Faatomuaga i le Tusi Lesona a le Faiaoga o le Mataupu Faavae ma Feagaiga (Mataupu Faalelotu 324-325)

O Lo Tatou Faamoemoega

O Le Sini Faamoemoeina o Seminare ma Inisitituti o Mataupu Faalelotu:

“O lo tatou faamoemoega o le fesoasoani lea i le autalavou, ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa ai mo faamanuiaga o le malumalu, ma saunia ai i latou, o o latou aiga, ma isi mo le ola e faavavau faatasi ma lo latou Tama o i le Lagi” (Aoaoina Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], 1).

Ina ia ausia lo tatou faamoemoega, tatou te aoao atu i tagata aoga aoaoga faavae ma mataupu faavae o le talalelei o loo maua i tusitusiga paia ma i upu a perofeta. O loo aoao atu ia aoaoga faavae ma mataupu faavae i se ala e tau atu ai i le malamalama ma le faagaeetiaina. Tatou te fesoasoani i tagata aoga e faataunuu la latou matafaioi i le faagasologa o le aoaoina ma saunia ai i latou e aoao atu le talalelei i isi.

Ina ia ausia nei faamoemoega, e uunaia oe ma tagata aoga e te aoaoina ia faaaofia ai vaega nei o Mataupu Taua o le Aoaoina Atu ma le Aoaoina Mai o le Talalelei, a o outou suesue faatasi i tusitusiga paia:

• Aoao atu ma aoao mai e ala i le Agaga.

• Atiina ae se siosiomaga o le alofa, faaaloalo, ma le faamoemoe, e aoao ai.

• Suesue ia tusitusiga paia i aso taitasi ma faitau tusi mo le vasega.

• Malamalama i talaaga ma anotusi o tusitusiga paia ma upu a perofeta.

• Faailoa, malamalama, lagona le moni ma le taua o, ma faaaoga ia aoaoga faavae ma mataupu faavae o le talalelei.

• Faamalamalama, faasoa atu, ma molimau atu e uiga i aoaoga faavae ma mataupu faavae o le talalelei.

• Tauloto fuaitau o mau autu ma Aoaoga Faavae Amata.

O fautuaga faafaiaoga i le tusi lesona lenei ua faataitai atu ai auala e ausia ai nei taunuuga i lou aoao atu. (Manatua o Mea Faavae o le Aoaoina Atu ma le Aoaoina Mai o le Talalelei e tatau ona vaaia o ni taunuuga ae le o ni metotia faafaiaoga.) “A faaaogaina ma le poto ma faaogatusa o le tasi ma le isi, o le a saofaga nei manatu faavae autu i le tomai o tagata aoga e malamalama ai i mau ma aoaoga faavae ma mataupu faavae o loo i ai. O loo fautuaina ai foi tagata aoga ina ia faia se matafaioi mataalia i lo latou aoaoina o le talalelei ma faateleina le tomai o tagata aoga e ola ai i le talalelei ma aoao atu i isi” (Aoaoina Atu ma le Aoaoina Mai o le Talalelei, 10).

Sauniuniga o le Lesona

Ua poloai atu le Alii ia i latou o e aoao atu Lana talalelei ina ia “aoao atu… mataupu autu o la’u talalelei” (MFF 42:12). Sa Ia faatonu atili mai o nei upumoni e tatau ona aoaoina e pei ona “taitaiina ai … e le Agaga,” lea e “tuu atu … e ala i le tatalo o le faatuatua” (MF&F 42:13–14). A o e saunia lesona taitasi, ia saili ma le agaga tatalo le taitaiga a le Agaga e fesoasoani ia e malamalama i tusitusiga paia ma aoaoga faavae ma mataupu faavae o loo i ai. E faapena foi, mulimuli i uunaiga a le Agaga pe a fuafuaina pe faapefea ona fesoasoani i au tagata aoga ia malamalama i tusitusiga paia, ia aoaoina e le Agaga Paia, ma lagonaina se manao e faaaoga mea ua latou aoaoina.

