o le malumalu e lei maea i Navu, Ilinoi.

Aokuso 1842Ina ia aloese mai le pueina faapagotaina e le tusa ai ma le tulafono ma sa toe foi ai i Misuri, sa lafilafi ai le Perofeta o Iosefa Samita i ni nofoaga eseese i Navu ma faataamilo i Navu, Ilinoi.

1 Setema, 1842Sa faalau mai ai e le Perofeta o Iosefa Samita se tusi i tagata o le Ekalesia, o loo tusia i le Mataupu Faavae ma Feagaiga 127.

7 Setema, 1842Sa faalau mai ai e le Perofeta o Iosefa Samita se isi tusi i tagata o le Ekalesia, o loo tusia i le Mataupu Faavae ma Feagaiga 128.

Fautuaga mo le Aoaoina Atu

Mataupu Faavae ma Feagaiga 125:1–4

Ua faatonuina e le Alii ia tagata o le Ekalesia i le Teritori o Aioua e faapotopoto i nofoga ua atofaina.

faafanua, o Eria o Misuri, Ilinoi, ma Aioua o le Iunaite Setete

Faaali le faafanua “O Eria o Misuri, Ilinoi, ma Aioua o le Iunaite Setete.” Faamanatu i tamaiti ina ua uma ona tutuliese tagata o le Au Paia mai Misuri i le taumalulu o le 1838--1839, sa latou maua se sulufaiga i pitonuu faasolosolo i le Vaitafe o le Misisipi i Ilinoi ma le Teritori o Aioua.

Aotele mai le Mataupu Faavae ma Feagaiga 125:1--4 i le faamalamalama atu faapea e ui ina sa faatonuina e le Alii ia tagata o le Ekalesia e faavae se siteki o Navu, Ilinoi, ma fauina se malumalu iina, sa Ia tau atu foi ia i latou sa tatau ona latou fauina isi aai i Ilinoi ma talaatu o le Vaitafe o Misisipi i le Teritori o Aioua. E le gata i lea, sa ta’u atu foi e le Alii i le Au Paia sa taunuu mai e faamautu i soo se aai ua Ia atofaina i le mea na faavae ai se siteki.

Mataupu Faavae ma Feagaiga 126:1–3

Ua ta’u atu e le Alii ia Peresitene Iaga ua le o toe manaomia ona tuua e Polika Iaga lona aiga ae toe alu e faamisiona.

Polika Iaga

Faaali atu se ata o Polika Iaga. Ina ia fesoasoani i tagata aoao ia malamalama i le talaaga o le Mataupu Faavae ma Feagaiga 126, valaaulia se tagata o le vasega e faitau leotele palakalafa ia:

Ina ua uma ona papatiso ia Polika Iaga ia Aperila i le 1832, sa ia auauna atu i ni misiona i le faagasologa o le iva tausaga na sosoo ai. O le tele o nei misiona sa mai le tolu i le lima masina le uumi. Ia Aperila 1838, sa valaauina ai Polika Iaga ma isi uso o le Korama a Aposetolo e Toasefululua e faamisiona i Peretania Tele, o le a manaomia ai i latou e toesea mai o latou aiga mo se taimi umi tele atu.

Na tuua e Polika Iaga Montrose, le Territori o Aioua, mo Peretania Tele i le aso 14 Setema, 1839. O se taimi faigata lea mo ia e tuua ai lona aiga. I le taumafanafana o le 1839, sa pesia ai le eria lena i le faama’i mumu, ma tuua ai Polika, o lona faletua o Mary Ann, ma le tele o le la fanau ua mama’i. Faatoa uma foi ona fanauina e Mary Ann le la tama lona fa. E le gata i lea, talu ai sa tutuliese i latou mai Misuri i le tausaga ua mavae, sa leiloloa uma ai le tele o a latou meatotino, ma ina ua malaga Polika mo lana misiona, sa na o le $2.72 le tupe sa mafai ona ia tuua ia Mary Ann e tausi ai lo latou aiga. I le toetoe atoa le lua tausaga sa toesea ai Polika Iaga i Egelani, sa tauivi Mary Ann e sue ni meaai ia lava ma se malutaga talafeagai mo ia ma lana fanau. I le aso 1 Iulai, 1841, sa taunuu ai Polika Iaga, o le sa tofia e avea ma Peresitene o le Korama a Aposetolo e Toasefululua i le taimi o lana misiona, i Navu ma toe faatasia ai ma lona aiga. E valu aso mulimuli ane, sa maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 126. (Tagai Leonard J. Arrington, Brigham Young: American Moses [1985], 74–75, 413–14; Lisa Olsen Tait and Chad M. Orton, “Take Special Care of Your Family,” i le Revelations in Context, ed. Matthew McBride and James Goldberg [2016], 244–46, or history.lds.org.)

