Lēsoni 10 Naunau ʻa e Faiakó

Muimui ki he Kau Palōfita Moʻui ʻa e ʻEikí

Ko ha tefitoʻi moʻoni ʻo e ongoongolelei kuo toe fakafoki maí ʻa e hokohoko atu hono ui ʻe he ʻEikí ʻa e kau palōfita moʻuí ke nau fakahā Hono finangaló mo e tokāteliné ki Hono kakaí. ʻOku fakataumuʻa e lēsoní ke tokoni ke fakamālohia e tukupā ʻa e kau akó ke muimui ki he kau palōfita ʻa e ʻEikí ʻi he faʻa kātaki mo e tui.

Ngaahi Fokotuʻu ki hono Akoʻí

ʻOku fekauʻi ʻe he ʻEikí ʻa e Kāingalotú ke nau tokanga ki he ngaahi lea ʻa ʻEne palōfitá.

Fakaʻaliʻali ha tā ʻo e Palesiteni ʻo e Siasí, pea fehuʻi ki he kau akó pe ko e hā ʻenau fakakaukau mo e ongo ʻi heʻenau sio ki he fakatātā ko ʻení.

Fakaʻaliʻali e lea ko ʻeni ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa ia ʻoku kau ʻi he naunau teuteú:

ʻEletā ʻUlise Soālesi

Ko hono maʻu ʻo e kau palōfitá ko ha fakaʻilonga ia ʻo e ʻofa ʻa e ʻOtuá ki Heʻene fānaú. (Ulisses Soares, “ ʻOku Lea ʻa e Kau Palōfitá ʻi he Mālohi ʻo e Laumālie Māʻoniʻoní,” Ensign pe Liahona, Mē 2018, 99)

• Ko e hā ha ngaahi founga ʻoku hoko ai e kau palōfita moʻuí ko ha fakaʻilonga ʻo e ʻofa ʻa e ʻOtuá ki Heʻene fānaú? (Poupouʻi e kau akó ke nau fakamanatu e meʻa naʻa nau ako ʻi he konga 1 ʻo e naunau teuteú.)

Fakamatalaʻi ange ʻi he ʻaho naʻe fokotuʻu ai e Siasí, naʻe maʻu ʻe he Palōfita ko Siosefa Sāmitá ha fakahā mei he ʻEikí mo ha fekau mo e talaʻofa ki he kau mēmipa ʻo Hono Siasí. Lau fakataha mo e kau akó ʻa e Tokāteline mo e Ngaahi Fuakava 21:4–5, ʻo fekumi ki he meʻa naʻe fekau ʻe he ʻEikí ke fai ʻe he kau mēmipa ʻo e Siasí.

• Ko e hā ha ngaahi tefitoʻi moʻoni te tau lava ʻo ʻilo mei he fekau ʻa e ʻEikí ki he Kāingalotú? (ʻI hono fakaʻaongaʻi e fakalea ʻa e kau akó, kumi ha moʻoni ʻoku faitatau mo ʻení: ʻOku fekauʻi kitautolu ʻe he ʻEikí ke tau tali e ngaahi lea ʻa e kau palōfitá ʻo hangē ko ha folofola tonu ia mei Hono ngutú ʻi he kātaki mo e tui.)

• Ko e hā nai ʻoku fie maʻu ai ʻa e kātakí mo e tuí he taimi ʻe niʻihi ke tali mo tokanga ki he ngaahi lea ʻa e palōfitá?

Fakaafeʻi e kalasí pe ʻi ha fanga kiʻi kulupu iiki ke nau lau e tūkunga ko ʻení pea aleaʻi e ngaahi fehuʻi ʻoku muimui mai aí:

Lolotonga haʻo talanoa mo ha kaungāmeʻa fekauʻaki mo ha konifelenisi lahi kimuí ni, ʻoku tala atu ʻe ho kaungāmeʻá ʻene faingataʻaʻia ke tali ha meʻa naʻe akoʻi ʻe ha taha ʻo e kau taki ʻo e Siasí. ʻOkú ne fehuʻi atu, “Ko e hā te u faí kapau ʻoku ʻikai ke u tui tatau mo ha meʻa naʻe akoʻi ʻe ha palōfita?”

• Ko e hā ʻe lava ke hoko ai ʻeni ko ha palopalema faingataʻa ki ha mēmipa ʻo e Siasí?

• Ko e hā nai te ke lava ʻo vahevahe mo ho kaungāmeʻá ke poupouʻi ia ke ne ngāue ʻi he kātaki mo e tui ʻi heʻene fekumi ke toʻo atu ʻene hohaʻá? (Poupouʻi e kau akó ke nau fakakaukau pe fakamanatu e meʻa naʻa nau ako ʻi he konga 2 ʻo e naunau teuteú ʻo ka fie maʻu.)

