Talateu ki he Tokāteline mo e Ngaahi Fuakavá – Tohi Lēsoni ʻa e Faiakó (Lēsoni Fakalotu 324–325)

Ko ‘Etau Taumuʻá

ʻOku pehē ʻe he Kaveinga ʻo e Seminelí mo e ʻInisititiuti Fakalotú:

“Ko ʻetau taumuʻá ke tokoni ke mahino mo falala ʻa e toʻu tupú mo e kakai lalahi kei talavoú ki he ngaahi akonaki mo e Fakalelei ʻa Sīsū Kalaisí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, mo teuteuʻi kinautolu, honau fāmilí, mo e niʻihi kehé ki he moʻui taʻengata mo ʻenau Tamai Hēvaní” (Ko Hono Akoʻi mo Ako ʻo e Ongoongoleleí: Ko ha Tohi Tuʻutuʻuni maʻá e Kau Faiako mo e Kau Taki ʻi he Seminelí mo e ʻInisititiuti Fakalotú [2012], 1).

Ke aʻusia ʻetau taumuʻá, ʻoku tau akoʻi ki he kau akó ‘a e ngaahi tokāteline mo e ngaahi tefitoʻi moʻoni ‘o e ongoongoleleí, ‘o hangē ko ʻene hā ‘i he folofolá mo e ngaahi lea ‘a e kau palōfitá. ‘Oku akoʻi ‘a e ngaahi tokāteline mo e ngaahi tefitoʻi moʻoni ko ‘ení ‘i ha founga ‘e maʻu ai ‘a e mahinó pea mo ha fakamaama. ‘Oku tau tokoni ki he kau akó ke fakahoko honau fatongia ‘i he akó, mo teuteuʻi kinautolu ke akoʻi ‘a e ongoongoleleí ki ha niʻihi kehe.

Ke tokoni ke aʻusia e ngaahi taumuʻa ko ʻení, ʻoku poupouʻi koe mo e kau ako ʻoku ke akoʻí ke fakakau atu ʻa e Ngaahi Konga Mahuʻinga ʻo Hono Akoʻi mo Ako ʻo e Ongoongoleleí ʻi he taimi ʻoku mou ako fakataha ai ʻa e folofolá:

• Akoʻi mo ako ʻaki e Laumālié.

• Fakatupulaki ha ʻātakai ʻo e akó ʻi he ʻo e ʻofa, fakaʻapaʻapa, pea mo ha taumuʻa.

• Ako fakaʻaho e folofolá pea lau ʻa e fakamatala ki he lēsoní.

• ʻAi ke mahino ʻa e kaveinga mo e kakano ʻo e folofolá mo e ngaahi lea ʻa e kau palōfitá.

• Feinga ke ‘iloʻi, mahino, ongoʻi ʻa e moʻoni mo hono mahuʻinga, pea fakaʻaongaʻi ʻa e ngaahi tokāteline mo e ngaahi tefitoʻi moʻoni ʻo e ongoongoleleí.

• Fakamatalaʻi, vahevahe, mo fakamoʻoniʻi e ngaahi tokāteline mo e ngaahi tefitoʻi moʻoni ʻo e ongoongoleleí.

• Taukei ʻi he ngaahi potufolofola mahuʻinga mo e Ngaahi Tefitoʻi Tokāteliné.

