Pasiuna

Ang Perlas nga Labing Bililhon usa ka pinili sa gipili nga mga basahon nga naghisgot sa daghang mahinungdanong mga aspeto sa pagtuo ug doktrina sa Ang Simbahan ni Jesukristo sa mga Santos sa Ulahing mga Adlaw. Kini nga mga butang gihubad ug gipaimprinta ni Propeta Joseph Smith, ug kadaghanan niini gimantala sa mga peryodiko sa Simbahan sa iyang panahon.

Ang unang koleksiyon sa mga basahon nga giulohan og Perlas nga Labing Bililhon gihimo niadtong 1851 ni Elder Franklin D. Richards, nga nianang higayona sakop sa Konseho sa Napulog Duha ug presidente sa Misyon sa Britanya. Ang katuyoan niini mao ang pagpasayon sa pagbaton sa pipila ka importante nga mga artikulo nga limitado lang ang sirkulasyon sa panahon ni Joseph Smith. Samtang nagkadaghan ang mga miyembro sa Simbahan sa tibuok Uropa ug Amerika, adunay panginahanglan nga maanaa kini nga mga butang. Ang Perlas nga Labing Bililhon gigamit sa kadaghanan ug unya nahimong sumbanan nga basahon sa Simbahan pinaagi sa kalihokan sa Unang Kapangulohan ug sa kinatibuk-an nga komperensiya sa Siyudad sa Salt Lake niadtong Oktubre 10, 1880.

Daghang kausaban ang gihimo sa mga nahisulat sumala sa mga panginahanglan sa Simbahan. Niadtong 1878 gidugang ang mga porsiyon sa basahon ni Moises nga wala mahilakip sa unang edisyon. Niadtong 1902 ang pipila ka bahin sa Perlas nga Labing Bililhon nga managsama og hilisgotan nga gimantala usab diha sa Doktrina ug mga Pakigsaad gitangtang. Ang paghan-ay ngadto sa mga kapitulo ug mga bersikulo, uban sa mga sinulat sa ubos sa panid, gihimo niadtong 1902. Ang unang pagmantala sa duha ka kolum nga mga pahina, nga may indeks, gihimo niadtong 1921. Walay laing kausaban ang gihimo hangtod niadtong Abril 1976, sa dihang ang duha ka butang sa pagpadayag gidugang. Niadtong 1979 kining duha ka butang gitangtang gikan sa Perlas nga Labing Bililhon ug gibutang sa Doktrina ug mga Pakigsaad, nga karon makita kini isip seksiyon 137 ug 138. Sa kasamtangan nga edisyon ang pipila ka kausaban gihimo aron ang basahon mapahiuyon ngadto sa nag-unang mga dokumento.

Ang mosunod mao ang mubo nga pasiuna sa kasamtangan nga mga sulod:

1. Mga Pinili gikan sa Basahon ni Moises. Kinuha gikan sa basahon sa Genesis sa hubad ni Joseph Smith sa Biblia, nga iyang gisugdan niadtong Hunyo 1830.

2. Ang Basahon ni Abraham. Dinasig nga hubad sa mga sinulat ni Abraham. Gisugdan ni Joseph Smith ang paghubad niadtong 1835 human makuha ang pipila ka Ehiptohanon nga mga papyrus. Ang hubad gimantala sa sinumpay-sumpay nga paagi sa Times and Seasons sugod niadtong Marso 1, 1842, sa Nauvoo, Illinois.

3. Joseph Smith—Mateo. Kinuha gikan sa pagpamatuod ni Mateo diha sa hubad ni Joseph Smith sa Biblia (tan-awa sa Doktrina ug mga Pakigsaad 45:60–61 alang sa balaang sugo nga sugdan ang paghubad sa Bag-ong Tugon).

4. Joseph Smith—Kasaysayan. Mga kinutlo gikan sa opisyal nga pagpamatuod ug kasaysayan ni Joseph Smith, nga giandam niya ug sa iyang mga tigsulat niadtong 1838–1839 ug gimantala sa sinumpay-sumpay nga paagi sa Times and Seasons sa Nauvoo, Illinois, sugod niadtong Marso 15, 1842.

5. Ang Mga Artikulo sa Hugot nga Pagtuo sa Ang Simbahan ni Jesukristo sa mga Santos sa Ulahing mga Adlaw. Usa ka pamahayag ni Joseph Smith nga gimantala sa Times and Seasons niadtong Marso 1, 1842, inubanan sa usa ka mubo nga kasaysayan sa Simbahan nga nailhan kaayo nga Wentworth Letter.