I le usiusitai i le poloaiga a le Alii e tauaofia se konafesi a le Ekalesia i Misuri (tagai MF&F 52:2--5), na malaga ai le Perofeta o Iosefa Samita ma le toatele o isi pe tusa ma le 900 maila mai Ohaio i Misuri. I le aso 20 Iulai, 1831, i ni nai aso talu ona taunuu i le Itumalo o Siakisone, Misuri, na maua ai e Iosefa Samita le faaaliga lea ua iloa nei o le Mataupu Faavae ma Feagaiga 57. I lea faaaliga, na tautino mai ai e le Alii e faapea o Initipene, Misuri o le a avea ma nofoaga tutotonu o le aai o Siona faatasi ai ma lona malumalu, ma sa Ia faatonuina foi ni tagata e tusa ai ma a latou matafaioi i le fausiaina o Siona.
I le aso 1 Aokuso, 1831, e le i atoa le lua vaiaso talu ona maua e Iosefa le faaaliga o loo ta’u mai ai ia Initipene e fai ma nofoaga tutotonu o Siona, na o atu nisi tagata ole Ekalesia i le Perofeta e fia iloa le finagalo o le Alii e faatatau i lo latou auai i le faatinoga o le fausiaina o Siona. I le tali mai, na tuuina mai e le Alii le faaaliga o loo tusia i le Mataupu Faavae ma Feagaiga 58. I lea faaaliga, na faatonuina ai e le Alii le Au Paia e faatatau i mataupu faavae e tatau ona faatuina ai le aai o Siona, e aofia ai le usiusitai i poloaiga, faamaoni i mafatiaga, ma le faaaogaina o le faitalia e aumaia ai le amiotonu, ma le salamo ma le faamagaloga.
14 Iulai, 1831Na taunuu ai Iosefa Samita ma ana soa na latou malaga i le Itumalo o Siakisone, Misuri.
2--3 Aokuso, 1831Na faapaiaina ai le laueleele i le Itumalo o Siakisone, mo le faavaeina o Siona, ma sa faapaiaina ai foi se tulaga mo le malumalu i Initipene, Misuri.
Ua faaalia mai e le Alii le nofoaga e faatu ai Siona ma ua faatonuina tagata taitoatasi e tusa ai ma a latou matafaioi i le faaatuina.
Tusi ia upu Faamoemoega ma le Taunuuga Tonu i luga o le laupapa. Fai i tagata o le vasega e mafaufau e uiga i se taimi na latou le fiafia ai ona o le taunuuga o se mea na ese mai le mea sa latou faamoemoeina pe sa mananao ai. Valaaulia ni nai tagata aoga e faasoa mai a latou aafiaga i le vasega.
Ia fautuaina tagata o le vasega e vaavaai mo upumoni a o latou suesueina le Mataupu Faavae ma Feagaiga 57--58 ia o le a fesoasoani ia i latou e malamalama atili ai i le auala e tumau faamaoni ai i le Alii pe a le tulaga mai mea e pei ona latou faamoemoeina.
Faamanatu i le vasega na faaalia muamua mai e le Alii o le a Ia faatuina le aai o Siona “i tuaoi latalata i sa Lamana” (MF&F 28:9). Na malamalama le Au Paia i le eria lea o le siui sisifo o Misiru, o lea la ina ua poloaiina e le Alii le Perofeta o Iosefa Samita ma nisi o toeaina e faia se konafesi a le Ekalesia i Misuri (tagai MF&F 52:2), sa latou naunau e fia iloa le nofoaga tonu e tu ai Siona. Sa naunau le Au Paia e fausia Siona aua sa latou iloaina o le avea o se vaega o Siona o le a mafai ai e i latou ona maua le togiola, puipuiga, ma le filemu mai le Alii (tagai Isaia 51:11; 52:7–8; 3 Nifae 21:22–29; MF&F 45:66–75; Mose 7:61–64). I le usiusitai ai i le poloaiga ale Alii, na tuua ai e Iosefa Samita ma nisi o toeina ia Katelani, Ohaio, ia Iuni 1831 ae malaga atu mo le tusa ma le 900 maila i Misuri, ma sa taunuu ai i se masina mulimuli ane i le aso 14 Iulai, 1831 (tagai The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 5–6).
Valaaulia se tagata o le vasega e faitau leotele le faaulutala o le vaega o le Mataupu Faavae ma Feagaiga 57. Fai i le vasega e mulimuli ai, ma vaavaai mo fesili na fesili atu ai le Perofeta i le Alii ina ua ia taunuu i le Itumalo o Siakisone, Misuri.