ʻOku ʻoatu ʻe he ngaahi fokotuʻu ki hono akoʻi ʻi he tohi lēsoni ko ʻení ha ngaahi founga ke aʻusia ʻa e ngaahi ola ko ʻení ʻi hoʻo faiakó. (Fakatokangaʻi ange ʻoku totonu ke hoko ʻa e Ngaahi Meʻa Mahuʻinga ʻi hono Akoʻi mo Ako ʻo e Ongoongoleleí ko ha ngaahi ola kae ʻikai ko ha ngaahi founga akoʻi.) “ʻI he taimi ʻoku fakahoko fakapotopoto pea mo nau fenāpasi aí, ʻoku tokoni leva ʻa e ngaahi meʻa mahuʻingá ni ki he malava ʻe he fānaú ʻo maʻu ha mahino ki he ngaahi potufolofolá kae ʻumaʻā ʻa e ngaahi tokāteline mo e ngaahi tefitoʻi moʻoni ʻoku ʻi aí. ʻOku nau toe poupouʻi foki ʻa e kau akó ke nau ngāue mālohi ʻi honau fatongia ke ako ʻa e ongoongoleleí pea fakatupulaki ai mo e malava ʻe he kau akó ke moʻui ʻaki ʻa e ongoongoleleí mo akoʻi ia ki he kakai kehé.” (Ko Hono Akoʻi mo Ako ʻo e Ongoongoleleí, 14).

Teuteuʻi ‘o e Lēsoní

Naʻe fekau ʻe he ʻEikí kiate kinautolu ʻoku nau akoʻi ʻEne ongoongoleleí ke “akoʻi e ngaahi tefitoʻi moʻoni ʻo ʻeku ongoongoleleí” (TF 42: 12). Naʻá Ne toe fakahinohinoʻi foki ʻoku totonu ke akoʻi e ngaahi moʻoni ko ʻení “ʻo fakatatau ki … he lotu ʻo e tuí” (TF 42:13–14). ʻI hoʻo teuteu e lēsoni takitaha, lotua ke maʻu ʻa e tataki ʻa e Laumālié ke tokoni ke mahino kiate koe ʻa e ngaahi folofolá mo e ngaahi tokāteline mo e tefitoʻi moʻoni ʻoku ʻi aí. ʻI he meʻa tatau, muimui ki he ueʻi ʻa e Laumālié ʻi hono palani e founga ke tokoni ke mahino ki hoʻo kau akó ʻa e ngaahi folofolá, ke akoʻi ʻe he Laumālie Māʻoniʻoní, pea ongoʻi ha holi ke fakaʻaongaʻi ʻa e ngaahi meʻa ʻoku nau akó.

Ko e Tokāteline mo e Ngaahi Fuakavá ʻe fakatefito ai hoʻo teuteu mo e faiako ʻi he kalasi ko ʻení. Ako ʻi he faʻa lotu ʻa e ngaahi vahe pe ngaahi veesi te ke akoʻí. Feinga ke mahino ‘a e puipuituʻa fakahisitōliá mo e kaveinga ʻo e ngaahi konga folofolá. ʻI he fakaʻau ke ke maheni mo e puipuituʻa mo e kakano ʻo e konga folofola takitaha, feinga ke ʻiloʻi ʻa e ngaahi tokāteline mo e ngaahi tefitoʻi moʻoni ʻoku akoʻi aí, pea fili pe ko fē ʻi he ngaahi moʻoni ko ʻení ʻoku mahuʻinga taha ke mahino pea fakaʻaongaʻi ʻe hoʻo kau akó. Hili hoʻo ʻiloʻi ʻa e meʻa ʻe tukutaha ki ai e tokangá, te ke lava ʻo fili pe ko fē ʻa e ngaahi founga, fokotuʻutuʻu, mo e ʻekitivitī ʻe tokoni lelei taha ki hoʻo kau akó ke nau ako pea fakaʻaongaʻi ʻa e ngaahi moʻoni toputapu ʻoku ʻi he ngaahi folofolá.

