Ol Skripsa
Doktrin na ol Kavanen 52


Seksen 52

Revelesen i go long Profet Joseph Smith bilong ol elda bilong Sios, long Kirtland, Ohio, 6 Jun 1831. Sios i bin holim wanpela konferens long Kirtland, stat long namba 3 de na pinis long namba 6 de bilong Jun. Long dispela konferens ol sios lida i bin mekim ol nambawan wanpela kain odinesen long opis bilong hai pris, na ol sampela long ol wanpela kain giaman spirit we wok long giamanim ol i wok long soim aut na ol lida bilong sios i wok long mekim ol save gut long samting i gutpela na samting i nogut na wok long hatim ol dispela giaman spirit.

1–2, Bikpela i makim narapela konferens bihain long kamap long Missouri; 3–8, Ol makim bilong ol wanpela kain elda long raun wantaim i bin kamap; 9–11, Ol elda bai mas tisim ol samting ol aposol na ol profet i bin raitim; 12–21, Ol dispela lain husat i kisim lait i kam long Spirit bai bringim i kamap ol kaikai bilong hamamas na gutpela save; 22–44, Bikpela i makim sampela elda long go aut long autim toktok long gospel taim ol i wok long raun i go long Missouri long konferens.

1 Lukim, olsem Bikpela i tok i go long elda husat em i bin singautim na makim ol long dispela ol las de, wantaim nek bilong Spirit bilong em—

2 Em i tok: mi, Bikpela, bai mekim yupela i save long wanem em mi laik bai yupela i wokim long dispela taim inap long narapela konferens, em bai kamap long Missouri, antap long dispela graun em mi bai dediketim i go long lain bilong mi, husat ol hap lain bilong Jacob i stap yet, na ol dispela husat bai kisim laip oltaim oltaim aninit long kavanen ol i mekim wantaim God.

3 Olsem na, tru mi tokim yupela, larim ol wokman bilong mi Joseph Smith Jnr., na Sidney Rigdon kisim raun bilong tupela klostu long taim olgeta samting ol inap long redim long lusim haus bilong ol, na raun i go long graun long Missouri.

4 Na inap olsem tupela i stap wantaim feit long mi, em bai kamap long tupela wanem samting tupela bai i mas wokim;

5 Na em bai kamap tu long tupela olsem, sapos tupela i stap wantaim feit bai mi soim ol long graun bilong ol.

6 Na inap olsem tupela i no stap wantaim feit long mi, mi bai rausim tupela, long save na laik bilong mi, olsem i luk gut long mi.

7 Na gen, tru mi tokim yupela, larim wokman bilong mi Lyman Wight na wokman bilong mi John Corrill bai kisim raun bilong tupela kwiktaim;

8 Na tu wokman bilong mi John Murdock, na wokman bilong mi Hyrum Smith, bai kisim raun bilong tupela i go long seim ples na wokabaut i go olsem long Detroit.

9 Na larim tupela i raun long dispela hap na autim tok bilong gospel long wokabaut bilong tupela, na i no tisim ol narapela samting tasol ol dispela toktok tasol em ol profet na aposol i raitim pinis, na dispela ol samting Spirit bilong Bel Isi yet i tisim tupela long beten wantaim feit.

10 Larim ol i go tupela tupela, na olsem larim ol autim toktok long gospel long wokabaut bilong ol long olgeta kongrigesen, na baptais, na putim han antap long het long arere long wara.

11 Long wanem olsem Bikpela i tok, mi bai katim sot wok bilong mi long stretpela pasin, long wanem dispela ol de bai kamap taim mi bai mekim planti moa long ol strongpela wok bilong mi em bai kamap i go long winim pait.

12 Na larim wokman bilong mi Lyman Wight lukaut gut, long wanem Satan i laik long sakim em liklik tru olsem wit.

13 Na lukim, husat man i stap wantaim feit bai Bikpela i mekim em hetman long bosim planti samting.

14 Na gen, mi bai givim yupela wanpela mak bilong olgeta samting, olsem bai Satan i no inap giamanim yupela long ol samting; long wanem Satan i stap raun long laik long dispela graun, na em i wok long go nambaut na giamanim ol nesen—

15 Olsem na husat man i beten, husat gat spirit bilong tanim bel, dispela sem manmeri mi wanbel long em sapos em i harim tok long ol odinens bilong mi.

16 Em husat i toktok, husat bel bilong em i buruk na i gat spirit bilong tanim bel, husat em i daunim em yet long toktok bilong em na kisim strong, dispela sem manmeri i bilong God sapos em i harim tok long ol odinens bilong mi.

17 Na gen, husat man i guria aninit long pawa bilong mi bai mi mekim em kamap strong, na bai bringim i kam ol kaikai bilong hamamas na gutpela save, olsem long ol revelesen na ol toktru em mi bin givim yupela.

18 Na gen, husat man Satan i daunim em na em i no bringim i kam ol kaikai, olsem long dispela mak, em i no bilong mi.

19 Olsem na, long dispela mak yupela bai save long ol spirit long olgeta stap bilong ol aninit long ol heven long olgeta hap bilong dispela ples graun.

