1 Hwɛ, mese wo dɛ, ɔnam dɛ m’akowaa Martin Harris apɛ dɛ obenya dasegye wɔ me nsamu dɛ, ɔwo, m’akowaa Joseph Smith, Kakraba, enya dɛm mprɛtse no a agye ho dase dɛ enya efi mo hɔ no ntsi;

2 Na afei, hwɛ, iyi na kã kyerɛ no—nyia ɔkasaa kyerɛɛ wo no, see wo dɛ: Emi, Ewuradze, meyɛ Nyame, na medze dɛm ndzɛmba yinom ama ɔwo, m’akowaa Joseph Smith, Kakraba, na mahyɛ wo dɛ gyina yɛ dasefo wɔ dɛm ndzɛmba yinom ho;

3 Na maama enye me edzi ahyɛmu, onnyi dɛ edze iyinom kyerɛ, gyedɛ nkorɔfo a mahyɛ wo wɔ hɔn ho no nko; na innyi tum wɔ do gyedɛ medze ma wo.

4 Na enya akyɛdze a ibotum dze akyerɛ mprɛtse no ase; na iyi nye akyɛdze a odzi kan a medze ama wo; na mahyɛ wo dɛ mma mmpetuw nnkã dɛ akyɛdze biara bio kesi dɛ me tsirmpɔw no bɛhyɛ mã; na mennkɛma wo akyɛdze fofor biara bio kesi dɛ ibowie yɛ.

5 Nokwar, mese wo dɛ, mbusu bɛba nkorɔfo a wɔwɔ asaase yi do no do sɛ wɔannyɛ aso amma me nsɛm a;

6 Na iyi ekyir no, wɔbɛhyɛ wo sɔfo ma edze me nsɛm akɛma adasamba.

7 Hwɛ, sɛ wɔanngye me nsɛm enndzi a, wɔnnkɛgye ɔwo Joseph, m’akowaa so edzi, sɛ ɔba no dɛ edze dɛm ndzɛmba yinom a medze ahyɛ wo nsa nyina mpo kyerɛ hɔn a.

8 O, dɛm ekyingyefo na akɔnkyefo ebusuasantsen yi—m’ebufuhyew redzɛw hɔn do.

9 Hwɛ, nokwar mese wo dɛ, medze dɛm ndzɛmba a medze ahyɛ ɔwo, m’akowaa Joseph nsa yi esie, wɔ me nyansaa mu, na wɔbɛda no edzi akyerɛ ebusuasantsen a wɔreba no;

10 Mbom dɛm ebusuasantsen yi bodua wo do enya m’asɛm;

11 Na mo nkowaa baasa dasegye bɛka wo dasegye ho, hɔn a mebɛfrɛ hɔn na mahyɛ hɔn asɔfo no, na medze dɛm ndzɛmba yinom bɛkyerɛ hɔn no, wɔdze me nsɛm a medze edua wo do ama no bɔkɔ mbeambea.

12 Nyew, wobohu ampaara dɛ ndzɛmba yinom yɛ nokwar, osiandɛ mebɛda no edzi efi sor akyerɛ hɔn.

13 Mebɛma hɔn tum ama woeetum ahwɛ na woeehu ndzɛmba yinom dɛ mbrɛ wɔtse;

14 Na mennkɛfa dɛm tum yi ama obiara bio, ma ɔdze agye dɛm dase yi ara wɔ ebusuasantsen yi mu, aber yi mu na m’asɔr bɛhyɛ ase asoɛr efi sar no do—na n’enyim atsew dɛ bosoom, na ɔayɛ fɛw dɛ ewia, na ɔayɛ hu dɛ nsordaafo a wokitsa mfrankaa.

15 Na adasefo baasa hɔn dasegye mu na medze m’asɛm bodua do akɔ.

16 Na hwɛ, obiara a ɔgye me nsɛm dzi no, hɔn na mo Sunsum bɛda edzi abɛsera hɔn; na medze nsu na Sunsum no mpo bɔwo hɔn—

17 Na ɔwɔ dɛ hom tweɔn kakra, osiandɛ wonnyae nnhyɛɛ hom asɔfo—

18 Na hɔn dasegye no so bɔkɔ ekobu ebusuasantsen yi fɔ, sɛ wopirim hɔn akoma dze tsia hɔn a;

19 Na amamfoyɛ ntsẽa besian adasamba a wɔwɔ asaase do no mu, na wɔbɔkɔ do ehue egu hɔn do ofi ber to ber, sɛ woennu hɔnho a, ekodu dɛ asaase yi bɔtɔ pan na me mbae ne hyerɛn bɛhyew adasa a wɔwɔ asaase do na ɔasɛɛ hɔn koraa.

