Lēsoni 6 Naunau ʻa e Faiakó

Ko e Tohi ʻa Molomoná—ko e Maka-tuʻu-loto ʻo ʻEtau Tui Fakalotú

Naʻe akonaki ʻa e Palōfita ko Siosefa Sāmitá ʻo pehē “ko e Tohi ʻa Molomoná ko e maka-tuʻu-loto ia ʻo ʻetau tui fakalotú” (talateu ki he Tohi ʻa Molomoná). ʻOku fakataumuʻa ʻa e lēsoni ko ʻení ke tokoniʻi e kau akó ke nau fakamatalaʻi e ʻuhinga ʻoku hoko ai e Tohi ʻa Molomoná ko e maka-tuʻu-loto ʻo ʻetau tui fakalotú pea ke fakamālohia ʻenau tuʻunga malava ke tali e ngaahi fakaanga ke fakafepakiʻi iá.

Ngaahi Fokotuʻu ki hono Akoʻí

FAKATUPULAKI ʻETAU FOUNGA AKOʻÍ MO E AKÓ

Tukutaha e tokangá ʻi he kau akó. ʻI hoʻo akoʻí, manatuʻi ke tokanga taha ki he ngaahi fiemaʻu fakafoʻituitui ʻa e kau akó. Tokanga ke ʻoua naʻa hoko ʻo mahuʻinga ange ʻa e naunau lēsoní ʻi he kau ako he loki akó. Toutou vakaiʻi maʻu pē e tuʻunga kau mai ʻa e kau akó pea tuku ke lava ʻo fulifulihi feʻunga e fealeaʻakí ke feau ʻenau ngaahi fiemaʻú.

ʻOku mahuʻinga e Tohi ʻa Molomoná ki he Siasi ʻo e ʻOtuá pea ki heʻetau ngaahi fakamoʻoní.

Te ke lava ʻo kamata e kalasí ʻaki hano hiki hake ha tatau ʻo e Tohi ʻa Molomoná pea fai ha fealeaʻaki nounou ʻi he fakamatala mo e fehuʻi ko ʻení:

Ko e konga lahi ʻo e ngaahi ʻohofi mei he kau fakaanga ʻo e Siasí ʻoku fakataumuʻa ia ki he Tohi ʻa Molomoná. ʻOkú ke pehē ko e hā hono ʻuhingá?

Fakaafeʻi e kau akó ke fakaava hake pe vakaiʻi e peesi talamuʻaki ʻo e Tohi ʻa Molomoná. Fakamatalaʻi ange ʻi he ʻaho Sāpate 28 ʻo Nōvema ʻo e 1841, naʻe ʻi ha fakataha alēlea ai ʻa e Palōfita ko Siosefa Sāmitá he ʻaho ko iá mo e Kau ʻAposetolo ʻe Toko Hongofulu Mā Uá ʻi he fale ʻo Pilikihami ʻIongí, ko e palesiteni ʻo e kōlomu ko iá (vakai, History, 1838–1856 [Manuscript History of the Church], volume C-1, 1255, josephsmithpapers.org). Kole ki ha tokotaha ako ke ne lau leʻo lahi e palakalafi ono ʻi he talateu ki he Tohi ʻa Molomoná ke ʻilo pe ko e hā e meʻa naʻe talaange ʻe Siosefa ki he kau ʻAposetoló. Fakaafeʻi e kau akó ke nau fakakaukau ke fakaʻilongaʻi e ngaahi moʻoni naʻe akoʻi ʻe Siosefá.

• ʻE loto-fiemālie nai ha taha ke vahevahe ʻene fakakaukaú pe fakamoʻoní ki ha taha ʻo e ngaahi akonaki ko ʻení? (Fakatokangaʻi ange: lolotonga e fai mai ʻe he kau akó ʻenau talí, fakakaukau ke fakaʻaongaʻi ha taha ʻo e ngaahi fakakaukau fakafaiako ko ʻení ke tokoni ke mahino kiate kinautolu e ngaahi moʻoni naʻe akoʻi ʻe Siosefa ki he Toko Hongofulu Mā Uá.)

Ko e Tohi ʻa Molomoná ʻa e tohi totonu taha ʻi he ngaahi tohi kotoa pē ʻi he māmaní.