Valaaulia se tagata aoao e faitau leotele le Mataupu Faavae ma Feagaiga 126:1–3 . Fai atu i le vasega e mulimuli i le faitauga, ma vaavaai pe na faapefea ona aumaia le faamafanafanaga ia Polika Iaga ma lona aiga e lenei faaaliga. Valaaulia tamaiti e lipoti mea sa latou mauaina.

• O le a se mea e mafai ona aoao mai ia i tatou e lenei faaaliga ia Polika Iaga e uiga i le Alii? (E mafai ona faailoa mai e tagata aoga se upumoni e pei o lenei: Ua silafia e le Alii o tatou tulaga patino ma o le a taialaina i tatou e tusa ai ma o tatou manaoga.)

Mataupu Faavae ma Feagaiga 127:1--12

Ua olioli le Perofeta o Iosefa Samita ona o sauaga ma ua fautuaina le Au Paia e tausia faamaumauga o papatisoga latou te faia mo e ua maliliu

Faamalamalama atu e faapea, ia Me 1842, o Lilburn W. Boggs, o le sa avea ma kovana talu ai o Misuri, lea na tuuina atu se poloaiga ia fasiotia le Au Paia, na faamanualia ai i se taumafaiga faaoosala. Sa tuuaia sese e taitai o Misuri le Perofeta o Iosefa Samita i lona faatonuina o se tasi e fasioti ia Boggs, ma sa taumafai taitai o Misuri ma Ilinoi e pue faapagotaina le Perofeta i Navu, Ilinoi, ma toe faafoi atu o ia i Misuri mo le faamasinoina. O le iloaina afai e toe foi mai o ia i Misuri, e ono fasiotia o ia, o lea na lafilafi ai le Perofeta mai nei taitai i le vaitaimi tele o Aokuso, Setema, ma Oketopa o le 1842 ina ia alofia ai mai le pue faapagotaina. O Ianuari 1843 na iloa ai o taualumaga e pue faapagotaina ai le Perofeta o Iosefa Samita ma toe faafoi i Misuri o se faiga faasolitulafono.. O le Mataupu Faavae ma Feagaiga 127 o loo i ai se tusi na tusia e le Perofeta o Iosefa Samita i tagata o le Ekalesia, a o i ai o ia i nei tulaga faigata.

Vaevae le vasega i paga. Valaaulia tagata aoao e faitau leotele le Mataupu Faavae ma Feagaiga 127:2-3 i a latou paga, ma vaavaai pe na faapefea ona tali atu le Perofeta o Iosefa Samita i ona “puapuaga” (fuaiupu 2).

• O a upu po o fasifuaitau e tulaga ese mai ia te oe e uiga i le ala na tali atu ai le Perofeta i ona puapuaga?

Aotele le Mataupu Faavae ma Feagaiga 127:4-12 e ala i le faamalamalama atu sa ta’u atu e le Perofeta i le Au Paia e faanatinati a latou taumafaiga e fau le Malumalu o Navu. Sa ia faaaofia ai foi faatonuga sa tuuina atu e le Alii ia te ia e faatatau i papatisoga mo e ua maliliu.

Valaaulia se tagata aoao e faitau leotele le Mataupu Faavae ma Feagaiga 127:5–7 . Fai atu i le vasega e mulimuli i le faitauga, ma vaavaai mo faatonuga na tuuina mai e le Alii e uiga i papatisoga mo e ua maliliu. Valaaulia ni nai tamaiti e lipoti mai mea ua latou mauaina.

• E tusa ai ma le fuaiupu 7, aisea na taua ai i tagata o le Ekalesia ona faatino a latou papatisoga mo e ua maliliu a o auai se tusitalafaamaumau?

Mataupu Faavae ma Feagaiga 128:1–18

Ua faamalalmalama mai e le Perofeta o Iosefa Samita le mafuaaga e tatau ai ona tausia faamaumauga o sauniga faaola.