20 Na ol dispela de i kam pinis; na olsem long feit bilong ol manmeri tasol bai ol dispela samting bai kamap long ol.

21 Lukim, dispela komanmen mi givim i go long olgeta elda husat mi bin makim.

22 Na gen, tru mi tokim yupela, larim wokman bilong mi Thomas B. Marsh na wokman bilong mi Ezra Thayre kisim raun bilong tupela tu, na autim toktok bilong gospel long wokabaut bilong tupela i go long dispela sem ples.

23 Na gen, larim wokman bilong mi Isaac Morley na wokman bilong mi Ezra Booth kisim raun bilong tupela, na autim toktok bilong gospel long wokabaut bilong tupela i go long dispela sem ples.

24 Na gen, larim ol wokman bilong mi Edward Partridge and Martin Harris kisim raun bilong tupela wantaim ol wokman bilong mi Sidney Rigdon na Joseph Smith Jnr.

25 Larim ol wokman bilong mi David Whitmer and Harvey Whitlock tu kisim raun bilog tupela, na autim toktok bilong gospel long wokabaut bilong tupela i go long dispela sem ples.

26 Na larim ol wokman bilong mi Parley P. Pratt na Orson Pratt kisim raun bilong tupela, na autim tok bilong gospel long wokabaut bilong tupela tu long dispela sem ples.

27 Na larim ol wokman bilong mi Solomon Hancock na Simeon Carter tu bai kisim raun bilong tupela i go long dispela sem ples, na autim toktok bilong gospel long wokabaut bilong tupela.

28 Larim ol wokman bilong mi Edson Fuller na Jacob Scott tu kisim raun bilong tupela.

29 Larim ol wokman bilong mi Levi W. Hancock na Zebedee Coltrin tu bai kisim raun bilong tupela.

30 Larim ol wokman bilong mi Reynolds Cahoon na Samuel H. Smith tu bai kisim raun bilong tupela.

31 Larim ol wokman bilong mi Wheeler Baldwin na William Carter tu bai kisim raun bilong tupela.

32 Na larim ol wokman bilong mi Newel Knight na Selah J. Griffin tupela wantaim bai kisim odinesen, na tu bai kisim raun bilong tupela.

33 Na tu, tru mi tok, larim olgeta dispela lain kisim raun bilong ol i go long wanpela ples, long ol planti rot, na wanpela man bai i no wokim samting antap long samting narapela i kamapim pinis, tu long raun long rot bilong narapela.

34 Husat man i stap wantaim feit, dispela sem man bai mi lukautim na blesim wantaim planti kaikai.

35 Na gen, mi tokim yupela, larim ol wokman bilong mi Joseph Wakefield na Solomon Humphrey kisim raun bilong tupela i go long ol graun long is;

36 Larim ol wok wantaim ol famili bilong ol, na i no tisim ol narapela samting tasol ol dispela toktok tasol em ol profet na aposol i raitim pinis, ol dispela samting ol i bin lukim na harim na gat bikpela bilip, olsem ol tok profet bai inap kamap.

37 Bikos em i brukim lo, larim olsem dispela wok ol lida bilong sios i bin givim long Heman Basset bai ol i kisim bek long em, na givim long Simonds Ryder.

38 Na gen, tru mi tokim yupela, larim Jared Carter bai odein olsem wanpela pris, na tu George James bai kisim odinesen olsem wanpela pris.

39 Larim ol elda husat i no go long was long sios, na autim tok long gospel long ol dispela hap ples nambaut long hap ol i stap; na larim ol wok wantaim han bilong ol yet olsem bai i nogat man i lotuim ol giaman god na tu bai ol man i no mekim pasin nogut.

40 Na tingim long olgeta samting ol turangu lain na ol lain i gat nid, ol sik lain na ol lain i painim hevi, long wanem husat manmeri i no wokim ol dispela samting, dispela sem manmeri i no disaipol bilong mi.

41 Na gen, larim ol wokman bilong mi Joseph Smith Jnr., na Sidney Rigdon na Edward Partridge kisim i go wantaim ol wanpela setifiket i kam long sios. Na larim olsem bai i gat wanpela tu bilong wokman bilong mi Oliver Cowdery.

42 Na tu, wankain olsem mi bin tok pinis, sapos yupela i stap wantaim feit yupela bai bung wantaim yupela yet long hamamas wantaim long graun bilong Missouri, dispela em i ples bilong yupela, dispela nau em i graun bilong ol birua bilong yupela.

43 Tasol, lukim, mi Bikpela, bai mekim kamap dispela siti hariap tru long taim bilong em, na bai mi putim kraun long ol lain husat i stap wantaim feit wantaim hamamas tru na wantaim piling bilong hamamas.

44 Lukim, mi Jisas Krais, Pikinini Man bilong God, na mi bai litimapim ol long las de. Em tasol. Amen.