ʻO ka fie maʻu, tokoniʻi e fānau akó ke mahino e kupuʻi lea “Tohi ʻa Molomoná ʻa e tohi totonu taha ʻi he ngaahi tohi kotoa pē ʻi he māmaní” ʻaki hono fakaʻaongaʻi e fakamatala ʻoku maʻu ʻi he konga 2 ʻo e naunau teuteú.

Mahalo te ke fakamatalaʻi foki ki he kau akó naʻe ʻikai ʻuhinga e fakamatala ʻa Siosefá ke hao e ngaahi tatau kuo paaki ʻo e Tohi ʻa Molomoná mei he fehālākí. Kuo fai ha ngaahi fakatonutonu ki he tatau takitaha ʻo e Tohi ʻa Molomoná talu mei he 1829. Ko e ngaahi fakatonutonú ko ha fanga kiʻi liliu iiki ʻi he fakaleá pe liliu ki he sipelá, fakaʻilonga leá, pe fakamataʻitohi lahí. ʻOku ʻuhinga hono fakaʻaongaʻi ʻo e foʻi lea totonu ʻi he lea ko ʻení ki he ngaahi moʻoni mālohi ʻoku ʻi he Tohi ʻa Molomoná ka ʻoku ʻikai ʻuhinga ia naʻe hao e tohi kuo pākí mei he fehalākí.

Ko e Tohi ʻa Molomoná ko e maka-tuʻu-loto ia ʻo ʻetau tui fakalotú.

ʻI hono pehē ʻe he kau akó ʻoku hoko e Tohi ʻa Molomoná “ko e maka-tuʻu-loto ia ʻo ʻetau tui fakalotú,” mahalo te ke fie fakaʻaliʻali ha fakatātā ʻo ha maka-tuʻu-loto, hangē ko ia ʻi he naunau teuteú. Fakaafeʻi e kau akó ke nau fakamatalaʻi e ʻuhinga ʻoku nau pehē ai ko e maka-tuʻu-lotó ko ha fakafehoanaki lelei ia ki he Tohi ʻa Molomoná.

Fakaafeʻi ha tokotaha ako ke ne lau pe fakamatala fakanounouʻi e lea ʻa Palesiteni ʻEselā Tafu Penisoni ʻi he konga 3 ʻo e naunau teuteú. (ʻOku fakamatalaʻi ʻe he lea ko ʻení e founga ʻe tolu ʻoku hoko ai e Tohi ʻa Molomoná ko e maka-tuʻu-loto ia ʻo ʻetau tui fakalotú.) Fakakaukau ke ʻeke ha niʻihi pe kotoa ʻo e ngaahi fehuʻi ko ʻení ke tokoniʻi e kau akó ke fakaloloto ʻenau mahino ki he ngaahi akonaki ʻa Palesiteni Penisoni fekauʻaki mo e hoko ʻa e Tohi ʻa Molomoná ko ha maka-tuʻu-lotó.

• Kuo fakamālohia fēfē nai ʻe he Tohi ʻa Molomoná ʻa hoʻo fakamoʻoni ki he Fakamoʻui ko Sīsū Kalaisí?

• Ko e hā ha ngaahi founga ʻoku tuʻu pe holo ai e Siasí fakataha mo e moʻoni ʻo e Tohi ʻa Molomoná?

• Kuo tākiekina fēfē ʻe hoʻo fakamoʻoni ki he Tohi ʻa Molomoná ʻa hoʻo fakamoʻoni ki he ngaahi tokāteline mo e akonaki kehe ʻo e Siasí?

• Kuo hoko nai e Tohi ʻa Molomoná ko ha maka-tuʻu-loto ʻo hoʻo fakamoʻoni fakataautahá? Kapau ko ia, ʻo ange fēfē?

Te tau lava ʻo ʻunu ke ofi ange ki he ʻOtuá ʻaki e muimui ki he ngaahi akonaki ʻo e Tohi ʻa Molomoná.

Vahevahe e kalasí ki ha fanga kiʻi kulupu iiki pea fakaafeʻi kinautolu ke nau vahevahe mo fakamatalaʻi ha ngaahi potufolofola ʻi he Tohi ʻa Molomoná kuó ne tokoniʻi kinautolu ke nau ʻunuʻunu ke ofi ange ki he ʻOtuá. (ʻE lava ke vakai e kau ako kuo nau ako e naunau teuteú ki he meʻa naʻa nau tohi ʻi he fakaʻosinga ʻo e konga 4.) ʻE lava foki ke ke fakaafeʻi e kau akó ke nau aleaʻi ʻi heʻenau ngaahi kulupú ʻa e founga ʻoku tokoniʻi ai kinautolu ʻe hono moʻui ʻaki e ngaahi akonaki ʻoku lekooti ʻi he ngaahi potufolofolá, ke nau hoko ʻo hangē ko Sīsū Kalaisí.