• Ko e hā kuó ne tokoniʻi koe ke ke muimui ki he kau palōfita ʻa e ʻEikí ʻi he kātaki mo e tuí? Pe ko e hā naʻá ke ako mei ha mēmipa ʻo e fāmilí pe kaungāmeʻa naʻá ke talanoa mo ia kau ki he fehuʻi ko ʻení (ʻo hangē ko ia ʻoku fokotuʻu atu ʻi he konga 2 ʻo e naunau teuteú)?

Hiki ʻi he palakipoé (pe fakaʻaliʻali) ʻa e tefitoʻi moʻoni taʻe kakato ko ʻení: ʻI heʻetau tokanga ki he ngaahi lea ʻa e kau palōfita ʻa e ʻEikí ʻi he kātaki mo e tuí …

Lau mo e kau akó ʻa e Tokāteline mo e Ngaahi Fuakava 21:6, ʻo fekumi ki he tāpuaki kuo talaʻofa ʻe he ʻEikí ki he muimui ki Heʻene kau palōfitá ʻi he kātaki mo e tuí.

• ʻOkú ke pehē ko e hā e ʻuhinga ʻo e “ʻe ʻikai ikuna ʻa kimoutolu ʻe he ngaahi matapā ʻo helí”? pea ʻe “fakamovetevetea atu ʻe he ʻEiki ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu”? pea ʻe “ngalulululu ʻa e ngaahi langí koeʻuhi ko hoʻomou leleí”? (Hiki e tali ʻa e kau akó ʻi he palakipoé ʻi lalo ʻi he sētesi tefitoʻi moʻoni taʻe kakató.)

• Ko e hā ha ngaahi akonaki kimuí ni mai mei he kau palōfita ʻa e ʻEikí ʻe lava ʻo tokoni ke maluʻi kitautolu mei he ngaahi mālohi ʻo e fakapoʻulí peá ne ʻai ke ngalulululu ʻa e ngaahi langí koeʻuhí ko ʻetau leleí? (Fakakaukau ke teuteu ha ngaahi sīpinga ʻe niʻihi ke vahevahe.)

• Ko e fē ha taimi naʻe iku ai hoʻo loto-fiemālie ke muimui ki he akonaki ʻa e kau palōfitá ʻi he kātaki mo e tuí, ki ha niʻihi ʻo e ngaahi tāpuaki ko ʻení?

Tuku ha taimi ki he kau akó ke nau fakalaulauloto ʻi he faʻa lotu ki he meʻa te nau lava ʻo fai ke muimui ki he kau palōfita ʻa e ʻEikí ʻi he kātaki mo e tui lahi angé. ʻE lava ke kau heni ʻa e fakakaukau ki he founga te nau lava ai ʻo toe ngāue kakato ange ʻi ha ngaahi fakaafe mo e faleʻi fakaepalōfita kimuí ni. Fakaafeʻi e kau akó ke nau lekooti ʻenau ngaahi fakakaukaú mo e ueʻi ʻoku nau maʻú. Poupouʻi kinautolu ke nau ngāueʻi e ngaahi ueʻi ʻoku nau maʻu mei he Laumālié.

ʻOku maʻu ʻe he kau palōfita ʻa e ʻEikí ʻa e fakahā ke talaki ʻene tokāteliné ki he Siasí kotoa.

Kole ki he kau akó ke nau fakamanatu e aʻusia ʻa Hailame Peisi mo ʻene maká mei heʻenau ako ʻo e naunau teuteú.

• Ko e hā ha ngaahi palopalema naʻe fakatupu ʻe he ngaahi fakahā fakamahamahalo ʻa Hailame Peisi ki he kāingalotu ʻo e Siasí?

Fakamanatu ange ki he kau akó naʻe ʻikai ngata pē ʻi hono tala ʻe Hailame Peisi naʻá ne maʻu fakahā maʻá e siasí, ka naʻe fepaki ʻene ngaahi fakahā fakamahamahaló mo e tokāteline naʻe akoʻi ʻi he ngaahi folofolá mo e ngaahi fakahā naʻe maʻu kimuʻa ange ʻe Siosefa Sāmitá. Naʻe kau ʻi he niʻihi naʻa nau tali e ngaahi fakahā ʻa Hailame Peisí ʻa e kau mēmipa ʻo e fāmili Uitemaá mo ʻŌliva Kautele.