‘Oku fokotuʻutuʻu ʻa e tohi lēsoni ko ʻení mo e Tokāteline mo e Ngaahi Fuakavá – Tohi Lēsoni ʻa e Tokotaha Akó ke tokoniʻi koe ʻi he founga ko ʻení. Vakaiʻi fakalelei ʻa e naunau fakalēsoni fekauʻaki mo e konga folofola te ke akoʻí. ‘E tokoni ʻa e fakamatala ko ʻení ke mahino kiate koe ʻa e puipuituʻa mo e kakano ʻo e konga folofola takitaha pea te ne tokoniʻi koe ke ʻiloʻi ha niʻihi ʻo e ngaahi tokāteline mo e tefitoʻi moʻoni ʻoku ʻi aí. ʻE lava ke tokoni e ngaahi fokotuʻu ki hono akoʻí ʻi he tohi lēsoni ko ʻení kiate koe mo hoʻo kau akó ke fakakau ha konga lahi ʻo e Ngaahi Meʻa Mahuʻinga ʻo hono Akoʻi mo Ako ʻo e Ongoongoleleí ki he lēsoni takitaha. ʻE lava ke ke fakaʻaongaʻi kotoa pē ko ha konga pē ʻo e ngaahi fokotuʻú ki ha konga folofola, pe ko hoʻo liliu e ngaahi fakakaukau ʻoku fokotuʻu atú fakatatau ki he fakahinohino ʻa e Laumālié mo e ngaahi fie maʻu mo e tūkunga ʻo e kau ako ʻokú ke akoʻí. ‘I he taimi ʻoku fulihi ai e ngaahi fokotuʻu ki hono akoʻí pe fetongi ʻaki ha ngaahi fakakaukau pē ʻaʻaú, fakapapauʻi ke fakakaukauʻi ʻa e ngaahi ola mahuʻinga ʻa ha faʻahinga fokotuʻu ʻoku fakataumuʻa ke fakahoko, pea fili ha fakakaukau fakafaiako ʻe tokoni ke ne ʻomi e ola tatau.

ʻOku mahuʻinga ke ke tokoni ke ako ʻe he kau akó ʻa e kotoa ʻo e konga folofola ʻi he lēsoni takitaha. ʻE tokoni hono fai iá ke maʻu ʻe he kau akó ʻa e pōpoaki kakato naʻe fakataumuʻa ʻa e ʻEikí, ʻo fakafou ʻi Heʻene palōfitá, ke fakahoko atú. Ka neongo ia, ʻi hoʻo palani hoʻo lēsoní, mahalo te ke ʻiloʻi ʻoku ʻikai ke ke maʻu ha taimi feʻunga ʻi ha kalasi ʻe taha ke fakaʻaongaʻi ai ʻa e ngaahi fokotuʻu fakafaiako kotoa pē ʻi he tohi lēsoní. Fekumi ki he fakahinohino ʻa e Laumālié pea fakakaukauʻi ʻi he faʻa lotu ʻa e ngaahi fie maʻu ʻa hoʻo kau akó ʻi hoʻo fakapapauʻi ʻa e ngaahi konga ʻo e konga folofolá ke fakamamafaʻí kae lava ke tokoni ki he kau akó ke nau ongo‘i ʻa e moʻoni mo e mahuʻinga ʻo e ngaahi moʻoni ʻo e ongoongoleleí pea fakaʻaongaʻi kinautolu ʻi heʻenau moʻuí. Kapau ʻoku nounou ʻa e taimí, mahalo ʻe fie maʻu ke ke liliu e ngaahi konga kehe ʻo e lēsoní ʻaki hano fakamatalaʻi fakanounou ha kulupu, ngaahi veesi pe ko hono tataki ʻa e kau akó ke nau ʻiloʻi vave ha tefitoʻi moʻoni pe tokāteline kimuʻa pea hoko atu ki he ngaahi veesi hokó.

‘I he taimi ʻoku fakakaukauʻi ai e founga ke fulihi e naunau ki he lēsoní, fakapapauʻi ʻoku muimui ki he faleʻi ko ʻeni meia ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

“ʻI heʻeku fanongó, kuo faʻa akoʻi ʻe Palesiteni Peeka, ke tau ʻuluaki ohi mai, pea tau toki liliu. Kapau ʻoku tau nofo kakato ʻi he lēsoni kuo ʻomai ke tau fakahokó, te tau lava leva ke muimui ʻi he Laumālié ke fulihi iá” (“A Panel Discussion with Elder Dallin H. Oaks “ [Fakamafola Fakasatelaite ‘a e Semineli mo e ʻInisititiuti ‘o e lēsoni fakalotú, Aug. 7, 2012], LDS.org).

