۳۰ ستمبر ۱۹۷۸ کو کلِیسیائے یِسُوع مسِیح برائے مُقَدَّسینِ آخِری ایّام کی ۱۴۸ویں ششماہی مجلِس عامہ میں صدر این ایلڈن ٹینر، کلِیسیا کی صدارتِ اَوّل کے مُشِیر اَوّل نے درج ذیل پیش کِیا:

اِس برس جُون کے اوائل میں صدارتِ اَوّل نے اِعلان کِیا کہ صدر سپنسر ڈبلیو کِمبل نے مُکاشفہ پایا ہے جو کہانت اور ہیکل کی برکات کو کلِیسیا کے تمام اَہل مرد اَرکان کے لیے مُمکِن الحصُول بناتا ہے۔ صدر کِمبل نے درخواست کی ہے کہ مَیں یہ بتاؤں کہ اُن کے اِس مُکاشفہ پانے کے بعد، جو اُنھیں پاک ہیکل کے مُقَدَّس کمروں میں طویل غَور و فکر اور دُعا کے بعد مِلا، اُنھوں نے اِسے اپنے مُشِیروں کے سامنے پیش کِیا، جِنھوں نے اِسے قَبُول اور منظُور کِیا۔ پھِر اُسے بارہ رسُولوں کی جماعت کے سامنے پیش کِیا گیا۔ جِنھوں نے مُتّفِقہ طور پر اُسے منظُور کِیا، اور بعد ازاں اُسے تمام دُوسرے کلِیسیائی اعلیٰ حُکام کو پیش کِیا گیا، جِنھوں نے من و عن اِسے مُتّفِقہ طور پر منظُور کِیا۔

صدر کِمبل نے درخواست کی ہے کہ اب مَیں یہ خط پڑھُوں:

جَیسا کہ ہم نے کارِ الہٰی کی اِس دھرتی پر توسیع دیکھی ہے، ہم شُکر گُزار ہُوئے ہیں کہ بُہت سی قَوموں کے لوگوں نے بحال شُدہ اِنجِیل کے پیغام پر مُثبت ردِعمل ظاہر کِیا ہے، اور ہمیشہ بڑھتی ہُوئی تعداد میں کلِیسیا میں شامِل ہُوئے ہیں۔ اِس بات نے نتیجتاً ہم میں اِس خواہش کو تحریک بخشی ہے کہ کلِیسیا کے ہر اَہل رُکن کو وہ تمام مراعات اور برکات دی جائیں جو اِنجِیل فراہم کرتی ہے۔

چُوں کہ ہم اُن وعدوں سے آگاہ ہیں جو ہم سے پہلے کلِیسیا کے نبیوں اور صدُور نے کیے کہ کسی وقت، خُدا کے اَبَدی منصُوبے میں ہمارے تمام بھائی جو اَہل ہیں کہانت پا سکیں گے، اور اُن کی راست بازی دیکھتے ہُوئے جِن سے کہانت روک کر رکھی گئی ہے، ہم نے، اپنے اِن وفادار بھائیوں کے حق میں، ہیکل کے بالائی کمرے میں گھنٹوں خُداوند سے اِلہامی راہ نمائی پانے کے لیے طویل اور سنجِیدہ اِلتجا کی ہے۔

اُس نے ہماری دُعائیں سُن لی ہیں، اور مُکاشفے سے تصدیق کی ہے کہ وہ دیرینہ موعودہ دِن آ گیا ہے جب کلِیسیا میں ہر وفادار، اَہل مرد مُقَدَّس کہانت، اِس کے اِلہامی اِختیار کے اظہار کی قُدرت کے ساتھ پا سکتا ہے، اور اپنے پیاروں کے ساتھ اِس سے مِلنے والی ہر برکت سے شادمان ہو سکتا ہے، بشمول ہیکل کی برکات کے۔ اِسی کی مُطابقت میں، کلِیسیا کے تمام اَہل مرد نسل اور رنگ کے لحاظ کے علاوہ کہانت میں مُقرّر کیے جا سکتے ہیں۔ کہانتی سربراہان کو ہدایت دی جاتی ہے کہ وہ دونوں، ہارُونی یا ملکِ صدق کہانت میں تَقرُّری کے لیے تمام اُمیدواروں کا اِنٹرویو احتیاط سے لینے کی پالیسی پر عمل کریں تاکہ یقینی بنایا جائے کہ وہ اَہلیت کے قائم کردہ معیار پر پُورا اُترتے ہیں۔

ہم سنجیدگی سے اِعلان کرتے ہیں کہ اب خُداوند نے تمام زمِین پر اپنے بچّوں کی برکت کے لیے اپنی مرضی ظاہر کر دی ہے جو اُس کے مُختار خادِموں کی آواز سُنیں گے، اور خُود کو اِنجِیل کی ہر برکت پانے کے لیے تیار کریں گے۔

سپنسر ڈبلیو کِمبل کو نبی، رویا بین، اور مُکاشفہ بین اور کلِیسیائے یِسُوع مسِیح برائے مُقَدَّسینِ آخِری ایّام کا صدر مانتے ہُوئے، یہ تجویز کی جاتی ہے کہ ہم بحیثِیتِ دستُور ساز جماعت اِس مُکاشفے کو خُداوند کا کلام اور مرضی قَبُول کریں۔ تمام جو اِس کی حمایت میں ہیں اپنا دائیاں ہاتھ اُٹھا کر اِظہار کریں۔ کوئی مُخالفت میں ہے تو اِسی نِشان سے اِظہار کرے۔

مذکُورہ بالا تجویز کی تائید میں اِتفاقِ رائے مُثبت تھی۔