Lau e Tokāteline mo e Ngaahi Fuakava 28:1–7, ʻo fekumi ki he ngaahi akonaki ʻa e ʻEikí kia ʻŌliva Kautele mo e kāingalotu ʻo e Siasí. Fakamahinoʻi ange ko e “ngaahi meʻa liló” ʻa ē ʻoku lau ki ai ʻi he veesi 7 ʻoku ʻuhinga ia ki he “ngaahi moʻoni fakalaumālie ʻoku toki ʻiloʻi pē ʻi he fakahā” (Fakahinohino ki he Ngaahi Folofolá, “Meʻa Lilo ʻa e ʻOtuá, Ngaahi,” scriptures.ChurchofJesusChrist.org).

• Ko e hā ha ngaahi moʻoni te tau lava ʻo ako mei he ngaahi veesi ko ʻení fekauʻaki mo e tokotaha ʻe lava ke ne maʻu fakahā maʻá e Siasí hono kotoá? (Mahalo ʻe maʻu ʻe he kau akó ha ngaahi moʻoni kehekehe, ʻo kau ai ʻeni: Ko kinautolu pē ʻoku nau maʻu e ngaahi kī ke tataki ʻa e Siasí ʻoku fakamafaiʻi ke nau maʻu fakahā mo fokotuʻu e tokāteline maʻá e Siasí kotoa.)

• ʻE tokoni fēfē nai e moʻoni ko ʻení ke tau fakaʻehiʻehi mei hono kākaaʻi kitautolú?

Fakamatalaʻi ange ʻoku lahi moʻoni e faitatau ʻi he tokāteline ʻoku akoʻi ʻe he kau palōfita ʻa e ʻEikí kuo filí ʻi he hisitōlia kotoa ʻo e Siasí. Ka neongo ia, ʻe lava ke fifili ha kau mēmipa ʻe niʻihi pe ko e hā ʻe faí ʻi haʻanau maʻu ha fakamatala naʻe fai ʻi he kuohilí ʻe ha taki ʻo e Siasí ʻoku hangē ʻoku ʻikai fenāpasi mo e tokāteline ʻoku akoʻi ʻi he ʻaho ní.

• Ko e hā ha ngaahi tefitoʻi moʻoni te ne lava ʻo tataki kitautolu ke tau ʻiloʻi e tokāteline ʻa e ʻEikí ʻo hangē ʻoku akoʻi ʻe Heʻene kau palōfita moʻuí? (Te ke lava ʻo fakaafeʻi e kau akó ke nau toe vakaiʻi e ongo lea ʻa ʻEletā D. Toti Kulisitofasoni mo Niila L. ʻEnitaseni ʻi he konga 3 ʻo e naunau teuteú.)

Mahalo te ke fie vahevahe e lea ko ʻeni ʻa Palesiteni Lāsolo M. Nalesoni ko ha konga ʻo e fealeaʻakí:

Palesiteni Lāsolo M. Nalesoni

He ʻikai mahino maʻu pē kiate koe ʻa e fakahā kotoa ʻa ha palōfita moʻui. Ka ʻi he taimi ʻokú ke ʻiloʻi ko e palōfitá ko ha palōfita, te ke lava ʻo hū ki he ʻEikí ʻi he loto-fakatōkilalo mo e tui pea kolea haʻo fakamoʻoni fekauʻaki mo ha meʻa pē kuo fakahā ʻe Heʻene palōfitá. (Russell M. Nelson, “Tuʻu ko ha Kau Nofotuʻi Moʻoni,” Liahona, ʻOkatopa 2016, 31)

Fakakaukau ke fakaʻosi e lēsoní ʻaki haʻo vahevahe hoʻo fakamoʻoni ki he kau palōfita moʻuí mo e ngaahi tāpuaki ʻo e muimui kiate kinautolu ʻi he kātaki mo e tuí.

Ki he Kalasi Hokó

Fakamatalaʻi ange ʻe nofotaha e kalasi hokó ʻi ha tefito kuo pehē ʻe Palesiteni Lāsolo M. Nalesoni ko e “tukupā kāfakafa taha, ko e meʻa mahuʻinga taha, mo e ngāue maʻongoʻonga taha ʻi he māmaní he ʻaho ní” (“ ʻAmanakiʻanga ʻo ʻIsilelí” [fakataha lotu fakamāmani lahi ʻa e toʻu tupú, Sune 3, 2018], tānaki atu ki he New Era mo e Ensign, 4–5, ChurchofJesusChrist.org; mataʻitohi fakahihifi ʻi he tatau moʻoní). Fakaafeʻi e kau akó ke nau ako e naunau teuteu ki he kalasi hokó pea nau haʻu mateuteu ke aleaʻi e ngaahi taumuʻa mo e tāpuaki ʻo e kau atu ki he ngāue mo e tulifua maʻongoʻonga taha ʻo hono tānaki ʻo ʻIsilelí.