Lēsoni 11 Naunau ʻa e Faiakó

Ko e Tānaki ʻo ʻIsilelí

Naʻe talaʻofa ʻa Sīsū Kalaisi ke tānaki Hono kakaí ʻi he ngaahi ʻaho kimui ní (vakai, 3 Nīfai 21:22–29). ʻOku fakataumuʻa ʻa e lēsoni ko ʻení ke tokoniʻi e kau akó ke mahino lelei ange honau fatongia ʻi heʻenau tokoni ki he ʻEikí ke tānaki ʻa ʻIsilelí. ʻE tokoni foki ia ki he kau akó ke palani e founga te nau kau kakato ange ai ki he tānaki ko ʻení.

Ngaahi Fokotuʻu ki hono Akoʻí

Kuo fekau ʻe he ʻEikí Hono Kāingalotú ke nau tānaki fakataha.

Fakaʻaliʻali e fakatātā ko ʻení pea fakaafeʻi ha tokotaha ako ke ne lau leʻolahi e Tokāteline mo e Ngaahi Fuakava 29:1–2.

Kuo Tuʻo Fiha, tā valivali ʻe Liz Lemon

• Ko e hā ʻe ala akoʻi mai ʻe he fakatātā ʻi he veesi ko ʻení fekauʻaki mo e Fakamoʻuí? Ko e hā ʻoku finangalo ʻe Sīsū Kalaisi ke fai maʻa Hono kakaí?

Fakahinohino ange e foʻi lea ko e “fakalelei” ʻi he veesi 1. Fakamatalaʻi ange naʻe akoʻi ʻe Palesiteni Lāsolo M. Nalesoni “ko e foʻi lea tefito ki he fakaleleí ko e kaphar, ko ha veape ʻoku ʻuhinga ‘ke ʻufiʻufi’” (“The Atonement,” Ensign, Nov. 1996, 34).

• Fakatatau ki he veesi 2, ko hai e kakai ʻa e ʻEikí ʻokú Ne finangalo ke tānaki mo ʻufiʻufi ʻaki Hono toʻukupu ʻaloʻofá?

Fakamatalaʻi ange ko e Tohi Tapú, ko e Tohi ʻa Molomoná, mo e ngaahi fakahā kehe ne ʻoange kia Siosefa Sāmitá, ʻoku nau akoʻi kotoa ʻe tānaki fakataha ʻe he ʻEikí Hono kakaí, ʻa ʻIsileli kuo fakamoveteveté, ʻi he ngaahi ʻaho kimui ní (vakai, ʻIsikeli 28:25; 2 Nīfai 10:8; Tokāteline mo e Ngaahi Fuakava 33:6).

Fakaafeʻi e kau akó ke nau fakamatalaʻi e meʻa ʻoku mahino kiate kinautolu fekauʻaki mo hono tānaki ʻo ʻIsilelí. (Poupouʻi ke nau vakai ki he konga 1 ʻo e naunau teuteu ki he kalasí.) Mahalo te ke fie ʻeke ha ngaahi fehuʻi hangē ko ʻení ke fakaloloto e fealeaʻakí:

• ʻOkú ke pehē ko e hā ka ui ai ʻe Palesiteni Nalesoni ʻa e tānaki fakatahá ko e “tukupā kāfakafa tahá, ko e meʻa mahuʻinga tahá, mo e ngāue maʻongoʻonga taha ʻi he māmaní ʻi he ʻaho ní”? (“ ʻAmanakiʻanga ʻo ʻIsilelí” [fakataha lotu fakamāmanilahi ʻa e toʻu tupú, 3 Sune 2018], tānaki atu ki he Ensign mo e New Era, 8, ChurchofJesusChrist.org; mataʻitohi fakahihifí ʻi he tatau moʻoní).

• Ko e hā te tau lava ʻo ako fekauʻaki mo e ʻEikí mo Hono ʻulungāngá ʻi hono fakamoveteveteʻi mo tānaki fakataha ʻo Hono kakai ʻo e fuakavá?

• Ko e hā ha ngaahi ʻuhinga ʻe niʻihi ʻoku finangalo ai e ʻEikí ke tānaki fakataha Hono Kāingalotú?

Fakamatalaʻi ange naʻe maʻu ʻe Siosefa Sāmita ʻi Tīsema ʻo e 1830 ha fakahā ne fekauʻi ai e Kāingalotú ke nau hiki ki ʻOhaiō (vakai, Tokāteline mo e Ngaahi Fuakava 37:1–3). ʻI ha konifelenisi ʻa e Siasí ʻi Sānuali ʻo e 1831, naʻe maʻu ʻe Siosefa ha toe fakahā lahi ange ʻo ʻomi ai e ngaahi ʻuhinga ʻa e ʻEikí ki hono fekauʻi e Kāingalotú ke tānaki fakatahá mo fakamatalaʻi e ngaahi tāpuaki kuo talaʻofa mai ʻi hono fai iá.