Faamalamalama atu pe a ma se vaiaso talu ona tusia e le Perofeta o Iosefa Samita le tusi o loo i le Mataupu Faavae ma Feagaiga 127, sa ia tusia se isi tusi i le Au Paia na aofia ai aoaoga faaopoopo e uiga i papatisoga mo e ua maliliu. O lenei tusi o loo tusia i le Mataupu Faavae ma Feagaiga 128

Aotele le Mataupu Faavae ma Feagaiga 128:1-14 e ala i le faamalamalama atu faapea na aoao mai Iosefa e faapea, e tatau ona tofia ni tusi talafaamaumau i le lotoifale e molimau ma faamaumau ia papatisoga mo e ua maliliu, ma ia tofia “se tusitalafaamaumau aoao” e tuufaatasia faamaumauga i le lotoifale i se “tusi aoao a le ekalesia,” po o talafaamaumau (fuaiupu 4). Sa ia faamalamalama mai e faapea o sauniga e faatino ma tusifaamaumauina i le lalolagi o le a aoga i le lagi aua o le “mana o faamaumauga e faamaumauina pe fusia i le lalolagi e fusia ai foi i le lagi” (fuaiupu 9). Na aoao mai foi e le Perofeta o Iosefa Samita e faapea o le sauniga o le papatisoga e faatusa i le oti ma le toetu (fuaiupu 12–13).

• E faaopoopo i papatisoga, o a isi sauniga e tatau ona maua uma e tagata ua tali atu mo i latou lava ina ia maua ai le ola e faavavau ma mau ai i le afioaga o le Atua? (O faamauga [lea e aofia ai le mauaina o le meaalofa a le Agaga Paia], faauuina i le Perisitua Mekisateko [mo alii], o faaeega paia i le malumalu, ma faamauga o le faaipoipoga. Ta’u i ai ua ta’ua nei mea o “sauniga faaola.”)

Valaaulia se tagata aoao e faitau leotele le Mataupu Faavae ma Feagaiga 128:15 . Fai i le vasega e mulimuli ai, ma vaavaai mo mafuaaga e taua ai sauniga faaola “i e maliliu ma e o ola.”

• E faavae i le fuaiupu 15, aisea e taua ai ia i tatou le faatino o sauniga faaola mo o tatou tuaa o e ua maliliu e aunoa ma se malamalama i le talalelei? (Pe a manaomia, tata’i le gauai a tamaiti i le fasifuaitau “e le mafai ona faaatoatoaina i latou e aunoa ma i tatou,” ma fesoasoani latou te faailoa mai le aoaoga faavae lenei: O o tatou tuaa ua maliliu e aunoa ma se malamalama i le talalelei e le mafai ona agai i luma i le faaatoatoaga sei vagana ua faatino ia sauniga faaola mo i latou.)

• O le a se aoaoga faavae e mafai ona tatou aoao mai le fasifuaitau “e le mafai foi ona faaatoatoaina i tatou e aunoa ma tatou tagata maliliu” (fuaiupu 15)? (Fesoasoani i tagata aoao e faailoa mai le aoaoga faavae lenei: O le faaolataga o o tatou tuaa ua maliliu e tatau ma taua i lo tatou faaolataga.)

Tusi le fesili lea i le laupapa: Aisea e te manatu ai faapea o le ‘faaolataga o [o tatou tuaa] e tatau ma taua mo lo tatou faaolataga’”?

Valaaulia tagata o le vasega e talanoaina a latou tali i lenei fesili i ni vaega toalaiti taitoalua pe taitoatolu. A uma ua lava le taimi, valaaulia se tamaitiiti aoga mai se vaega e tasi pe sili atu foi e lipoti mai a latou tali i le vasega.

Aotele le Mataupu Faavae ma Feagaiga 128:16-17 e ala i le faamalamalama atu o lenei tusi i le Au Paia, sa sii mai ai e le Perofeta ia fuaitau e lua mai le Tusi Paia e uiga i le papatisoga mo e ua maliliu.

Valaaulia se tamaitiiti aoga e faitau leotele le Mataupu Faavae ma Feagaiga 128:17–18 . Fai i le vasega e mulimuli i le faitauga, ma vaavaai pe faapefea e le faatinoina o papatisoga mo e ua maliliu ona fesoasoani e faataunuu le valoaga o loo tusia i le Malaki 4:5–6.

• E tusa ai ma le fuaiupu 18, e faapefea e le faatinoga o papatisoga mo e ua maliliu ona fesoasoani e faataunuu ai le valoaga a Malaki?

Mataupu Faavae ma Feagaiga 128:19-25

Ua olioli Iosefa Samita i le talalelei toefuataiina ma ua apoapoa’ia le Au Paia e faaauau ona faatino ia papatisoga mo e ua maliliu

Faamalamalama atu i le tusi lona lua na tusia e le Perofeta o Iosefa Samita i le Au Paia e faatatau i le papatisoga mo e ua maliliu, sa ia toe faamatala atu ai ni mea taua o le Toefuataiga na tutupu. Valaaulia se tagata aoao e faitau leotele le Mataupu Faavae ma Feagaiga 128:19 . Fai atu i le vasega e mulimuli i le faitauga, ma vaavaai pe na faapefea ona faamatala e le Perofeta le Toefuataiga.

