1 Asɔfodzi ahorow ebien na ɔwɔ asɔr no mu, ɔno nye Melchizedek na Aaron dze a Levitical Asɔfodzi kã ho bi.

2 Siantsir a dza odzi kan no wɔfrɛ no Melchizedek Asɔfodzi no nye dɛ Melchizedek no nna ɔyɛ sɔfopanyin kɛse bi.

3 Ansaana wɔrobɔwo no no, nna dzin a wɔdze frɛ no nye Asɔfodzi Krɔnkrɔn a ɔwɔ Nyankopɔn ne Ba no ne Nhyehyɛɛ do.

4 Mbom ɔnam dɛ wɔpɛ dɛ wodzi Nyame Tumfo no ne dzin nyi anaa wobu no ntsi, aama woekwetsir dɛ nkorɔfo bɔbobɔ ne dzin basabasa ntsi, tsetseberdo asɔr no dze Melchizedek ne dzin too dɛm asɔfodzi no, anaa wɔfrɛɛ no Melchizedek Asɔfodzi.

5 Tumdzi nye dzibewdzi biara a ɔwɔ asɔr no mu no fam dɛm asɔfodzi yi ho.

6 Mbom asɔfodzi no wɔ mu nkyɛmu ebien anaadɛ etsitsir ebien—kor nye Melchizedek Asɔfodzi na kor so nye Aaron Asɔfodzi anaadɛ Levitical Asɔfodzi.

7 Elder dzibew hyɛ Melchizedek Asɔfodzi ase.

8 Melchizedek Asɔfodzi no wɔ tum dɛ ɔyɛ asɔr no ne president na n’apamfo no, na ɔwɔ tum na tumdzi dɛ ɔhwɛ asɔr no mu dzibewdzi nyina do wɔ mber biara mu wɔ wiadze yi mu, na ɔyɛ sunsum mu ndzɛmba so.

9 Asɔfodzi a Ɔkrɔn no ne President na n’Apamfo no a ɔwɔ Melchizedek nhyehyɛɛ mu no, no wɔ kwan dɛ wodzi dwuma wɔ asɔr no mu dzibew nyina hyɛ hɔn nsa.

10 Asɔfompanyin a wɔwɔ Melchizedek Asɔfodzi nhyehyɛɛ do no mu no hɔn gyinabew ma hɔn kwan ma wodzi dwuma biara a asɔr no mu president na n’apamfo no bɛkyerɛ, dza ɔfa sunsum mu ndzɛmba ho, na wotum so yɛ elder, ɔsɔfo (a ɔyɛ Levitical nhyehyɛɛ no), kyerɛkyerɛnyi, deacon nye asɔrba biara so ne dzibew mu.

11 Elder wɔ ho kwan dɛ sɛ sɔfopanyin no nnyi hɔ a ogyina n’ananmu dzi dwuma.

12 Ɔsɔfopanyin na elder na ɔwɔ dɛ wɔyɛ sunsum mu ndzɛmba ho dwuma, dza asɔr no n’ahyɛmudzi na mbrasɛm ma ho kwan no; sɛ banodzifo a hɔn dzibew krɔn sen hɔn no mu biara nnyi hɔ a, wɔwɔ ho kwan dɛ wodzi dwuma biara.

13 Asɔfodzi a otsĩa ebien no wɔfrɛ no Aaron Asɔfodzi, osiandɛ wɔdze maa Aaron nye n’asefo wɔ hɔn ebusuasantsen nyina.

14 Siantsir a wɔfrɛ no asɔfodzi kuma no nye dɛ, ɔfam dza ɔkrɔn no anaadɛ Melchizedek Asɔfodzi no ho, na wɔwɔ tum dɛ wɔyɛ enyido ayɛdze no.

15 Bishop na n’apamfo no nye asɔfodzi yi ne, president na n’apamfo na wokura dɛm asɔfodzi yi ho nsaafee anaadɛ tumdzi.

16 Obiara nnyi mbra mu kwan wɔ dzibew yi ho dɛ obokura asɔfodzi yi ho nsaafee, gyedɛ ɔyɛ Aaron n’asenyi ankasa.

17 Mbom dɛ ma Melchizedek Asɔfodzi mu sɔfopanyin wɔ tum dɛ odzi dwuma a ɔwɔ asɔfodzi kuma no mu nyina, sɛ Aaron n’asenyi ankasa nnyi hɔ a, otum yɛ edwuma wɔ bishop dzibew mu, sɛ, wɔafrɛ no na woeyi no esi hɔ na Melchizedek Asɔfodzi no president na n’apamfo no dze nsa egu no do dze dɛm asɔfodzi tum yi ama no a.