Valaaulia se tagata o le vasega e faitau leotele le Mataupu Faavae ma Feagaiga 50:13–14 . Fai atu i le vasega e mulimuli i le faitauga, ma vaavaai pe na faapefea ona tali atu le Faaola i fesili a le Perofeta.
O fea sa tatau ona fausia ai le aai o Siona?
E tusa ai ma le fuaiupu 3, o fea sa tatau ona fausia ai le malumalu e fesootai ma le aai o Siona?
O le a sou manatu i le mea e taua e uiga i le tuuina e le Alii o le malumalu i le totonugalemu o le aai o Siona?
Aotele le Mataupu Faavae ma Feagaiga 57:4--16 e ala i le faamalamalama atu na faatonuina e le Alii le Au Paia e faatau mai fanua i totonu ma faataamilomilo i Initipene, Misuri. Na faatonuina foi e le Alii ni tagata patino e faaaoga o latou malosiaga taitoatasi e fesoasoani ai i le fausiaina o Siona.
Ua fautuaina e le Alii le Au Paia ina ia faamaoni i o latou puapuaga
Ta’u i tagata o le vasega o faifeautalai ma tagata o le Paranesi o Kolesavile o e na poloaiina e o i Misuri, na taunuu i ni aso ina ua mavae ona taunuu le Perofeta ma ana soa sa latou faimalaga faatasi. O nisi o tagata faatoa taunuu sa latou mafaufau o le a latou maua atu se nuu lauusiusi o tagata fou o le ekalesia, ae sa latou le fiafia ina ua maua atu sa na o ni nai tagata liliu mai toalaiti. O isi na le fiafia ona o le tele o fanua i le Itumalo o Siakisone e lei faato’aina. E le gata i lea, o le Perofeta o Iosefa Samita ma Epikopo Eteuati Paterika sa i ai so la’ua eseesega e uiga i le fanua sa tatau ona faatau mo le Au Paia. O tulaga ia na maua ai e le Perofeta o Iosefa Samita le faaaliga o loo ua tusia i le Mataupu Faavae ma Feagaiga 58. (Tagai The Joseph Smith Papers, Documents, Volume 2: July 1831–January 1833, 12–13.)
Valaaulia tagata o le vasega e faitau le leoa le Mataupu Faavae ma Feagaiga 58:1--5 ma vaavaai mo mea na finagalo le Alii e malamalama ai ia toeaina pe a latou taunuu i Misuri.
O le a le mataupu faavae e mafai ona tatou aoao mai mea na ta’u atu e le Alii i toeaina i le fuaiupu 2? (A uma ona tali mai tagata, tusi le mataupu faavae lea i luga o le laupapa: O le a sili atu lo tatou taui e faavavau pe afai e tumau lo tatou faamaoni i puapuaga.)
Mata na faapefea ona fesoasoani lenei mataupu faavae i le Au Paia ina ua le ogatusa o latou faamoemoega ma tulaga o lo latou nuu fou
Fesili i le vasega pe i ai se tasi e mafai ona faamatala faapuupuu mai ni sauaga ma tofotofoga o le a feagai ma le Au Paia i tausaga o i luma i Misuri. (Afai e tatau ai, ta’u faapuupuu atu i le vasega na mafatia le Au Paia i le faalumalumaina ma vesiga mai o latou tuaoi i Misuri, ma o nisi o tagata o le Ekalesia na iu lava ina fasiotia. O sauaga na iu lava ina faamalosia ai le Au Paia e sosola i le Itumalo o Siakisone ia Novema ma Tesema o le 1833, ma sa iu lava ina tutuli ese uma i latou mai Misuri ile taumalulu o le 1838--39 ina ua sainia e le kovana o le setete se poloaiga e faaumatia i latou.)
Mata o fesoasoani faapefea le mataupu faavae o i luga o le laupapa ma folafolaga a le Alii o i fuaiupu 2--4 e faamalolosia ai le Au Paia i le taimi o faigata na latou onosaia i Misuri?
E tusa ai ma le fuaiupu e 3o le a le mea e masani ona tatou le iloa pe malamalama i ai a o tatou feagai ma ni puapuaga?
Pe ono fesoasoani faapefea ia aoaoga o i nei fuaiupu ia i tatou pe a tatou le fiafia ma feagai ma puapuaga?
Aotele mai le Mataupu Faavae ma Feagaiga 58:6--13 e ala i le faamalamalama atu sa faaali amai e le Alii nisi o mafuaaga na Ia auina atu ai le Au Paia i Siona, o se tasi ina ia mafai ai e toeaina ona faataatia le faavae o Siona ma amata ona tapena le lalolagi mo le Afio Mai Faalua o Iesu Keriso. E pei ona tusia I nei fuaiupu, na faasino le Alii i se faataoto o le Feagaiga Fou (tagai Mataio 22:1–14; Luka 14:12–24) o loo aoao mai ai e faapea o tagata i malo uma o le a valaaulia e aai ma feinu i faamanuiaga o le talalelei.
