1 Ug nahitabo nga mipadayon si Enoch sa iyang pakigpulong, nga nag-ingon: Tan-awa, mitudlo ang atong amahan nga si Adan niini nga mga butang, ug daghan ang mituo ug nahimong mga anak sa Dios, ug daghan ang wala motuo, ug namatay diha sa ilang mga sala, ug nagpaabot uban sa kahadlok, sa kasakit, kay ang nagdilaab nga makataronganon nga kasuko sa Dios ibu-bo diha kanila.

2 Ug gikan niana nga panahon misugod si Enoch sa pagpanagna, nag-ingon ngadto sa katawhan, nga: Samtang nagpanaw ko, ug nagbarog sa dapit sa Mahujah, ug mituaw ngadto sa Ginoo, dihay miabot nga tingog gikan sa langit, nga nag-ingon—Balik, ug lakaw ngadto sa bungtod sa Simeon.

3 Ug nahitabo nga mibalik ko ug mitungas sa bungtod; ug samtang nagbarog ko sa bungtod, nakita nako ang mga langit nga miabli, ug gisul-oban ko sa himaya;

4 Ug nakita nako ang Ginoo; ug nagbarog siya sa akong atubangan, ug nakigsulti siya nako, gani sama sa usa ka tawo nga nakigsulti sa lain, nawong sa nawong; ug gisultihan ko niya: Tan-awa, ug ipakita ko kanimo ang kalibotan sulod sa daghang henerasyon.

5 Ug nahitabo nga nakita nako sa walog sa Shum, ug tan-awa, daghang katawhan ang nagpuyo sa mga tolda, nga mao ang katawhan sa Shum.

6 Ug gisultihan na usab ako sa Ginoo: Tan-awa; ug mitan-aw ko paingon sa amihanan, ug nakita nako ang katawhan sa Canaan, nga nagpuyo sa mga tolda.

7 Ug gisultihan ako sa Ginoo: Panagna; ug nanagna ko, nga nag-ingon: Tan-awa ang katawhan sa Canaan, nga daghan kaayo, mosulong sa gubat batok sa katawhan sa Shum, ug mopatay kanila aron malaglag sila sa hingpit; ug ang katawhan sa Canaan managbahin-bahin diha sa yuta, ug ang yuta dili katuboan ug dili makapamunga, ug walay laing katawhan ang makapuyo didto gawas sa katawhan sa Canaan;

8 Kay tan-awa, tunglohon sa Ginoo ang yuta sa tumang kainit, ug ang pagkadili katuboan niana molungtad hangtod sa hangtod; ug nahimong itomon ang tanang anak sa Canaan, nga sila gitamay taliwala sa tanang katawhan.

9 Ug nahitabo nga gisultihan ako sa Ginoo: Tan-awa; ug mitan-aw ko, ug nakita nako ang yuta sa Sharon, ug ang yuta sa Enoch, ug ang yuta sa Omer, ug ang yuta sa Heni, ug ang yuta sa Shem, ug ang yuta sa Haner, ug ang yuta sa Hanannihah, ug ang tanang lumulupyo niini;

10 Ug gisultihan ako sa Ginoo: Lakaw ngadto niini nga katawhan, ug isulti ngadto kanila—Paghinulsol, basin pa unya og mopakita ko ug mohampak kanila sa usa ka tunglo, ug mamatay sila.

11 Ug gihatagan ko niya og sugo nga ako kinahanglang mobunyag pinaagi sa ngalan sa Amahan, ug sa Anak, nga puno sa grasya ug kamatuoran, ug sa Espiritu Santo, nga nagpamatuod sa Amahan ug sa Anak.

12 Ug nahitabo nga mipadayon si Enoch sa pagtawag sa tanang katawhan, gawas lang sa katawhan sa Canaan, sa paghinulsol;

13 Ug dako kaayo ang pagtuo ni Enoch nga nangulo siya sa katawhan sa Dios, ug miabot ang ilang mga kaaway aron sa pakiggubat batok kanila; ug gipamulong niya ang pulong sa Ginoo, ug ang yuta mikurog, ug ang kabukiran nahanaw, gani sumala sa iyang sugo; ug nabalhin ang agianan sa katubigan sa mga suba; ug nadungog ang ngulob sa mga liyon gikan sa kamingawan; ug nahadlok sa hilabihan ang tanang nasod, gamhanan kaayo ang pulong ni Enoch, ug hilabihan ka dako ang gahom sa pinulongan nga gihatag sa Dios kaniya.

