សូមស្វាគមន៍មកកាន់គោលលទ្ធិ និង សេចក្តីសញ្ញា និង ប្រវត្តិសាសនាចក្រ
តើគោលលទ្ធិ និងសេចក្ដីសញ្ញាគឺជាអ្វី ?
គោលលទ្ធិ និងសេចក្ដីសញ្ញា គឺជាគម្ពីរ ហើយមាននូវការប្រមូលផ្ដុំនៃវិវរណៈរបស់ព្រះ និងសេចក្ដីប្រកាសដ៏បំផុសគំនិតទាំងឡាយ ដែលផ្ដល់នូវការណែនាំដល់អ្នកដឹកនាំសាសនាចក្រ សមាជិកសាសនាចក្រ និងប្រជាជនទាំងអស់នៅលើផែនដីក្នុងជំនាន់របស់យើង ។ វាគឺជាវិវរណៈសម័យទំនើប ហើយឈរទន្ទឹមគ្នាជាមួយព្រះគម្ពីរប៊ីប ព្រះគម្ពីរមរមន និងមុក្ដាដ៏មានតម្លៃមហិមា ក្នុងនាមជាគម្ពីរជាបទដ្ឋានមួយនៃគម្ពីរជាបទដ្ឋានទាំងបួនរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ប្រធាន យ៉ូសែប ហ្វីលឌីង ស្ម៊ីធ បានពន្យល់អំពីតម្លៃនៃគោលលទ្ធិ និងសេចក្ដីសញ្ញាចំពោះយើង ៖ « គោលលទ្ធិ និងសេចក្ដីសញ្ញានេះ មាននូវព្រះបន្ទូលនៃព្រះដល់អស់អ្នកទាំងឡាយណា ដែលរស់នៅក្នុងពេលឥឡូវនេះ » ។ វាគឺជាព្រះគម្ពីររបស់យើង ។ វាជារបស់ផងនៃពួកបរិសុទ្ធថ្ងៃចុងក្រោយ ។ ព្យាការី [ យ៉ូសែប ស្ម៊ីធ ] បានមានប្រសាសន៍ថាវាមានតម្លៃថ្លៃជាងមាស ដែលយើងគប្បីរក្សាទុកច្រើនជាងរបស់ទ្រព្យនានានៃលោកិយនេះទាំងមូល » (Doctrines of Salvationcomp. Bruce R. McConkie 3 vols. [១៩៥៤–៥៦] ៣:១៩៩ ) ។
ហេតុអ្វីក៏ការសិក្សាគោលលទ្ធិ និងសេចក្ដីសញ្ញា និងប្រវត្តិសាស្ត្រនៃសាសនាចក្រសំខាន់ចំពោះខ្ញុំ ?
ព្រះអម្ចាស់ ព្រះយេស៊ូវគ្រីស្ទផ្ទាល់ បានប្រទាននូវការទទួលខុសត្រូវមួយដល់អ្នកទាំងឡាយណាដែលទទួលបានគោលលទ្ធិ និងសេចក្ដីសញ្ញា ៖
« ចូរពិចារណាមើលព្រះបញ្ញត្តិទាំងនេះចុះ ដ្បិតព្រះបញ្ញត្តិទាំងនេះពិត ហើយស្មោះត្រង់ ហើយសេចក្ដីព្យាករណ៍ និងសេចក្ដីសន្យា ដែលមានទាំងប៉ុន្មាននៅក្នុងនោះ នោះនឹងបានសម្រេចទាំងអស់ ។
« អ្វីដែលយើងជាព្រះអម្ចាស់បានមានបន្ទូល នោះយើងបានមានបន្ទូលហើយ ហើយយើងពុំកែដោះសារខ្លួនឡើយ ហើយទោះជាផ្ទៃមេឃហើយផែនដី នឹងកន្លងបាត់ទៅក៏ដោយ គង់តែពាក្យរបស់យើង នឹងមិនកន្លងបាត់ដែរ ប៉ុន្តែពាក្យទាំងអស់នឹងបានសម្រេច ទោះជាដោយសំឡេងរបស់យើងផ្ទាល់ ឬក៏ដោយសំឡេងនៃពួកអ្នកបម្រើរបស់យើងក្ដី គឺដូចតែគ្នា » (គ និង ស ១:៣៧-៣៨) ។
