Seksen 30
Revelesen i go long Profet Joseph Smith bilong David Whitmer, Peter Whitmer Jnr., na John Whitmer, long Fayette, New York, long Septemba 1830, bihain long tripela de konferens long Fayette, tasol pastaim long ol elda bilong Sios i go nambaut. Bipo long dispela taim Sios i bin raitim na putim aut dispela ol samting olsem tripela hap revelesen; Profet i bin putim ol wantaim long wanpela seksen bilong dispela buk bilong Doktrin na ol Kavanen long dispela yia 1835.
1–4, Bikpela i korosim David Whitmer long taim em i no sevim em gut wantaim olgeta bel bilong em; 5–8, Peter Whitmer Jnr., bai poromanim Oliver Cowdery long wanpela misin wok i go long ol lain bilong Leiman; 9–11, Bikpela i singautim John Whitmer long go na autim toktok bilong gospel.
1 Lukim, mi tokim yu, David, olsem yu bin poretim ol man, na yu no bin putim tras bilong yu long mi long strongim yu olsem yu mas mekim.
2 Tasol tingting bilong yu i bin stap tasol long ol samting bilong dispela ples graun planti moa long ol samting bilong mi, Mi Husat i Mekim Yu, na dispela ministri em Bikpela i bin singautim yu long en; na yu no harim tok bilong Spirit bilong mi, na long ol dispela lain husat Bikpela i makim olsem ol bos bilong yu, tasol yu bilip tasol ol dispela lain husat mi no givim tok strong long ol.
3 Olsem na, yu stap yu yet long askim long ol samting long han bilong mi, na tingting strong long ol samting yu bin kisim.
4 Na bai yu stap long haus bilong papa bilong yu, inap mi givim yu moa oda. Na yu bai putim yu yet i go insait long wok bilong sios, na long ai bilong ol manmeri long dispela wol, na long ol hap ples nambaut. Amen.
5 Lukim, mi tokim yu, Peter, olsem yu bai mekim wokabaut bilong yu wantaim brata bilong yu Oliver; long wanem dispela taim i kamap nau olsem em i gutpela long mi, bilong yu long opim maus bilong yu na tokaut long gospel bilong mi; long dispela as, noken poret, tasol harim tok na kaunsel bilong brata bilong yu, dispela em bai givim yu.
6 Na tu yu mas pilim olgeta hevi bilong em, larim yu litimapim bel bilong yu long mi wantaim beten na feit, long bai Bikpela i banisim yu na em long birua; long wanem mi bin givim em pawa long kamapim sios bilong mi namel long ol lain bilong Leiman;
7 Na i nogat wanpela husat mi makim long kamap kaunsela bilong em long sios, long ol samting bilong sios, tasol brata bilong em, Joseph Smith Jnr.
8 Na nau, harim tok long ol dispela samting na wok hat long holim pas ol komanmen bilong mi, na yu bai gat laip oltaim oltaim. Amen.
9 Lukim, mi tokim yu, wokman bilong mi Jon, olsem yu bai stat long dispela taim i go long tokaut long gospel bilong mi olsem wantaim krai bilong wanpela biugel.
10 Na tu yu bai wok long ples bilong brata bilong yu Philip Burrough, na long dispela hap ples nambaut, na tu long wanem hap ol manmeri inap long harim yu, inap mi givim oda long yu long lusim dispela ples.
11 Na olgeta wok bilong yu bai i stap long Saion tasol, wantaim olgeta sol bilong yu, long dispela taim i go; na moa yet, yu bai tokaut long sapotim tok bilong mi, na i no poret long wanem samting man bilong dispela graun i ken wokim, long wanem mi stap wantaim yu. Amen.