Lolotonga hoʻo teuteu lēsoní, mahalo te ke fili ke fakaʻaongaʻi e Ngaahi Fakamatalá mo e Tohinoá ʻi he LDS.org pe ʻi he Gospel Library ki he telefoni toʻotoʻó. Te ke lava ʻo fakaʻaongaʻi e ngaahi meʻangāue ko ʻení ke fakaʻilongaʻi ʻa e folofolá, ngaahi lea ʻo e konifelenisi lahí, ngaahi fakamatala ʻi he ngaahi makasini ʻa e Siasí, pea mo e ngaahi lēsoní. Te ke lava foki ke tānaki atu pea seivi e ngaahi fakamatalá ke fakaʻaongaʻi lolotonga hoʻo lēsoní. Ke ako lahi ange fekauʻaki mo e founga ke fakaʻaongaʻi ai e ngaahi meʻangāue ko ʻení, vakai ki he peesi Ngaahi Fakamatalá mo e peesi Tokoni Tohinoá ʻi he LDS.org.

Anga Hono Fokotuʻutuʻu ʻo e Tohi Lēsoní ni

ʻOku fokotuʻutuʻu ʻa e Lēsoni Fakalotu 324–325 ke fakahoko ʻi he semesitā ʻe ua. ʻOku tataki ʻe he Lēsoni Fakalotu 324 ʻa e kau akó ʻi he Tokāteline mo e Ngaahi Fuakava 1–76. ʻOku ʻi he Lēsoni Fakalotu 325 ʻa e Tokāteline mo e Ngaahi Fuakava 77–138 mo e Fanongonongo Fakamafaiʻi 1 mo e 2. ʻOku ʻi he tohi lēsoni ko ʻení ha ngaahi lēsoni ʻe 56, ʻa ia ʻoku taki lēsoni ʻe 28 ki he semesitā takitaha ʻo e Tokāteline mo e Ngaahi Fuakavá. ʻOku fokotuʻutuʻu ʻa e lēsoni takitaha ke akoʻi ʻi ha kalasi miniti ʻe 50. Kapau ʻoku fakahoko tuʻo ua hoʻomou kalasí ʻi he uike, te ke akoʻi ʻa e foʻi lēsoni ʻe taha ʻi he taimi kalasi kotoa pē. Kapau ʻoku fakahoko tuʻo taha pē hoʻomou kalasí ʻi he uike ʻi ha miniti ʻe 90 ki he 100, ʻoku fokotuʻu atu ke ke akoʻi ha lēsoni ʻe ua mei he tohi lēsoní ʻi he kalasi takitaha.

‘Oku kau ʻi he ngaahi lēsoni ʻi he tohi lēsoni ko ʻení ʻa e ngaahi meʻá ni:

Talateú

‘Oku kamata ʻaki e lēsoni takitaha ha talateu nounou ʻo ha vahe pe ngaahi vahe ‘o e Tokāteline mo e Ngaahi Fuakavá ʻa ia te ke ako ʻi he lēsoni ko iá. ‘Oku ʻomi ʻe he talateú ha fakamatala fakanounou ʻo e puipuituʻa fakahisitōliá mo e kakano ʻo e vahe takitaha. Ko e ngaahi talateú ni, ʻa ia ʻoku toe maʻu ʻi he tohi lēsoni ʻa e tokotaha akó, te ne ʻoatu kiate koe mo hoʻo kau akó ha vakai fakalūkufua ki he ngaahi potufolofola ʻoku ako ʻi he lēsoni takitaha.

Taimi Tēpilé

‘Oku ʻoatu fakataha mo e talateú ha taimi tēpile. ‘E tokoni atu ʻa e taimi tēpile ko ʻení ke mahino ʻa e puipuituʻa ʻo e vahe takitaha ʻo e Tokāteline mo e Ngaahi Fuakavá ʻaki hono fakahaaʻi e taimi naʻe maʻu aí mo ʻene kaunga ki he ngaahi meʻa kehe naʻe hoko ʻi he hisitōlia ʻo e Siasí.

