Lesona 41

Mataupu Faavae ma Feagaiga 103, 105

Faatomuaga ma le Faasologa o Taimi

I le aso 24 Fepuari, 1834, sa feiloai Parley P. Palate ma Laimani Wight ma le Perofeta o Iosefa Samita ma le aufono maualuga i Katelani e faamalamalama ai le mala a le Au Paia i Misuri ma sailia se fautuaga ma se fesoasoani. O le aso lava foi lea na maua mai ai e le Perofeta le faaaliga ua faamaumau i le Mataupu Faavae ma Feagaiga 103, lea na folafola mai ai e le Alii o le a “[toefuataiina] le Au Paia i le laueleele o Siona” pe afai latou te le “faaeleelea o latou tofi” (MFF 103:13–14) ma aoaoina Taitai o le Ekalesia e faaputuina ni oloa ma faatasi ai ma latou e fesoasoani ai le Au Paia i Misuri.

I le usiusitai ai le poloaiga a le Alii, sa faatulagaina ai e le Perofeta o Iosefa Samita ma le silia teisi atu ma le 200 volenitia le Tolauapiga a Isaraelu, (lea na faaigoa mulimuli ane o le Tolauapiga a Siona) ina ia o atu e fesoasoani i le Au Paia o e sa tutuli faamalosi ese mai o latou fale i le Itumalo o Siakisone, Misuri. I le aso 22 Iuni, 1834, a o tolauapi ai i le fa maila i matu o le Fishing River i Misuri ma pe tusa ma le 24 maila mai Initipene, sa faalauina ai e Iosefa le faaaliga o loo tusia i le Mataupu Faavae 105, lea na faamalamalama mai ai e le Alii e tatau i le Au Paia ona “faatali [au toeaina] mo se vaitau itiiti mo le laveaiina o Siona” (MFF 105:9). Na tuuina mai foi e le Alii ia faatonuga e faatatau i le mea e tatau ona tupu ina ia mafai ai ona laveaiina Siona, pe toe faatagisia e le Au Paia, i se taimi i le lumanai.

Novema–Tesema 1833Sa faamalosia le Au Paia e tuua le Itumalo o Siakisone, Misuri.

24 Fepuari, 1834Na maua mai ai leMataupu Faavae ma Feagaiga 103. .

Mati–Me 1834E sue mai e taitai o le Ekalesia ia alii ma ao mai tupe e sauniuni ai mo le savaliga i Misuri.

Me 1834Na amata e tagata o le Tolauapiga a Siona la latou savaliga mai Ohaio i Misuri.

15 Iuni, 1834Sa aoaoina e le Perofeta o Iosefa Samita faapea o le a le saunia e Kovana Tanielu Dunklin se au fitafita e fesoasoani ile Au Paia e toe faafoi i o latou fale i le Itumalo o Siakisone, Misuri.

22 Iuni, 1834.Na maua mai ai leMataupu Faavae ma Feagaiga 105 .

Faaiuiuga o Iuni 1829Sa pagatia ai tagata o le Tolauapiga a Siona ma isi tagata o le Ekaleisa i le kolela

Amataga o Iulai 1834Sa faataape ai tagata o le Tolauapiga a Siona.

Fautuaga mo le Aoaoina Atu

Mataupu Faavae ma Feagaiga 103:1–20

Ua folafola mai e le Alii o le a laveaiina Siona

Tusi le fasifuaitau Faatoilaloina e le lalolagi i le laupapa.

• E faapefea ona e faamatalaina le uiga o le faatoilaloina e le lalolagi? (O tali e mafai ona i ai e ono aofia ai le lofituina ma faataumaoia e tosinaga amioletonu, faaosoosoga, ma le agasala.)

• O a ni nai auala o loo faatoilaloina ai talavou matutua e le lalolagi i nei ona po?

Valaaulia tamaiti aoao e vaavaai mo mataupu faavae a o latou suesueina le Mataupu Faavae ma Feagaiga 103 ia o le a fesoasoani latou te iloa ai pe faapefea ona maua le mana e manumalo ai mai tosinaga amioletonu o le lalolagi.

Faamalamalama atu ina ua tutuliese faamalosi le Au Paia mai le Itumalo o Siakisone, Misuri, sa latou tauivi e sue ni malutaga talafeagai ma ni meaai ma sa taumanatunatu pe ua tatau ona latou faamautu i se isi mea nai lo le taumafai e toe foi i o latou fale i le Itumalo o Siakisone. A o toe talosagaina e taitai o le Ekalesia ia taitai o le lotoifale ma le setete mo se fesoasoani, sa taitai le Au Paia ia talitonu afai latou te faatuina sa latou lava ‘autau mo lo latou lava saogalemu, o le a tofia e le kovana o Misuri, o Tanielu Dunklin, le au fitafita a le setete e toe faafeaoina le Au Paia i o latou laueleele i le Itumalo o Siakisone. O le le mautinoa po o le a le isi mea e fai, sa auina atu ai e le Au Paia i Misuri ia Pale P. Palate ma Laimani Wight i Ohaio e saili se taitaiga mai le Perofeta o Iosefa Samita. Sa taunuu Pale ma Laimani i Katelani i le faaiuga o Fepuari, 1834 ma sa feiloai ai ma le Perofeta ma le aufono maualuga sa faatoa faatulagaina i le aso 24 Fepuari e talanoaina manaoga o le Au Paia i Misuri. O le aso lava lena, sa maua ai e le Perofeta le faaaliga o loo faamaumauina i le Mataupu Faavae ma Feagaiga 103.

Valaaulia se tagata aoga e faitau leotele le Mataupu Faavae ma Feagaiga 103:1–4 . Fai i le vasega e mulimuli ai, ma vaavaai mo mafuaaga na tuu ai e le Alii le Au Paia ia sauaina ma tutuliese mai le Itumalo o Siakisone.

• O a mafuaaga na aumai e le Alii na ala ai ona tuu i le Au Paia i Misuri ia sauaina ma tutuli ese mai o latou fale?

Valaaulia se tagata aoga e faitau leotele le Mataupu Faavae ma Feagaiga 103:5-7 . Fai atu i le vasega e mulimuli i le faitauga, ma vaavaai mo le fautuaga ma folafolaga a le Alii i le Au Paia.

• O le a le fautuaga ma le folafolaga na tuuina mai e le Alii i le Au Paia?

• O le a le mataupu faavae e mafai ona tatou faailoa mai le fautuaga ma le folafolaga a le Alii i nei fuaiupu? (A uma ona tali mai tamaiti, tusi le mataupu faavae lea i le laupapa: Afai tatou te faalogo ma usitai i fautuaga a le Alii, o le a tatou maua le mana e manumalo ai mai le lalolagi.)

Valaaulia se tagata aoga e faitau leotele le Mataupu Faavae ma Feagaiga 103:8-10 . Fai i le vasega e mulimuli i le faitauga, ma vaavaai mo lapataiga a le Alii ia i latou o le a le faalogo ma usitai i Ana upu.

• E tusa ai ma le fuaiupu 8, o le a le mea o le a tupu pe afai tatou te le tausia poloaiga? (A uma ona tali mai tagata aooga, tusi le mataupu faavae lea i le laupapa: Afai tatou te le tausia poloaiga, o le a manumalo le lalolagi ia i tatou.)

Vaevae le vasega i ni vaega se lua pe tolu ma valaaulia tagata e talanoaina ia latou vaega a latou tali i fesili nei. (Atonu e te manao e tusi fesili nei i luga o le laupapa pe saunia i se tufaaga.)

• O a ni faataitaiga o le faalogo ma usitai i fautuaga a le Alii e aumai ai ia i tatou le mana e manumalo ai i le lalolagi?

• O anafea na e lagonaina ai ua fesoasoani le Alii ia te oe ia e manumalo mai le lalolagi ao e faalogo ma usitai i Ana fautuaga?

Molimau atu afai tatou te taumafai ma le filiga e faalogo ma usitai i fautuaga a le Alii ma salamo ma le loto faamaoni pe a tatou sese, o le a fesoasoani o Ia ia i tatou ia tatou manumalo mai tosinaga leaga a lenei lalolagi. Valaaulia tagata e mafaufau loloto ma tusi i lalo mea o le a latou faia e faalogo atoatoa ai ma usitai i fautuaga a le Alii.

Faamalamalama atu o le Mataupu Faavae ma Feagaiga 103:11–20 sa faaalia mai ai e le Alii e faapea “a mavae puapuaga e tele,” o le a Ia toefuataiina Lona nuu i le laueleele o Siona “i se taimi” (fuaiupu 12, 20).

Mataupu Faavae ma Feagaiga 103:21-40

Ua faaali mai e le Alii le ala o le a laveaiina ai le laueleele o Siona

Valaaulia ni nai tagata o le vasega e feauauai i le faitauina leotele mai le Mataupu Faavae ma Feagaiga 103:21–25. Fai atu i le vasega e mulimuli i le faitauga, ma vaavaai mo mea na poloaiina e le Alii le Perofeta o Iosefa Samita e fai ina ia fesoasoani ai e laveai Siona. Fai atu i tagata aooga e lipoti mai mea ua latou mauaina.

Faamalamalama atu o le Mataupu Faavae ma Feagaiga 103:26–40, na valaauina ai e le Alii taitai e toavalu o le Ekalesia e sue ma aumai ni alii ma faaputuputu ni tupe ma sapalai e fesoasoani ai e laveai, pe toe faatagisia mai laueleele o Siona. Na ta’u atu e le Alii ia te i latou e sue mai ni alii se limaselau pe a mafai ae aua nei itiiti ifo nai lo le tasi le selau. O lenei vaega o tagata o le a faaigoaina o le Tolauapiga a Siona.

Valaaulia se tagata aoga e faitau leotele le palakalafa lenei:

I le faaiuga o le fonotaga a le aufono maualuga lea na talanoaina ai e taitai o le Ekalesia le tulaga o le Au Paia i Misuri, sa saunoa atu ai Iosefa Samita o le a malaga o ia i Siona e fesoasoani e laveai mai. E tusa ma le 30 pe 40 alii sa auai sa faapea ona volenitia ai foi. I nai masina na sosoo ai, sa galulue ai ma le filiga ia taitai e toavalu o le Ekalesia ia na valaauina e sauniuni mo le malaga faapitoa. Na iu ina silia ma le 200 na maua mai ma sa aufaatasi atu ma le Tolauapiga a Siona mo le savaliga i Misuri.

Mataupu Faavae ma Feagaiga 105:1–19

Ua tolo le laveaiina o Siona “mo se vaitau itiiti”

Faaali se faafanua e faaalia ai Katelani, Ohaio, ma le Itumalo o Siakisone, Misuri (pei o le faafanua nu. 9 “O Le Ala Na Ui ai le Tolauapiga a Siona, 1834,” i le tusi lesona lenei).

faafanua, Ala na ui ai le Tolauapiga a Siona

Faamalamalama atu e toatele tagata o le Tolauapiga a Siona sa naunau e auai i le malaga faapitoa ma sa vaavaai lelei atu i lea aafiaga. Peitai, sa fetaiai foi i latou ma le tele o faigata. Sa malaga le vaega i le silia ma le 900 maila i asaga gaoa. O le toatele sa savavali ma sa savavali i le va o le 20 ma le 40 maila i le aso. Sa latou pagatia i le vevela, susu, timuga, masini gaui, leai o ni meaai ma ni vai, mama’i, ma vae tiga ma tafetotoi. E i ai taimi, o nisi ona o le fiafeinu tele sa latou inu ai vai taufusi po o vai mai asaga o solofanua pe a uma ni timuga. O nisi o le tolauapiga sa tomumu e uiga i tulaga o le savaliga.

• Pe ana fai sa e i ai i le Tolauapiga a Siona, mata na faapefea e nei aafiaga ona tofotofoina lou faatuatua?

Ta’u atu i tamaiti ina ua taunuu le Tolauapiga a Siona i Misuri, sa latou iloa ai o le a le faatagaina e le Kovana o Tanielu Dunklin le au fitafita a le setete e fesoasoani e toe faafoi le Au Paia i o latou laueleele. E ui i lea tala faalotovaivai, sa faaauau pea le Tolauapiga a Siona i Clay County. I le aso 22 o Iuni, 1834, a o latou tolauapi i le va o afega i sasae ma sisifo o le FishIng River, i matu tonu o le Itumalo o Siakisone, Misuri, na tuu atu ai e le Alii le faaaliga o loo faamaumauina i le Mataupu Faavae ma Feagaiga 105.

Valaaulia ni nai tagata aoga e auauai e faitau leotele mai i le Mataupu Faavae ma Feagaiga 105:1–6. Fai atu i le vasega e mulimuli i le faitauga, ma vaavaai mo le mea na taofia ai le Au Paia mai le laveaiina o Siona.

• O le a le mea na taofia ai le Au Paia mai le laveaiina o Siona?

• E tusa ai ma le fuaiupu 5, o le a le auala e tasi e mafai ona fausia ai Siona?

Faamalamalama atu o le fautuaga a le Alii i nei fuaiupu sa le na o le Au Paia i Misuri na faasinotonu i ai. I le Mataupu Faavae ma Feagaiga 105:8–9, na aoaiina ai e le Alii isi tagata o le Ekalesia aua sa latou mumusu e auai faatasi i le Tolauapiga a Siona pe auina atu tupe e lagolago ai le Au Paia mafatia i Misuri.

Valaaulia ni nai tagata aoga e auauai e faitau leotele mai i le Mataupu Faavae ma Feagaiga 105:9, 16–17. Fai atu i le vasega e mulimuli i le faitauga, ma vaavaai mo taunuuga o solitulafono a le Au Paia.

• O a nisi o taunuuga o solitulafono a le Au Paia?

• Pe ana faapea sa avea oe o se sui auai o le Tolauapiga a Siona, o a ni mafaufauga ma ni faalagona e te manatu atonu sa ia te oe ina ua uma ona savavali i le silia ma le 900 maila ona iloa ane lea sa lei finagalo le Alii tou te tau e toe faafoi mai le laueleele o Siona?

Faamalamalama atu o nisi o le Tolauapiga a Siona na liliuese ona sa latou manatu ua toilalo le Tolauapiga a Siona ina ua le toefuataiina i le Au Paia i Misuri o latou fale ma meatotino. Peitai, e toatele na tumau faamaoni.

Valaaulia ni nai tagata o le vasega e feauauai i le faitauina leotele mai le Mataupu Faavae ma Feagaiga 105:10–14. Fai atu i le vasega e mulimuli i le faitauga, ma vaavaai mo faamoemoega o le Alii i le tolopoina o le laveaina o Siona.

• O a faamoemoega o le Alii na toe tolopo ai le laveaina o Siona? (Faamanatu i tagata o le faaeega i le fuaiupu 12 e faasino i se faaeega o le mana lea na folafola mai e le Alii o le a tuuina atu i totonu o le Malumalu o Katelani [tagai MFF 95:8].)

Valaaulia se tagata aoga e faitau leotele le Mataupu Faavae ma Feagaiga 105:18-19 . Fai i le vasega e mulimuli ai, ma vaavaai mo le folafolaga a le Alii ia i latou o e “faalologo i [Lana] upu” (fuaiupu 18).

• O le a le mea na folafola mai e le Alii ia i latou o e faalogo i Lana upu?

• O le a se mataupu faavae e mafai ona tatou faailoa mai i nei fuaiupu? (A uma ona tali mai le vasega, tusi le mataupu faavae lea i le laupapa: O le a faamanuia tele e le Atua i latou o e tumau pea ona faalogo ma usiusitai i Ana upu pe a tofotofoina lo latou faatuatua.)

Tau atu o i latou o e sa faamaoni i le taimi o le savaliga a le Tolauapiga a Siona sa aoaoina patino e le Perofeta o Iosefa Samita ma sa saunia e avea ma taitai i le lumanai o le Ekalesia.

Valaaulia se tagata aoga e faitau leotele le saunoaga lenei mai ia Peresitene Uilifoti Uitilafi (1807–1898):

“Sa ou i ai i le Tolauapiga a Siona ma le Perofeta a le Atua. Sa ou vaai i fegalegaleaiga a le Atua ma ia. Sa ou vaai i le mana o le Atua ia te ia. Sa ou vaai o ia o se Perofeta. …

“Ina ua valaauina tagata o le Tolauapiga a Siona, o le toatele o i matou sa vaavaai atu i foliga o le tasi ma le isi; sa o ni tagata ese i matou o le tasi ma le isi ma o le toatele lava e lei vaai i le perofeta. … Sa tele mea sa matou ausia, e ui sa tele taimi na tuufesili ai le au liliuese ma le au le talitonu, ‘O le a lau mea sa fai?’ Sa matou maua mai se poto masani semanu matou te le mauaina lava i se isi lava ala. Na matou maua le avanoa e vaai ai i fofoga o le perofeta, ma sa matou maua le avanoa e malaga ai i ni maila e afe ma ia, ma vaai i galuega a le Agaga o le Atua ia te ia, ma faaaliga a Iesu Keriso ia te ia ma le faataunuuina o na faaaliga.

“O le aafiaga na [matou] maua mai i le malaga ai i le Tolauapiga a Siona sa sili atu le taua nai lo auro” (Teachings of Presidents of the Church: Wilford Woodruff [2011], 135, 138.)

Tuu atu ni faataitaiga o auala e faaaoga ai mataupu faavae o le talalelei.

O oe po o tagata o le vasega e mafai i nisi taimi ona fautuaina mai ni auala e mafai ona faaaoga ai mataupu faavae o le talalelei. O na faataitaiga e mafai ona maua ai e tagata aoga ni manatu aoga mo le faaaoaina o mataupu faavae o le talalelei i o latou olaga. Peitai, ia faaeteete aua nei soona faamaopo i le tuuina atu o ni faaaogaaga patino mo tagata o le vasega.

Faasino i le mataupu faavae o loo tusia i le laupapa: “O le a faamanuia tele e le Atua i latou o e tumau pea ona faalogo ma usitai i Ana upu pe a tofotofoina lo latou faatuatua.

• E mafai faapefea ona e faafesootaia lenei mataupu faavae i talavou matutua ma tofotofoga o le faatuatua ua latou oo i ai i le taimi nei?

• O anafea na e tumau ai pe tumau ai se tasi e te iloaina ona faalogo ma usitai i upu a le Alii e oo lava i le taimi o se tofotofoina o le faatuatua?

Fautuaina le vasega e filifili nei e tumau i le faalogo ma usitai i upu a le Alii tusa lava pe tofotofoina lo latou faatuatua.

Mataupu Faavae ma Feagaiga 105:20-41

Ua aoao mai e le Alii le Au Paia i le mea e tatau ona latou faia a’o le’i laveaiina Siona

Faamalamalama atu o le Mataupu Faavae ma Feagaiga 105:20–41, sa folafola mai ai e le Alii i le Au Paia e faapea afai latou te mulimuli i Ana fautuaga o lea latou maua le “mana pe a mavae aso e tele” e laveaiina ai Siona (fuaiupu 37).

Faaiu i le faasoa atu o lau molimau i upumoni sa faailoa mai i lenei lesona, ma valaaulia le vasega e faatino nei upumoni.