1 Ականջ դրեք, ով իմ եկեղեցո՛ւ երեցներ, որ ժողովվել եք միասին, իմ անունով, այսինքն՝ Հիսուս Քրիստոսի, կենդանի Աստծո Որդու, աշխարհի Փրկչի. որովհետև դուք հավատում եք իմ անվանը և պահում եք իմ պատվիրանները:

2 Կրկին ես ասում եմ ձեզ. Ականջ դրեք ու լսեք և հնազանդվեք այն օրենքին, որը ես պիտի տամ ձեզ:

3 Քանզի, ճշմարիտ ասում եմ ես՝ քանի որ դուք ժողովվել եք միասին՝ ըստ պատվիրանի, որով պատվիրել եմ ձեզ, և համաձայնության եք եկել այս հարցի շուրջը, և հարցրել եք Հորը՝ իմ անունով, ապա դուք կստանաք:

4 Ահա, ճշմարիտ ասում եմ ձեզ, ես տալիս եմ ձեզ այս առաջին պատվիրանը, որ դուք առաջ պիտի գնաք իմ անունով, ձեզանից ամեն մեկը, բացի իմ ծառա Ջոզեֆ Սմիթ կրտսերից և Սիդնի Ռիգդոնից:

5 Եվ ես պատվիրան եմ տալիս նրանց, որ նրանք առաջ գնան, մի փոքր ժամանակով, և Հոգու զորությամբ կտրվի, թե նրանք երբ պիտի վերադառնան:

6 Եվ դուք առաջ պիտի գնաք իմ Հոգու զորությամբ, քարոզելով իմ ավետարանը, երկու-երկու, իմ անունով, բարձրացնելով ձեր ձայները, ինչպես փողի ձայնով, հայտարարելով իմ խոսքը, ինչպես Աստծո հրեշտակներ:

7 Եվ դուք առաջ պիտի գնաք, մկրտելով ջրով, ասելով. Ապաշխարե՛ք, ապաշխարե՛ք, քանզի երկնքի արքայությունը մոտ է:

8 Եվ այս տեղից դուք առաջ պիտի գնաք դեպի արևմտյան շրջանները. և որքան որ դուք գտնեք նրանց, ովքեր կընդունեն ձեզ, դուք պիտի կառուցեք իմ եկեղեցին յուրաքանչյուր շրջանում,–

9 Մինչև որ կգա ժամանակը, երբ բարձրից պիտի հայտնվի ձեզ, թե երբ պիտի Նոր Երուսաղեմ քաղաքը պատրաստվի, որ դուք կարողանաք հավաքվել, որ կարողանաք լինել իմ ժողովուրդը, և ես կլինեմ ձեր Աստվածը:

10 Եվ բացի այդ, ես ասում եմ ձեզ, որ իմ ծառա Էդվարդ Պատրիջը պետք է կանգնի այն պաշտոնում, որտեղ նշանակել եմ նրան: Եվ պիտի լինի այնպես, որ, եթե նա օրինազանցի, մեկ ուրիշը կնշանակվի նրա տեղում: Ճիշտ այդպես: Ամեն:

11 Բացի այդ, ես ասում եմ ձեզ, որ ոչ ոքի չպետք է տրվի առաջ գնալ՝ քարոզելու իմ ավետարանը կամ կառուցելու իմ եկեղեցին, մինչև որ նա չկարգվի մեկի կողմից, որն ունի իշխանություն, և եկեղեցուն հայտնի չլինի, որ նա ունի իշխանություն և կանոնավոր կերպով կարգված է եկեղեցու ղեկավարների կողմից:

12 Եվ բացի այդ, այս եկեղեցու երեցները, քահանաներն ու ուսուցիչները պետք է ուսուցանեն իմ ավետարանի սկզբունքները, որոնք Աստվածաշնչի մեջ են, և Մորմոնի Գրքի, որը պարունակում է ավետարանի լրիվությունը:

13 Եվ նրանք պիտի հետևեն ուխտերին ու եկեղեցու հանգանակներին, որ կատարեն դրանք, և այդ բաները պիտի նրանք ուսուցանեն, ինչպես որ նրանց ցույց կտրվի Հոգու կողմից:

14 Եվ Հոգին կտրվի ձեզ հավատքի աղոթքով. և եթե դուք չստանաք Հոգին, դուք չպետք է ուսուցանեք:

