Seksen 112
Revelesen i go long Profet Joseph Smith bilong Thomas B. Marsh, long Kirtland, Ohio, 23 Julai, 1837, long dispela Twelpela Aposol bilong dispela Pikinini Sipsip. Dispela revelesen i bin kam long dispela de tupela Elda Heber C. Kimball na Orson Hyde i bin autim toktok long gospel long nambawan taim long England. Thomas B. Marsh long dispela taim i bin Presiden bilong ol Kwarom bilong ol Twelpela Aposol.
1–10, Dispela Twelpela i mas salim dispela gospel na kirapim dispela tok lukaut i go long olgeta nesen na pipol; 11–15, Ol i mas kisim diwai kros bilong ol, bihainim Jisas, na givim kaikai long ol sipsip bilong Em; 16–20, Ol dispela lain husat i kisim Nambawan Presidensi i kisim Bikpela; 21–29, Tudak i karamapim dispela ples graun, na ol dispela lain tasol husat i bilip na i baptais bai kisim salvesen; 30–34, Dispela Nambawan Presidensi na dispela Twelpela i holim ki bilong dispela dispensesen bilong dispela ol taim bilong pulap.
1 Tru olsem Bikpela i tokim yu wokman bilong mi Thomas: Mi bin harim ol beten bilong yu; na ol gutpela pasin bilong yu i bin kam antap olsem wanpela samting bilong holim long tingting long ai bilong mi, long makim ol dispela lain, ol brata bilong yu, husat mi bin makim long tokaut long testimoni long nem bilong mi na long salim go aut namel long olgeta nesen, wanples, wantok, na pipol, na odenim thru long wok bilong ol wokman bilong mi.
2 Tru mi tokim yu, i bin gat sampela samting insait long bel bilong yu na tu wantaim yu we mi, Bikpela, i no bin hamamas long en.
3 Tasol, inap olsem yu daunim yu yet mi bai litimapim; olsem na, olgeta sin bilong yu, mi fogivim.
4 Larim bel bilong yu i mas hamamas long pes bilong mi; na yu bai givim witnes long nem bilong mi, i no long ol Jentail tasol, tasol tu long ol Ju; na yu bai salim i go aut tok bilong mi long olgeta hap bilong dispela ples graun.
5 Yu mas tok pait, olsem, moning i go moning; na olgeta de larim tok lukaut bilong nek bilong yu bai go aut; na taim nait i kam noken larim ol lain bilong dispela ples graun slip, bikos long toktok bilong yu.
6 Larim ol lain bai save long ples bilong yu long Zion, na noken rausim haus bilong yu; long wanem, mi, Bikpela, i gat wanpela bikpela wok bilong yu long wokim, long tokaut long nem bilong mi namel long ol pikinini bilong man.
7 Olsem na, yu mas pasim strong namel bilong yu long dispela wok. Larim lek bilong yu i mas karamap tu, long wanem Bikpela i makim yu, na rot bilong yu i go namel long ol maunten, na namel long planti nesen.
8 Na long toktok bilong yu planti bikpela manmeri bai kam daun, na long toktok bilong yu planti liklik manmeri bai i kisim biknem.
9 Nek bilong yu bai kamap olsem wanpela hatpela toktok long ol lain husat i brukim lo; na wantaim hatpela toktok bilong yu bai larim tang bilong dispela man i save mekim giaman toktok stopim pasin nogut bilong em.
10 Yu mas daunim yu yet; na Bikpela God bilong yu bai holim han bilong yu na lidim yu, na givim yu bekim long ol beten bilong yu.
11 Mi save long bel bilong yu, na harim ol beten bilong yu long ol brata bilong yu. Noken laikim ol moa long ol narapela, tasol larim lav bilong yu long ol olsem long yu yet; na larim lav bilong yu i bikpela moa long olgeta manmeri, na long olgeta lain husat i lavim nem bilong mi.
12 Na beten long ol brata bilong yu, ol dispela Twelpela. Givim strongpela toktok stret long ol long nem bilong mi, na larim ol bai kisim strongpela toktok long olgeta sin bilong ol, na yu i mas stap wantaim feit long ai bilong mi i go long nem bilong mi.
13 Na bihain long ol temtesen bilong ol, na planti tru bikpela pen, lukim, mi, Bikpela, bai lukluk long painim ol, na sapos ol i no strongim bel bilong ol, na i no strongim nek bilong ol agensim mi, ol i ken senisim bel bilong ol na kam insait long sios, na mi bai mekim ol orait.
14 Nau, mi tokim yu, na wanem samting mi tokim yu long en, mi tokim olgeta dispela Twelpela: Kirap na yu mas pasim strong namel bilong yu, kisim kros bilong yu, bihainim mi, na givim kaikai long ol sipsip bilong mi.