I lenei kosi, o le Mataupu Faavae ma Feagaiga o lau tusiga autu lea a o e sauniuni ma aoao atu. Ia suesue ma le agaga tatalo ia vaega po o fuaiupu o le a e aoaoina atu. Saili ia malamalama i talaaga faasolopito ma anotusi o poloka mau. A o e faamasani i le talaaga ma anotusi o poloka mau taitasi, ia iloa aoaoga faavae ma mataupu faavae o loo aoao atua, ma filifili po o fea o nei upumoni e sili ona taua ia malamalama ma faaaoga e au tagata aoga. O le taimi lava e te iloa ai lau taulaiga, ona mafai lea ona e iloilo poo ā auala, o metotia, ma gaoioiga o lea sili atu ona fesoasoani i au tamaiti aoga e aoaoina ma faaaogaina upumoni paia ua maua i totonu o tusitusiga paia.

E o faatasi lenei tusi lesona ma le Tusi Lesona a le Tagata Aoga o le Mataupu Faavae ma Feagaiga ma ua mamanuina e fesoasoani ia te oe i lenei faagasologa. Iloilo ma le faaeteete anomea o le lesona e fesootai i le poloka o mau o le a e aoaoina atu. O le a fesoasoani lenei anomea ina ia e malamalama i talaaga ma anotusi o poloka mau taitasi ma o le a fesoasoani ia te oe ia iloa nisi o aoaoga faavae ma mataupu faavae o loo i ai. O fautuaga o le aoaoina atu o i lenei tusi lesona o le a fesoasoani foi ia te oe ma au tagata aoga ina ia faaaofia ai le tele o Aoaoga Faavae Autu o le Aoao Atu ma le Aoaoina Mai o le Talalelei i lesona taitasi. E mafai ona e filifili e faaaogaina uma pe nao ni nai fautuaga mo se poloka o mau, ma e mafai foi ona e fetuunaia ia manatu fautuaina e tusa ai ma le taitaiga a le Agaga ma i manaoga ma tulaga o tagata aoga o loo e aoaoina. Pe a fetuunaia fautuaga mo le aoaoina atu po o le suitulaga ai o ni ou lava manatu, ia mautinoa ua iloa po o fea o taunuuga o manatu autu ua faamoemoe se fautuaga faapitoa mo le aoaoina atu ia faia, ma filifili se isi manatu mo le aooaina atu o le a fesoasoani ia maua mai ai lena lava taunuuga.

E taua lou fesoasoani i tagata aoga e suesue i le poloka mau atoa i lesona taitasi. O le faia o lena mea, o le a fesoasoani ai i tagata aoga ia maua le savali atoa ua faamoemoe le Alii, e ala atu i Ana perofeta, e faailoa mai. Ae peitai, ao e fuafuaina lau lesona, e iu ina e iloa e le lava sou taimi i le piriota o le vasega e faaaoga ai fautuaga uma faafaiaoga o loo i le tusi lesona. Saili le taitaiga a le Agaga ma mafaufau ma le agaga tatalo i manaoga o au tagata aoga a o e fuafua po o le fea vaega o le poloka mau e faamamafa atu, ina ia fesoasoani i tagata aoga ia lagona le moni ma le taua o upumoni o le talalelei ma faaaoga ai i o latou olaga. Afai e puupuu le taimi, atonu e manaomia lou fetuunai o isi vaega o le lesona, e ala i le aotele faapuupuu o ni fuaiupu pe taiala tagata aoga e vave faailoa mai se mataupu faavae po o se aoaoga faavae a o lei see atu i le isi vaega o fuaiupu.

