I le aso 16 Fepuari, 1832, a o galulue ai le Perofeta o Iosefa Samita ma Sini Rikitone i le faaliliuga musuia o le Tusi Paia ma manatunatu loloto i le uiga o le Ioane 5:29, sa faaali atu ia i la’ua se faaaliga vaaia, lea o loo tusia i le Mataupu Faavae ma Feagaiga 76. I le vaega o le faaaliga vaaia o loo tusia i le Mataupu Faavae ma Feagaiga 76:50--119, sa faaali atu ia Iosefa ma Sini ia i latou e nofoia malo selesitila, teresitila, ma le telesitila ma le taua o le mauaina ma le totoa i le molimau ia Iesu Keriso.
25 Ianuari, 1832Sa faauuina ai Iosefa Samita e avea ma Peresitene o le Perisitua Maualuga i le taimi o se konafesi a le Ekalsia i Amherst, Ohaio.
Faaiuga o Ianuari, 1832Na toe foi ai Iosefa Samita ma Sini Rikitone i Hairama, Ohaio, e galulue i le faaliliuga musuia o le Feagaiga Fou.
24--25 Mati 1832Na ave ai Iosefa Samita ma Sini Rikitone e se vaega faatupu faalavelave i le po, fasi faamo’amo’a, ma valitaina ma faapipii i ai fulumanu i Hairama, Ohaio.
Ua faaali atu ia Iosefa Samita ma Sini Rikitone i latou o e o le a maua le mamalu selesitila.
Faitau leotele ia vaaiga nei, ma fai i tagata o le vasega e mafaufau pe o le a faapefea ona latou tali atu i ai. Ia mautinoa e lava se taimi e tuu atu pe a uma tagata taitasi ina ia faatulaga ai o latou manatu.
Ua talitonu se alii talavou e faapea ona e alofa le Atua i Ana fanau uma, o le a Ia faamanuiaina ai i tatou tusa lava po o a mea tatou te fai. Ua talitonu foi o ia e ui atonu e faasalaina i tatou mo a tatou agasala, ae mulimuli ane o le a faasaoina i tatou uma i le malo o le Atua.
Ua talitonu se tamaitai talavou afai e mulimuli o ia ma le atoatoa i poloaiga uma, o le a faasaoina o ia i le malo o le Atua.
Ua fai mai se alii ona ua toe fanauina o ia, o lea o le a faasaoina ai o ia i le malo o le Atua tusa lava po o a isi mea na te faia i lenei olaga.
E mafai faapefea e nei vaaiga eseese ona aafia ai taga fai a se tagata i le olaga nei?
Faamalamalama atu e eseese lotu ia latou aoaoga e uiga i le olaga pe a mavae le oti, i le taimi nei faapea foi i le 1832 ina ua tuuina mai le faaaliga o loo tusia i le Mataupu Faavae ma Feagaiga -76 Mo se faataitaiga, o le toatele o lotu Kerisiano na aoao atu faapea o tagata uma e o i le lagi po o seoli pe a oti. O isi lotu, e pei o le Universalists, na aoao atu e faapea o le a faasalaina e Iesu Keriso e agasala mo sina taimi e le tumau ae o le a iu lava ina togiolaina tagata uma.
A o suesueina e le vasega le Mataupu Faavae ma Feagaiga 76:50--119 ile aso, valaaulia i latou e vaavaai mo le aoaoga faavae ma mataupu faavae ia e mafai ona fesoasoani ia latou malamalama ai i le olaga pe a mavae le oti, ma le mea e moomia mo le faaolataga ma le ola e faavavau.
Toe iloilo le Mataupu Faavae ma Feagaiga 76:1--49 e ala i le valaaulia o ni nai tagata aoao e aotele mai le vaega o le faaaliga vaaia na suesueina i le lesona talu ai.
Valaaulia se tagata aoao e faitau leotele le Mataupu Faavae ma Feagaiga 76:50–53 Fai i le vasega e mulimuli i le faitauga, ma vaavaai po o le a le mea agavaa ai se tagata e maua le mamalu selesitila. A uma ua lava se taimi, valaaulia ni tagata e o mai i le laupapa e tusi mea nei e faaagavaa ai i lalo o le “Mamalu Selesitila.”