ʻOku feinga ʻa e ngaahi fili ʻo e Siasí ke fakaongoongokoviʻi e Tohi ʻa Molomoná.

Fakaʻaliʻali e lea ko ʻeni ʻa ʻEletā Teti R. Kalisitā naʻá ne hoko ko ha Palesiteni Lahi ʻo e Lautohi Faka-Sāpaté, pea fakaafeʻi ha tokotaha ako ke ne lau leʻo lahi ia.

Misa Teti R. Kalisitā

ʻOku pauni mamafa ange e moʻoni ʻo e [Tohi ʻa Molomoná] ʻi hono fakatahaʻi fakakātoa e mamafa ʻo e ngaahi fakaʻuhinga e kau fakaangá. Ko e hā hono ʻuhingá? He ʻoku moʻoni, ko Siosefa Sāmitá ko ha palōfita pea ko e Siasi ʻeni ʻo Sīsū Kalaisi ne toe fakafoki maí, ʻo tatau ai pē pe ʻoku fehangahangai mo ha ngaahi fakakikihi ʻi hono meʻa fakahisitōliá pe ngaahi meʻa kehe. Ko hono ʻuhinga ʻeni ʻoku feinga ai e kau fakaangá ke fakahalaki e Tohi ʻa Molomoná, ka ʻoku fuʻu lahi e ngaahi fakafeʻātungia ʻoku nau fepaki mo iá, he ʻoku moʻoni ʻa e tohí ni. (“Ko e Fakamoʻoni Mālohi ʻa e ʻOtuá: Ko e Tohi ʻa Molomoná,“ Ensign pe Liahona, Nōv. 2017, 107)

Tokoniʻi e fānau akó ke nau kumi e ngaahi maʻuʻanga tokoni falalaʻanga fakaʻilekitulōnika ko ʻení, pe ʻoatu ha tatau laʻipepa kiate kinautolu ʻo ka fie maʻu. Vahevahe ʻa e ngaahi maʻuʻanga tokoní ʻi he kau akó, pea kole ange ke nau fakakaukau pea fekumi ki ha niʻihi ʻo e ngaahi fakakikihi ʻoku fai ʻe he kau fakaangá ke fakafepakiʻi e Tohi ʻa Molomoná pea fakakaukau pe ko e hā ha founga te tau lava ʻo fakaʻaongaʻi ai e maʻuʻanga tokoni ko ʻení ke tali e ngaahi fakaanga ko iá ʻi heʻetau fekumi ke maʻu e ʻilo fakalaumālié mo fakatupulaki e fakamoʻoní. Kole ki he kau akó ke lipooti ha niʻihi ʻo e meʻa ʻoku nau maʻú. Te nau lava ʻo fakahoko ʻeni ʻi ha fanga kiʻi kulupu iiki pe fakakātoa mo e kalasí.

• Molomona 8:14–22. ʻOku fakaʻosi ʻe Molonai e lekooti ʻene tamaí ʻaki ha fakatokanga kiate kinautolu ʻoku nau fakaangaʻi e Tohi ʻa Molomoná ʻi he ngaahi ʻaho fakaʻosí.

• ʻEta 12:23–29. ʻOku fakahā ʻe Molonai ʻene hohaʻa naʻa fakaangaʻi ʻe ha niʻihi e vaivai ʻo ʻene faitohí pea ʻikai ke nau maʻu e mālohi ʻo e pōpoaki ʻo e Tohi ʻa Molomoná.

• Tad R. Callister, “Ko e Fakamoʻoni Mālohi ʻa e ʻOtuá: Ko e Tohi ʻa Molomoná,” Ensign pe Liahona, Nōvema 2017, 107–9. (Te ke lava ʻo fakaʻaongaʻi e konga ʻuluaki ʻo e lea ʻa Misa Kalisitaá.)  

• “Kau Fakatanga ʻo e Tohi ʻa Molomoná,” Ngaahi Tefito ʻi he Hisitōlia ʻo e Siasí, history.ChurchofJesusChrist.org.

•   .  