20 Hwɛ, mekã nsɛm yinom kyerɛ hom, dɛ mbrɛ mekãa kyerɛɛ nkorɔfo so wɔ Jerusalem ne nsɛe ho no; na m’asɛm bɛyɛ hɔ dɛm aber yi mu dɛ mbrɛ ɔyɛɛ hɔ wɔ ber a abasen kɔ no mu no.

21 Na afei mehyɛ ɔwo, m’akowaa Joseph, dɛ nu woho na nantsew tsenenee mu yie wɔ m’enyim, na mma nndzi nyimpa ndaadaa ekyir bio;

22 Na si nketse dzi mbrasɛm a medze ama wo no do; na sɛ eyɛ dɛm na woku wo mpo a, hwɛ mebɛma wo nkwa a onnyiewiei.

23 Na afei, bio, mekasa kyerɛ ɔwo, m’akowaa Joseph, dze fa nyimpa a ɔpɛ dɛ ɔyɛ dasefo no ho—

24 Hwɛ, mese wo dɛ, ɔmema noho do na ɔmmbrɛ noho adze dɛ mbrɛ ɔsɛ wɔ m’enyim; na mbom sɛ ɔbɔbɔ no mu adze wɔ m’enyim, na ofi n’akoma mu, brɛ noho adze bɔ mpaa dzendzen wɔ gyedzi mu a, mebɛma no kwan ma ɔahwɛ ndzɛmba a ɔpɛ dɛ ohu no.

25 Na ɔbɛkasa akyerɛ dɔm a wɔwɔ ebusuasantsen yi mu dɛ: Hwɛ, meehu ndzɛmba a Ewuradze dze akyerɛ Joseph Smith, Kakraba, no na minyim ampaara dɛ ɔyɛ nokwar, osiandɛ meehu, na ɔnam Nyame no tum do na ɔdze kyerɛɛ me na nnyɛ nyimpa dze.

26 Na emi Ewuradze mehyɛ ɔno m’akowaa Martin Harris dɛ, mma ɔnnkã biribiara a ɔfa ndzɛmba no ho bio nnkyerɛ hɔn, gyedɛ ɔkã dɛ: Meehu, na ɔnam Nyame no tum do na ɔdze kyerɛɛ me; na iyi nye nsɛm a ɔnkã.

27 Na sɛ ɔpow iyi a, ɔbɔtõ ahyɛmu a ɔnye me edzi no dada no, na hwɛ, woebu no fɔ.

28 Na afei, gyedɛ ɔbrɛ noho adze na ɔgye ndzɛmba a ɔayɛ a omuo no to mu ma muhu, nye ahyɛmu a ɔnye me edzi dɛ obedzi me mbrasɛm do, na oenya gyedzi wɔ mo mu, hwɛ, mese no dɛ, onnkohu dɛm ndzɛmba yi, osiandɛ mennkɛma oehu ndzɛmba no a maakã ho asɛm no.

29 Na sɛ dɛm na ɔtse a, nna mehyɛ wo, m’akowaa Joseph, dɛ kã kyerɛ no dɛ, mma ɔnnyɛ bio, eso mma ɔnnhaw me bio wɔ dɛm asɛm yi ho.

30 Na sɛ dɛm na ɔtse a, hwɛ, mese ɔwo Joseph dɛ, sɛ ekyerɛ nkrataafa kakra ase a, gyaa mber kakra, kesi dɛ mebɛhyɛ wo dɛ sɔw do bio; ansaana asɔw do akyerɛ ase bio.

31 Na gyedɛ eyɛ iyi, hwɛ, innkenya akyɛdze biara bio, na mebɛgye ndzɛmba a medze ahyɛ wo nsa no efi wo nkyɛn.

32 Na afei, ɔnam dɛ meehu dada dɛ wɔatsɛw rotweɔn asɛɛ wo ntsi, nyew, mehu dada dɛ sɛ m’akowaa Martin Harris ammbrɛ noho adze amma oennya me nsamu dasegye a, ɔbɔhwe ase wɔ mbrato mu;

33 Na dodowara wɔ hɔ a wɔatsɛw rotweɔn asɛɛ wo efi asaase enyi; na osian iyi ntsi na maama wo dɛm mbrasɛm yinom, ama wo nda aawar.

34 Nyew, na osian iyi ntsi na makã dɛ: Gyaa, na gyina dzinn kesi dɛ mebɛhyɛ wo, na mebɛkyerɛ wo kwan a ebɛfa do etum dze ayɛ dza mahyɛ wo dɛ yɛ no.

35 Na sɛ idzi nokwar wɔ me mbrasɛm mu a, wɔbɛma wo do wɔ da a odzi ewiei no mu. Amen.