Seksen 48
Revelesen i go long Profet Joseph Smith, long Kirtland, Ohio, 10 Mas 1831. Profet i bin askim long Bikpela long wei bilong baim ol graun long ol sindaun bilong ol Seint. Dispela em i wanpela impoten samting bikos ol memba bilong Sios long hap long is long United States i wok long muv, long pasin bilong harim tok long komanmen bilong Bikpela, ol i mas bung long Ohio (lukim seksen 37:1–3; 45:64).
1–3, Ol Seint long Ohio i mas tilim ol graun bilong ol wantaim ol brata bilong ol long sios; 4–6, Ol Seint i mas baim ol dispela hap graun, wokim wanpela siti, na bihainim kaunsel bilong ol hetman bilong ol.
1 Em i impoten olsem yupela i mas stap tasol long dispela taim long ol ples yupela stap nau long en, olsem em bai gutpela long ol sindaun bilong yupela.
2 Na sapos yupela i gat ol graun, yupela bai givim i go long ol memba bilong sios husat i stap long is;
3 Na sapos yupela i no gat ol graun, larim ol baim graun long nau long ol hap ples nambaut, sapos em i gutpela long ol, long wanem em i impoten olsem ol i gat ples long stap long dispela taim.
4 Em i impoten olsem yupela inap bungim olgeta mani bilong yupela, na olsem yupela inap kisim olgeta samting wantaim stretpela pasin, olsem yupela inap baim ol graun bilong yupela yet, na tu dispela siti.
5 Dispela ples Bikpela i no soim yet; tasol bihain long ol brata bilong yupela long is i kam, ol lida bilong Sios bai makim sampela man, na Bikpela bai givim save long ol long save long dispela ples, o Bikpela bai soim ol.
6 Na ol lida bilong Sios bai makim ol long baim ol dispela graun, na long stat long brukim graun long wokim dispela siti; na bihain bai yupela stat long bung wantaim ol famili bilong yupela, olgeta wanwan man wantaim famili bilong ol, olsem sindaun bilong em i orait, na olsem presidensi na bisop bilong sios i makim em, olsem long ol lo na komanmen yu bin kisim, na tu yu bai kisim long bihain taim. Em tasol. Amen.