Ua otooto mai e le Alii ia tiute o se epikopo, poloaiina le Au Paia e tausi ia tulafono o le laueleele, ma fautuaina i latou e faaaoga lo latou faitalia e fai ai mea lelei.
Faamanatu i tagata o le vasega o Epikopo Eteuati, o le sa tofia e noto i Misuri e pulea meatotino a le Ekalesia, ma faatau ia fanua i totonu ma faataamilo i Initipene, sa i ai so la eseesega ma le Perofeta pe o fea ogaeleele e faatau mai. Faamalamalama atu e pei ona tusia i le Mataupu Faavae ma Feagaiga 58:15, na lapataia e le Alii ia Epikopo Paterika afai e le salamo o ia i lona “le talitonu ma le tauaso o lona loto,” o le a toilalo o ia. Sa talia e Epikopo Paterika le lapataiga a le Alii ma le aoaiga ma le lotomaualalo (tagai The Joseph Smith Papers, Documents, Volume 2: July 1831–January 1833, 12–13). Aotele mai le Mataupu Faavae ma Feagaiga 58:16--20 e ala i le faamalamalama atu faapea sa otooto mai foi e le Alii nisi o tiute o Eteuati Paterika ma ona tiutetauave o se epikopo i Misuri. Ona aotele lea ole Mataupu Faavae ma Feagaiga 58:21--23 e ala i le faamalamalama atu sa faatonuina e le Alii le Au Paia i Misuri e tausia tulafono o le laueleele ma tulafono a le Atua.
Valaaulia se tagata o le vasega e faitau leotele le Mataupu Faavae ma Feagaiga 58: 24-28 Fai atu i le vasega e mulimuli i le faitauga, ma vaavaai mo mea na ta’u atu e le Alii ia Eteuati Paterika ma ona fesoasoani e fai.
E tusa ai ma le fuaiupu 25, o le a le mea na ta’u atu ele Alii ia Epikopo Paterika ma ona fesoasoani e fai?
Mata na fesoasoani faapefea le fefautuaai faatasi ma faatasi ai ma le Alii latou te faafoeina ai mataupu o le Ekalesia i Misuri ma fausiaina Siona?
E faavae i mea na aoao atu e le Alii inei tagata i fuaiupu 26--28, o le a le aoaoga faavae ma mataupu faavae e mafai ona tatou aoaoina e faatatau i mea ua faamoemoeina e le Alii mai ia i tatou? (Atonu e tele ni tali o le a tuu mai e tagata o le vasega, ae ia mautinoa latou te faailoa maia upumoni nei: afai tatou te faatalitali mo le Alii e ta’u mai ia i tatou mea uma e tatau ona tatou fai, o le a leai so tatou taui e maua. Ua ia te i tatou le mana tatou te galulue ai mo i tatou lava. Afai tatou te faaaogaina lo tatou faitalia e aumaia ai le amiotonu, o le a tauia i tatou. Valaaulia le vasega e mafaufau e faalanu upumoni nei ia latou tusitusiga paia.
E taua i se a mo i latou o e ua tofia e fausia Siona ona malamalama i nei mataupu faavae?
Aisea e taua ai ia i tatou ona tatou malamalama i nei upumoni i aso nei?
Valaaulia se tagata o le vasega e faitau leotele le Mataupu Faavae ma Feagaiga 58:29-33 Fai atu i le vasega e mulimuli i le faitauga, ma vaavaai mo mea na fetalai mai le Alii e tupu ia i latou o e e le faaaogaina o latou faitalia e fai ai mea lelei po o e e masalosalo i Ana poloaiga.
O le a le mea e tupu ia i latou o e le faaaogaina o latou faitalia e fai ai mea lelei po o e e masalosalo i poloaiga a le Alii?
E tusa ai ma fuaiupu 32--33, e faapefea ona tali atu nisi tagata pe a latou le mauaina faamanuiaga ua latou talitonu ua ia i latou le aia tatau e maua ai, tusa lava pe na latou faatamala ma le usiusitai?
O a ni lapataiga e aumai e le Alii i ma tagata taitoatasi?