Fakaafeʻi e kalasí ke nau lau e Tokāteline mo e Ngaahi Fuakava 38:28, 31–33, ʻo fekumi ki he ngaahi founga ʻe tāpuekina ai e Kāingalotú kapau te nau talangofua ki he fekau ke tānaki fakataha ki ʻOhaioó. Fakaafeʻi e kau akó ke nau vahevahe e meʻa ne nau maʻú.

Mahalo te ke fie fakamamafaʻi e moʻoni ko ʻení: ʻOku tānaki fakataha ʻe he ʻEikí Hono kakaí ke maluʻi mo fakamālohia fakalaumālie kinautolu.

• ʻOku hoko fēfē ʻa e tānaki fakatahá he ʻahó ni ki hotau ngaahi uōtí, siteikí, mo e temipalé ke tau lava ai ʻo maʻu e maluʻi mo e mālohi fakalaumālié mei he ʻEikí?

• Ko e hā ha faʻahinga maluʻi kuó ke aʻusia ʻi hoʻo tānaki fakataha mo e Kāingalotu kehé?

ʻOku ui ʻe he ʻEikí mo tokoniʻi ʻEne kau tamaioʻeikí ke tānaki ʻa ʻIsileli.

Toe vakai ki he fakatātā ʻo e motuʻa moa ʻokú ne tānaki fakataha hono ʻuhikí ʻi hono lalo kapakaú. Fakaʻaliʻali e moʻoni ko ʻení: Kuo ui kitautolu ʻe he ʻEikí pea te ne tokoniʻi kitautolu ke tānaki ʻa ʻIsileli.

Fakaafeʻi e kau akó ke nau lau e Tokāteline mo e Ngaahi Fuakava 29:4–7 mo e 84:86–88, ʻo fekumi ki ha ngaahi founga ʻe tokoniʻi ai kitautolu ʻe he ʻEikí ʻi heʻetau tokoni ki hono tānaki ʻo ʻIsilelí. Tuku ke vahevahe ʻe he kau akó e meʻa ʻoku nau maʻú.

Ki ha sīpinga ʻo e founga ʻe tokoniʻi ai kitautolu ʻe he ʻEikí ke tānaki ʻa ʻIsilelí, fakaafeʻi e kau akó ke fakamanatu pe lau fakataha e talanoa ʻo e ngāue fakafaifekau ʻa Hiipa C. Kimipolo ki ʻIngilaní ʻa ia ʻoku maʻu ʻi he konga 2 ʻo e naunau teuteú. ʻE lava ke fakahoko ʻeni ʻi ha ngaahi kulupu iiki. Fakaafeʻi e kulupu takitaha (pe ko e kalasí) ke aleaʻi fakataha e ngaahi fehuʻi ko ʻení hili hono toe vakaiʻi e talanoa ʻa ʻEletā Kimipoló:

• Ko e hā ʻe lava ke u ako mei he aʻusia ʻa Hiipa C. Kimipoló te ne lava ʻo ʻomi ha loto-falala lahi ange kiate au ke tokoni ki hono tānaki ʻo ʻIsilelí ʻo fakafou ʻi hono vahevahe ʻo e ongoongoleleí mo e niʻihi kehé?

• Ko e fē ha taimi kuó u ongoʻi ai e tokoni ʻa e ʻEikí ʻi hono talaki ʻo e ongoongoleleí?

• Ko e hā te u lava ʻo fai ke fakaʻaongaʻi ʻeku tuí mo vahevahe e ongoongoleleí mo e niʻihi kehé?

Fakaʻaliʻali e fakamatala ko ʻeni ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi e kau akó ke nau lau e fakamatalá pea vahevahe e founga kuo nau vahevahe ai e pōpoaki ʻo e ongoongoleleí mo e niʻihi kehé ʻi ha ngaahi founga ʻaonga kae fakanatula.

ʻEletā Tieta F. ʻUkitofa

Tatau ai pē pe ko e fē ha feituʻu ʻokú ke ʻi ai ʻi he māmaní, ʻoku lahi e ngaahi faingamālie ke vahevahe ai e ongoongo fakafiefia ʻo e ongoongolelei ʻo Sīsū Kalaisí ki he kakai te ke fetaulaki, ako, nofo fakataha pe ngāue mo feohi fakataha mo iá. … ʻOku lahi ha ngaahi founga angamaheni mo fakanatula ke fakahoko ai ʻení. (Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Ensign pe Liahona, Mē 2019, 15, 17)

Te tau lava ʻo kau ki he ngāue fakaofo ʻo hono tānaki ʻo ʻIsilelí.