14 Usab dihay mitunga nga yuta gikan sa kahiladman sa dagat, ug hilabihan gayod ang kahadlok sa mga kaaway sa katawhan sa Dios, nga sila milayas ug mipahilayo ug miadto sa yuta nga migula gikan sa kahiladman sa dagat.

15 Ug ang mga higante sa yuta, usab, mitindog didto sa layo; ug dihay miabot nga usa ka tunglo sa tanang katawhan nga nakig-away batok sa Dios;

16 Ug gikan nianang panahona dihay mga gubat ug pagbanaw sa dugo taliwala kanila; apan miabot ang Ginoo ug mipuyo uban sa iyang katawhan, ug sila nagpuyo diha sa pagkamatarong.

17 Ang kahadlok ngadto sa Ginoo anaa sa tanang nasod, dako kaayo ang himaya sa Ginoo, nga anaa sa iyang katawhan. Ug gipanalanginan sa Ginoo ang yuta, ug napanalanginan sila diha sa kabukiran, ug diha sa taas nga mga dapit, ug miuswag.

18 Ug gitawag sa Ginoo ang iyang katawhan og Zion, tungod kay nagkahiusa sila sa kasingkasing ug sa hunahuna, ug nagpuyo sa pagkamatarong; ug walay kabos taliwala kanila.

19 Ug nagpadayon si Enoch sa iyang pagsangyaw sa pagkamatarong ngadto sa katawhan sa Dios. Ug nahitabo sa iyang mga adlaw, nga gitukod niya ang usa ka siyudad nga gitawag og siyudad sa Pagkabalaan, gani ang Zion.

20 Ug nahitabo nga nakigsulti si Enoch sa Ginoo; ug gisultihan niya ang Ginoo: Sa pagkamatuod ang Zion magpuyo sa kalinaw hangtod sa hangtod. Apan gisultihan sa Ginoo si Enoch: Ang Zion gipanalanginan nako, apan ang nahibilin sa katawhan akong gitunglo.

21 Ug nahitabo nga gipakita sa Ginoo ngadto ni Enoch ang tanang lumulupyo sa yuta; ug nakita niya, ug tan-awa, ang Zion, sa paglabay sa panahon, gidala ngadto sa langit. Ug gisultihan sa Ginoo si Enoch: Tan-awa ang akong pinuy-anan sa kahangtoran.

22 Ug nakita usab ni Enoch ang nahibilin sa katawhan nga mao ang mga anak ni Adan; ug sila mao ang mga nagkasagol-sagol sa tanang binhi ni Adan gawas sa binhi ni Cain, kay ang binhi ni Cain mga itom, ug walay dapit taliwala kanila.

23 Ug human nga ang Zion gidala ngadto sa langit, nakita ni Enoch, ug tan-awa, ang tanang kanasoran sa yuta diha sa iyang atubangan;

24 Ug dihay miabot nga henerasyon human sa laing henerasyon; ug gihimaya ug gibayaw si Enoch, gani ngadto sa sabakan sa Amahan, ug sa Anak sa Tawo; ug tan-awa, ang gahom ni Satanas anaa sa ibabaw sa tibuok yuta.

25 Ug nakakita siya og mga anghel nga mikunsad gikan sa langit; ug nakadungog siya og makusog nga tingog nga nag-ingon: Alaot, alaot ang mga lumulupyo sa yuta.

26 Ug nakita niya ni Satanas; ug siya adunay dagko nga kadena sa iyang kamot, ug mitabon kini sa ibabaw sa tibuok yuta uban sa kangitngit; ug mitan-aw siya sa ibabaw ug mikatawa, ug ang iyang mga anghel nagmaya.

27 Ug nakita ni Enoch ang mga anghel nga mikunsad gikan sa langit, nga nagpamatuod sa Amahan ug sa Anak; ug misulod ang Espiritu Santo sa daghang tawo, ug gidala sila sa mga gahom sa langit ngadto sa Zion.

28 Ug nahitabo nga ang Dios sa langit mitan-aw sa nahibilin sa katawhan, ug mibakho; ug mipamatuod si Enoch niini, nga nag-ingon: Ngano nga ang mga langit nagbakho, ug nagpaagas sa mga luha niini sama sa ulan diha sa mga bukid?

29 Ug si Enoch miingon sa Ginoo: Nganong nagbakho ka, nga ikaw balaan man, ug gikan sa tanang kahangtoran ngadto sa tanang kahangtoran?