ប្រធាន ហ្គរដុន ប៊ី. ហ៊ិងគ្លី បានពន្យល់ថា
« ព្រះគម្ពីរគោលលទ្ធិ និងសេចក្ដីសញ្ញា គឺពិសេសនៅក្នុងចំណោមព្រះគម្ពីរទាំងឡាយរបស់យើង ។ វាគឺជារដ្ឋធម្មនុញ្ញរបស់សាសនាចក្រ។ ខណៈដែលគោលលទ្ធិ និងសេចក្ដីសញ្ញាដាក់បញ្ចូលនូវការសរសេរ និងសេចក្ដីថ្លែងការអំពីច្បាប់ដើមផ្សេងៗក្ដី ក៏វាជាគម្ពីរនៃវិវរណៈដែលបានប្រទានដល់ព្យាការីដ៏សំខាន់មួយនៃគ្រាកាន់កាប់ត្រួតត្រានេះដែរ ។
« វិវរណៈទាំងនេះចាប់ផ្ដើមជាមួយនឹងការប្រកាសដ៏ខ្ទររំពងអំពីគោលបំណងរបស់ព្រះនៅជុំវិញនៃការស្ដារឡើងវិញនៃកិច្ចការថ្ងៃចុងក្រោយដ៏មហិមារបស់ទ្រង់ ៖
« ‹ ចូរប្រុងស្ដាប់ចុះ ឱប្រជារាស្ត្រនៃសាសនាចក្រយើងអើយ សំឡេងនៃព្រះដែលគង់នៅលើ ហើយដែលមានព្រះនេត្រទតមកលើមនុស្សទាំងអស់ ទ្រង់មានព្រះបន្ទូលថា ដូច្នោះ ប្រាកដមែន យើងប្រាប់ជាប្រាកដថា ៖ ចូរប្រុងស្ដាប់ចុះ ឱប្រជាជាតិទាំងប៉ុន្មានដែលនៅឆ្ងាយអើយ និងអ្នករាល់គ្នាដែលនៅលើកោះក្នុងសមុទ្រអើយ ចូរស្ដាប់ព្រមគ្នាចុះ ។
« ‹ ដ្បិតសំឡេងនៃព្រះអម្ចាស់ប្រាកដជាប្រាប់ដល់មនុស្សទាំងអស់ មែនហើយគ្មាននរណានឹងគេចបានឡើយ ហើយគ្មានភ្នែកណាដែលនឹងមិនបានឃើញ ឬគ្មានត្រចៀកណាដែលនឹងមិនបានឮ ឬគ្មានដួងចិត្តណាដែលនឹងមិនធ្លុះបានឡើយ › ។ ( គ និង ស ១:១-២ ) ។
« ចេញមកពីការចាប់ផ្ដើមដ៏សំខាន់ នោះភាពទូលំទូលាយខាងគោលលទ្ធិដ៏អស្ចារ្យបើកបង្ហាញឡើង ដែលកើតចេញមកពីគ្រឹះនៃសេចក្ដីពិតដ៏អស់កល្បជានិច្ច ។ រឿងមួយចំនួនគឺជាវិវរណៈ ដែលព្រះអម្ចាស់បានបង្គាប់ដល់ព្យាការីរបស់ទ្រង់ដោយផ្ទាល់ ។ នេះគឺជាភាសាមួយចំនួនរបស់យ៉ូសែប ស្ម៊ីធ សរសេរ ឬនិយាយ នៅពេលលោកត្រូវបានសណ្ឋិតដោយព្រះវិញ្ញាណបរិសុទ្ធ ។ ក៏មានបញ្ចូលនូវព្រឹត្តការណ៍និទានកថារបស់លោក ដែលបានកើតឡើងនៅក្នុងស្ថានភាពផ្សេងៗផងដែរ ។ អ្វីៗទាំងអស់ត្រូវបានប្រមូលផ្ដុំគ្នា ដែលវាបង្កើតបានជាខ្នាតដ៏ត្រឹមត្រូវចំពោះគោលលទ្ធិ និងការអនុវត្តទាំងឡាយក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។…