Ngaahi Fokotuʻu ki hono Akoʻí

‘Oku kau ʻi he kakano ʻo e lēsoni takitaha ha fakahinohino mo ha ngaahi fakakaukau ki he founga te ke ala akoʻi ʻaki ha konga pau ʻo e folofolá, ʻo kau ai ha ngaahi fehuʻi, kupuʻi lea, fakatātā, ʻekitivitī, mo ha fakamatala fakahisitōlia. ‘Oku fakahaaʻi ʻe he ngaahi fakakaukau ko ʻení e founga ke fakakau ai e Fakavaʻe ʻo Hono Akoʻi mo Ako ʻo e Ongoongoleleí ki hoʻo faiakó ke tokoni ke fakaloloto e ului ʻa e kau akó ki he ʻEikí mo ʻEne ongoongoleleí.

Fakamatala Fakanounou ʻo e Ngaahi Veesi Fakakulupú mo e Kaveingá

ʻOku nofotaha ʻa e lēsoni takitaha ʻi he tohi lēsoni ko ʻení ʻi ha potufolofola kae ʻikai ko ha foʻi fakakaukau, tokāteline, pe tefitoʻi moʻoni pau. ʻE tokoni ʻa e founga ko ʻení kiate koe mo hoʻo kau akó ke mou ako fakahokohoko ʻa e ngaahi folofolá mo e puipuituʻa ʻo e ngaahi tokāteliné mo e tefitoʻi moʻoní ʻi heʻene hā mahino ʻi hono fakalea ʻi he folofolá. ‘Oku faʻa vahevahe ʻa e ngaahi konga folofola takitaha ki ha ngaahi konga iiki ange, pe veesi fakakulupu ke muimui ʻi he hokohoko ʻo ha foʻi fakakaukau pau pe nofotaha ʻi ha tefito pau. ʻOku kamata ʻa e ngaahi konga takitaha ko ʻení ʻaki ha potufolofola fakafekauʻaki ʻokú ne lisi e ngaahi veesi ʻi he konga ko iá, pea hoko atu ai ha fakamatala fakanounou ʻo e puipuituʻa ʻo e ngaahi meʻa ne hokó pe aleaʻi ʻo e ngaahi meʻa ke akoʻi ʻi he ngaahi veesi fakakulupu ko iá.

Tokāteliné mo e Ngaahi Tefitoʻi Moʻoní

ʻI he kakano ʻo e lēsoni takitaha, te ke ʻilo ai ʻoku fakaʻilongaʻi mataʻāʻā atu e ngaahi tokāteline mo e tefitoʻi moʻoni mahuʻingá. ʻOku maʻu ʻa e ngaahi tokāteline mo e ngaahi tefitoʻi moʻoni ko ʻení ʻi he naunau fakalesoní koeʻuhí (1) ʻoku nau ʻomi ha tefitoʻi pōpoaki ʻo e konga folofolá (2) ʻoku kaungatonu ki he fie maʻu mo e tūkunga ʻo e kau akó, pe (3) ko e ngaahi moʻoni mahuʻinga ia ʻe lava ke tokoni ki he kau akó ke fakaloloto honau vā fetuʻutaki mo e ʻEikí. Kuo faleʻi ʻa Palesiteni Henelī B. ʻAealingi ʻo pehē: “ʻI hoʻo teuteu ha lēsoni, kumi ʻi ai ʻa e ngaahi tefitoʻi moʻoni fakauluí. … Ko e tefitoʻi moʻoni fakauluí ʻa ē ʻoku fakaiku ki he talangofua ki he finangalo ʻo e ʻOtuá” (“Converting Principles” [evening with a general authority, Feb. 2, 1996], 1). Fakatokangaʻi ange ʻoku ʻikai feinga ʻa e tohi lēsoni ko ʻení ke ʻiloʻi kotoa ʻa e ngaahi tokāteline mo e tefitoʻi moʻoni ʻoku lava ke maʻu ʻi he Tokāteline mo e Ngaahi Fuakavá.