Pe a mafaufau i le auala e fetuunai ai anomea o lesona, ia mautinoa e mulimuli i le fautuaga lenei mai ia Elder Dallin H. Oaks o le Korama a Aposetolo e Toasefululua:

“Sa masani ona aoao mai Peresitene Packer, i la’u faalogo, faapea e muamua ona tatou vaetamaina, ona fetuunai ai lea. A tatou masani lelei ma le lesona o le a tatou tuuina atu, ona mafai lea ona tatou mulimuli i le Agaga e fetuunaia” (“A Panel Discussion with Elder Dallin H. Oaks” [Seminaries and Institutes of Religion satellite broadcast, Aug. 7, 2012], LDS.org).

I le taimi o le sauniuniga o lau lesona, atonu e te filifili e faaaoga ia punaoa o Faamatalaga ma le Api Talaaga o loo i le LDS.org po o le Potutusi o le Talalelei mo masini feaveai. E mafai ona e faaaogaina nei meafaigaluega e faailoga ai mau, saunoaga o konafesi, tusiga i mekasini a le Ekalesia, ma lesona. E mafai foi ona e faaopoopo ma sefe ia faamatalaga mo le faaaogaina i taimi o au lesona. Ina ia aoao atili e uiga i le auala e faaaoga ai nei meafaigaluega, tagai i le itulau Fesoasoani o Faamatalaga ma le Api Talaaga i le LDS.org.

Auala o Loo Faatulaga Ai le Tusi lesona Lenei

O le Mataupu Faalelotu 324–325 ua mamanuina e avea o se kosi e lua vaituuaga po o semesa. O le Mataupu Faalelotu 324 e taialaina tagata aoga e suesue i le Mataupu Faavae ma Feagaiga 1–76. O le Mataupu Faalelotu 325 e aofia ai le Mataupu Faavae ma Feagaiga 77–138 ma le Folafolaga Aloaia 1 ma le 2. O lenei tusi lesona a le faiaoga e 56 lesona, 28 mo afa taitasi o le Mataupu Faavae ma Feagaiga. Ua fuafuaina lesona taitasi ina ia aoao atu i le 50 minute o le vasega. Afai e faalua ona feiloai lau vasega i le vaiaso, e te aoao atua le lesona e tasi i le vasega e tasi. Afai na o le faatasi i le vaiaso e feiloai ai lau vasega mo le 90 i le 100 minute, e fautuaina e te aoao atua ni lesona se lua mo le vasega e tasi.

O lesona o i lenei tusi lesona e aofia ai vaega nei:

O Le Faatomuaga

E amata lesona taitasi ma se faatomuaga puupuu e uiga i le vaega po o vaega o le Mataupu Faavae ma Feagaiga lea o le a suesueina i lena lesona. E tuuina atu e le faatomuaga se aotelega o le talaaga faasolopito ma le anotusi o vaega taitasi. O nei faatomuaga, o loo maua foi i le tusi lesona a le tagata aoga, o le a tuuina atu ia te oe ma au tagata aoga se vaaiga lautele autu e uiga i fuaitau o mau na suesueina i lesona taitasi.

Faasologa o Taimi

E o faatasi faatomuaga taitasi ma se faasologa o taimi. O le a fesoasoani lenei faasologa o taimi ia te oe ina ia malamalama i le talaaga o vaega taitasi o le Mataupu Faavae ma Feagaiga e ala i le faaali atu o le taimi na maua ai e fesootai lea i isi mea na tutupu i le talafaasolopito o le Ekalesia.

Fautuaga mo le Aoaoina Atu

O le vaega autu o lesona taitasi o loo i ai se taiala ma ni manatu mo le auala e te ono aoao atu ai se fuaitau faapitoa o mau, e aofia ai ni fesili, upusii, siata, gaoioiga, ma ni faamatalaga anamua. E faataitaia e nei manatu le auala e faaaofia ai ia Aoaoga Faavae Autu o le Aoao Atu ma le Aoaoina Mai o le Talalelei i totonu o au aoaoga e fesoasoani ai i tagata aoga ia faateleina lo latou liua i le Alii ma Lana talalelei.