« បញ្ហាផ្សេងៗដែលគម្ពីរមាន គឺអស្ចារ្យណាស់ ។ វាមានរួមបញ្ចូលទាំងគោលការណ៍ និងទម្រង់ការទាំងឡាយអំពីការគ្រប់គ្រងសាសនាចក្រ ។ ច្បាប់សុខភាពដ៏ពិសេស និងអស្ចារ្យ មាននូវការសន្យាជាច្រើនទាំងខាងរូបកាយ និងខាងវិញ្ញាណ ។ សេចក្ដីសញ្ញានៃបព្វជិតភាពដ៏អស់កល្បជានិច្ច ត្រូវបានរៀបរាប់នៅក្នុងលក្ខណៈមួយដែលរកមិនឃើញនៅកន្លែងផ្សេងឡើយក្នុងព្រះគម្ពីរ ។ ឯកសិទ្ធិ និងពរជ័យទាំងឡាយ--ព្រមទាំងព្រំដែន និងឱកាសទាំងឡាយ--នៃកម្រិតសិរីល្អទាំងបី ត្រូវបានប្រកាស ស្ថាបនានៅលើសេចក្តីថ្លែងដោយសង្ខេបរបស់ប៉ុលអំពីសិរីល្អនៃព្រះអាទិត្យ និងនៃព្រះចន្ទ និងនៃតារាទាំងឡាយ ។ ការប្រែចិត្តត្រូវបានប្រកាសឡើងដោយភាសាច្បាស់ៗ និងដាក់កំហិត។ គំរូនៃពិធីបុណ្យជ្រមុជទឹកត្រឹមត្រូវ ត្រូវបានផ្ដល់ឲ្យ ។ លក្ខណៈនៃក្រុមព្រះ ដែលទេវវិទូធ្លាប់មានបញ្ហាអស់ជាច្រើនសតវត្សរ៍ ឥឡូវត្រូវបានពិពណ៌នាជាភាសាដែលអាចយល់បានសម្រាប់មនុស្សទូទៅ ។ ក្រឹត្យវិន័យខាងហិរញ្ញវត្ថុរបស់ព្រះអម្ចាស់ ត្រូវបានប្រកាសជាលិខិតប្រគល់សិទ្ធិ អំពីរបៀបដែលមូលនិធិប្រតិបត្តិការសាសនាចក្រ គឺត្រូវទទួលបាន និងត្រូវបានចំណាយ ។ កិច្ចការសម្រាប់មរណជន គឺត្រូវបានបើកសម្ដែងដើម្បីប្រទានពរដល់បុត្រា និងបុត្រីនៃព្រះនៅគ្រប់ជំនាន់ » (« The Order and Will of God » Ensign ខែ មករា ឆ្នាំ ១៩៨៩ ទំព័រ ២, ៤ ) ។
នៅពេលអ្នកសិក្សាគោលលទ្ធិ និងសេចក្ដីសញ្ញា អ្នកអាចបានកាន់តែស្គាល់សំឡេងនៃព្រះយេស៊ូវ គ្រីស្ទ ( សូមមើល គ. និងស. ១៨:៣៣-៣៦) និងទំនាក់ទំនងមកពីព្រះវិញ្ញាណបរិសុទ្ធ ( សូមមើល គ. និង ស. ៨:២-៣) ។
អំពីគោលលទ្ធិ និងសេចក្ដីសញ្ញា
គោលលទ្ធិ និងសេចក្ដីសញ្ញាត្រូវបានដាក់បញ្ចូលគ្នាជា១៣៨ កណ្ឌ និងសេចក្ដីប្រកាសជាផ្លូវការពីរ ។ វិវរណៈជាច្រើនទាំងនេះ ត្រូវបានបោះពុម្ពជាលើកដំបូងនៅក្នុងទម្រង់ជាសៀវភៅ ដូចជាព្រះគម្ពីរនៃព្រះបញ្ញត្តិ នៅឆ្នាំ ១៨៣៣ ។ នៅក្រោមការដឹកនាំរបស់គណៈប្រធានទីមួយ នៅក្នុងការបោះពុម្ពបន្ដបន្ទាប់នៃគោលលទ្ធិ និង សេចក្ដីសញ្ញា វិវរណៈបន្ថែម ឬបញ្ហាផ្សេងទៀតនៃកំណត់ត្រាត្រូវបានបន្ថែមចូលបន្ទាប់ពីដាក់ជូន និងទទួលយកដោយសមាជិកនៃសាសនាចក្រអំឡុងសន្និសីទនៃសាសនាចក្រ ។
