គោលលទ្ធិ និង សេចក្តីសញ្ញា ៨១

បុព្វកថា

នៅថ្ងៃទី ៨ ខែ មិនា ឆ្នាំ ១៨៣២ ព្រះអម្ចាស់បានហៅ ចែស៊ី កស និង ស៊ីឌនី រិកដុន ឲ្យបម្រើជាទីប្រឹក្សារបស់ យ៉ូសែប ស្ម៊ីធ ។ មួយសប្ដាហ៍ក្រោយមក នៅថ្ងៃទី ១៥ ខែ មិនា ឆ្នាំ ១៨៣២ ព្រះអម្ចាស់បានប្រទានវិវរណៈ ដែលមានកត់ត្រានៅក្នុង គោលលទ្ធិ និង សេចក្ដីសញ្ញា ៨១ ។ នៅក្នុងវិវរណៈនេះ ទ្រង់បានពិពណ៌នាអំពីតួនាទីរបស់ទីប្រឹក្សាក្នុងគណៈប្រធានទីមួយ ហើយបានសន្យាថានឹងប្រទានជីវិតដ៏នៅអស់កល្បជានិច្ចដល់ ចែស៊ី កស បើគាត់បន្តស្មោះត្រង់ដរាបដល់ចុងបំផុត ។ ចែស៊ី កស ពុំបានបន្តស្មោះត្រង់នោះទេ ហើយព្រះអម្ចាស់បានផ្ទេរការហៅបម្រើជាទីប្រឹក្សាក្នុងគណៈប្រធានទីមួយទៅឲ្យ ហ្វ្រែឌើរិក ជី វិលលាម្ស ដែលឈ្មោះរបស់គាត់ត្រូវបានលើកឡើងជាញឹកញាប់នៅក្នុងវិវរណៈនេះ ។

គោលលទ្ធិ និង សេចក្តីសញ្ញា ៨១

ព្រះអម្ចាស់ពិពណ៌នាអំពីតួនាទីរបស់ទីប្រឹក្សាក្នុងគណៈប្រធានទីមួយ

ហេតុអ្វីបានជាព្រះអម្ចាស់ ប្រទានការហៅបម្រើដល់យើង នៅក្នុងសាសនាចក្ររបស់ទ្រង់ ? តើពរជ័យនៃការបំពេញការហៅបម្រើដោយស្មោះត្រង់ មានអ្វីខ្លះ ? តើនឹងមានអ្វីកើតឡើង ប្រសិនបើមនុស្សម្នាក់ជ្រើសរើសមិនបំពេញការហៅរបស់ខ្លួនដោយស្មោះត្រង់នោះ ? ទោះជាអ្នកដឹកនាំសាសនាចក្រអាចទទួលបានការបំផុសគំនិត ហៅសមាជិកនៃសាសនាចក្រម្នាក់ ឲ្យកាន់តំណែងជាក់លាក់ណាមួយក្ដី ក៏វាអាស្រ័យទៅលើបុគ្គលដែលទទួលការហៅនោះ ប្រព្រឹត្តដោយស្មោះត្រង់ដែរ ។

សូមអានសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ៨១ដោយស្វែងរកថាតើនរណា ដែលត្រូវបានហៅឲ្យបម្រើជាទីប្រឹក្សាក្នុងគណៈប្រធាននៃបព្វជិតភាពជាន់ខ្ពស់ ( គណៈប្រធានទីមួយ ) ដំបូងគេបង្អស់ និង អ្វីបានកើតឡើងចំពោះគាត់ ។