• Na faapefea ona faamatala e le Perofeta le Toefuataiga?

• O a ni auala ua avea ai le talalelei toefuataiina “o se leo o le fiafia mo e o ola ma e ua oti”?

Aotele le Mataupu Faavae ma Feagaiga 128:20-21 e ala i le faamalamalama atu sa faamatalaina e le Perofeta nisi o mea ofoofogia na tutupu i le Toefuataiga, ma faapupula atu ai na o mai agelu e toefuatai mai “aia,” “ki,” ma le “mana” o tisipenisione ua mavae (fuaiupu 21).

Valaaulia se tagata aoao e faitau leotele le Mataupu Faavae ma Feagaiga 128:22 . Fai atu i le vasega e mulimuli i le faitauga, ma vaavaai mo le mea na ta’u atu e le Perofeta i le Au Paia e fai, ma ia iloa ai o aia, ki, ma le mana o le perisitua ua uma ona toefuatai mai i o tatou taimi.

• O le a le “mea … ofoofogia” na manao le Perofeta i le Au Paia e “o atu pea i luma” i ai?

• E tusa ai ma le fuaiupu 22, e mafai faapefea e lo tatou auai i le faatinoga o talafaasolopito o aiga ma auaunaga i le malumalu ona fesoasoani i o tatou tuaa?

Faamalamalama atu ao faaiuina e le Perofeta lana tusi i le Au Paia, sa ia sii maia le Malaki 3:2--3, lea e aofia ai le valoaga a Malaki e uiga i aso e gata ai. Valaaulia se tagata aoao e faitau leotele le Mataupu Faavae ma Feagaiga 128:24 . Fai atu i le vasega e mulimuli i le faitauga, ma vaavaai po o a mea na faatonu e le Perofeta le Au Paia e fai.

• E tusa ai ma lenei fuaiupu, o a “taulaga amiotonu” e tatau ona tatou “osi atu i le Alii”?

• O le a se mea e mafai ona tatou fai e saofaga atu ai i lenei “tusi”? (Fesoasoani i tagata aoao ia malamalama tatou te faia lenei mea i le taimi nei e ala i le taina i totonu o talafaamaumau o o tatou tuaa i le uepisaite o le FamilySearch a le Ekalesia ma faatino ia sauniga mo i latou i le malumalu. Afai e mafai, mafaufau e folasia atu i tagata aoao le FamilySearch.org.)

Tusi le mataupu faavae lenei i le laupapa: A o tatou galulue ai i le talafaasolopito o le aiga ma faatino ia sauniga i le malumalu mo o tatou tuaa ua maliliu, ua tatou fesoasoani i le osia o se taulaga i le Alii i le amiotonu.

• O a nisi i o auala o e auai ai i le taimi nei i le faiga o talafaasolopito o aiga ma auaunaga i le malumalu?

• O a faamanuiaga ua e maua ao e auai i lenei auaunaga?

Faasoa atu lau molimau faapea a o tatou auai i le auaunaga i talafaasolopito o aiga ma le malumalu, ua tatou fesoasoani e osia se taulaga i le Alii i le amiotonu. Valaaulia tagata aoga e faatu se sini o le a fesoasoani ia i latou ia latou taumafaiga e auai ai i le auaunaga i talafaasoolopito o aiga ma le malumalu.

Tulitatao i valaaulia e faatino

E mafai ona e uunaia tagata aoao e faaaoga mataupu faavae o le talalelei e ala i le tulitatao o valaaulia e faatino. Fai se faamanatu e tulitatao tamaiti aoga e uiga i a latou sini na faatutu i le lesona lenei. Atonu foi e te manao e valaaulia i latou e lipoti mai i aafiaga na latou maua a’o faatinoina a latou sini. A e tulitataoina tagata aoao, ia mautinoa e te faia i se ala e nofouta ai i o latou tulaga patino e le faalauaiteleina ma faaaloalogia ai la latou faitalia.

Manatu Faaopoopo Faafaiaoga

Mataupu Faavae ma Feagaiga 128:24. Aoaoga faavitio—”A Sacrifice of Time”

Ina ia fesoasoani ia lagonaina e tamaiti le moni ma le taua o le aoaoga faavae ma mataupu faavae sa talanoaina i lenei lesona, mafaufau e faaali le vitio “A Sacrifice of Time” (2:54), o loo maua i le LDS.org. A o matamata le vitio e tagata aoao, valaaulia i latou e mafaufau po o a osigataulaga e mafai ona latou faia a o latou saili e sauniuni a latou taulaga amiotonu mo le Alii.