፩ ታላቅ እና ድንቅ ስራ ወደ ሰዎች ልጆች ሊመጣ ነው።

፪ እነሆ፣ እኔ እግዚአብሔር ነኝ፤ ፈጣን እና ሀያል፣ ሁለት ስለት ካለው ሰይፍ ይልቅ የተሳለ፣ መገጣጠሚያን እና መቅኔን እስኪለይ ድረስ የሚሰራውን ቃሌን አድምጡ፤ ስለዚህ ቃሎቼን አድምጡ።

፫ እነሆ፣ የእርሻው ስፍራ ነጭ ሆኖ አዝመራው ዝግጁ ነው፣ ስለዚህ፣ ለነፍሱም ዘለአለማዊ ደህንነት በእግዚአብሔር መንግስት ያከማች ዘንድ መሰብሰብ የሚሻ በኃይሉ ይጨድ እናም ቀኑም እየመሸ ሳለም ይሰብስብ።

፬ አዎን፣ ማንኛውም የሚያጭድ እናም የሚሰበስብ፣ እንዲሁ በእግዚአብሔር የተጠራ ነው።

፭ ስለዚህ፣ እኔን ብትጠይቁኝ ትቀበላላችሁ፣ ካንኳኳችሁ ይከፈትላችኋል።

፮ አሁን፣ እንደጠየቃችሁት፣ እነሆ፣ እንዲህ እላችኋለሁ፣ ትእዛዛቴን ጠብቁ እናም የፅዮንን አስተሳሰብ ለማምጣት እና ለመመስረት እሹ፤

፯ ጥበብን እንጂ ሀብትን አትሹ፣ እናም እነሆ፣ የእግዚአብሔር ሚስጥራት ይገለጡላችኋል፣ እናም ባለጠጋም ትሆናላችሁ። እነሆ፣ ዘለዓለማዊ ሕይወት ያለው እርሱም ባለጠጋ ነውና።

፰ እውነት፣ እውነት፣ እላችኋለሁ፣ ላደርግላችሁ እንደምትሹ እንዲሁ ይሆንላችኋል፤ የምትሹ ከሆነም ካላችሁ፣ በዚህ ትውልድ ውስጥ ለብዙ መልካም ነገሮች መከናወን መሳሪያ ትሆናላችሁ።

፱ ለዚህ ትውልድ ከንስሀ በቀር ሌላ ምንም አትናገሩ፤ ትእዛዛቴን ጠብቁ፣ እናም ስራዬን በትእዛዛቴ መሰረት ለማምጣት እርዱ፣ እናም ትባረካላችሁ።

፲ እነሆ ስጦታ አላችሁ፣ እናም በስጦታችሁም የተነስ የተባረካችሁ ናችሁ። ይህም የተቀደሰ እና ከላይ የመጣ መሆኑን አስታውሱ—

፲፩ እናም ከጠየቅህ፣ ታላቅ እና ድንቅ የሆኑ ሚስጥራትን ታውቃለህ፤ ስለዚህም ሚስጥራትን ታውቅ ዘንድ፣ ብዙዎችንም ወደ እውነት እውቀት ታመጣ ዘንድ፣ አዎን፣ የተሳሳተ መንገዳቸውን ሁሉ እንዲተው ታሳምናቸውም ዘንድ ስጦታህን ትጠቀምበታለህ።

፲፪ በአንተ እምነት ውስጥ ካልሆኑ በስተቀር ስጦታህን ለማንም አታሳውቅ። በተቀደሱ ነገሮች አትቀልድ።

፲፫ መልካምን ካላደረግህ፣ እናም እስከ መጨረሻም በእምነት ከጸናህ ከእግዚአብሔር የስጦታዎች ሁሉ የበላይ በሆነው በእግዚአብሔር መንግስት ትድናለህ፤ ከደህንነት በላይ የሆነ ምንም ስጦታ የለምና።

፲፬ እውነት፣ እውነት፣ እልሀለሁ፣ ባደረግኸው የተባረክህ ነህ፤ ምክንያቱም እኔን ጠይቀኃል እናም በጠየቅኸው መጠን የመንፈሴን መመሪያ ተቀብለኃል። ይህ ባይሆን ኖሮ አሁን ያለህበት ስፍራ ባልደረስህ ነበር።

፲፭ እነሆ፣ እንደጠየቅኸኝ ታውቃለህ እናም አዕምሮህን አብርቻለሁ፤ እናም አሁን በእውነት መንፈስ መረዳትን እንዳገኘህ ታውቅ ዘንድ እነዚህን ነገሮች እነግርሀለሁ፤

፲፮ አዎን፣ ከእግዚአብሔር በስተቀር ማንም ሀሳብህንና የልብህን ፈቃድ እንደማያውቅ እንድታውቅ ዘንድ እነግርሀለሁ።

፲፯ እየጻፍህ ያለው ቃላት ወይም ስራ እውነት እንደሆነ—ለአንተ እንደምስክርነት እነዚህን ነገሮች እነግርሀለሁ።

፲፰ ስለዚህ ትጉህ ሁን፤ በታማኝነት፣ ለቃሉ ሲል በሚገጥመው በማንኛውም አስቸጋሪ ሁኔታ ከአገልጋዬ ከጆሴፍ ጎን ቁም።

፲፱ በስህተቱም ገስጸው፣ እናም ከእርሱም ተግሳጽን ተቀበል። ትዕግስተኛ ሁን፤ የተረጋጋህ ሁን፣ ራስህን ግዛ፣ ትዕግስት፣ እምነት፣ ተስፋ እና ልግስና ይኑርህ።

