Seksen 87
Revelesen na profesi long pait, i go long Profet Joseph Smith, long o klostu long Kirtland, Ohio, 25 Disemba, 1832. Long dispela taim ol tokpait long United States long pasin mangi-masta na pasin bilong ol lain long South Carolina long i no peim ol takis bilong bikpela gavman i planti tru. Histori bilong Joseph Smith i tok olsem “ol lukluk bilong ol trabel namel long ol nesen” i wok long kamap o “soim moa” long Profet “moa long ol bin save kamap long taim Sios bing statim raun bilong em kamaut long ples i nogat man.”
1–4, Tokaut bilong war namel long ol Stet long not na ol Stet long Saut; 5–8, Bikpela taim nogut bai pundaum antap long ol lain bilong dispela ples graun.
1 Tru, olsem Bikpela i tok long dispela ol pait em bai kamap klostu, stat long pait agensim bilong Saut Carolina, dispela bai i go inap i pinis long dai na sori bilong planti lain;
2 Na dispela taim bai kam taim pait bai kapsait i go aut antap long olgeta nesen, statim long dispela ples.
3 Long wanem lukim, dispela ol Stet long saut bai bruk agensim ol Stet long not, na dispela ol Stet long saut bai singautim ol narapela nesen, tu dispela nesen bilong Great Britain, olsem ol i save kolim, na ol bai singautim tu ol narapela nesen, long olsem bai ol i sambai long ol yet agensim ol narapela nesen; na olsem pait bai kapsait i go aut long olgeta nesen.
4 Na em i bai kamap olsem, bihain long planti de, ol mangi-masta bai kirap agensim ol master bilong ol, husat gavman bai bungim na skulim ol long pait.
5 Na em i bai kamap olsem tu olsem ol lain husat bai stap bihain long graun bai bungim ol yet, na bai kamap kros nogut tru, na bai givim hevi long ol Jentail wantaim wanpela bikpela hevi.
6 Na olsem, wantaim dispela pait na long kilim i dai ol lain bilong dispela ples graun bai soim sori; na wantaim taim nogut, na bikpela sik, na guria, na dispela klaut pairap bilong heven, na dispela strong tru na laitning olsem paia tu, bai olgeta lain bilong dispela ples graun bai pilim dispela belhat, na bel nogut i gat paia, na han bilong korosim man bilong God husat i Strong Moa Yet, inap dispela bagarap God i bin makim i mekim wanpela pinis olgeta bilong olgeta nesen;
7 Olsem dispela krai bilong ol seint, na bilong blut bilong ol seint, bai pinis long go antap insait long ol yau bilong Bikpela bilong Sabaoth, i kam long dispela ples graun, long bekim bek long ol birua bilong ol.
8 Olsem na, yupela mas sanap long ol ples i holi, na no inap surik, inap dispela de bilong Bikpela i kam; long wanem lukim, em bai kam kwiktaim, Bikpela i tok. Amen.