O le a sou manatu o le a le uiga o le mauaina o le molimau ia Iesu Keriso ma talitonu i Lona suafa (fuaiupu 51)? (O tali e mafai ona aofia ai le mauaina o se molimau e ala i faaaliga patino e faapea o Iesu Keriso o le Faaola ma faatino ai e tusa ma lena molimau.)
Faamatala atu o fasifuaitau “tusa ai ma le poloaiga”(fuaiupu 51) ma le “e ala i le tausia o poloaiga” (fuaiupu 52) e faasino i le usitai i poloaiga ma sauniga o le talalelei o loo faamatala mai i le fuaiupu 51.
E faapefea ona “manumalo [se tagata] e ala i le faatuatua” (fuaiupu 53)? (Ina ia manumalo e ala i le faatuatua e aofia ai le manumalo i faaosoosoga ma agasala e ala i le faaaogaina o le faatuatua ia Iesu Keriso, ma onosai faamaoni i tofotofoga.)
O le a lou manatu i le uiga ole “faamauina e le Agaga Paia o folafolaga” (fuaiupu 53)? (Fesoasoani i tagata o le vasega ia malamalama o le Agaga Paia o Folafolaga o le Agaga Paia lea. Ua faamauina i tatou e le Agaga Paia o Folaolaga pe a faamaonia e le Agaga Paia ia sauniga ua tatou maua, pe molimauina foi i le Tama Faalelagi ua uma ona faatinoina lelei ma ua tatou faamaoni i a tatou feagaiga.)
Tagai i le lisi o i luga o le laupapa, ma fesili i le vasega pe faapefea ona latou aoteleina mea e tatau ona tatou faia e maua ai le mamalu selesitila. A uma ona tali mai le vasega, tusi le mataupu faavae lea i luga o le laupapa: Ina ia maua lemamalu selesitila, e tatau ona tatou maua se molimau ia Iesu Keriso, maua sauniga o le talalelei, ma faatoilaloina le agasala ma tofotofoga e ala i le faatuatua ia Iesu Keriso.
Valaaulia tagata o le vasega e faitau le leoa le Mataupu Faavae ma Feagaiga 76:54--68 ma vaavaai mo faamanuiaga o le a tuu mai e le Atua ia i latou o e maua le mamalu selesitila. A uma ua lava se taimi, valaaulia le vasega e lipoti mai mea na latou aoaoina. Atonu e manaomia ona e faamalamalama atu le fasifuaitau “ekalesia a le Ulumatua” i le fuaiupu 54 e faasino i tagata o le Ekalesia ua agavaa e maua le ola e faavavau, po o le faaeaga (tagai Joseph Fielding Smith, Doctrines of Salvation, comp. Bruce R. McConkie [1955], 2:41–42).
O fea o nei faamanuiaga e sili ona ‘anoa ia te oe ma pe aisea?
Valaaulia se tagata o le vasega e faitau leotele le Mataupu Faavae ma Feagaiga 76:69–70 . Fai i le vasega e mulimuli ai, ma vaavaai pe o faapefea ona faamatala mai i latou o e maua le mamalu selesitila.
Faamatala atu o le fasifuaitau “tagata amiotonu” i le fuaiupu 69 e faasino i alii ma tamaitai o e taumafai e ola amiotonu ae e le atoatoa i le taimi o o latou olaga i le tino nei.
O a mea o aoao mai e nei fuaiupu e uiga i le ala tatou te agavaa ai e maua le mamalu selesitila? (A uma ona tali mai le vasega, tusi le aoaoga faavae lea i luga o le laupapa: Na pau le mea e mafai ai ona faaatoatoaina i tatou o le ala lea ia Iesu Keriso.)
Molimau atu e faapea, e ui o a tatou taumafaiga sili e tausi uma poloaiga e le faapea tatou te atoatoa ai, ae o a tatou taumafaiga e fesoasoani tatou te maua ai le alofa tunoa o le Faaola, ma faamamaina ai e ala i Lana “togiola ua atoatoa” (MF&F 76:69).
E mafai faapefea e le malamalama i lenei aoaoga faavae ona faamalosiauina i tatou a o tatou taumafai mo le faaeaga i le malo selesitila?
Ua faaali atu ia Iosefa Samita ma Sini Rikitone i latou o e o le a maua le mamalu teresitila.
Valaaulia se tagata o le vasega e faitau leotele le Mataupu Faavae ma Feagaiga 76:71 . Fai atu i le vasega e mulimuli i le faitauga, ma vaavaai mo le mea na sosoo ai sa faaalia mai ia Iosefa Samita ma Sini Rikitone.