Tuuvaegaina o Fuaiupu ma Aotelega o Anotusi

O lesona taitasi o i lenei tusi lesona o loo taulai atu i se poloka o mau nai lo se manatu faavae patino, aoaoga faavae, po o se mataupu faavae. O le a fesoasoani lenei faiga ia te oe ma au tagata aoga e suesue ia tusitusiga paia i le faasologa, ma faaaoga aoaoga faavae ma mataupu faavae o i anotusi pe a fotuai mai lava i latou i fuaitau o mau. E masani lava ona vaevaeina poloka o mau mo lesona taitasi i ni vaega laiti, po o le faakulupuina faafuaiupu, lea e mulimuli i se faasologa faapitoa o manatu pe taulai atu i se autu patino. O nei vaega taitasi e amata i se mau faasino o loo lisiina atu ni fuaiupu o loo i ai i lena vaega, sosoo ai ma se aotelega faaanotusi o mea na tutupu po o aoaoga na talanoaina i lena vaega o mau.

Aoaoga Faavae ma Mataupu Faavae

I le tino o lesona taitasi, o le a e maua ai ni aoaoga faavae ma mataupu faavae autu ua faailogaina faamatamatatetele. O nei aoaoga faavae ma mataupu faavae o loo faailoaina i le mataupu aoaoina ona (1) latou te atagia mai ai se savali autu o le poloka mau, (2) e faapitoa ona faatatau i manaoga ma tulaga o tagata aoga, po o le (3) o i latou o ni upumoni autu e mafai ona fesoasoani i tagata aoga e faaloloto o latou sootaga ma le Alii. Na fautua mai Peresitene Henry B Eyring o le Au Peresitene Sili: “A o e saunia se lesona, tilotilo i ai mo mataupu faavae e liua mai ai. … O se mataupu faavae e liua ai o se mataupu e tau atu ai i le usitai i le finagalo o le Atua” (Converting Principles” [o se faasauga ma se pulega aoao, Fep. 2, 1996], 1). Ia silafia, e le o taumafai lenei tusi lesona ia faailoa atu aoaoga faavae uma ma mataupu faavae ia e ono maua i le Mataupu Faavae ma Feagaiga.

O fautuaga e aoao atu ai o i lenei tusi lesona o loo avatu ai le tele o avanoa i tagata aoga e faailoa mai ai aoaoga faavae ma mataupu faavae o i mau. O loo fautua atu foi i le lesona ni taimi e mafai ai e oe le faiaoga ona filifili e faailoa atu se aoaoga faavae po o se mataupu faavae. Ao faailoa mai e tagata aoga upumoni na latou mauaina, ia faaeteete e aua le fautua atu e faapea e sese tali a tagata aoga ona e ese upu o loo latou faaaogaina mai upu o loo faaaogaina i le tusi lesona, pe ona ua latou faailoa mai se upumoni e le o ta’ua i le mataupu aoaoina. Ae peitai, afai e mafai ona sili atu ona sa’o le faamatalaga a le tagata aoga pe e sese le aoaoga faavae, mafaufau ma le faaeteete i le auala e mafai ona e faamanino pe faasa’o atu ai ma le agaalofa lona malamalamaaga ao faatumauina pea se siosiomaga o le alofa ma le faatuatuaina.

Fesoasoaniga Faafaiaoga

O fesoasoaniga faafaiaoga o loo aofia atu i fautuaga mo le aoaoina atu i le faagasologa o lesona. O nei fesoasoaniga faafaiaoga e fesoasoani e faamalamalamaina ia Aoaoga Faavae Autu o le Aoao Atu ma le Aoaoina Mai o le Talalelei ma ofoina atu se taiala i le faaaogaina lelei o metotia eseese faafaiaoga, tomai, ma faiga. A oo ina e malamalama i mataupu faavae o loo i ai i fesoasoaniga faafaiaoga, vaavaai mo auala e faaaoga tutusa ai i lou aoao atu.