ʻOku ʻomi ʻe he ngaahi fokotuʻu ki hono akoʻi ʻi he tohi lēsoni ko ʻení ha faingamālie lahi ki he kau akó ke nau ʻilo ʻa e ngaahi tokāteline mo e ngaahi tefitoʻi moʻoni ʻi he folofolá. ʻOku fokotuʻu mai foki ʻi he lēsoní ʻa e ngaahi taimi kiate koe ko e faiakó ke fakaʻilongaʻi ha tokāteline pe tefitoʻi moʻoni. Tokanga ke ʻoua naʻá ke fokotuʻu atu ʻoku hala ʻa e tali ʻa e kau akó koeʻuhí pē ko e kehe ʻa e lea ʻoku nau fakaʻaongaʻí mei he ngaahi lea ʻoku fakaʻaongaʻi he tohi lēsoní pe koeʻuhí ʻoku nau ʻilo ha moʻoni ʻoku ʻikai ke ʻasi ʻi he nāunau fakalēsoní. Ka neongo iá, kapau ‘oku lava ke toe tonu ange ha fakamatala ʻa ha taha ako pe ‘oku hala fakatokāteline, fakakaukauʻi fakalelei pe te ke fakamahino fēfē ʻi he angaʻofa pe fakatonutonu e meʻa ʻoku mahino ki aí lolotonga hoʻo tauhi ha ʻātakai ʻo e ʻofá mo e mahinó.

Ngaahi Tokoni ki hono Akoʻí

ʻOku fakakau ʻi he lēsoní ʻa e ngaahi tokoni ki hono akoʻí mo e ngaahi fokotuʻu ki hono akoʻí. ʻOku tokoni ʻa e ngaahi tokoni ki hono akoʻí ke fakamatalaʻi e Fakavaʻe ʻo Hono Akoʻi mo e Ako ʻo e Ongoongoleleí mo ʻoatu ha fakahinohino ki hono fakaʻaongaʻi lelei ʻo e ngaahi founga fakafaiako kehekehé, pōtoʻi ngāué, mo e founga ke fakahoko ʻakí. ʻI he kamata ke mahino kiate koe ʻa e ngaahi tefitoʻi moʻoni ʻi he ngaahi tokoni ki hono akoʻí, kumi ha ngaahi founga ke fakaʻaongaʻi maʻu ai pē kinautolu ʻi hoʻo faiakó.

Ngaahi Fakakaukau Tokoni Fakafaiakó

ʻOku hā ʻa e ngaahi fakakaukau ʻoku tokoni atu ki hono akoʻí ʻi he fakaʻosinga ʻo e ngaahi lēsoni ʻe niʻihi. ʻOku ʻoatu heni ha ngaahi fokotuʻu ki hono akoʻi ʻo e ngaahi tokāteline mo e tefitoʻi moʻoni he ʻikai faʻa ʻasí pe fakamamafaʻi ʻi he sinoʻi lēsoní. ʻI he taimi ʻe niʻihi ʻoku nau ʻomai ha founga kehe ki hono akoʻi ʻo ha konga folofola. ʻOku ʻikai totonu ke ke haʻisia ke ngāue ʻaki ʻa e ngaahi tokoni fakafaiako ko ʻení. ʻOku totonu ke ke fili pe te ke fie fakaʻaongaʻi ʻa e ngaahi fokotuʻu ko ʻení ʻo fakatatau ki he taimí, ngaahi fie maʻu hoʻo kau akó, mo e fakahinohino ʻa e Laumālié.