15 Եվ այս բոլորը դուք պիտի հետևեք որ կատարեք, ինչպես որ ես պատվիրեցի ձեր ուսուցման վերաբերյալ, մինչև որ իմ սուրբ գրքերի լրիվությունը կտրվի:

16 Եվ երբ ձեր ձայները բարձրացնեք՝ Մխիթարիչով, դուք պիտի խոսեք և մարգարեանաք, ինչպես բարի է երևում ինձ:

17 Քանզի, ահա, Մխիթարիչը գիտի բոլոր բաները և վկայում է Հոր մասին և Որդու մասին:

18 Եվ այժմ, ահա, ես ասում եմ եկեղեցուն. Մի սպանիր. Եվ ով որ սպանում է ներում չի ստանա ոչ այս աշխարհում, ոչ էլ գալիք աշխարհում:

19 Եվ բացի այդ, ես ասում եմ. Մի սպանիր. իսկ նա, ով սպանում է, պիտի մեռնի:

20 Մի գողացիր. և նա, ով գողանում է և չի կամենում ապաշխարել, դուրս պիտի գցվի:

21 Մի ստիր. նա, ով ստում է և չի կամենում ապաշխարել, դուրս պիտի գցվի:

22 Սիրիր կնոջդ քո ողջ սրտով ու հարիր նրան և ուրիշ ոչ մեկի:

23 Եվ նա, ով նայում է մի կնոջ վրա՝ ցանկանալով նրան, ուրանում է հավատքը, և չպիտի ունենա Հոգին. և եթե նա չապաշխարի, նա դուրս պիտի գցվի:

24 Շնություն մի արա. իսկ նա, ով շնություն է անում և չի ապաշխարում, դուրս պիտի գցվի:

25 Բայց նրան, ով շնություն է անում և ապաշխարում է իր ողջ սրտով, և թողնում է այն, և այլևս չի անում, դու պիտի ներես.

26 Սակայն, եթե նա անում է դա կրկին, նա չպիտի ներվի, այլ դուրս պիտի գցվի:

27 Քո մերձավորի մասին չար բան մի խոսիր, ոչ էլ որևէ վնաս հասցրու նրան:

28 Դու գիտես, որ իմ օրենքն այս բաների վերաբերյալ տրված է սուրբ գրքերում. նա, ով մեղանչում է և չի ապաշխարում, դուրս պիտի գցվի:

29 Եթե ինձ սիրում ես, ծառայիր ինձ և պահիր իմ բոլոր պատվիրանները:

30 Եվ ահա, դու պետք է հիշես աղքատներին և նվիրաբերես քո ունեցվածքից՝ նրանց աջակցելու համար, այն ինչ կարող ես բաժին հանել նրանց համար, ուխտով և վավերագրով, որը չի կարող խախտվել:

31 Եվ որքան որ դուք ձեր ստացվածքից բաժին հանեք աղքատներին, դուք դա կանեք ինձ համար. և դրանք պիտի դրվեն իմ եկեղեցու եպիսկոպոսի և նրա խորհրդականների՝ երեցներից կամ քահանայապետերից երկուսի առաջ, որոնց նա կնշանակի կամ նշանակել է, և այդ նպատակի համար ի սպաս է դրել:

32 Եվ կլինի այնպես, որ հետո, երբ դրանք դրվեն իմ եկեղեցու եպիսկոպոսի առաջ, և հետո, երբ նա ստանա իմ եկեղեցու ունեցվածքի նվիրաբերման վերաբերյալ այդ վկայագրերը, որ դրանք չեն կարող ետ վերցվել եկեղեցուց, համաձայն իմ պատվիրանների, ամեն մարդ պատասխանատու պիտի դառնա իմ առաջ, որպես տնտես, իր իսկ ունեցվածքի կամ այն բանի վրա, ինչ նա ստացել է նվիրաբերմամբ, որչափ որ բավարար է իր և ընտանիքի համար:

33 Եվ բացի այդ, այս առաջին նվիրաբերումից հետո, եթե եկեղեցու կամ նրա անհատների ձեռքում ավելի շատ ունեցվածք լինի, քան նրանց անհրաժեշտ է իրենց ապրուստի համար, մնացորդ, որը պետք է նվիրաբերվի եպիսկոպոսին, այն պիտի պահվի, որպեսզի ժամանակ առ ժամանակ տրվի նրանց, ովքեր չունեն, որ ամեն մարդ, ով կարիքի մեջ է, լիովին բավարարվի ու ստանա իր պահանջների համեմատ:

34 Ուստի, մնացորդը պիտի պահվի իմ շտեմարանում, աղքատին ու կարիքավորին սատարելու համար, ինչպես որ կնշանակվի եկեղեցու բարձրագույն խորհրդի և եպիսկոպոսի ու նրա խորհրդի կողմից.

