Lēsoni 22 Naunau ʻa e Faiakó

Mali Tokolahí

Ko e mali ʻi he vahaʻa ʻo ha tangata ʻe taha mo ha fefine ʻe tahá, ko e fono ia ʻa e ʻEikí tukukehe kapau te Ne toe fai mai ha fekau kehe (vakai, Sēkope 2:27–30). Naʻe fekauʻi ʻe he ʻEikí ʻi he fakahā ʻa e Palōfita ko Siosefa Sāmitá, ke moʻui ʻaki e tefitoʻi moʻoni ʻo e mali tokolahí pea akoʻi ia ki ha niʻihi ʻo e fuofua kāingalotu ʻo e Siasí. Naʻe hokohoko atu e mali tokolahí ʻi he Siasí kae ʻoua kuo fekau ʻe he ʻEikí ʻi he fakahā ke fakangata ʻe he Kāingalotú hono fakahoko iá (vakai, Fanongonongo Fakamafaiʻi 1). ʻOku fakataumuʻa ʻa e lēsoni ko ʻení ke fakamālohia e fakapapau ʻa e kau akó naʻe ngāue ʻa Siosefa Sāmita mo e fuofua kāingalotu ʻo e Siasí ʻi he fakahinohino ʻa e ʻEikí, ʻi heʻenau fakahoko e mali tokolahí. Te ne tokoniʻi foki e kau akó ke nau falala lahi ange ki he ʻEikí ʻi heʻenau fekumi ke talangofua ki Hono finangaló mo maʻu e tali ki heʻenau ngaahi fehuʻí.

Ngaahi Fokotuʻu ki hono Akoʻí

Naʻe fakahā mai ʻe he ʻEikí ʻa hono fakahoko ʻo e mali tokolahí.

Fakaʻaliʻali ʻa e lea ko ʻeni naʻe fai ʻe Palesiteni Lāsolo M. Nalesoní:

Palesiteni Lāsolo M. Nalesoni

Kuo kole maʻu mai pē ʻe he ʻOtuá ki Heʻene fānau ʻo e fuakavá ke nau fai e ngaahi meʻa faingataʻá. (Russell M. Nelson, “Tuʻu ko ha Kau Nofotuʻi Moʻoni,” Liahona, ʻOkatopa 2016, 31)

• Ko e hā ha “ngaahi meʻa faingataʻa” ʻe niʻihi kuo kole ʻe he ʻOtuá ke fai ʻe he kāingalotu ʻo e Siasí ʻi hotau kuongá? (ʻE lava ke ke lisi ʻeni ʻi he palakipoé. Fakaafeʻi e kau akó ke nau fakakaukau ki heʻenau talangofua fakafoʻituitui ki he ngaahi fekau ko ʻení lolotonga e lēsoní.)

• Ko e hā ʻokú ke pehē ʻoku kole ai ʻe he ʻOtuá ki Heʻene fānau ʻo e fuakavá ke nau fai e ngaahi meʻa ko ʻení?

Fakamahinoʻi ange ko e taha ʻo e ngaahi tuʻutuʻuni faingataʻa taha mei he ʻOtuá ki ha tokolahi ʻo e fuofua Kau Māʻoniʻoni ʻi he Ngaahi ʻAho Kimui Ní, ko ʻenau moʻui ʻaki e tefitoʻi moʻoni ʻo e mali tokolahí. Fakamanatu ange ki he kau akó ne talu mei he kamataʻangá pē ʻi he 1831, ʻa e lotu ʻa Siosefa Sāmita ke mahino e ʻuhinga naʻe fakahoko ai ʻe ha niʻihi ʻo e kau palōfita fakakuongamuʻá mo e ngaahi tuʻi ʻo ʻIsilelí e mali tokolahí (vakai ki he ʻuluʻi vahé mo e veesi 1 ʻo e Tokāteline mo e Ngaahi Fuakava 132).