Pulusinga 2013 ʻo e Folofolá

‘Oku fakatefito ʻa e fakamatala ‘i he tohi lēsoni ko ʻení ʻi he pulusinga 2013 ‘o e folofola naʻe pulusi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku kau ʻi he pulusinga 2013 ʻo e folofolá ‘a e ngaahi ʻuluʻi fakamatala ʻo e vahe ʻe niʻihi ʻo e Tokāteline mo e Ngaahi Fuakavá. Ko e ngaahi liliu ki he ʻuluʻi vahé, ʻo kau ai e ngaahi liliu ki he ʻahó mo e feituʻú, kuo fakahoko ia ke kau ai e ngaahi fakatotolo kimuí ni maí pea ke ʻoatu ha puipuituʻa mahino ange pe tānaki atu ki he folofolá.

ʻOku maʻu ʻa e pulusinga faka-Pilitānia 2013 ʻo e folofolá ʻi he ʻinitanetí he scriptures.lds.org pea ʻi he Gospel Library app ki he ngaahi naunau fakaʻilekitulōniká.

Mahalo ʻe fakaʻaongaʻi ʻe ha niʻihi ʻo hoʻo kau akó e ngaahi pulusinga (1981) kimuʻa ange ʻo e folofolá. Ko e lahi taha ʻo e ngaahi liliu ʻi he pulusinga ʻo e 2013 ʻoku siʻisiʻi pē pea ʻikai uesia hono ako ʻe he kau akó ‘a e Tokāteline mo e Ngaahi Fuakavá. Ka neongo ia, ʻoku totonu ke ʻilo ko e ngaahi ʻahó, feituʻú, mo e ngaahi fakamatala kehe ʻi he ʻuluʻi vahé ʻe lava ke kehekehe ʻo fakatatau ki he pulusinga ʻo e folofolá ʻoku fakaʻaongaʻi ʻe he kau akó. ‘I he ngaahi meʻa ko ʻení, ʻe fakapotopoto ke tokanga ki he ngaahi liliu ʻo e 2013 ʻaki hono ʻeke ki ha taha ʻo e kau akó kuó ne maʻu ʻa e tatau lolotongá pe tataki ʻa e kau akó ki he pulusinga 2013 ʻo e Gospel Library app.

Ngaahi Fie Maʻu ki he Maaka Fakalangilangí

Ke maʻu ha maaka ki he fakalangilangi ʻinisititiutí, ʻoku fie maʻu ʻa e kau akó ke nau lau ʻa e tohi folofola ki he kalasí (Tokāteline mo e Ngaahi Fuakava 1–76 ki he Lēsoni Fakalotu 324, mo e Tokāteline mo e Ngaahi Fuakava 77–138 mo e Fanongonongo Fakamafaiʻi 1 moe 2 ki he Lēsoni Fakalotu 325) pea kuo pau foki ke ne lavaʻi ʻa e ngaahi fie maʻu ki he maʻu akó mo fakahaaʻi ʻene ʻilo ki he naunau ʻo e kalasí ʻaki hano fakakakato ha sivi.

Te U Liliu Fēfē ʻa e Ngaahi Lēsoní Maʻanautolu ʻoku Faingataʻaʻia Fakaesinó?

ʻI hoʻo teuteu ke faiakó, manatuʻi ʻa e kau ako ʻoku ʻi ai haʻanau ngaahi fie maʻu paú. Fulifulihi ʻa e ngaahi ʻekitivitií mo e ngaahi meʻa ʻoku fai ki ai e ʻamanakí ke tokoni ke nau lavameʻa. Fekumi ki ha ngaahi founga ke tokoniʻi ai kinautolu ke ongoʻi ʻoku ʻofaʻi, tali, pea fakakau mai kinautolu. Fakatupulaki ha vā fetuʻutaki ʻo e falalá.

Fetuʻutaki ki he peesi Disability Resources ʻi he disabilities.lds.org ke maʻu ha ngaahi fakakaukau mo ha ngaahi maʻuʻanga tokoni lahi ange pea mo e konga ʻo e tohi tuʻutuʻuni ʻo e Seminelí mo e Ngaahi ʻInisititiuti Fakalotú ʻoku ui ko e “Filioʻi ʻa e Ngaahi Kalasí mo e Ngaahi Polokalamá maʻá e Kau Ako ʻOku Faingataʻaʻia Fakaesinó.