18 Tum na tumdzi a asɔfodzi a ɔkrɔn no, anaadɛ Melchizedek Asɔfodzi no wɔ nye dɛ obokura asɔr no mu sunsum mu nhyira nyina ne nsaafee—

19 Dɛ wobɛnya ndzinoa dze ehu sor ahenman no mu esumasɛm, wobue sor ma hɔn, wotum nye ɔdodow nhyiamu mba nye Abakamba no n’asɔrmba kasa, na ɔma wotum ba Nyame Egya no nye Jesus a ɔyɛ ahyɛmu fofor no ne ntamugyinanyi no enyim na wɔnye hɔn kasa.

20 Tum na tumdzi a asɔfodzi kuma no, anaadɛ Aaron Asɔfodzi no na okura abɔfosom ho nsaafee, wɔyɛ enyido ayɛdze, wɔkã asɛmpa no, wonuma hɔn a woenu hɔnho no dze hɔn kɔ bɔnfakyɛ mu, dɛ mbrɛ ahyɛmudzi na mbrasɛm ma ho kwan dɛ wɔnyɛ no.

21 Ohia dɛ woyi presidentfo, anaadɛ banodzi dzibewdzifo no fi nkorɔfo a woeyi hɔn esi hɔ dze nsa egu hɔn do na wɔdze dzibew horow yinom ahyɛ hɔn nsa dada no fi dɛm asɔfodzi ebien yi mu.

22 Melchizedek Asɔfodzi no mu no, asɔr no nyina bɔ mu dze gyedzi na mpaabɔ fua Asɔfompanyin Banodzifo baasa no a, kuw yi asan mu eyi hɔn na wɔahyɛ hɔn akɔ dɛm dzibew no mu dɛ wɔnyɛ Asɔr no ne President na n’Apamfo hɔn quorum.

23 Apamfo akwantufo duebien no na wɔfrɛ hɔn Asomafo Duebien no, anaadɛ Christ ne dzin ho adasegyefo soronko a wɔwɔ wiadze nyina mu—dɛm na ɔma nsonsonee ba hɔn na wɔ nkorɔfo a wɔafrɛ hɔn dze hɔn esisi gyinabew ma wodzi dwuma horow wɔ asɔr no mu.

24 Na hɔn so wɔ yɛ quorum bi a wɔwɔ tum kor noara a dɛm eguamutsenafo baasa a wɔakã hɔn ho asɛm dada no wɔ no.

25 Eduosuonfo no so wɔafrɛ hɔn dɛ wɔmbɔ asɛmpa no dawur, na wɔnyɛ adasegyefo soronko mma Amanamamfo a wɔwɔ wiadze nyina mu no—dɛm na ɔma nsonsonee ba hɔn nkorɔfo a wɔafrɛ hɔn dze hɔn esisi gyinabew horow ma wodzi dwuma wɔ asɔr no mu.

26 Na hɔn so wɔ yɛ quorum bi a wɔwɔ tum kor noara a dɛm adasegyefo soronko Duebien no anaadɛ Asomafo no a wɔabɔ hɔn dzin seseiara no wɔ.

27 Na adwen pɔw biara a quorum yinom mu obiara bɔbɔ no ɔwɔ dɛ hɔn nyina hɔn ndze yɛ kor; ɔkyerɛ dɛ, ɔsɛ dɛ ankorankor biara a ɔwɔ quorum no mu no n’adwen nye obiara n’adwen pɔw a wɔabɔ no bɛsaa wɔ nhyehyɛɛ biara a wɔbɛyɛ ho ama tum na ahoɔdzen aaba nhyehyɛɛ no mu a ɔkyerɛ dɛ ankorankor biara n’ano wɔ mu—

28 Hɔn mu dodow botum ehyia mu edzi dwuma, sɛ ɔba no dɛ hɔn nyinara nnkotum ehyia mu a.

29 Gyedɛ ɔtse dɛm, na ɔnntse dɛm a, nhyira remmba dɛm nhyehyɛɛ no do dɛ mbrɛ president baasa no hɔn quorum dze no tse tsetseberdo no, hɔn a wɔnam Melchizedek nhyehyɛɛ do hyɛɛ hɔn asɔfo no, na wɔyɛ nkorɔfo a wɔtsen na wɔyɛ krɔnkrɔn.

30 Na ɔsɛ dɛ dɛm quorum yinom, anaadɛ hɔn mu kor biara dze tseneneeyɛ, krɔnkrɔnyɛ, na ɔwɔ akoma a ɔyɛ botoo, ɔdwe, penkyɛr na gyedzi, ɔbrapa, nyimdzee, enyidahɔ, abotar, nyamesompa, enuadɔ na ayamuyie dze bɔ adwen pɔw biara.

31 Osiandɛ anohoba no nye dɛ, sɛ dɛm ndzɛmba yinom dɔɔ sõ wɔ hɔn mu a, wɔrennyɛ hɔn a wɔnnsow aba wɔ Ewuradze ne nyimdzee ho.

32 Na sɛ ɔba no dɛ quorum yinom mu bi bɔ adwen pɔw bi a ɔnntsen a, ɔwɔ dɛ wɔdze ba quorum horow no nyina enyim, hɔn a wɔyɛ asɔr no ne banodzifo a wokitsa tum wɔ sunsum mu dwumadzi ho no nhyiamu kɛse enyim; ɔnntse dɛm a, nkyɛ worunntum nnsan nka asɛm a wɔabɔ ho pɔw no ho asɛm.

33 Duebien no nye Abaguafo Banodzifo Etsitsir Akwantufo no, wodzi dwuma wɔ Ewuradze ne dzin mu, dɛ mbrɛ Asɔr ne President na n’Apamfo no bɛkyerɛ hɔn, dɛ mbrɛ nhyehyɛɛ a ofi sor no tse; dɛ wɔbɛkyekyer asɔr na wɔahwɛ ma dwumadzi a ɔwɔ mu nyina abɛyɛ kor wɔ aman nyina mu, odzi kan, kɔ Amanamamfo mu, na otsĩa ebien kɔ Jewfo hɔ.

34 Eduosuon no dzi dwuma wɔ Ewuradze ne dzin mu dɛ mbrɛ Duebien no anaadɛ Abaguafo Etsitsir a wotu kwan no bɛkyerɛ hɔn wɔ asɔr no ne nhyehyɛɛ nye no mu dwumadzi kor no ara a ɔwɔ aman nyina mu, odzi kan, kɔ Amanamamfo mu, na afei, kɔ Jewfo hɔ—

35 Wɔsoma Duebien no a wokitsa nsaafee no ma wɔkɛkã Jesus Christ n’asɛmpa no dze bue kwan no, odzi kan, wɔ Amanamamfo mu, na afei, Jewfo mu.

36 Abaguafo etsitsir a wɔtse Zion ne stake horow do no bɔ mu yɛ quorum a ɔnye presidentfo hɔn quorum no anaadɛ abaguafo etsitsir a wotu kwan no wɔ tumdzi kor no ara a wɔdze dzi asɔr no mu dwuma, wɔ hɔn adwen pɔw ne mbɔe mu.

37 Abaguafo etsitsir a wɔtse Zion ne stake horow do so bɔ mu yɛ quorum a wɔwɔ dɛm tumdzi kor no ara wɔ asɔr no mu dwumadzi mu, na wɔnye hɔn yɛ hɔn nhyehyɛɛ biara a wɔdze kɔto abaguafo Duebien a wɔwɔ stake a ɔwɔ Zion no enyim.

38 Ɔyɛ abaguafo etsitsir a wotu kwan no hɔn edwuma dɛ sɛ wohia mboa a, wobisa fi Eduosuon no hɔ nko, ma wɔboa hɔn wɔ hɔn ɔfrɛ ne dwumadzi pii a wɔwɔ dzi mu, dɛ, wɔkã asɛmpa no na wɔyɛ asɛmpa ayɛdze no kyɛn dɛ wɔbɛfrɛ binom.

39 Ɔyɛ Duebien no a wɔwɔ asɔr no nkorbata akɛse nyina mu no hɔn edwuma dɛ wɔnam nyikyerɛ kwan do hyɛ asɛnkãfo asomfo—

40 Dɛm asɔfodzi yi ne nhyehyɛɛ no woesi no pi ma oeefi egya nsamu akɔ babanyin hɔ, na odzi wɔ aba a wɔsaan mu yii no no n’asefo ankasa, hɔn a wɔbɔɔ hɔn anohoba no.

41 Dɛm nhyehyɛɛ yi, wɔhyehyɛɛ no Adam aber do dze sianee fi ebusuasantsen kor do baa ebusuasantsen kor so do wɔ dɛm kwan yi do:

42 Ofi Adam do kɔr Seth do, a Adam hyɛɛ no sɔfo ber a nna oedzi mfe eduosia akron, na ohyiraa no no, ne mfe ebiasa ansaana oruwu no (Adam), na ɔnam n’egya do na ne nsa kãa Nyankopɔn n’anohoba no, na dɛ n’asefo na Ewuradze asan mu eyi hɔn dɛ wonkura do nkesi asaase n’ewiei;

43 Osiandɛ ɔno (Seth) yɛ nyimpa a odzi mu, nna ɔsɛ n’egya papaapa, na ne nsunsuando nye dɛ ne ndzeyɛɛ nyina tse dɛ n’egya, na dza wɔnam do dze hu ɔno na n’egya ara nye ne mfe.

44 Na ber a Enos dzii mfe ɔha eduasa anan na abosoom anan ara na Adam dze ne nsa guu no do hyɛɛ no sɔfo.

45 Ber a Cainan dzii mfe eduanan no Nyankopɔn frɛɛ no wɔ sar no do, na ohyiaa Adam ber a nna orutu kwan akɔ Shedolamak mbew do no. Na ber a ne nsa kãa n’asɔfohyɛ no nna oedzi mfe eduowɔtwe esuon.

46 Ber a Mahalaleel dzii mfe ahaanan eduokron esia na nda esuon no, Adam dze ne nsa guu no do hyɛɛ no sɔfo, na ɔnoara so na ohyiraa no.

47 Ber a Jared dzii mfe ahaebien no, Adam dze ne nsa guu no do hyɛɛ no sɔfo, na ɔnoara so na ohyiraa no.

48 Enoch dzii mfe eduonu enum no, Adam dze ne nsa guu no do hyɛɛ no sɔfo; na odzii mfe eduosia enum no, Adam hyiraa no.

49 Na ohun Ewuradze, na ɔnye no nantsewee, na mber nyina nna ɔwɔ n’enyim; na ɔnye Nyankopɔn nantseew mfe ahaebiasa eduosia enum, a ɔkyerɛ dɛ nna oedzii mfe ahaanan eduasa ber a wɔsakyeer no a wɔannsɔ owu.

50 Methuselah dzii mfe ɔha no na Adam dze ne nsa guu no do hyɛɛ no sɔfo.

51 Lamech dzii mfe eduasa ebien no na Seth dze ne nsa guu no do hyɛɛ no sɔfo.

52 Noah dzii mfe du no na Methuselah dze ne nsa guu no do hyɛɛ no sɔfo.

53 Ber a aka mfe ebiasa ma Adam ewu no, ɔfrɛɛ Seth, Enos, Cainan, Mahalaleel, Jared, Enoch na Methuselah a nna hɔn nyina yɛ asɔfompanyin no, nye n’asefo nkaa nyina a wɔyɛ atseneneefo no na ɔnye hɔn kɔr mbɔnsa a ɔwɔ Adam-ondi-Ahman no mu na ɔdze ne nhyira a odzi ekyir no maa hɔn.

54 Na Ewuradze yii noho kyerɛɛ hɔn, na wɔsoɛree hyiraa Adam, na wɔfrɛɛ no Michael, ɔhenbabanyin, bɔfopanyin.

55 Ewuradze kyekyee Adam no werɛ, na ɔsee no dɛ: Meeyi wo esi hɔ dɛ ebɛyɛ edzikanyi; aman pii befi wo mu aba, na ɔwo yɛ hɔn do ɔhenbabanyin afebɔɔ.

56 Na Adam soɛree gyinaa mboanofo no finimfin; nna Sunsum Krɔnkrɔn no ahyɛ no mã, ammfa no ho koraa dɛ oenyin posoposo, ɔhyɛɛ nkɔm wɔ dza ɔbɛba n’asefo do dze kesi ebusuasantsen a wɔbɛba ekyir yi do ho.

57 Ndzɛmba yinom no wɔakyerɛw ne nyina wɔ Enoch no nwoma mu, na wɔbɛgye ho dase ne mber pa mu.

58 Ɔyɛ Duebien no so hɔn edwuma dɛ wɔhyɛ asɔfo na wɔdze sisi hɔn dzibew horow a ɔwɔ asɔr no mu no do, dɛ mbrɛ nyikyerɛ no se:

59 Dze kɛma Christ n’asɔr a ɔwɔ Zion asaase do, dɛ wɔmfa nkã asɔr ne mbra a ɔwɔ asɔr no dwumadzi ho no ho—

60 Nokwar, mese hom dɛ; Dɔm Ewuradze na ɔse, ɔwɔ dɛ wonya elderfo banodzifo ma wɔhwɛ hɔn a wogyinagyina elder dzibew wɔ asɔr no mu no do.

61 Na asɔfo so a wɔbɔhwɛ asɔfo no hɔn dzibew do;

62 Na akyerɛkyerɛfo so a wɔbɔhwɛ hɔn a wogyina kyerɛkyerɛnyi dzibew do, nye deaconfo so dɛmara—

63 Dɛm ntsi, ofi deacon do kɔ kyerɛkyerɛnyi do; na ofi kyerɛkyerɛnyi do akɔ sɔfo do, na ofi sɔfo do akɔ elder do; ankorankor biara dɛ ma wɔdze no besi no, dɛ mbrɛ ahyɛmudzi na mbrasɛm a ɔwɔ asɔr no mu tse.

64 Nkyii nna aba Asɔfodzi a Ɔkrɔn no do, dza ɔsõ kyɛn ne nyina no.

65 Dɛm ntsi, obehia dɛ woyi obi so fi Asɔfodzi a Ɔkrɔn no mu ma ɔhwɛ Asɔfodzi no do, na wɔbɛfrɛ no Asɔr no mu Asɔfodzi a Ɔkrɔn hɔn President.

66 Anaa yɛbɛkã dɛ Asɔr no mu Ɔsɔfopanyin Banodzinyi a ɔhwɛ Asɔfodzi a Ɔkrɔn no do.

67 Dɛm nyimpa yi ara so na ɔhwɛ ayɛdze nyina ne nyɛe na ɔdze ne nsa gu nkorɔfo do, hyira asɔr no.

68 Dɛm ntsi, bishop ne dzibew nye no nnyɛ pɛr; osiandɛ bishop ne dzibew nye dɛ ɔhwɛ honam afamu ndzɛmba do;

69 Eso otwar dɛ woyi bishop fi Asɔfodzi a Ɔkrɔn no mu, gyedɛ ɔyɛ Aaron n’asenyi ankasa;

70 Na gyedɛ ɔyɛ Aaron n’asenyi ankasa, ɔnntse dɛm a, onnkotum ekura dɛm asɔfodzi ho nsaafee no.

71 Naaso, wotum san mu yi ɔsɔfopanyin, kyerɛ dɛ, obi a ɔwɔ Melchizedek nhyehyɛɛ no mu no si hɔ, ma ɔsom wɔ dɛm honam afamu ndzɛmba no, na ɔbɛfa Sunsum nokwafo no do enya nyimdzee wɔ dɛm ndzɛmba no ho;

72 Na afei so ɔbɛyɛ ɔtsɛmbuafo wɔ Israel mu, a ɔbɛyɛ asɔr no n’edwuma, dɛ ɔbɛtsena ase edzi mbratofo nsɛm na oetsie adasegyefo hɔn dasee a wɔdze bɛba abɔto ɔno na n’apamfo a oeyi hɔn anaa oribeyi hɔn efi asɔr no mu elderfo mu ma wɔaboa no no hɔn enyim ma woebua asɛm no wɔ mbra kwan do.

73 Iyi nye bishop a ɔnnyɛ Aaron n’asenyi ankasa, na mbom wɔahyɛ no Asɔfodzi a Ɔkrɔn a ɔwɔ Melchizedek nhyehyɛɛ no mu no ne dwuma.

74 Dɛm na ɔbɛyɛ ɔtsɛmbuafo, ɔdodow ɔtsɛmbuafo mpo wɔ nkorɔfo a wɔwɔ Zion no mu, anaadɛ stake a ɔwɔ Zion no mu, anaa asɔr no nkorbata biara a woetu no esi hɔ wɔ dɛm ɔsomdwumadzi yi mu no, kɛpem dɛ wɔbɛtserɛw Zion no nkorbata mu ma ekehia dɛ wonya bishop anaa atsɛmbuafo wɔ Zion anaa beebi so.

75 Na susuampaara dɛ wobenya bishopfo binom so akã ho no, hɔn nyinara bedzi dwuma wɔ dzibew kor no ara mu.

76 Mbom Aaron n’asenyi ankasa dze, ɔwɔ mbra mu kwan dɛ ɔbɛkã president na n’apamfo ho, na okura dɛm dwumadzi yi ne nsaafee, dɛ nonko gyina dɛm bishop dzibew yi wɔ ber a apamfo biara nnkã no ho, gyedɛ ɔba no dɛ oredzi Asɔfodzi a Ɔkrɔn mu President, a ɔwɔ Melchizedek nhyehyɛɛ mu no n’asɛm a, na ɔretsena ase dɛ ɔtsɛmbuafo wɔ Israel mu.

77 Na dɛm abaguafo yinom mu biara na adwen pɔw biara nye dza dɛm mbrasɛm yi se no saa:

78 Bio, nokwar, mese hom dɛ, asɔr no mu dwumadzi a ho hia kɛse nye asɔr no mu asɛndzi a no mu yɛ dzen no, susuampaara dɛ atsɛmbu bi a bishop no anaa atsɛmbuafo no dze mae no annyɛ abodwee a, ɔwɔ dɛ wɔdze asɛm no kɛma asɔr no mu abaguafo no na hɔn so wɔdze kɔto Asɔfodzi a Ɔkrɔn hɔn President na n’Apamfo no enyim.

79 Na Asɔfodzi a Ɔkrɔn abaguafo no hɔn President na n’Apamfo no benya tum dze afrɛ asɔfompanyin binom, bɛyɛ duebien dɛm mpo ma wɔboa dɛ apamfo; na dɛm na Asɔfodzi a Ɔkrɔn hɔn President na n’Apamfo nye hɔn apamfo benya kwan etsie adasefo hɔn dasegye na wɔafa do abɔ adwen pɔw wɔ asɔr ne mbra kwan do.

80 Sɛ wɔbɔ adwen pɔw yi wie a, wɔrommbɔ do bio wɔ Ewuradze enyim; osiandɛ iyi nye Nyankopɔn n’asɔr mu abaguafo a ɔkrɔn kɛse, na adwen pɔw biara a otwa sunsum mu ekyingye nyina do.

81 Na obiara nnyi asɔr no mu a woyi no fir mu dɛ obegyina dɛm abaguafo yi enyim.

82 Susuampaara dɛ Asɔfodzi a Ɔkrɔn no hɔn President no bɔtõ mbra no, ɔwɔ dɛ wɔdze no ba ɔdodow abaguafo no enyim, na Asɔfodzi a Ɔkrɔn no n’apamfo duebien no ma wɔaboa.

83 Na hɔn adwen pɔw a wɔbɔbɔ wɔ ne tsir do no na obotwa ekyingye a ɔwɔ no ho nyina do.

84 Dɛm ntsi, obiara nnyi hɔ a wobeyi no efi Nyame ne pɛrpɛrdzi na mbra mu, ama wɔaayɛ biribiara esiado esiado no na awɔse mu, wɔ tseneneeyɛ na nokwar mu wɔ n’enyim.

85 Na bio, nokwar, mese hom dɛ, dwuma a president a ɔhwɛ deacon dzibew do yɛ nye dɛ ɔhwɛ deaconfo duebien do, na ɔnye hɔn tsena ase wɔ baguabɔ mu, na otu hɔn fo na ɔkyerɛkyerɛ hɔn hɔn ndwuma a ɔsɛ dɛ wɔyɛ, na wɔma hɔnho ntowdo nkorkor dɛ mbrɛ wɔakyerɛw no wɔ ahyɛmu no mu no.

86 Na president no a ɔhwɛ akyerɛkyerɛfo dzibew do ne dwuma nye dɛ ɔhwɛ akyerɛkyerɛfo eduonu anan do, na ɔnye hɔn tsena ase wɔ baguabɔ mu, na ɔkyerɛkyerɛ hɔn hɔn dzibew no mu ndwuma, dɛ mbrɛ wɔakyerɛw no ahyɛmu no mu no.

87 President a ɔhwɛ Aaron Asɔfodzi do no so ne dwuma nye dɛ ɔhwɛ asɔfo eduanan awɔtwe do, na ɔnye hɔn tsena ase wɔ baguabɔ mu, na ɔkyerɛkyerɛ hɔn ma wohu hɔn ndwuma, dɛ mbrɛ wɔakyerɛw no ahyɛmu no mu no—

88 President yi wɔ dɛ ɔyɛ bishop; osiandɛ ɔyɛ asɔfodzi yi ne dwuma no mu kor.

89 Bio, president a ɔhwɛ elderfo dzibew no do no ne dwuma nye dɛ ɔhwɛ elderfo eduokron esia do, na ɔnye hɔn tsena ase wɔ baguabɔ mu, na ɔkyerɛkyerɛ hɔn dza wɔakyerɛw no ahyɛmu no mu no.

90 President yi na n’apamfo no yɛ dansewa wɔ eduosuon no ho, na wɔhyehyɛe maa hɔn a wonntu kwan nnkɔ wiadze nyina mu no.

91 Na bio, President a ɔhwɛ Asɔfodzi a Ɔkrɔn ne dzibew no do no ne dwuma nye dɛ ɔhwɛ asɔrtɔw nyina do, na ɔyɛ dɛ Moses—

92 Hwɛ, nyansa nye yi, nyew, dɛ ɔbɛyɛ adzehunyi, oyikyerɛfo, obi a otum kyerɛ biribi ase, nye nkɔnhyɛnyi, ɔwɔ Nyame n’akyɛdze nyina, a ɔdze ma asɔr ne tsir no.

93 Na dɛ mbrɛ enyido-adzehu a ɔkyerɛ nhyehyɛɛ a ɔwɔ Eduosuon no hɔn dwumadzi ho kyerɛ no, ɔwɔ dɛ woyi presidentfo beesuon fi eduosuon no mu ma wɔhwɛ hɔn do;

94 Na president a ɔtɔ do esuon wɔ dɛm presidentfo yinom mu no na ɔbɔhwɛ beesia no do;

95 Na dɛm presidentfo beesuon yi wɔ dɛ woyi eduosuon binom so kã eduosuon a wodzi kan no a hɔnankasa wɔkã ho no ho, ma wɔhwɛ hɔn do;

96 Na woyi eduosuon fofor so, kesi dɛ wobenya eduosuon mbɔho esuon, sɛ okehia dɛ edwuma a ɔwɔ wenyin ture no mu bɛgye dɛm a.

97 Na eduosuon yinom na wɔbɛyɛ akwantufo asomfo, na wobedzi kan akɔ Amanamamfo mu, na afei Jewfo mu.

98 Edzibewdzifo binom wɔ asɔr no mu a wɔnnka Duebien anaaso Eduosuon no so ho, na woyinom no mbrɛ hɔn dzibew ne kɛse tse biara wɔ asɔr no mu no da nkyɛn a, asodzi bi nnda hɔn do dɛ wobotu kwan akɔ amanaman mu, mbom sɛ okehia pɛpɛɛpɛ dɛ wotu a, ɔno wotum tu.

99 Dɛm ntsi, wɔmma obiara nsũa ne dwuma, na ɔmfa enyimpi ndzi dwuma wɔ dzibew a wɔdze ahyɛ ne nsa no.

100 Nyia ɔyɛ onyihanyi no mmfata dɛ obegyina, na nyia onnkosũa ne dwuma na ne dwumadzi nnsɔ enyi no nnkedzi mu dɛ obegyina. Ɔnyɛ hɔ dɛm. Amen.