۱ دیکھو، مَیں تُم سے کہتا ہُوں، یہ دانِش مندی ہے، جِس سے تُم جان سکو کہ اِس مُعاملے کے بارے میں کیسے عمل کرنا ہے، پَس اَیسا میری دانِست میں واجب ہے کہ یہ میخ جِسے مَیں نے صِیُّون کی مضبُوطی کے لیے قائم کِیا ہے مضبُوط بنائی جائے۔

۲ پَس، میرا خادِم نیول کے وِٹنی اُس جگہ کا نظام سنبھالے جو تُمھارے درمیان میں نامزد کی گئی ہے، جِس پر مَیں اپنا مُقَدَّس گھر بنانے کا اِرادہ رکھتا ہُوں۔

۳ اور پھِر، یہ حِکمت کے مُطابق، اُن کے مفاد کے لیے جو مِیراثیں تلاش کرتے ہیں، ٹکڑوں میں تقسیم کی جائے، جَیسا کہ تُمھارے درمیان میں جماعت تعین کرے۔

۴ پَس، خبردار رہو کہ تُم اس مُعاملے پر دھیان دو، اور اُس حِصّے پر جو میرے نظام کے فائدے کے لیے ضروری ہے، جِس کا مقصد بنی آدم تک میرا کلام پہنچانا ہے۔

۵ پَس دیکھو، مَیں تُم سے سچّ کہتا ہُوں، یہ میری دانِست میں سب سے زیادہ واجب ہے کہ میرا کلام بنی آدم تک پہنچے، تاکہ تُمھاری بھلائی کے لیے بنی آدم کے دِل مائل کرے۔ اَیسا ہی ہو۔ آمین۔

۶ اور پھِر، مَیں تُم سے سچّ کہتا ہُوں، میرے نزدیک یہ دانِش مندی اور پسندیدہ ہے، کہ میرا خادِم جان جانسن جِس کی نذر مَیں نے قَبُول کی ہے، اور جِس کی دُعائیں مَیں نے سُنی ہیں، جِسے مَیں اَبَدی زِندگی کا وعدہ دیتا ہُوں جِس قدر وہ اب سے میرے حُکموں پر عمل کرے گا—

۷ پَس وہ یُوسف کی نسل سے ہے اور وعدے کی برکات کا حِصّے دار جو اُس کے باپ دادا سے کِیا گیا تھا—

۸ مَیں تُم سے سچّ کہتا ہُوں، یہ میری دانِست میں واجب ہے کہ وہ نظام کا رُکن بنے، تاکہ وہ بنی آدم تک میرا کلام پہنچانے میں مدد کرے۔

۹ پَس تُم اُسے اِس برکت کے لیے مُقرّر کرو گے۔ اور وہ جاں فِشانی سے اُن قرضوں کو جو اُس گھر پر ہیں جِس کا تُم نے اپنے درمیان میں ذِکر کِیا ہے چُکانے کی کوشش کرے گا، تاکہ وہ وہاں رہ سکے۔ اَیسا ہی ہو۔ آمین۔