35 Եվ հողեր գնելու նպատակով՝ եկեղեցու հանրային օգտի, և երկրպագության տներ կառուցելու, և Նոր Երուսաղեմը կառուցելու համար, որը հայտնի պիտի դարձվի հետագայում,–

36 Որ իմ ուխտյալ ժողովուրդը կարողանա հավաքվել այն օրը, երբ ես կգամ իմ տաճարը: Եվ սա ես անում եմ իմ ժողովրդի փրկության համար:

37 Եվ կլինի այնպես, որ նա, ով մեղանչում է և չի ապաշխարում, պիտի դուրս գցվի եկեղեցուց, և ետ չի ստանա այն, ինչ նա նվիրաբերել է իմ եկեղեցու աղքատների և կարիքավորների համար, կամ, այլ խոսքով, ինձ համար,–

38 Քանզի, որքան որ դուք անում եք այս փոքրերից մեկի համար, դուք այդ անում եք ինձ համար:

39 Քանզի կլինի այնպես, որ այն, ինչ ես խոսել եմ իմ մարգարեների բերանով, պիտի կատարվի. քանզի նրանց հարստությունից, ովքեր ընդունում են իմ ավետարանը հեթանոսների միջից, ես կնվիրաբերեմ իմ ժողովրդի աղքատներին, որոնք Իսրայելի տնից են:

40 Եվ բացի այդ, քո սրտում հպարտ մի եղիր. թող քո բոլոր հանդերձները լինեն պարզ, իսկ դրանց գեղեցկությունը լինի քո ձեռքերի աշխատանքի գեղեցկությունը.

41 Եվ թող բոլոր բաները մաքրությամբ կատարվեն իմ առաջ:

42 Ծույլ մի եղիր. քանզի նա, ով ծույլ է, չպետք է ուտի աշխատողի հացը, ոչ էլ հագնի նրա հանդերձները:

43 Եվ ովքեր որ ձեր մեջ հիվանդ են և բժշկվելու հավատք չունեն, բայց հավատում են, պիտի սնուցվեն մեղմությամբ, բույսերով ու թեթև սննդով, և դա ոչ թշնամու ձեռքով:

44 Եվ եկեղեցու երեցները՝ երկուսը կամ ավելին, պիտի կանչվեն, որ նրանց համար աղոթեն ու ձեռնադրեն նրանց՝ իմ անունով. և եթե մահանան, նրանք պիտի մահանան ինձ համար, իսկ եթե ապրեն, նրանք պիտի ապրեն ինձ համար:

45 Ապրեք միասին սիրով, այնպես որ սգաք նրանց կորստի համար, ովքեր մահանում են, և հատկապես նրանց համար, ովքեր չունեն փառավոր հարության հույս:

46 Եվ կլինի այնպես, որ նրանք, ովքեր մահանում են ինձանում, մահ չեն ճաշակի, քանզի այն քաղցր կլինի նրանց համար.

47 Իսկ նրանք, ովքեր ինձանում չեն մահանում, վա՜յ լինի նրանց, քանզի նրանց մահը դառն է:

48 Եվ բացի այդ, կլինի այնպես, որ նա, ով բժշկվելու հավատք ունի առ ինձ և նշանակված չէ մահվան, պիտի բժշկվի:

49 Նա, ով հավատք ունի տեսնելու, պիտի տեսնի:

50 Նա, ով հավատք ունի լսելու, պիտի լսի:

51 Կաղը, որ հավատք ունի ցատկելու, պիտի ցատկի:

52 Եվ նրանք, ովքեր այս բաներն անելու հավատքը չունեն, բայց հավատում են ինձ, զորություն ունեն դառնալու իմ որդիները. և որքան որ նրանք չեն խախտում իմ օրենքները, դու պիտի կրես նրանց տկարությունները:

53 Կանգնիր այնտեղ, որտեղ քո տնտեսությունն է:

54 Մի վերցրու եղբորդ հանդերձը. վճարի՛ր այն բանի համար, ինչ ստանում ես եղբորիցդ:

55 Եվ եթե դու ստանաս ավելին, քան անհրաժեշտ է քո ապրուստի համար, իմ շտեմարան հանձնիր այն, որ բոլոր բաներն արվեն համաձայն նրա, ինչ ես ասել եմ:

56 Խնդրիր, և իմ սուրբ գրքերը կտրվեն, ինչպես ես նշանակել եմ, և դրանք պետք է ապահովությամբ պահպանվեն.