Molimau atu e ui ina sa faaalia mai e le Alii le nofoaga o le aai o Siona, ae o loo moomia pea e Ia le Au Paia e faaaoga lo latou faitalia e faia ai mea lelei ma fesoasoani e faatuina. E tutusa lava foi le moni mo i tatou i o tatou taimi. E ui ina taialaina i tatou e leAlii i faaaliga, e faamoemoe lava o Ia ia i tatou e faaaoga lo tatou faitalia e faia ai mea lelei ma “aumaia ai le amiotonu tele” (MF&F 58:27) e faataunuu ai Lana galuega.
Valaaulia tagata o le vasega e mafaufau loloto pe o a mea e mafai ona latou fai e aumaia ai le amiotonu tele. Uunaia i latou e galulue i soo se uunaiga latou te maua.
Ua tuuina mai e le Alii nisi faatonuga e faatatau ia Siona, aoao mai mataupu faavae o le salamo ma le faamagaloga, ma ua poloaiina toeaina e talai atu le talalelei i le lalolagi uma.
Faamalamalma atu e faapea o le Mataupu Faavae ma Feagaiga 58:34--37, na tuuina mai ai e le Alii nisi faatonuga e faatatau i le laueleele o Siona. Na Ia faatonuina ia Matini Harisi e faapaia ana tupe i le Alii, ia mulimuli ia le Au Paia o e ua nonofo i Siona e mulimuli i lenei faataitaiga ma ola i le tulafono o le faapaiaga, ma ia faatauina mai se fanua mo le faleteuoloa ma le falelomitusi.
Fai atu i ni nai tagata aoao e auauai i le faitauina leotele mai o le Mataupu Faavae ma Feagaiga 58:43, 60. Ia fautuaIna le vasega e mulimuli i le faitauga, ma vaavaai mo le fautuaga na tuuina mai e le Alii ia Matini Harisi, William W. Phelps, ma Ziba Peterson a o latou tapenapena e nonofo i Siona.
Mata na faapefea e agasala a nei alii, ona taofia ai i latou mai le fesoasoani atu e fausia Siona?
E tuuitiitia faapefea e a tatou agasala lo tatou tomai e auauna atu i le Alii?
O le a le upumoni na aoao atu e le Alii i nei alii e uiga i le salamo i le fuaiupu 42? (Fesoasoani i tagata o le vasega e faailoa mai le upumoni lenei: Afai tatou te salamo i a tatou agasala, o le a faamagalo i tatou e le Alii ma le toe manatuaina a tatou agasala.)
E mafai faapefea ona aumai e lenei upumoni le faamoemoe ia i tatou?
O le a le upumoni na aoao atu e le Alii i nei alii e uiga i le salamo i le fuaiupu 43? (Fesoasoani i tagata o le vasega e faailoa mai le aoaoga faavae lenei: Ina ia salamo, e tatau ona tatou ta‘uta’u atu ma lafoai a tatou agasala.
Ina ia fesoasoani i tagata aoao ia malamalama i le uiga o le ta’uta’u atu ma lafoai agasala, valaaulia se tagata e faitau leotele le saunoaga lenei mai ia Elder Neil L. Andersen o le Korama a Aposetolo e Toasefululua:
Ata
Elder Neil L. Andersen
“O le lafoaia o agasala e aofia ai le aua lava nei toe foi mai. O le lafoaia e manaomia ai le taimi. Ina ia fesoasoani ia i tatou, e faataga ai e le Ali i nisi o taimi ia toega o a tatou mea sese e nofo i o tatou manatua. O se vaega taua o lo tatou aoaoina faaletino.
“Pe a tatou ta’uta’u atu ma le faamaoni a tatou agasala, toefuatai mea e mafai ona tatou i le na faatiga i ai, ma lafoai a tatou agasala e ala i le tausia o poloaiga, ua tatou i ai i le faagasologa o le mauaina o le faamagaloga. E oo mai le taimi, o le a tatou lagonaina ai ua liua le tiga o lo tatou faanoanoaga, ua aveesea le tausalaina mai o tatou loto’ [Alema 24:10] ma aumaia le ‘filemu o le lotofuatiaifo’ [Mosaea 4:3]” (Neil L. Andersen, “Repent … That I May Heal You,” Ensign or Liahona, Nov. 2009, 42).
Molimau atu ona o le Togiola a Iesu Keriso, ua mafai ai ona faamagaloina atoatoa i tatou ai a tatou agasala. Ia fautuaina tagata o le vasega ia salamo ia latou agasala e ala i le ta’uta’u atu ma lafoaia.
Aotele le Mataupu Faavae ma Feagaiga 58:44--65 e ala i le faamalamalama atu faapea na faatonuina e le Alii ia toeaina o e o le a nonofo i Misuri e faatau mai se fanua ma tapenapena mo le faapotopotoina mai o le Au Paia i Siona, lea na aofia ai le talai atu o le talalelei i le lalolagi uma.