Seksen 67
Revelesen i go long Profet Joseph Smith, long Hiram, Ohio, long stat bilong Novemba 1831. Dispela taim em bin taim bilong wanpela spesol konferens, na buk bilong ol dispela revelesen Profet i bin kisim pinis long Bikpela ol i bin tingim na mekim kamap pinis ol dispela samting (lukim het tok long seksen 1). William W. Phelps i bin nau tasol bin kamapim hap bilong printim ol samting long Independence, Missouri. Dispela konferens i bin mekim desisen long putim aut ol dispela revelesen insait long Book of Commandments (Buk bilong ol Komanmen) na long printim 10,000 bilong ol (em bikos long sampela samting hat long wokim ol i bin daunim i go long 3,000 buk tasol). Planti bilong ol sios brata i bin tokaut long strongpela testimoni olsem ol dispela revelesen ol i bin bungim bilong mekim buk i bin tru tru, olsem Holi Gos i bin witnes antap long ol. Histori bilong Joseph Smith i bin rekotim olsem bihain long Bikpela i bin givim dispela revelesen yumi save long en olsem seksen 1, sampela toktok i bin kamap long tokples i stap insait long ol dispela revelesen. Dispela revelesen nau i bihainim dispela.
1–3, Bikpela i save harim beten bilong ol na was long ol elda bilong Em; 4–9, Em i salensim man i gat bikpela save stret long kamapim samting em i gutpela moa yet long ol liklik stret revelesen bilong Em; 10–14, Spirit bai senisim ol elda husat i gat feit na bai ol i lukim pes bilong God.
1 Lukim na harim gut, O yupela ol elda bilong sios bilong mi, husat i bungim yupela yet wantaim, husat ol beten bilong yupela mi harim pinis, na husat ol bel bilong yupela mi save, na husat ol laik bilong yupela u stap long pinis long ai bilong mi.
2 Lukim na lukim gen, ai bilong mi i stap antap long yupela, na ol heven na dispela ples graun i stap long ol han bilong mi, na ol rits samting bilong oltaim oltaim em i bilong mi long givim.
3 Yupela i traim long bilip olsem yupela i mas kisim dispela blesing em i givim long yupela; tasol lukim, tru mi tokim yupela i bin gat poret long bel bilong yupela, na tru dispela em i wai yupela i no bin kisim.
4 Na nau mi, Bikpela, givim long yupela wanpela testimoni bilong toktru bilong ol dispela komanmen em i stap long han bilong yupela.
5 Ai bilong yupela i bin stap antap long wokman bilong mi Joseph Smith Jnr., na toktok bilong em yupela i bin save, na asua bilong em yupela i bin save; na yupela bin painim long yupela yet save olsem yupela bin inap long autim tok gutpela moa long em; dispela yupela i save tu.
6 Nau, yupela painim long Buk bilong ol Komanmen, maski dispela liklik stret namel long ol, na makim em husat i gat bikpela save moa namel long yupela;
7 O, sapos i gat sampela namel long yupela husat inap raitim wanpela olsem dispela, olsem yupela i stret long tok olsem yupela i no save olsem ol dispela i tru;
8 Tasol sapos yupela i no inap long mekim kamap wanpela olsem dispela, yupela i stap aninit long kot sapos yupela i no witnesim olsem ol dispela i tru.
9 Long wanem yupela i save olsem i nogat pasin i no stret insait long ol, na dispela em i stret i kam daun long antap, long Papa bilong ol lait.
10 Na gen, tru mi tokim yupela olsem dispela em i spesol rait bilong yupela, na wanpela promis mi givim long yupela husat i kisim odinesen long dispela ministri, olsem sapos yupela i rausim ol pasin bilong jeles na poret long yupela yet, na daunim yupela yet long ai bilong mi, long wanem yupela i nogat inap daun pasin, dispela vel bai buruk na yupela bai lukim mi na save olsem em mi—i no long bodi na tu i no long tingting bilong man, tasol wantaim tingting bilong spirit.
11 Long wanem nogat man i bin lukim God long wanpela taim long bodi, tasol sapos Spirit bilong God i mekim dispela man i senis.
12 Na tu nogat wanpela man bilong graun inap sanap long ai bilong God, na tu nogat man wantaim tingting bilong man.
13 Yupela i no inap sanap long ai bilong God nau, na tu ol wok bilong ol ensel; olsem na, go het yet long pasin bel isi inap yupela i kamap gutpela olgeta.
14 Noken larimol tingting bilong yupela i go bek; na taim yupela i kamap stretpela, long taim bilong mi yet, yupela bai lukim na save long dispela we wokman bilong mi Joseph Smith Jnr., i givim yupela long han bilong em. Amen.