Fakaafeʻi ha tokotaha ako ke ne lau leʻolahi ʻa e Tokāteline mo e Ngaahi Fuakava 132:34–37. Kole ki he kalasí ke nau muimui ki ai, ʻo fekumi ki he tali ʻa e ʻEikí ki he fehuʻi ʻa e Palōfitá.

• Fakaʻaliʻali ʻa e fehuʻi ko ʻení: Ko e hā naʻe mali ai ʻa ʻĒpalahame mo Hekaʻā ko ha mali tokolahí?

• Fakatatau ki he veesi 36–37, ko e hā ha tefitoʻi moʻoni naʻe akoʻi ʻe he ʻEikí kia Siosefa Sāmita fekauʻaki mo e talangofua ki Heʻene ngaahi fekaú? (Hili e tali ʻa e kau akó, tohi e moʻoni ko ʻení ʻi he palakipoé: ʻI he taimi ʻoku tau loto-fiemālie ai ke talangofua ki ha meʻa pē kuo fekauʻi ʻe he ʻEikí, ʻoku “lau ia kiate [kitautolu] ko e māʻoniʻoni.”)

• Ko e hā ha founga ʻe lava ke fakafehoanaki ai e fekau ʻa e ʻEikí kia ʻĒpalahame ke feilaulauʻi ʻa ʻAisaké, pea mo ʻEne fekau kia Siosefa Sāmita mo e fuofua Kāingalotú ke nau fakahoko e mali tokolahí?

Fakamatalaʻi ange ne hili ha vahaʻataimi mei hono fakahā ʻe he ʻEikí e tefitoʻi moʻoni ʻo e mali tokolahí kia Siosefa Sāmitá, naʻá Ne fekau ki he Palōfitá ke ne moʻui ʻaki e tefitoʻi moʻoní pea akoʻi ia ki he niʻihi kehé.

Fakaʻaliʻali ange ʻa e fakamatala ko ʻení, pea fakaafeʻi ha tokotaha ako ke ne lau leʻolahi ia:

Fakatatau ki he lau ʻa Hēleni Mā Kimipoló, ne pehē ʻe Siosefa Sāmita ko “hono fakahoko ʻo e tefitoʻi moʻoni ko ʻení ʻa e ʻahiʻahi faingataʻa taha ke siviʻi ai e tui ʻa e Kāingalotú.” Naʻá ne fakamoʻoni neongo ko e taha ia ʻo e ʻahiʻahi “faingataʻa taha” ʻi heʻene moʻuí, ka naʻe toe hoko foki ia ko e “taha ʻo e ngaahi tāpuaki maʻongoʻonga tahá.” (“Plural Marriage in Kirtland and Nauvoo,” Gospel Topics, topics.ChurchofJesusChrist.org)

• Ko e hā e ngaahi ongo ʻa Siosefa Sāmita fekauʻaki mo hono fakahoko ʻo e mali tokolahí ʻi he taimi ne fuofua fakafeʻiloaki ai iá? (Kapau ʻe fie maʻu, tuku ke toe vakaiʻi ʻe he kau akó e fakamatala ʻa Sisitā ʻIlisa R. Sinou ʻi he konga 2 ʻo e naunau teuteú.)

Kole ki he kau mēmipa ʻo e kalasí ke nau fakakaukau ki he ongo sīpinga ʻa ʻĒpalahame mo Siosefa Sāmitá.

• Ko e hā ʻoku fakahaaʻi mai ʻe he loto-fiemālie ʻa e fuofua Kāingalotú ke talangofua ki he ngaahi fekau faingataʻá, fekauʻaki mo honau ʻulungāngá mo ʻenau tuí?

Fakamatalaʻi ange naʻe tuku mai ʻe he fuofua Kāingalotú ha ngaahi fakamatala ʻo e fefaʻuhi fakaeloto naʻa nau aʻusia ʻi hono fakafeʻiloaki ange ʻo e mali tokolahí kiate kinautolú. Fakaafeʻi e kau akó ke vahevahe e meʻa ʻoku nau manatuʻi mei he ngaahi fakamatala naʻa nau ako ʻi he konga 3 ʻo e naunau teuteú.