• Jeffrey R. Holland, “Malu Maʻá e Laumālié,” Ensign pe Liahona, Nōvema 2009, 88–90. (Te ke lava ʻo ako pē ʻa e konga hono ua ʻo e lea ʻa ʻEletā Hōlaní.)

Hili hono aleaʻi ʻe he kau akó e meʻa naʻa nau maʻú, ʻeke ha taha pe lahi ange ʻo e ngaahi fehuʻi ko ʻení:

• Ko e hā ʻokú ke pehē ai ʻoku ʻikai ʻomai kakato ai pē ʻe he ʻOtuá e fakamoʻoni fakatuʻasino ʻoku moʻoni e Tohi ʻa Molomoná?

• Ko e hā ha faleʻi te ke fai ki ha kaungāmeʻa pe mēmipa ʻo e fāmilí ʻokú ne falala atu ʻo tala atu ʻoku faingataʻaʻia ia ʻi he ngaahi fakaanga kau ki he Tohi ʻa Molomoná? Ko e hā mo ha toe meʻa te ke lava ʻo fai ke tokoni?

• Ko e hā ʻokú ke fai (pe ko e hā te ke lava ʻo fai) kapau ʻoku ngalingali ʻikai ha tali lelei ki ha fakaanga ʻokú ke fanongo ki ai?

ʻOange ha ngaahi miniti siʻi ki he kau akó ke nau fakakaukau ki hono ʻaonga ʻo ʻenau ako fakataautaha ʻo e Tohi ʻa Molomoná pea fakahoko ha ngaahi palani ki ha liliu ʻo fakatatau mo e ueʻi ʻa e Laumālié. Poupouʻi e kau akó ke fakakau ʻi heʻenau ngaahi palaní ha taumuʻa ke ako pea lotu ʻo ka fie maʻu ke fakapapauʻi ko e Tohi ʻa Molomoná ko ha maka-tuʻu-loto ia ʻo ʻenau fakamoʻoní. ʻI heʻenau fakalaulauloto ki aí, te ke lava ʻo fakaʻaliʻali e lea ko ʻeni ʻa ʻEletā Kēvini W. Piasoni ʻo e Kau Fitungofulú:

ʻEletā Kēvini W. Piasoni

Kapau ʻokú ke faingataʻaʻia, puputuʻu, pe hē fakalaumālie, ʻoku ou kole atu ke ke fai e meʻa ʻe taha ʻoku ou ʻiloʻi te ke toe foki ai ki he halá. Toe kamata ke ako e Tohi ʻa Molomoná ʻi he faʻa lotu pea moʻui ʻaki hono ngaahi akonakí he ʻaho kotoa pē, ʻaho kotoa pē, ʻaho kotoa pē! ʻOku ou fakamoʻoni ki he liliu ʻe fai ʻe he fuʻu mālohi ʻo e Tohi ʻa Molomoná ki hoʻo moʻuí mo fakamālohia hoʻo holi ke muimui kia Kalaisí. ʻE liliu ʻe he Laumālie Māʻoniʻoní ho lotó mo tokoni ke ke sio “ki he ngaahi meʻá ʻo hangē ko honau anga moʻoní” [Sēkope 4:13]. Te Ne fakahā atu kiate koe e meʻa hoko ʻoku fie maʻu ke ke faí. (Kevin W. Pearson, “Nofo Maʻu ʻi he Fuʻu ʻAkaú,” Ensign pe Liahona, Mē 2015, 116)

Fakaafeʻi ha kau ako ʻe niʻihi te nau fie vahevahe ha fakamoʻoni nounou ʻo e Tohi ʻa Molomoná ke nau fai ia. Mahalo foki te ke fie vahevahe ange hoʻo fakamoʻoní.

Ki he Kalasi Hokó

Kole ki he kau akó ke nau fakakaukau pe ko e hā hono tuʻo lahi ʻo ʻenau aʻusia e ngaahi tāpuaki ʻo e mafai ʻo e lakanga fakataulaʻeikí mo e ngaahi kī ʻo e lakanga fakataulaʻeikí ʻi he uike takitaha. Poupouʻi kinautolu ke nau ako e naunau teuteu ki he kalasi hokó ki hono toe fakafoki mai ʻo e lakanga fakataulaʻeikí pea fekumi ki he founga ʻe lava ai ʻe he lakanga fakataulaʻeikí ʻo ʻai ke nau lava ʻo maʻu e ngaahi mālohi faifakamoʻui ʻo Sīsū Kalaisí.