57 Եվ նպատակահարմար է, որ դու լռես դրանց վերաբերյալ և չուսուցանես դրանք, մինչև որ դուք դրանք ամբողջությամբ ստանաք:

58 Եվ ես ձեզ տալիս եմ պատվիրան, որ այդ ժամանակ, դուք դրանք կուսուցանեք բոլոր մարդկանց. քանզի դրանք պետք է ուսուցանվեն բոլոր ազգերին, ցեղերին, լեզուներին ու ժողովուրդներին:

59 Ընդունեք այն բաները, որոնք դուք ստացել եք, որոնք տրվել են ձեզ իմ սուրբ գրքերում, որպես օրենք, որ լինի իմ եկեղեցին կառավարելու իմ օրենքը.

60 Եվ նա, ով գործում է համաձայն այս բաների, պիտի փրկվի, և նա, ով կատարում է դրանք, չպիտի նզովվի, եթե այդպես շարունակի:

61 Եթե խնդրես, դու կստանաս հայտնություն հայտնության վրա, գիտություն գիտության վրա, որ կարողանաս իմանալ խորհուրդներն ու խաղաղարար բաները,– որոնք բերում են ուրախություն, որոնք բերում են կյանք հավերժական:

62 Խնդրիր, և ինձ հարմար ժամանակ քեզ հայտնի կդարձվի, թե որտեղ պիտի կառուցվի Նոր Երուսաղեմը:

63 Եվ ահա, կլինի այնպես, որ իմ ծառաներն առաջ կուղարկվեն դեպի արևելք և դեպի արևմուտք, դեպի հյուսիս և դեպի հարավ:

64 Եվ նույնիսկ հիմա, նա, ով գնում է արևելք, թող ուսուցանի նրանց, ովքեր դարձի կգան, որ փախչեն արևմուտք, և դա՝ երկրի վրա գալիք բաների և գաղտնի խմբակցությունների հետևանքով:

65 Ահա, դու պիտի հետևես բոլոր այս բաներին, և մեծ պիտի լինի քո վարձքը. քանզի ձեզ տրված է իմանալ արքայության խորհուրդները, բայց աշխարհին տրված չէ իմանալ դրանք:

66 Հետևեք օրենքներին, որոնք դուք ստացել եք և եղեք հավատարիմ:

67 Եվ հետագայում, դուք կստանաք եկեղեցու ուխտերը, այնպիսիք, որոնք բավական կլինեն հաստատելու ձեզ՝ թե՛ այստեղ, թե՛ Նոր Երուսաղեմում:

68 Ուստի նա, ով իմաստության պակաս ունի, թող խնդրի ինձ, և ես կտամ նրան առատությամբ և չեմ նախատի:

69 Բարձրացրեք ձեր սրտերն ու ցնծացեք, քանզի արքայությունը, կամ այլ խոսքով, եկեղեցու բանալիները տրվել են ձեզ: Ճիշտ այդպես: Ամեն:

70 Քահանաներն ու ուսուցիչները պիտի ունենան իրենց տնտեսությունները, ճիշտ ինչպես անդամները:

71 Եվ երեցներն ու քահանայապետերը, որոնք նշանակված են օգնելու եպիսկոպոսին, որպես խորհրդականներ բոլոր բաներում, իրենց ընտանիքներն ապահովելու համար պետք է օգտվեն այն ունեցվածքից, որը նվիրաբերված է եպիսկոպոսին՝ աղքատների օգտի և այլ նպատակների համար, ինչպես նախկինում նշվեց.

72 Կամ էլ նրանք պետք է արդար փոխհատուցում ստանան իրենց բոլոր ծառայությունների համար, կա՛մ տնտեսության, կա՛մ այլ ձևով, ինչպես հարմար կգտնվի կամ կորոշվի խորհրդականների ու եպիսկոպոսի կողմից:

73 Եվ եպիսկոպոսը, նույնպես, աջակցություն կամ արդար փոխհատուցում պիտի ստանա եկեղեցում իր բոլոր ծառայությունների համար:

74 Ահա, ճշմարիտ ասում եմ ձեզ, որ ձեր միջից նրանք, ովքեր թողել են իրենց կողակցին պոռնկության պատճառով, կամ, այլ խոսքով, եթե նրանք վկայեն ձեր առաջ, սրտի խոնարհությամբ, որ դա այդպես է, դուք նրանց չպետք է դուրս գցեք ձեր միջից.