ចែស៊ី កស ត្រូវបានហៅឲ្យបម្រើជាទីប្រឹក្សាក្នុងគណៈប្រធាននៃបព្វជិតភាពជាន់ខ្ពស់ ( គណៈប្រធានទីមួយ ) ក្នុងខែ មិនា ឆ្នាំ ១៨៣២ ។ ប្រាំមួយខែក្រោយមក នៅថ្ងៃទី ១ ខែ សីហា ឆ្នាំ ១៨៣២ គាត់បានចេញទៅបម្រើបេសកកម្មជាមួយ សេបេដេ ខូលទ្រិន ។ ចែស៊ី បានទៅសួរសុខទុក្ខភរិយារបស់គាត់ ហើយបានព្យាយាមបញ្ចុះបញ្ចូលនាង អំពីភាពពេញលេញនៃសាសនាចក្រដែលបានស្ដារឡើងវិញ ប៉ុន្តែ នាងបដិសេធមិនព្រមចូលសាសនាចក្រឡើយ ។ មិនយូរប៉ុន្មាន ដៃគូផ្សព្វផ្សាយរបស់ ចែស៊ី គឺ សេបេដេ បានធ្លាក់ខ្លួនឈឺខ្លាំង ហើយត្រូវត្រឡប់ទៅទីក្រុង ខឺតឡង់ រដ្ឋ អូហៃអូ វិញ ។ ដោយនៅតែឯង ចែស៊ី ពុំបានបញ្ចប់បេសកកម្មរបស់គាត់នោះទេ ហើយពុំបានបន្តស្មោះត្រង់នៅក្នុងសាសនាចក្រទៀតឡើយ ។ គាត់ត្រូវបានកាត់កាលចេញពីសាសនាចក្រនៅខែ ធ្នូ ឆ្នាំ ១៨៣២ ។

យោងតាមសេចក្ដីណែនាំអំពីកណ្ឌនៃ គោលលទ្ធិ និង សេចក្តីសញ្ញា ៨១តើនរណាដែលព្រះអម្ចាស់បានហៅឲ្យជំនួសតំណែងរបស់ ចែស៊ី ?

អ្នកអាចនឹងចង់គូសចំណាំឃ្លាដូចតទៅនេះ ដែលមានចែងនៅក្នុងសេចក្ដីណែនាំអំពីកណ្ឌ ៖ « វិវរណៈ … ត្រូវបានរាប់ថាជាជំហានឆ្ពោះទៅរកការរៀបចំតាមផ្លូវការ នៃគណៈប្រធានទីមួយ » ។ ព្រះអម្ចាស់ពុំបានបើកសម្ដែងការរៀបចំទាំងស្រុងនៃសាសនាចក្រទ្រង់ ទៅដល់ព្យាការីក្នុងពេលតែមួយនោះទេ ។ ផ្ទុយទៅវិញ ទ្រង់បានបើកសម្ដែងផ្នែកផ្សេងៗគ្នានៃការរៀបចំ នៅពេលមានសេចក្ដីត្រូវការ និង នៅពេលពួកបរិសុទ្ធត្រៀមខ្លួនរួចរាល់ដើម្បីទទួលបានការររៀបចំនោះ ។ ក្នុងខែ មិនា ឆ្នាំ ១៨៣២ ព្រះអម្ចាស់បានបើកសម្ដែងថា ពេលវេលាបានមកដល់ហើយ ដើម្បីរៀបចំគណៈប្រធាននៃបព្វជិតភាពជាន់ខ្ពស់ ។

នៅក្នុងវិវរណៈដែលមានកត់ត្រានៅក្នុង គោលលទ្ធិ និង សេចក្តីសញ្ញា ៨១ព្រះអម្ចាស់បានពន្យល់អំពីតួនាទីសំខាន់មួយ នៃគណៈប្រធានទីមួយ ។ សូមអាន គោលលទ្ធិ និង សេចក្តីសញ្ញា ៨១:១–២រួចគូសចំណាំពាក្យដែលបង្រៀនថា គណៈប្រធាននៃបព្វជិតភាពជាន់ខ្ពស់ កាន់កូនសោទាំងឡាយនៃនគរព្រះនៅលើផែនដី ។

សូមចងចាំថា កូនសោបព្វជិតភាពគឺជាសិទ្ធិអំណាច ដើម្បីធ្វើអធិបតីលើសាសនាចក្រ ហើយដឹកនាំការប្រើប្រាស់សិទ្ធិអំណាចបព្វជិតភាព ។ ក្រោយមក គណៈប្រធានទីមួយត្រូវបានបង្កើតឡើង ។ កូនសោនៃនគរ តែងតែត្រូវបានកាន់ដោយគណៈប្រធានទីមួយ ដែលត្រូវបានធ្វើអធិបតីលើ ដោយប្រធាននៃសាសនាចក្រ ។