15 Noken litimapim yupela yet; noken birua agensim wokman bilong mi Joseph; long wanem tru mi tokim yupela, mi stap wantaim em, na han bilong mi bai stap antap long em; na ol dispela ki we mi bin givim em, na long yupela tu, bai no inap raus long em inap mi kam.
16 Tru, mi tokim yu, wokman bilong mi Thomas, yu em dispela man mi bin makim long holim ol dispela ki bilong kingdom bilong mi, olsem ol dispela Twelpela, namel nambaut long olgeta nesen—
17 Olsem yu bai kamap wokman bilong mi long opim dispela dua bilong dispela kingdom long olgeta ples we wokman bilong mi Joseph, na wokman bilong mi Sidney, na wokman bilong mi Hyrum, i no inap long kam;
18 Long wanem long ol mi putim dispela risponsibiliti bilong olgeta sios long liklik taim.
19 Olsem na, wanem hap ol i bai salim yu, yu go, na mi bai stap wantaim yu; na long wanem ples yu bai tokaut long nem bilong mi wanpela dua i gat pawa bai op long yu, olsem ol bai kisim tok bilong mi.
20 Husat man i kisim tok bilong mi i kisim mi, na husat man i kisim mi, kisim ol dispela lain, Nambawan Presidensi, husat mi bin salim, husat mi bin mekim ol kaunsela long nem bilong mi i go long yu.
21 Na gen, mi tokim yu, olsem husat man yu bai salim long nem bilong mi, long nek bilong ol brata bilong yu, dispela Twelpela, husat i kisim tok orait long stretpela wei na kisim atoriti long yu, bai i gat pawa long opim dispela dua bilong kingdom bilong mi, long wanem kain nesen we yu bai salim ol—
22 Inap olsem ol bai daunim ol yet long ai bilong mi, na stap long tok bilong mi, na harim nek bilong Spirit bilong mi.
23 Tru, tru, mi tokim yu, tudak karamapim dispela ples graun, na bikpela tudak i karamapim ol tingting bilong ol pipol, na ol bodi i bagarap long pes bilong mi.
24 Lukim, pe bek bai kam kwiktaim antap long ol lain bilong dispela ples graun, wanpela de bilong bikpela kros, wanpela de bilong paia, wanpela de bilong bagarap, bilong krai, bilong sori, na bilong bikpela pasin bilong soim sori; na olsem wanpela raunwin dispela bai kam antap long olgeta pes bilong dispela ples graun, Bikpela i tok.
25 Na long haus bilong mi dispela bai i stat, na long haus bilong mi dispela bai go aut, Bikpela i tok;
26 Pastaim namel long ol dispela lain namel long yupela, Bikpela i tok, ol husat i tok olsem ol i save long nem bilong mi na i no bin save long mi, na bin tok nogut agensim mi insait long haus bilong mi, Bikpela i tok.
27 Olsem na, mekim olsem yupela i no givim trabel long yupela yet long ol samting bilong sios bilong mi insait long dispela ples, Bikpela i tok.
28 Tasol klinim gut bel bilong yupela long ai bilong mi; na bihain yupela i go long olgeta hap bilong dispela wol, na autim toktok long gospel bilong mi long olgeta wanwan manmeri husat i no kisim yet;
29 Na em husat i bilip na baptais, God bai seivim em, na em husat i no bilip, na i no baptais, bai lus olgeta long kot.
30 Long wanem long yupela, ol Twelpela, na ol dispela, Nambawan Presidensi, husat Bikpela i makim wantaim yupela long kamap olsem ol kaunsela bilong yupela na ol lida bilong yupela, pawa bilong dispela prishud Bikpela i givim, long dispela ol laspela de na long dispela laspela taim, long dispela dispensesen bilong taim bilong pulap.
31 Dispela pawa yupela holim, wantaim dispela olgeta husat i bin kisim risponsibiliti long wanpela taim long kamap bilong olgeta samting;
32 Long wanem tru mi tokim yupela, ol dispela ki bilong dispela dispensesen, we yupela i bin kisim, i bin kamdaun long ol tumbuna, na laspela tru, i bin kamdaun long heven long yupela.
33 Tru mi tokim yupela, lukim, singaut bilong yupela em i impoten tumas. Klinim ol bel bilong yupela na ol kolos bilong yupela, nogut blut bilong dispela lain long dispela taim bai stap long han bilong yupela.
34 Stap wantaim feit inap mi kam, long wanem mi kam kwiktaim; na pe bilong mi em i stap wantaim mi long givim pe long olgeta wanwan manmeri bihainim wok bilong ol. Mi tasol mi Alpa na Omega. Amen.