Fakaʻaliʻali e fakamatala ko ʻeni meia Fīpē Utalafi ko e uaifi ʻo Palesiteni Uilifooti Utalafí. Fakaafeʻi ha tokotaha ako ke ne lau leʻolahi ia:

ʻI hono fuofua akoʻi ʻo e tefitoʻi moʻoni ʻo e mali tokolahí, naʻá ku fakakaukau ko e meʻa kovi taha ia kuó u fanongo ki aí. … Ka neongo ia, ʻi he taimi ne fakalotoa ai au naʻe tupu ia mei ha fakahā mei he ʻOtuá ʻo fakafou ʻia Siosefá, pea ʻi heʻeku ʻilo ia ko ha palōfitá, ne u fefaʻuhi mo ʻeku Tamai Hēvaní ʻi ha lotu faivelenga, ke tataki totonu au ʻi he taimi mahuʻinga taha ko ia ʻeku moʻuí. Naʻe hoko mai ʻa e talí. Naʻe nonga ʻeku fakakaukaú. Naʻá ku ʻiloʻi ko e finangalo ia ʻo e ʻOtuá. (Phebe Woodruff, ʻi he Edward Tullidge, The Women of Mormondom [1877], 413)

• ʻE tokoni fēfē e sīpinga ʻa Fīpeé ki ha taha he ʻahó ni ʻe ala fefaʻuhi mo e talangofua ki ha fekau mei he ʻOtuá? ʻE tokoniʻi fēfē ʻe heʻene sīpingá ha taha ʻoku ʻi ai haʻane ngaahi fehuʻi fekauʻaki mo hono fakahoko ʻo e mali tokolahí ʻi he lotolotonga ʻo e fuofua Kāingalotú?

Fakaafeʻi ha tokotaha ako ke ne lau leʻolahi e Lea Fakatātā 3:5–6, pea kole ki he kalasí ke nau muimui ki ai ʻo kumi ha tefitoʻi moʻoni ʻe ala felāveʻi mo e ngaahi aʻusia ʻa e fuofua Kāingalotu ko ʻení.

• Ko e hā ha ngaahi tefitoʻi moʻoni te tau lava ʻo ako mei he potufolofola ko ʻení mo e aʻusia ʻa e fuofua Kāingalotú? (Fakaʻaongaʻi e fakalea ʻa e kau akó, ʻo tohi ʻi he palakipoé (pe fakaʻaliʻali) ha tefitoʻi moʻoni ʻoku faitatau mo ʻení: Kapau te tau falala ki he ʻEikí ʻaki hotau lotó kotoa pea ʻikai falala ki heʻetau ʻiló, te Ne fakahinohino ʻetau moʻuí.)

ʻEke ki he kau akó ʻa e fehuʻi ko ʻení:

• ʻOkú ke pehē ko e hā hono ʻuhinga ki ha taha ʻokú ne hohaʻa ki hono fuofua fakahoko ʻo e mali tokolahí, ke falala ki he ʻEikí ʻaki hono lotó kotoa pea ʻikai fakafalala pē ki heʻene mahinó?

Fakamatalaʻi ange ʻoku ʻikai hāhāmolofia ia ki he kāingalotu ʻo e Siasí ke ʻi ai haʻanau ngaahi fehuʻi pe hohaʻa fekauʻaki mo e mali tokolahí. Kuo teʻeki ai fakahā ʻe he ʻOtuá pea ʻikai fie maʻu ʻEne fānaú he ʻahó ni ke mahino e ngaahi fakaikiiki ʻo e mali tokolahí. Ka neongo ia, ʻoku talaʻofa ki he Kāingalotu kotoa pē te nau lava ʻo maʻu ha fakamoʻoni ko Siosefa Sāmitá ko ha palōfita ia ʻa e ʻOtuá naʻá ne maʻu e ngaahi fekaú mo e fakahaá meiate Ia pea naʻe moʻui faivelenga ʻa Siosefa ʻo fakatatau mo e ngaahi fekau ʻa e ʻEikí.