Fakaʻaliʻali ʻa e lea ko ʻeni naʻe fai ʻe Palesiteni Nalesoní, pea kole ki ha tokotaha ako ke ne lau leʻolahi ia:

Palesiteni Lāsolo M. Nalesoni

Ko e taimi kotoa pē ʻokú ke fai ai ha faʻahinga meʻa pē ke tokoni ki ha faʻahinga taha pē—ʻi ha faʻahinga tafaʻaki pē ʻo e veilí—ke ne laka ki muʻa ʻi hono fakahoko e ngaahi fuakava mo e ʻOtuá mo maʻu honau ngaahi ouau mahuʻinga ʻo e papitasó mo e temipalé, ʻokú ke tokoni ai ke tānaki fakataha ʻa ʻIsileli. (Russell M. Nelson, “ʻAmanakiʻanga ʻo ʻIsilelí,” 15; mataʻitohi fakahihifí ʻi he tatau moʻoní)

• Fakatatau ki he ngaahi akonaki ʻa Palesiteni Nalesoní, ko e hā mo ha toe meʻa te tau lava ʻo fai ke tokoni ki he ʻEikí ke tānaki ʻa ʻIsilelí? (Tokoniʻi e kau akó ke nau maʻu ha moʻoni faitatau mo ʻení: ʻOku tau tānaki ʻa ʻIsileli ʻi heʻetau tokoniʻi e fānau ʻa e ʻOtuá ke laka ki muʻa ʻi hono fakahoko mo tauhi e ngaahi fuakava mo Iá.)

Fakatokangaʻi ange: ʻE lava ke toe aleaʻi lahi ange ʻe he kau akó hono tānaki fakataha ʻo ʻIsilelí ʻo fakafou ʻi he hisitōlia fakafāmilí mo e ngāue fakatemipalé ʻi he lēsoni 19, “Ko Hono Huhuʻi ʻo e Kau Pekiá.”

Fakaafeʻi e kau akó ke nau kumi ha ngaahi founga pau te nau lava ai ʻo tokoni ke tānaki ʻa ʻIsileli. Hiki ʻenau talí ʻi he palakipoé. Mahalo te ke fie kole ki he kau akó ke vahevahe ʻenau ngaahi aʻusia felāveʻi mo e ʻū meʻa ʻoku ʻi he lisí.

Tuku ha taimi maʻá e kau akó ke nau fakalaulauloto ki he fehuʻi ko ʻeni ʻoku maʻu ʻi he konga 2 ʻo e naunau teuteú pea mo tohi ha taumuʻa ʻoku nau ongoʻi te nau lava ʻo aʻusia. Mahalo te nau fie faʻu ha palani ke ngāueʻi ʻenau ngaahi taumuʻá mo ha kaungāmeʻa pe kulupu ʻi he kalasí. Mahalo te ke fie kole pe ʻe loto-fiemālie nai ha kau ako ke lipooti ʻenau aʻusiá lolotonga ha fealeaʻaki ʻi he kahaʻú.

• Ko e hā te ke fai ʻi he ngaahi ʻaho mo e uike ka hokó ke ke kau longomoʻui ange ki hono tānaki ʻo ʻIsilelí?

Fakaʻosi ʻaki haʻo vahevahe hoʻo fakamoʻoní ʻoku tānaki ʻe he ʻEikí ʻa ʻIsileli ʻi he ngaahi ʻaho kimui ní. Fakapapauʻi ange ki he kau akó ʻa e maluʻi mo e mālohi ʻe foaki kiate kinautolu ʻe he ʻOtuá ʻi heʻenau tānaki fakataha mo e Kāingalotu kehé pea ʻi heʻenau tokoni ke tānaki ʻa ʻIsilelí.

Ki he Kalasi Hokó

Fakamatalaʻi ange ʻoku felāveʻi ʻaupito hono tānaki ʻo ʻIsilelí mo e ngāue ʻa e ʻEikí ʻi hono fokotuʻu ʻo Saione ʻi he māmaní ke teuteu ki Heʻene Hāʻele ʻAnga Ua Maí. Fakaafeʻi e kau akó ke nau ako e naunau teuteu ki he kalasi hokó pea nau haʻu mateuteu ke aleaʻi pe ko e hā ʻa e Saione mo e ngaahi tāpuaki ʻoku maʻu mei he tokoni ki hono fokotuʻu ʻo Saione ʻi honau ngaahi ʻapí mo e siteikí.