75 Բայց եթե դուք իմանաք, որ ինչ-որ անձինք հեռացել են իրենց կողակցից շնության համար, և նրանց կողակիցն ապրում է, և նրանք իրենք են մեղավոր, նրանք պետք է դուրս գցվեն ձեր միջից:

76 Եվ բացի այդ, ես ասում եմ ձեզ, որ դուք աչալուրջ և զգույշ պիտի լինեք, մանրամասն տեղեկանալով, որ այդպիսիներին, եթե նրանք ամուսնացած են, դուք չընդունեք ձեր մեջ.

77 Իսկ եթե ամուսնացած չեն, նրանք պիտի ապաշխարեն իրենց բոլոր մեղքերից, այլապես դուք չպետք է ընդունեք նրանց:

78 Եվ բացի այդ, ամեն ոք, ով պատկանում է Քրիստոսի այս եկեղեցուն, պիտի հետևի, որ պահի եկեղեցու բոլոր պատվիրաններն ու ուխտերը:

79 Եվ պիտի լինի այնպես, որ, եթե ձեզանից որևէ մեկը սպանություն գործի, նրան պիտի հանձնեն և նրա հետ պիտի վարվեն համաձայն երկրի օրենքների. քանզի հիշեք, որ նա ներում չունի. և դա կապացուցվի՝ համաձայն երկրի օրենքների:

80 Եվ եթե որևէ տղամարդ կամ կին շնություն անի, նա պիտի դատվի եկեղեցու երկու կամ ավելի երեցների առաջ, և ամեն մի խոսք, նրա դեմ, պիտի հաստատվի եկեղեցու երկու վկաների, բայց ոչ թշնամիների կողմից. իսկ եթե կան ավելի, քան երկու վկաներ, ավելի լավ է:

81 Բայց նա պիտի դատապարտվի երկու վկաների բերանով. և երեցները գործը պիտի դնեն եկեղեցու առաջ, և եկեղեցին պիտի ձեռք բարձրացնի նրա դեմ, որպեսզի նրա հետ վարվեն համաձայն Աստծո օրենքի:

82 Եվ եթե հնարավոր է, անհրաժեշտ է, որ եպիսկոպոսը նույնպես ներկա լինի:

83 Եվ այդպես դուք պիտի վարվեք բոլոր հարցերում, որոնք կծագեն ձեր առաջ:

84 Եվ եթե տղամարդը կամ կինը կողոպտի, նա պիտի հանձնվի երկրի օրենքին:

85 Եվ եթե նա գողություն անի, նա պիտի հանձնվի երկրի օրենքին:

86 Եվ եթե նա ստի, նա պիտի հանձնվի երկրի օրենքին:

87 Եվ եթե նա ինչ-որ ամբարշտություն գործի, նա պիտի հանձնվի օրենքին, այսինքն՝ այն, որ Աստծունն է:

88 Եվ եթե քո եղբայրը կամ քույրը մեղանչի քո դեմ, դու պիտի հանդիպես նրա հետ՝ միայն ինքը և դու. և եթե նա խոստովանի, դու պիտի հաշտվես:

89 Իսկ եթե նա չխոստովանի, դու պիտի նրան հանձնես եկեղեցուն՝ ոչ թե անդամներին, այլ երեցներին: Եվ դա պետք է արվի ժողովում և ոչ աշխարհի առաջ:

90 Եվ եթե քո եղբայրը կամ քույրը մեղանչի շատերի դեմ, նա պիտի խրատվի շատերի առաջ:

91 Եվ եթե մեկը հրապարակայնորեն մեղանչի, նա պիտի հրապարակայնորեն կշտամբվի, որպեսզի ամաչի: Եվ եթե նա չխոստովանի, նա պիտի հանձնվի Աստծո օրենքին:

92 Եթե մեկը գաղտնաբար մեղանչի, նա պիտի կշտամբվի գաղտնաբար, որ հնարավորություն ունենա գաղտնաբար խոստովանել նրան, ում ինքը վիրավորել է, և Աստծուն, որ եկեղեցին նրա մասին չխոսի հանդիմանությամբ:

93 Եվ այդպես դուք պիտի վարվեք բոլոր բաներում: