Seksen 53
Revelesen i go long Profet Joseph Smith bilong Algernon Sidney Gilbert, long Kirtland, Ohio, 8 Jun 1831. Long askim bilong Sidney Gilbert, Profet i askim Bikpela long wanem kain wok na singaut bilong Brother Gilbert insait long Sios.
1–3, Singaut na makim bilong Sidney Gilbert insait long Sios em long kisim odinesen olsem wanpela elda; 4–7, Em bai wok tu olsem wanpela wokman bilong bisop.
1 Lukim, mi tokim yu, wokman bilong mi Sidney Gilbert, olsem mi harim ol beten bilong yu; na yu bin prea long mi olsem, mi Bikpela God bilong yu, i mas mekim klia long yu, long singaut na makim bilong yu long dispela sios, mi Bikpela, i bin kirapim long dispela ol las de.
2 Lukim, mi, Bikpela husat i bin dai long ol sin bilong dispela wol, givim yu wanpela komanmen olsem yu mas tanim baksait long dispela ples graun.
3 Kisim antap long yu dispela odinesen bilong mi, olsem dispela bilong wanpela elda, long autim toktok bilong feit na tanim bel pasin na tekewe sin, olsem long tok bilong mi, na long kisim Holi Spirit wantaim han antap long het.
4 Na tu long kamap wanpela wokman bilong dispela sios long dispela ples em bisop bai makim, olsem long ol komanmen Bikpela bai givim long bihain taim.
5 Na gen, tru mi tokim yu, yu bai kisim raun bilong yu wantaim ol wokman bilong mi Joseph Smith Jnr., na Sidney Rigdon.
6 Lukim, dispela ol nambawan odinens em yu bai kisim; na ol narapela Mi bai soim yu long bihain taim, olsem long wok bilong yu long gaden wain bilong mi.
7 Na gen, mi laikim olsem yu bai save olsem husat bai go inap long pinis, em bai kisim salvesen. Em tasol. Amen.