រូបភាព
ប្រធាន យ៉ូសែប ហ្វីលឌីង ស្ម៊ីធ

ប្រធាន យ៉ូសែប ហ្វីលឌីង ស្ម៊ីធ បានពន្យល់អំពីកិច្ចការ ដែលកូនសោទាំងឡាយនៃនគរ អាចឲ្យគណៈប្រធានទីមួយធ្វើ នាពេលបច្ចុប្បន្ននេះ ៖ « កូនសោទាំងនេះគឺជាសិទ្ធិរបស់គណៈប្រធាន ដ្បិតវាជាអំណាច និង សិទ្ធិអំណាចដើម្បីគ្រប់គ្រង ហើយដឹកនាំអស់ទាំងកិច្ចការរបស់ព្រះអម្ចាស់នៅលើផែនដី ។ អ្នកទាំងឡាយដែលកាន់កូនសោទាំងនេះ មានអំណាចគ្រប់គ្រង និង ត្រួតត្រាលើរបៀប ដែលមនុស្សដទៃអាចបម្រើក្នុងបព្វជិតភាព » ( « Eternal Keys and the Right to Preside » Ensign ខែ កក្កដា ឆ្នាំ ១៩៧២ ទំព័រ ៨៧ ) ។

របៀបមួយដែលគណៈប្រធានទីមួយដឹកនាំ និង គ្រប់គ្រងសាសនាចក្រ គឺតាមរយៈការបង្រៀនរបស់ពួកលោក ។

សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក នូវឧទាហរណ៍មួយ អំពីរបៀបដែលអ្នកបានទទួលពរ តាមរយៈការបង្រៀនរបស់គណៈប្រធានទីមួយ ។

សូមអាន គោលលទ្ធិ និង សេចក្តីសញ្ញា ៨១:៣ដោយស្វែងរកអ្វី ដែលព្រះអម្ចាស់បានមានព្រះបន្ទូលប្រាប់ឲ្យ ហ្វ្រែឌើរិក ជី វិលលាម្ស ធ្វើ ក្នុងនាមជាទីប្រឹក្សាក្នុងគណៈប្រធានទីមួយ ។

សូមសរសេរចំណងជើង ទីប្រឹក្សាក្នុងគណៈប្រធានទីមួយ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។ នៅក្រោមចំណងជើងនេះ សូមរាយបញ្ជីការទទួលខុសត្រូវនានា ដែលអ្នកបានរកឃើញនៅក្នុង ខទី ៣ ។ បន្ថែមពីលើនោះ សូមសរសេរថាតើ អ្នកគិតថាវាមានន័យដូចម្ដេច សម្រាប់ទីប្រឹក្សាដែលត្រូវ « មានចិត្តស្មោះត្រង់ក្នុងការទូន្មាន » ចំពោះប្រធានរបស់ខ្លួន ។

ដើម្បីជួយអ្នកឲ្យយល់កាន់តែច្បាស់ថាតើ វាមានន័យដូចម្ដេច សម្រាប់ទីប្រឹក្សាដែលត្រូវ « មានចិត្តស្មោះត្រង់ក្នុងការទូន្មាន » ចំពោះប្រធាននោះ សូមពិចារណាអំពីអ្វីដែលប្រធាន ហ្គរដុន ប៊ី ហ៊ិងគ្លី បានបង្រៀនអំពីរបៀបដែលទីប្រឹក្សានឹងទូន្មានជាមួយប្រធាន ។

រូបភាព
ប្រធាន ហ្គរដុន ប៊ី ហ៊ិងគ្លី

« [ ទីប្រឹក្សាម្នាក់ ] គឺជា ជំនួយការនៃប្រធានរបស់គាត់ ។…

« ក្នុងនាមជាជំនួយការម្នាក់ នោះទីប្រឹក្សាមិនមែនជាប្រធានឡើយ ។ គាត់មិនអាចសន្មត់អំពីការទទួលខុសត្រូវ ហើយនាំមុខប្រធានរបស់ខ្លួននោះទេ ។

