፩ የምትሰሙኝ፣ ከበረከቶች ሁሉ ታላቅ በሆነው በረከት ልባርካችሁ ደስተኛ የሆንኩት እናንት ህዝቤ ሆይ፣ አድምጡ እናም ስሙ ይላል ጌታ እና አምላካችሁ፤ እናም የማያደምጡኝን እና በከንቱ ስሜን የጠሩትን ከእርግማኖች ሁሉ ከባድ በሆነው እርግማን እረግማቸዋለሁ።

፪ እኔ የጠራኋችሁ የቤተክርስቲያኔ ሽማግሌዎች ሆይ አድምጡ፣ እነሆ በቃላቴ ላይ እንድትስማሙና ራሳችሁን እድታሰባስቡ ትእዛዝን እሰጣችኋለሁ።

፫ እናም ቤተክርስቲያኔን እንዴት ማስተዳደር እንዳለባችሁ እንድታውቁ እና ነገሮችን ሁሉ በፊቴ መልካም ታደርጉ ዘንድ በእምነታችሁ ጸሎት ህጌን ትቀበላላችሁ።

፬ እናም እኔ በምመጣበት ጊዜ የእናንተ ገዢ እሆናለሁ፤ እናም እነሆ፣ በቶሎም እመጣለሁ፣ ህጌም እንዲጠበቅ አድርጉ።

፭ ህጌን ተቀብሎ የሚያደርገው፣ እርሱ ደቀ መዛሙሬ ነው፤ እናም ተቀብየዋለሁ የሚል እና የማያደርገው፣ እርሱ ደቀ መዛሙሬ አይደለም፣ እናም ከመካከላችሁ ወጥቶ ይጣላል፤

፮ የመንግስተ ስማይ ልጆች የሆኑ ነገሮችን ወስዶ፣ ብቁ ላልሆኑ ወይም ለውሾች ሊሰጥ አይገባም፣ ወይም ዕንቁዎችም በእሪያዎች ፊት እንዳይጣሉ ዘንድ አይገባምና።

፯ እናም ዳግም፣ ለአገልጋዬ ለጆሴፍ ስሚዝ፣ ዳግማዊ፣ የሚኖርበትና የሚተረጉምበት ቤት ሊገነባለት ይገባል።

፰ እናም ዳግም፣ ትእዛዛቴን እስከጠበቀ ድረስ አገልጋዬ ሲድኒ ሪግደን መልካም እንደመሰለው ይኖር ዘንድ ይገባል።

፱ ደግሞም፣ አገልጋዬን ኤድዋርድ ፓርትሪጅን ጠርቼዋለሁ፤ በቤተክርስቲያኗ ድምጽ እንዲመረጥ እና ለቤተክርስቲያኗ ኤጲስ ቆጶስነት እንዲሾም እናም ንግዱን ትቶ ሙሉ ጊዜውን ለቤተክርስቲያኗ አገልግሎት እንዲያውል ትእዛዝን እሰጣለሁ፤

፲ ህግጋቴን በምሰጥ ጊዜ የሚሰጡትን ነገሮች ሁሉ በዚያው መሰረት እንዲያከናውንም ትእዛዝን እሰጣለሁ።

፲፩ እናም ይህም የሆነበት ምክንያት ልቡ በፊቴ ንጹህ ስለሆነ ነው፣ እሱ ለእኔ ተንኮል እንደሌለው እንደ ጥንቱ ናትናኤል ነውና።

፲፪ እነዚህ ቃላት ለእናንተ ተሰጥተዋችኋል፣ እናም በፊቴም ንጹህ ናቸው፤ ስለዚህም፣ በፍርድ ቀን በነፍስህ ስለሚመለሱ፣ እንዴት እንደምትይዛቸውም ተጠንቀቅም። እንዲህም ይሁን። አሜን።