E faatusatusa faapefea le mamalu o i latou i le malo teresitila i le mamalu o i latou i le malo selesitila?
Faamatala atu e faapei lava ona sili atu le malamalama o le la nai le masina, o i latou o e maua tino selesitila o le a toetutu mai ma le mamalu ma faamanuiaga e sili atu nai lo i latou e maua ia tino teresitila.
Fai i le vasega e faitau le Mataupu Faavae ma Feagaiga 76:72--80 ma se paga ma talanoaina pe faapefea ona eseese i latou o e maua le mamalu terestitila mai ia i latou o e maua le mamalu selesitila. A uma ua lava se taimi, valaaulia tamaiti faamatala mai eseesega na latou maua. Tusi a latou tali i luga o le laupapa i lalo o le “Mamalu Teresitila.”
Ta’u i ai o fasifuaitau “o e na oti e aunoa ma le tulafono” i le fuaiupu 72 ma le “o e sa le taliaina le molimau ia Iesu i la le tino, ae mulimuli ane taliaina” i le fuaiupu 74, ma faamalamalama atu e mafai ona faasino ia i latou e le i taliaina le talalelei i le lalolagi ae sa ola i ni olaga mama, faapea foi i latou e lei faalogo lava i le talalelei. Ina ia fesoasoani ia malamalama atili tagata ole vasega i le uiga o nei fuaitau, valaaulia i latou e sue i le Mataupu Faavae ma Feagaiga 137:7--8, ma valaaulia se tagata e faitau leotele fuaiupu nei.
O a mea na faamanino mai e le Alii i nei fuaiupu e uiga ia i latou ua oti e aunoa ma se malamalama i le talalelei? (O i latou “o e taliaina ma o latou loto atoa” [MF&F 137:8] pe ana faapea latou te maua le avanoa o le a mautofi i le malo selesitila.)
O le a sou manatu i le uiga o le fasifuaitau “faatauasoina i le faitogafiti o tagata” i le Mataupu Faavae ma Feagaiga 76:75 ? E mafai faapefea ona faatauasoina tagata e le faitogafiti o tagata?
O le a le uiga o le fasifuaitau “o i latou ia sa lei totoa i le molimau ia Iesu” i le fuaiupu 79 ?
Afai o se tagata e le toa i lana molimau ia Iesu Keriso, o le a maua le mamalu terasitila, o le a le upumoni o loo fautuaina mai i i e faatatau ia i latou o e totoa i le molimau ia Iesu Keriso? (E ao i tagata o le vasega ona faailoa mai se mataupu faavae e pei o lea: Afai tatou te totoa i le molimau ia Iesu Keriso, o le a tatou maua le mamalu selesitila.)
Ina ia fesoasoani i tagata o le vasega ia malamalama i le uiga o le totoa i le molimau ia Iesu Keriso, valaaulia se tagata e faitau leotele le saunoaga lea a Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“O le toa i le molimau ia Iesu o le talitonu lea ia Keriso ma lana talalelei faatasi ma se talitonuga maumaututu e le maluelue. …
Ae e le na o le pau lena. E sili atu nai lo na o le talitonu ma le iloa. E tatau ona fai i tatou ma e anaana i le upu ae le na o le faalogo i ai. E sili atu nai lo na o se auaunaga e na o upu; e le na o le tautau atu e le gutu le tulaga paia o le Alo o le Faaola. O le usiusitai ma le usitaia ma le amiotonu patino. …
“O le totoa i le molimau ia Iesu o le … ‘tumau e oo i le iuga.’ (2 Nifae 31:20.) O le ola ai lea i la tatou tapuaiga, o le faia lea o mea ua tatou aoao atu, o le tausia lea o poloaiga.” …
“Ina ia toa i le molimau ia Iesu o le tumau lea i le itu a le Alii i taimi uma lava i mea e oo mai. … O le mafaufau lea i mea o loo ia mafaufau i ai, ma ia talitonu i mea o loo ia talitonu i ai, ma fai atu mea na te fetalai atu ai ma faia mea na te faia i le tulaga lava e tasi. O le maua o le mafaufau o Keriso ma ia tasi ma ia e faapei ona tasi o ia ma le Tma” (Bruce R. McConkie, “Be Valiant in the Fight of Faith,” Ensign, Nov. 1974, 35).
Mafaufau i se tasi ua e manatu e toa i lana molimau ia Iesu Keriso. O a ni uiga ma ni taga fai ua faaalia ai lona lototoa patino?
Valaaulia tagata ole vasega e mafaufau e uiga i lo latou lototoa ia latou molimau ia Iesu Keriso. Valaaulia tagata o le vasega e filifili se mea e tasi o le a latou faia ina ia atili totoa ai i la latou molimau ia Iesu Keriso.
Ua faaali atu ia Iosefa Samita ma Sini Rikitonu i latou o e o le a maua le mamalu selesitila
Valaaulia se tagata o le vasega e faitau leotele le Mataupu Faavae ma Feagaiga 76:81–83, 101, 103 Fai i le vasega e mulimuli i le faitauga, ma vaavaai po o le a le mea na vaai i ai Iosefa Samita ma Sini Rikitone po o ai o le a maua le mamalu telesitila.
O ai o le a maua le mamalu telesitila? (Tusi tali a tagata o le vasega i le laupapa i lalo o le “Mamalu Telesitila.”)
Valaaulia tagata aoga e faitau filemu le Mataupu Faavae ma Feagaiga 76:84–85, 104–106 ma vaavaai mo mea o le a tupu i e amioleaga a o lei mafai ona latou maua le mamalu telesitila.
O le a le mea o le a tupu i e amioleaga a o lei mafai ona latou maua le mamalu telesitila?
Faamalamalama atu e faapea, ona o le a latou le salamo i le olaga nei, o lea o i latou o e maua le mamalu telesitila o le a tatau ona puapuagatia mo a latou agasala i “seoli” (MF&F 76:84, 106; tagai foi MF&F 19:4--12). I fuaiupu nei, o seoli e faasino i le falepuipui o agaga ma e le o faasino i le tulaga faaiu o e amioleaga. I le faaiuga o le Meleniuma, o nei tagata ole a o tulai mai i le Toetutu o e amioletonu ma mautofi i le malo telesitila.
Valaaulia se tagata aoga e faitau leotele le Mataupu Faavae ma Feagaiga 76:109–111 . Fai i le vasega e mulimuli i le faitauga, ma vaavaai mo le mea o le a tupu pe a o mai i latou o e o le a maua le mamalu telesitila i luma o le Atua ina ia faamasinoina. Valaaulia tagata o le vasega e lipoti mai mea ua latou mauaina.
Valaaulia se isi tagata o le vasega e faitau leotele le Mataupu Faavae ma Feagaiga 137:9 Fai i le vasega e mulimuli ai, ma vaavaai po o a isi mea e mafai ona tatou aoao mai e uiga i le ala o le a faamasinoina ai.
O le a le aoaoga faavae e mafai ona tatou aoao mai nei fuaiupu pe o le a le mea e fua i ai le malo o le mamalu e fai mo tatou tofi? (A uma ona tali mai tagata o le vasega, tusi le aoaoga faavae lea i luga o le laupapa: O le malo o le mamalu o le a fai mo tatou tofi o le a fua i a tatou galuega ma naunauga o o tatou loto.)
E mafai faapefea e le malamalama i nei upumoni ona fesoasoani ia i tatou a o tatou taumafai e avea ma tagata selesitila?
Ua faamalamalama mai e Iosefa Samita ma Sini Rikitone le auala e mafai ai ona maua e isi le malamalama sa la mauaina e ala i faaaliga.
Aotele le Mataupu Faavae ma Feagaiga 76:113–119 e ala i le faamalamalama atu faapea, ina ua uma ona faamatalaina lenei faaaliga, sa ta’ua faapea e Iosefa Samita ma Sini Rikitone, na poloaiina i laua e le Alii e aua ne’i tusia uma mea na faaali mai ia i la’ua. Sa la faamatalaina foi e faapea e ala i le mana o le Agaga Paia, e mafai foi e isi ona maua le malamalama sa la mauaina.
Faasoa atu lau molimau e uiga i upumoni na aoaoina i le lesona i le asō. Faaiu i le tusia o upu Amata, Taofi, ma le Faaauau i luga o le laupapa, ma fai i tagata o le vasega e fuafua pe o le a le mea o le a latou amata, taofi, pe faaauau ona fai ona o mea sa latou aoaoina i le lesona i le aso.