Manatu Faaopoopo mo le Aoaoina Atu

Manatu faaopoopo mo le aoaoina atu e vaaia i le faaiuga o nisi o lesona. O loo maua atu ai ni fautuaga mo le aoaoina atu o aoaoga faavae ma mataupu faavae ia atonu e le o faailoa atu pe faamamafaina i le tino autu o le lesona. O nisi taimi, latou te avatu ai se isi faiga faaopoopo e aoao atu ai le poloka mau. E le tatau ona e manatu e tatau ona e faaaogaina nei manatu faafaiaoga. E tatau ona e faia faaiuga pe faaaoga nei fautuaga e fua i le taimi e maua, o manaoga o au tagata aoga, ma le taitaiga a le Agaga.

O le Lomiga 2013 o Tusitusiga Paia

O le faamatalaga o loo i ai i lenei tusi lesona e faavae lea i luga o le lomiga 2013 o tusitusiga paia na lolomiina ma tufatufaina atu e Le Ekalesia a Iesu Keriso o le Au Paia o Aso e Gata Ai. O le lomiga 2013 o tusitusiga paia e aofia ai ni ulutala ua toefaafouina o vaega mo nisi o vaega o le Mataupu Faavae ma Feagaiga. O suiga i ulutala o vaega, e aofia ai fetuunaiga i nisi o aso ma nofoaga, ua uma ona faia e atagia ai ni sailiga lata mai nei ma mea na maua faasolopito ma ia saunia ai se anotusii faaopoopo pe manino atu mo tusitusiga paia.

O loo maua anotusi o le lomiga o le 2013 o tusitusiga paia i luga o le initoneti i le scriptures.lds.org ma i le polokalama o le Potutusi o le Talalalei mo masini feaveai.

Atonu o loo faaaoga e nisi o au tagata aoga lomiga talu ai (1981) o tusitusiga paia. O le tele o suiga i le lomiga o le 2013 e itiiti lava ma e leai se afaina i suesuega a tagata aoga o le Mataupu Faavae ma Feagaiga. Ae peitai, ia nofouta i aso, nofoaga, ma isi faamatalaga i ulutala o vaega ia e ono eseese ona e fuafua lea i le lomiga o tusitusiga paia o loo faaaoga e tagata aooga. I nei tulaga, e sili pe a gauai atu i iloiloga o le 2013 i le fesili atu i se tagata aoga o loo i ai le lomiga fou e faitau mai pe faasino tagata aoga i le lomiga o le 2013 o loo i le polokalama o le Potutusi o le Talalelei.

Faamoemoega o le Tagata Aoga mo Togi o le Faauuga

Ina ia maua se togi mo le faauuga i le inisitituti, e manaomia e tagata aoga ona faitau tusiga o mau mo le kosi (Mataupu Faavae ma Feagaiga 1–76 mo le Mataupu Faalelotu 324, ma le Mataupu Faavae ma Feagaiga 77–138 ma le Folafolaga Aloaia 1 ma le 2 mo le Mataupu Faalelotu 325) ma e tatau foi ona ausia tulaga manaomia o le auai ma faaalia le lelei i anotusi o le kosi i le faamaeaina o se faavasegaga mo le aoaoina.

E Mafai Faapefea Ona Ou Faafetauiina Lesona Mo i Latou E I Ai Manaoga Faapitoa?

A o e sauni e aoao atu, ia e magafagafa i tagata aoga o e e i ai ni manaoga faapitoa. Fetuunai ia gaoioiga ma ni faamoemoega e fesoasoani ai ia faamanuiaina i latou. Saili auala e fesoasoani ai ia i latou ia lagona le alofaina, taliaina, ma le faaaofiaina. Ia maua se fesootaiga o le talitonuina.

Mo nisi manatu ma punaoa, faafesootai le itulau o Disability Resources i le disabilities.lds.org ma le tusitaiala o aiaiga a Seminare ma Inisitituti o Mataupu Faalelotu ua faaautu “Adapted Classes and Programs for Students with Disabilities.”