30 Ug kon posible pa lang nga ang tawo makaihap sa mga butang sa yuta, oo, sa minilyon nga mga yuta nga sama niini, kini dili usa ka sinugdanan sa gidaghanon sa imong mga nilalang; ug ang imong mga tabil gibukhad sa gihapon; ug gani ikaw anaa gihapon diha, ug ang imong sabakan anaa diha; ug usab ikaw makiangayon; ikaw maluluy-on ug mabination sa kahangtoran;

31 Ug gidawat nimo ang Zion nganha sa imong kaugalingong sabakan, gikan sa imong tanang nilalang, gikan sa tanang kahangtoran ngadto sa tanang kahangtoran; ug walay lain apan ang kalinaw, hustisya, ug kamatuoran mao ang pinuy-anan sa imong trono; ug ang kaluoy anaa sa imong atubangan ug walay kataposan; nganong nagbakho man ikaw?

32 Gisultihan sa Ginoo si Enoch: Tan-awa kining imong kaigsoonan; sila ang mga binuhat sa akong kaugalingong mga kamot, ug gihatagan ko sila sa ilang kahibalo, sa adlaw nga gilalang ko sila; ug didto sa Tanaman sa Eden, gihatag nako sa tawo ang iyang kabubut-on;

33 Ug gisultihan nako ang imong kaigsoonan, ug mihatag usab sa sugo, nga maghigugmaay sila sa usag usa, ug nga kinahanglan nga mopili sila kanako, nga ilang Amahan; apan tan-awa, sila walay mga balatian ug nasilag sila sa kaugalingong kaliwatan;

34 Ug ang dilaab sa akong kaligutgot napukaw batok kanila; ug sa kainit sa akong kahiubos ipadala nako ang mga lunop diha kanila, kay ang akong mabangis nga kasuko napukaw batok kanila.

35 Tan-awa, ako ang Dios; Tawo nga Balaan mao ang akong ngalan; Tawo sa Tambag mao ang akong ngalan; ug Walay Kataposan ug Mahangtoron mao usab ang akong ngalan.

36 Mao nga, makapataas ko sa akong mga kamot ug makagunit sa tanang gilalang nga akong binuhat; ug ang akong mata makatulisok usab kanila, ug taliwala sa tanang binuhat sa akong mga kamot walay sama nga hilabihan ang pagkadaotan sama sa imong kaigsoonan.

37 Apan tan-awa, ang ilang mga sala maanaa sa mga ulo sa ilang mga amahan; si Satanas mahimo nga ilang amahan, ug ang pagkauyamot mao ang ilang kapalaran; ug ang tibuok langit mobakho tungod kanila, gani ang tanang binuhat sa akong mga kamot; mao nga dili ba mobakho ang mga langit, nga nagtan-aw niini nga mag-antos?

38 Apan tan-awa, kini nga nakita sa imong mga mata mangamatay sa mga lunop; ug tan-awa, ako mosumpo kanila; nag-andam ko og bilanggoan alang kanila.

39 Ug kana nga akong pinili nagahangyo sa akong atubangan. Mao nga, nag-antos siya tungod sa ilang mga sala; kon maghinulsol sila sa adlaw nga mobalik ang akong Pinili ngari kanako, ug hangtod nianang adlawa mag-antos sila;

40 Mao nga, tungod niini ang langit magbakho, oo, ug ang tanang binuhat sa akong mga kamot.

41 Ug nahitabo nga gisultihan sa Ginoo si Enoch, ug gisulti ngadto ni Enoch ang tanang binuhatan sa katawhan; mao nga nasayod si Enoch, ug mitan-aw sa ilang pagkadaotan, ug sa ilang kasub-anan, ug mibakho ug mipatuy-od sa iyang mga bukton; ug ang iyang kasingkasing milugway ngadto sa kahangtoran; ug ang iyang kahiladman nangandoy; ug miuyog ang tanang kahangtoran.

42 Ug nakita usab ni Enoch si Noe, ug ang iyang pamilya; nga ang kaliwatan sa tanang anak ni Noe kinahanglan maluwas sa usa ka temporal nga kaluwasan;

43 Mao nga nakita ni Enoch nga si Noe nagbuhat og arka; ug mipahiyom ang Ginoo niini, ug mikupot niini sa iyang kaugalingon nga kamot; apan ngadto sa nahibilin nga mga daotan ang lunop miabot ug milamoy kanila.

44 Ug samtang nakita kini ni Enoch, mibati siya og kasakit sa kalag, ug nagbakho tungod sa iyang kaigsoonan, ug gisultihan ang kalangitan: Magdumili ko nga mahupay; apan gisultihan sa Ginoo si Enoch: Pagmaya sa imong kasingkasing, ug pagmalipayon; ug tan-awa.

45 Ug nahitabo nga mitan-aw si Enoch; ug gikan ni Noe, nakita niya ang tanang pamilya sa yuta; ug mituaw siya ngadto sa Ginoo, nga nag-ingon: Kanus-a moabot ang adlaw sa Ginoo? Kanus-a moagas ang dugo sa Matarong, nga ang tanan nga nagbangotan mabalaan ug makaangkon og kinabuhing dayon?

46 Ug misulti ang Ginoo: Moabot kini sa tunga-tunga sa panahon, sa mga adlaw sa pagkadaotan ug pagpanimalos.

47 Ug tan-awa, nakita ni Enoch ang adlaw sa pag-anhi sa Anak sa Tawo, bisan diha sa unod; ug nagmaya ang iyang kalag, nga nag-ingon: Ang Matarong gibayaw, ug ang Kordero gipatay gikan sa katukoran sa kalibotan; ug pinaagi sa pagtuo ako anaa sa sabakan sa Amahan, ug tan-awa, ang Zion nag-uban kanako.

48 Ug nahitabo nga mitan-aw si Enoch sa yuta; ug nakadungog siya og tingog gikan sa mga kahiladman niini, nga nag-ingon: Alaot, alaot ako, ang inahan sa mga tawo, nag-antos ako, gikapoy ako, tungod sa pagkadaotan sa akong mga anak. Kanus-a ako makapahulay, ug malimpyohan gikan sa kahugaw nga migula gikan kanako? Kanus-a ako himoong balaan sa akong Tiglalang aron makapahulay na ako, ug ang pagkamatarong sulod sa usa ka panahon maanaa kanako?

49 Ug sa dihang nadungog ni Enoch nga nagbangotan ang yuta, mibakho siya, ug mituaw ngadto sa Ginoo, nag-ingon: O Ginoo, wala ka bay kaluoy sa yuta? Dili ba nimo panalanginan ang mga anak ni Noe?

50 Ug nahitabo nga mipadayon si Enoch sa iyang pagtuaw ngadto sa Ginoo, nga nag-ingon: Mohangyo ko kanimo, O Ginoo, sa ngalan sa imong Bugtong Anak, gani si Jesukristo, nga kaluy-an nimo si Noe ug ang iyang binhi, nga ang yuta dili na unta matabonan sa mga lunop.

51 Ug wala makapugong ang Ginoo; ug nakigsaad siya ni Enoch, ug nanumpa ngadto kaniya sa usa ka panumpa, nga mopahunong sa mga lunop; aron siya motawag sa mga anak ni Noe;

52 Ug mipadala siya og usa ka dili mausab nga sugo, nga ang salin sa iyang binhi kinahanglan kanunay nga makita diha sa tanang nasod, samtang ang kalibotan magpabilin;

53 Ug misulti ang Ginoo: Bulahan siya nga pinaagi sa iyang binhi moabot ang Mesiyas; kay miingon siya—Ako mao ang Mesiyas, ang Hari sa Zion, ang Bato sa Langit, nga halapad sama sa kahangtoran; kinsa ang mosulod sa ganghaan ug mosaka pinaagi kanako dili gayod mahulog; mao nga, bulahan sila nga akong gipamulong, kay moabot sila uban sa mga awit sa walay kataposan nga kalipay.

54 Ug nahitabo nga mituaw si Enoch ngadto sa Ginoo, nga nag-ingon: Sa panahon nga magpakatawo ang Anak sa Tawo, makapahulay na ba ang yuta? Nag-ampo ko kanimo, ipakita kanako kining mga butanga.

55 Ug gisultihan sa Ginoo si Enoch: Tan-awa, ug mitan-aw siya ug nakita ang Anak sa Tawo nga gituboy sa krus, subay sa pamaagi sa mga tawo;

56 Ug nakadungog siya og makusog nga tingog; ug gisalipdan ang mga langit; ug nagbangotan ang tanang nilalang sa Dios; ug nag-agulo ang yuta; ug nangabuak ang mga bato; ug namangon ang mga santos, ug gikoronahan diha sa tuong kamot sa Anak sa Tawo, uban sa mga korona sa himaya;

57 Ug kutob sa gidaghanon sa mga espiritu nga didto sa bilanggoan nanggawas, ug namarog sa tuong kamot sa Dios; ug ang nahibilin gireserbar sa mga kadena sa kangitngit hangtod sa paghukom sa mahinungdanon nga adlaw.

58 Ug mibakho ug mituaw pag-usab si Enoch ngadto sa Ginoo, nga nag-ingon: Kanus-a makapahulay ang yuta?

59 Ug nakita ni Enoch ang Anak sa Tawo nga mikayab sa itaas ngadto sa Amahan; ug gitawag niya ang Ginoo, nag-ingon: Dili ba ikaw mobalik pag-usab sa yuta? Tungod kay ikaw ang Dios, ug nakaila ko kanimo, ug nanumpa ka ngari kanako, ug misugo kanako nga kinahanglan mangayo pinaagi sa ngalan sa imong Bugtong Anak; ikaw mibuhat kanako, ug mihatag kanako og katungod sa imong trono, ug dili sa akong kaugalingon, apan pinaagi sa imong kaugalingon nga grasya; mao nga, mangutana ko kanimo kon ikaw dili ba mobalik pag-usab sa yuta.

60 Ug gisultihan sa Ginoo si Enoch: Segurado ako, sa ingon niana ako mobalik sa kataposang mga adlaw, sa mga adlaw sa pagkadaotan ug sa pagpanimalos, aron sa pagtuman sa panumpa nga akong gihimo kanimo mahitungod sa mga anak ni Noe;

61 Ug moabot ang adlaw nga ang yuta mopahulay, apan sa dili pa moabot kana nga adlaw ang langit mongitngit, ug ang tabil sa kangitngit motabon sa yuta, ug mokurog ang mga langit, ug usab ang yuta; ug ang dagkong mga katalagman moabot taliwala sa katawhan, apan luwason nako ang akong katawhan;

62 Ug ang pagkamatarong ipakanaog nako gikan sa langit, ug ipadala nako ang kamatuoran gikan sa yuta, aron sa pagpamatuod sa akong Bugtong Anak; sa iyang pagkabanhaw gikan sa patay; oo, ug usab ang pagkabanhaw sa tanang tawo; ug ang pagkamatarong ug kamatuoran akong himoon nga mobanlas sa yuta sama sa usa ka lunop, aron sa pagpundok sa akong pinili gikan sa upat ka suok sa yuta, ngadto sa usa ka dapit nga akong giandam, ang usa ka Balaan nga siyudad, aron ang akong katawhan mobakos sa ilang mga bat-ang, ug magpaabot sa panahon sa akong pag-anhi; kay anaa diha ang akong tabernakulo, ug kini pagatawgon og Zion, usa ka Bag-ong Jerusalem.

63 Ug gisultihan sa Ginoo si Enoch: Dayon ikaw ug ang imong tibuok nga siyudad makigkita kanila didto, ug sila atong pagadawaton ngari sa atong sabakan, ug makakita sila kanato; ug mogakos kita kanila, ug mogakos sila kanato, ug maghinagkanay kita;

64 Ug anaa diha ang akong pinuy-anan, ug kini mao ang Zion, diin mogula ang tanan nga nilalang nga akong gibuhat; ug sulod sa usa ka libo ka tuig ang yuta mopahulay.

65 Ug nahitabo nga nakita ni Enoch ang adlaw sa pag-anhi sa Anak sa Tawo, sa kataposang mga adlaw, aron mopuyo sa yuta diha sa pagkamatarong sulod sa usa ka libo ka tuig;

66 Apan sa dili pa mahitabo kana nga adlaw nakita niya ang dagkong mga kalisdanan taliwala sa mga daotan; ug nakita usab niya ang dagat, nga nagkaguliyang, ug ang mga kasingkasing sa mga tawo mihunong sa pagpitik, nagpaabot uban sa kahadlok sa mga paghukom sa Labawng Makagagahom nga Dios, nga moabot sa mga daotan.

67 Ug gipakita sa Ginoo kang Enoch ang tanang butang, gani ngadto sa kinatumyan sa kalibotan; ug nakita niya ang adlaw sa mga matarong, ang takna sa ilang katubsanan, ug nakadawat sa kahingpitan sa kalipay;

68 Ug ang tanang adlaw sa Zion, sa mga adlaw ni Enoch, mga tulo ka gatos ug kan-uman ug lima ka tuig.

69 Ug si Enoch ug ang iyang tanang katawhan naglakaw uban sa Dios, ug nagpuyo siya taliwala sa Zion; ug nahitabo nga ang Zion nawala, kay ang Dios midawat niini ngadto sa iyang kaugalingong sabakan; ug gikan didto gisangyaw ang panultihon, nga ang Zion Nawala.