FAKATUPULAKI ʻETAU FOUNGA AKOʻÍ MO E AKÓ

Te ke lava ʻo tokoni ki he kau akó ke tali e ngaahi fehuʻi faingataʻá. ʻE ala tokoni hono ʻoange ha fakamatala totonu ki he kau akó mo tokoniʻi ke nau ʻiloʻi ʻa e ngaahi maʻuʻanga tokoni falalaʻangá ke nau fakakaukau mo fakamatalaʻi ai e ngaahi kaveinga faingataʻá ʻi ha founga totonu. Kapau ʻoku fie ako lahi ange e kau akó ki hono fakahoko ʻo e mali tokolahí ʻi he kamataʻanga ʻo e hisitōlia ʻo e Siasí, fakaafeʻi ke nau ako ʻi he faʻa lotu e ngaahi maʻuʻanga tokoni kehe ʻoku lisi ʻi he konga “Ako Lahi Ange?” ʻo e naunau teuteú.

Fakaafeʻi e kau akó ke nau fakakaukau ki he ngaahi taimi ʻi heʻenau moʻuí kuo nau falala ai ki he ʻEikí pea talangofua ki ha fekau faingataʻa—pe ko e taimi naʻe pau ai ke “ʻoua naʻa [nau] falala ki [honau] potó” ʻi heʻenau fekumi e tali ki he ngaahi fehuʻi faingataʻá. Te ke ala kole ki ha niʻihi ʻo e kau akó ke vahevahe ʻenau ngaahi aʻusiá. Fehuʻi ange pe naʻe founga fēfē hono tataki ʻe he ʻEikí honau ngaahi ʻalungá.

Fakakaukau ke tuku ha taimi ki he kau akó ke nau fakakaukau ki he ngaahi fehuʻi fakalotu pe fakataautaha ʻoku nau maʻú. Kole ke nau fakalaulauloto ki he meʻa te nau lava ʻo fai ke maʻu e talí pe fakapapau fekauʻaki mo e ngaahi fehuʻi ko ʻení, ke falala ki he ʻEikí, pea ke fakafalala kiate Iá. Mahalo naʻa nau hiki foki ʻenau ngaahi fakakaukaú ʻi ha tohinoa pe lotua e tokoni ʻa e ʻEikí ke ʻiloʻi e founga ke nau ngāue ai ʻi he tuí.

Naʻe fakahā mai ʻe he ʻEikí ha niʻihi ʻo e ngaahi ʻuhinga ki hono fakahoko ʻo e mali tokolahí.

Fakamatalaʻi ange ʻoku ʻikai ke mahino kiate kitautolu e ngaahi taumuʻa kotoa ʻa e ʻOtuá ki hono fakafeʻiloaki mai e mali tokolahí ʻi he kuonga fakakosipeli ko ʻení, ka kuó Ne ʻomi kiate kitautolu ha niʻihi ʻo ʻEne ngaahi ʻuhingá. Hangē ko ʻení, naʻe akoʻi ʻe he ʻEikí e Palōfita ko Siosefa Sāmitá ko hono fakahoko iá ko ha konga ia ʻo hono toe fakafoki mai ʻo e “ngaahi meʻa kotoa pē” mei he ngaahi kuonga fakakosipeli ʻi muʻá (vakai, Tokāteline mo e Ngaahi Fuakava 132:40, 45).