« នៅក្នុងការប្រជុំគណៈប្រធាន ទីប្រឹក្សាម្នាក់ៗមានសេរីភាពបញ្ចេញមតិរបស់ខ្លួន ទៅលើបញ្ហាដែលមានចំពោះមុខគណៈប្រធាន ។ ទោះជាយ៉ាងណាក៏ដោយ វាគឺជាបុព្វសិទ្ធិរបស់ប្រធានដើម្បីធ្វើការសម្រេចចិត្ត ហើយវាគឺជាករណីយកិច្ចរបស់ទីប្រឹក្សា ដែលត្រូវគាំទ្រលោកលើការសម្រេចចិត្តនោះ ។ ការសម្រេចចិត្តរបស់លោក បន្ទាប់មកក្លាយជាការសម្រេចចិត្តរបស់ពួកគេ មិនថាគំនិតពីមុនរបស់ពួកគេយ៉ាងណាទេ » (In … Counsellors There Is Safety » Ensign, ខែ វិច្ឆិកា ឆ្នាំ ១៩៩០ ទំព័រ ៤៩ ) ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើការយល់អំពីករណីយកិច្ចរបស់ទីប្រឹក្សា អាចនឹងជួយមនុស្សម្នាក់ដែលកំពុងបម្រើជាទីប្រឹក្សានៅក្នុងគណៈប្រធានណាមួយនៃសាសនាចក្រ យ៉ាងដូចម្ដេច ?
2. ហេតុអ្វីបានជាទីប្រឹក្សានៅក្នុងគណៈប្រធាន គួរតែគាំទ្រ ហើយពង្រឹងដល់ប្រធានរបស់ខ្លួន ?
3. តើអ្នកអាចធ្វើអ្វីដើម្បីបម្រើនៅក្នុងគណៈប្រធានដោយមានប្រសិទ្ធិភាព ប្រសិនបើអ្នកមានឱកាសនោះ ?

ព្រះអម្ចាស់បានប្រទានការសន្យាដ៏មានអានុភាពដល់ ហ្វ្រែឌើរិក ជី វិលលាម្ស បើគាត់នឹងមានចិត្តស្មោះត្រង់ក្នុងការហៅរបស់គាត់ ។ សូមអាន គោលលទ្ធិ និង សេចក្តីសញ្ញា ៨១:៤រួចស្វែងរកការសន្យានោះ ។

ឃ្លា « តម្កើងសិរីល្អនៃ… ព្រះអម្ចាស់របស់អ្នក » នៅក្នុងបរិបទនេះបញ្ជាក់ថា ដោយសារការមានចិត្តស្មោះត្រង់ក្នុងការហៅរបស់យើង នោះយើងអាចជួយដឹកនាំមនុស្សឲ្យប្រតិបត្តិ និង ថ្វាយបង្គំព្រះអម្ចាស់ ។ ការសន្យានេះក៏អនុវត្ត ចំពោះពួកយើងផងដែរ ។ អ្នកអាចនឹងចង់សរសេរគោលការណ៍ដូចតទៅនេះ នៅលើគែមព្រះគម្ពីររបស់អ្នក ៖ បើយើងមានចិត្តស្មោះត្រង់ក្នុងការហៅរបស់យើង នោះយើងអាចប្រព្រឹត្តល្អបំផុតចំពោះមនុស្សទូទៅ ហើយតម្កើងសិរីល្អនៃព្រះ ។

សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
1. តើការបម្រើយ៉ាងស្មោះត្រង់នៅក្នុងការហៅ ក្នុងសាសនាចក្រ អាចនឹងជួយយើងឲ្យប្រព្រឹត្តល្អបំផុតចំពោះមនុស្សទូទៅ បានយ៉ាងដូចម្ដេច ?
2. តើនៅពេលណាខ្លះ ដែលអ្នកធ្លាប់បានឃើញសមាជិកនៃសាសនាចក្រ ប្រព្រឹត្តល្អបំផុតចំពោះមនុស្សទូទៅ ដោយសារតែពួកគាត់មានចិត្តស្មោះត្រង់ក្នុងការហៅរបស់គាត់នោះ ? សូមសរសេរអំពីអ្វី ដែលអ្នកបានសង្កេតឃើញ ។
3. តើការបម្រើដោយមានចិត្តស្មោះត្រង់ នៅក្នុងការហៅក្នុងសាសនាចក្ររបស់អ្នក អាចនឹងជួយអ្នកឲ្យតម្កើងសិរីល្អនៃព្រះ យ៉ាងដូចម្ដេច ?

សូមអាន គោលលទ្ធិ និង សេចក្តីសញ្ញា ៨១:៥ដោយស្វែងរកឱវាទបន្ថែម ដែលព្រះអម្ចាស់បានប្រទានឲ្យដល់ ហ្វ្រែឌើរិក ជី វិលលាម្ស ។

ដោយផ្អែកទៅលើអ្វី ដែលព្រះអម្ចាស់បានមានព្រះបន្ទូលប្រាប់ ហ្វ្រែឌើរិក នៅក្នុង ខទី ៥តើយើងអាចរៀនអ្វីខ្លះ អំពីការមានចិត្តស្មោះត្រង់ ក្នុងការហៅបម្រើក្នុងសាសនាចក្រ ឬ ធ្វើជាសមាជិកដ៏ស្មោះត្រង់នៃសាសនាចក្រ ?