፳ እነሆ፣ አንተ ኦሊቭር ነህ፣ እናም በፈቃድህ ምክንያት ተናግሬሀለሁ፤ ስለዚህ እነዚህን ቃላት በልብህ አከማች። የእግዚአብሔርን ትእዛዝ በመጠበቅታማኝ እና ትጉህ ሁን፣ እናም በፍቅሬ እቅፍ ውስጥም አደርግሀለሁ።

፳፩ እነሆ፣ እኔ የእግዚአብሔር ልጅ ኢየሱስ ክርስቶስ ነኝ። የእኔው ወደሆኑት የመጣሁት እናም የራሴም ያልተቀበሉኝ እኔው ነኝ። እኔ በጭለማም የማበራ ብርሀን ነኝ፣ እናም ጭለማውም አይገነዘበውም።

፳፪ እውነት፣ እውነት፣ እልሀለሁ፣ ተጨማሪ ምስክርነትን ከፈለግህ፣ ስለ እነዚህ ነገሮች እውነትነት ታውቅ ዘንድ በልብህ ወደ እኔ የጮህክበትን ምሽት አስታውስ።

፳፫ ይህንን ነገር በተመለከተ ለአምሮህ ሰላምን አልተናገርኩምን? ከእግዚአብሔር ከመጣ ምስክርነት ይልቅ ምን አይነት ምስክርነት ትፈልጋለህ?

፳፬ እናም አሁን፣ እነሆ፣ ምስክርነትን ተቀብለሀል፤ ሌላ ሰው የማያውቃቸውን ነገሮች ነግሬህ ምስክርነትን አልተቀበልክምን?

፳፭ እናም፣ እነሆ፣ ከእኔም የምሻ ከሆነ ልክ እንደ አገልጋዬ ጆሴፍ ትተረጉም ዘንድ ስጦታን እሰጥሀለሁ።

፳፮ እውነት፣ እውነት፣ እልሀለሁ፣ በሰዎች ኃጢአት የተነሳ ያስቀረኋቸው አብዛኛውን ወንጌሌን የያዙ ጽሁፎች አሉ።

፳፯ እናም አሁን አዝሀለሁ፥ ለራስህ ሀብትን በሰማይ የማከማቸት ፈቃድ የሆነ መልካም ፈቃድ ካለህ፣ ከዚያም፣ በኃጢአት የተነሳ ተደብቀው የነበሩትን ቅዱሳን መጻህፍቴን በስጦታህ ወደ ብርሀን በማምጣት ትረዳለህ።

፳፰ እናም አሁን፣ እነሆ፣ ለአንተ እና ለአገልጋዬ ለጆሴፍ ይህንን አገልግሎት ወደ ብርሀን የሚያመጣውን ስጦታ ቁልፍ እሰጣችኋለሁ፤ በሁለት ወይም በሶስት ምስክር አንደበት ሁሉም ቃል ይጸናል።

፳፱ እውነት፣ እውነት፣ እልሀለሁ፣ ቃሌን እና የዚህን የወንጌል ክፍል እናም አገልግሎቴን የማይቀበሉ ከሆኑ፣ የተባረካችሁ ናችሁ፣ ምክንያቱም በእኔ ላይ ካደረጉብኝ በላይ ሊያደርጉባችሁ አይችሉምና።

፴ እናም በእኔ ላይ እንዳደረጉት እንዲሁ በእናንተ ላይ ቢያደርጉም እንኳን፣ የተባረካችሁ ናችሁ፣ ከእኔም ጋር በክብር ትኖራላችሁና።

፴፩ ነገር ግን በሚሰጠው ምስክርነት የሚጸናውን ቃሌን ካልተቃወሙ፣ የተባረኩ ናቸው፣ እና ከዚያም በስራችሁ ፍሬ ትደሰታላችሁ።

፴፪ እውነት፣ እውነት፣ እልሀለሁ፣ ልክ ለደቀመዛሙርቴ እንደተናገርሁት፣ ሁለት ወይም ሶስት ሆነው በስሜ፣ አንድን ነገር በተመለከተ፣ በሚሰበሰቡበት፣ በዚያም በመካከላቸው እሆናለሁ፣ እንዲሁም በመካከላችሁ ነኝ።

፴፫ ልጆቼ፣ መልካምን ለማድረግ አትፍሩ፣ የዘራችሁትን ያንኑ መልሳችሁ ታጭዳላችሁ፤ ስለዚህ መልካምን ከዘራችሁ ያንኑ መልካም የሆነውን እንደ ደመወዝ ታጭዳላችሁ።

፴፬ ስለዚህ፣ አትፍሩ፣ እናንት ትንሽ መንጋዎች፣ መልካምን አድርጉ፤ ምድርና ገሀነም ቢቀናጁባችሁም፣ በእኔ ዐለት ላይ ከተገነባችሁ ሊቋቋሟችሁ አይችሉምና።

፴፭ እነሆ፣ አልኮንናችሁም፤ በመንገዳችሁ ሂዱ እናም ዳግምም ኃጢአትን አትስሩ፤ ያዘዝኳችሁን ስራ በርጋታ እከናውኑ።

፴፮ ባሰባችሁት ነገር ሁሉ ወደ እኔ ተመልከቱ፤ አትጠራጠሩ፣ አትፍሩ።

፴፯ ጎኔ ላይ የተወጋሁት ቁስል፣ እናም በእጄ እና በእግሬ ላይ ያሉትን የምስማር ምልክቶች አስቧቸው፤ እናም እምነት ይኑራችሁ፣ ትእዛዛቴን ጠብቁ፣ እናም መንግስተ ሰማያትን ትወርሳላችሁ። አሜን።