Fakaafeʻi ha tokotaha ako ke ne lau leʻolahi e Sēkope 2:30, pea kole ki he kalasí ke nau fekumi ki ha ʻuhinga ʻe taha kuo ʻomi ʻe he ʻEikí ki hono fekauʻi Hono kakaí ke nau fakahoko e mali tokolahí. Fakaafeʻi e kau akó ke nau lipooti e meʻa ʻoku nau ʻiló. (ʻOku totonu ke fakakau ʻe he kau akó ʻi heʻenau talí ko e fekaú naʻe ʻomi ia ko ha founga ke fakatupulaki e tokolahi ʻo e fānau ke fanauʻi ʻi he fuakava ʻo e ongoongoleleí. ʻI he foungá ni, ʻoku hanga ai ʻe he kakai ʻa e ʻEikí ʻo “fakatupu ha hako” kiate Ia.)

Fakamahino ange ko e ngaahi feinga ʻa e fuofua Kāingalotú ke talangofua ki he fekau ko ʻení “[naʻe] iku ia ki hono fāʻeleʻi ʻo e fānau tokolahi ʻi he ngaahi ʻapi faivelenga ʻo e Kau Māʻoniʻoni ʻi he Ngaahi ʻAho Kimui Ní” (“Plural Marriage and Families in Early Utah,” Gospel Topics, topics.ChurchofJesusChrist.org).

Naʻe fakahā kimui ange ʻe he ʻEikí ʻoku totonu ke taʻofi hono fakahoko ʻo e mali tokolahí ʻe he Kau Māʻoniʻoni ʻi he Ngaahi ʻAho Kimui Ní.

Fakaafeʻi ha tokotaha ako naʻá ne ako e naunau teuteú (konga 2) ke ne fakamanatu e meʻa naʻe iku ai ki hono fakangata ʻo e mali tokolahí ʻi he Siasi kuo toe fakafoki maí.

• Ko e hā ha founga te ke lava ai ʻo fakamatalaʻi e tuʻunga lolotonga ʻa e Siasí ki he mali tokolahí ki ha taha?

Fakaafeʻi ha kau ako ʻe niʻihi ke nau taufetongi ʻi hono lau leʻolahi e palakalafi ʻuluakí ki he palakalafi fitu ʻo e “Ko e Ngaahi Meʻa Naʻe Toʻo mei he Ngaahi Malanga ʻe Tolu ʻa Palesiteni Uilifooti Utalafi ʻo kau ki he Fanongonongo Fakamafaiʻí,” ʻa ia ʻoku hoko atu ʻi he Fanongonongo Fakamafaiʻi 1.

• Ko e hā naʻe akoʻi ʻe Palesiteni Utalafi ki he Kāingalotú? (ʻOku totonu ke ʻilo ʻe he kau akó ha tokāteline tatau mo ʻení: He ʻikai ke teitei fakangofua ʻe he ʻEikí ha Palesiteni ʻo e Siasí ke ne takihalaʻi e Siasí.)

• ʻE uesia fēfē ʻe he moʻoni ko ʻení e founga ʻoku tau tali fakataautaha ai e faleʻi mo e ngaahi akonaki ʻa e palōfita moʻui ʻa e ʻEikí?

Fakaʻosi ʻaki haʻo vahevahe hoʻo fakamoʻoni ko e Palōfita ko Siosefa Sāmitá mo e kau fuofua taki ʻo e Siasí ko ha kau palōfita moʻoni kinautolu ʻa e ʻOtuá naʻa nau muimui ʻi he talangofua pea akonaki ʻaki e ngaahi fekau ʻa e ʻEikí ki he Kau Māʻoniʻoni ʻi he Ngaahi ʻAho Kimui Ní.

Ki he Kalasi Hokó

Fakamatalaʻi ange ki he kau akó ʻi heʻenau ako ki he kalasi hokó, te nau maʻu e faingamālie ke ako fekauʻaki mo e ngaahi fakaikiiki kaunga ki he pekia ʻa Siosefa mo Hailame Sāmitá. Poupouʻi e kau akó ke nau haʻu mateuteu ki he kalasí ke aleaʻi ʻenau ngaahi fakakaukau ki he meʻa naʻe fakahoko ʻe Siosefa Sāmita ko ha palōfita ʻa e ʻOtuá.