រូបភាព
អែលឌើរ ម៉ាវីន ជេ អាស្តុន

សេចក្ដីថ្លែងការណ៍ដូចតទៅនេះពី អែលឌើរ ម៉ាវីន ជេ អាស្តុន ក្នុងកូរ៉ុមនៃពួកសាវកដប់ពីរនាក់ អាចជួយអ្នកឲ្យយល់អំពីឱវាទរបស់ព្រះអម្ចាស់នេះ ៖ « នៅក្នុង គោលលទ្ធិ និង សេចក្តីសញ្ញា ៨១:៥ ខគម្ពីរនេះអាចត្រូវបានបកស្រាយថាជាការជំរុញចិត្តពីព្រះអម្ចាស់ដល់ ហ្វ្រែឌើរិក ជី វិលលាម្ស ឲ្យផ្ដល់កម្លាំងដល់អ្នកទន់ខ្សោយ ( ‹ ជួយអ្នកទន់ខ្សោយ › ) ផ្ដល់ការលើកទឹកចិត្តដល់អ្នកដែលនឿយហត់ ឬ ខូចចិត្ត ( ‹ លើកដៃដែលរោយ › ) ហើយផ្ដល់កម្លាំងចិត្ត និង ភាពរឹងមាំដល់អ្នកមានក្បាលជង្គង់ញ័រ និង ចិត្តភ័យខ្លាច » ( « Strengthen the Feeble Knees » Ensign ខែ វិច្ឆិកា ឆ្នាំ ១៩៩១ ទំព័រ ៧០ ) ។

រូបភាព

ស្ត្រីម្នាក់អង្គុយលើកៅអីជនពិការ ជាមួយនឹងយុវនារីម្នាក់

នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមសរសេរអំពីបទពិសោធន៍មួយ នៅពេលដែលអ្នកត្រូវបានលើកឡើង ឬ ពង្រឹងដោយនរណាម្នាក់ ។ រួចធ្វើបញ្ជីឲ្យបានយ៉ាងហោចណាស់កិច្ចការចំនួនបី ដែលអ្នកអាចធ្វើដើម្បី « ជួយអ្នកទន់ខ្សោយ លើកដៃដែលរោយ ហើយចម្រើនកម្លាំងដល់ក្បាលជង្គង់ដែលញ័រ » នៃមនុស្សទូទៅ ។ សូមដាក់គោលដៅមួយ ដើម្បីជួយដល់មនុស្សម្នាក់អំឡុងសប្ដាហ៍នេះ ដោយប្រព្រឹត្តតាមកិច្ចការដែលនៅក្នុងបញ្ជីរបស់អ្នក ។

សូមអាន គោលលទ្ធិ និង សេចក្តីសញ្ញា ៨១:៦–៧ដោយស្វែងរកពរជ័យ ដែលព្រះអម្ចាស់បានសន្យាថានឹងប្រទានដល់ ហ្វ្រែឌើរិក ជី វិលលាម្ស បើគាត់នឹងមានចិត្តស្មោះត្រង់ដរាបដល់ចុងបំផុត ។

ការសន្យានេះក៏កើតមាន ចំពោះអ្នកផងដែរ ។ បើអ្នកជ្រើសរើសមានចិត្តស្មោះត្រង់ចំពោះព្រះអម្ចាស់ ដែលរួមបញ្ចូលទាំងការមានចិត្តស្មោះត្រង់ក្នុងការហៅរបស់អ្នក និង ការជួយដល់មនុស្សជុំវិញខ្លួនអ្នកផង នោះអ្នកក៏នឹងមានគុណសម្បត្តិទទួលបានពរជ័យពីព្រះអម្ចាស់ដែរ ។

សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖

ខ្ញុំបានសិក្សា គោលលទ្ធិ និង សេចក្តីសញ្ញា ៨១ ហើយបានបញ្ចប់មេរៀននេះនៅ ( កាលបរិច្ឆេទ ) ។

សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