នៅក្នុងការបោះពុម្ពឆ្នាំ ១៨៧៦ បានរៀបចំដោយអែលឌើរ អួរសុន ប្រាត្ត នៅក្រោមការដឹកនាំរបស់ប្រធាន ព្រិកហាំ យ៉ង់ បានរៀបចំវិវរណៈតាមកាលប្រវត្តិ ហើយផ្ដល់នូវក្បាលកណ្ឌថ្មីដោយមានការណែនាំអំពីប្រវត្តិ ។
នៅក្នុងការបោះពុម្ព នៃគោលលទ្ធិ និងសេចក្ដីសញ្ញាឆ្នាំ ១៩៨១ ឯកសារចំនួនបីច្បាប់ត្រូវបានដាក់បញ្ចូលជាលើកទីមួយ ។ ទាំងនេះគឺជា កណ្ឌ ១៣៧ និង ១៣៨ ដាក់ជាគ្រឹះនៃសេចក្ដីសង្គ្រោះសម្រាប់មរណជន និង សេចក្ដីប្រកាសជាផ្លូវការទី ២។
នៅក្នុងការបោះពុម្ពនៃព្រះគម្ពីរគោលលទ្ធិ និងសេចក្ដីសញ្ញាឆ្នាំ ២០១៣ មានដាក់បញ្ចូលទាំងកំណែថ្មីដើម្បីជាជំនួយដល់ការសិក្សា រូបថតថ្មី ផែនទីដែលបានធ្វើបច្ចុប្បន្នភាព និងការកែសម្រួលសេចក្ដីផ្ដើមកណ្ឌ ។ ការកែសម្រួលបន្ដិចបន្ដួចចំពោះសេចក្ដីណែនាំ គឺមានបំណងដើម្បីផ្ដល់នូវបរិបទកាន់តែច្បាស់ និងកាន់តែត្រឹមត្រូវចំពោះបទគម្ពីរទាំងឡាយ ។
The Joseph Smith Papers( គម្រោងឯកសាររបស់ យ៉ូសែប ស្ម៊ីធ )
ព័ត៌មានប្រវត្តិសាស្ត្រភាគច្រើននៅក្នុងសៀវភៅសិក្សានេះបានដកស្រង់ចេញពី History of the Church និង Joseph Smith Papers Project ( គម្រោឯកសាររបស់យ៉ូសែប ស្ម៊ីធ ) ។ ជាពិសេសគឺភាគទី ១ និង ២នៃ Documents series of The Joseph Smith Papers ( គម្រោឯកសាររបស់យ៉ូសែប ស្ម៊ីធ ) ដែលបានបោះពុម្ពដោយកាសែតប្រវត្តិសាស្ត្ររបស់សាសនាចក្រ ( ការបោះពុម្ពនៃនាយកដ្ឋានប្រវត្តិសាស្ត្រសាសនាចក្រនៃ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ) ។ ដើម្បីមើលរូបភាពឌីជីថល និងអានឯកសារសរសេរដោយដៃនៃឯកសារច្បាប់ដើមនៅក្នុង The Joseph Smith Papers ( គម្រោងឯកសាររបស់យ៉ូសែប ស្ម៊ីធ ) សូមចូលទស្សនានៅ josephsmithpapers.org ។