Ol Skripsa
Doktrin na ol Kavanen 18


Seksen 18

Revelesen i go long Profet Joseph Smith, Oliver Cowdery, na David Whitmer, long Fayette, New York, long Jun 1829. Long tingting bilong Profet, dispela revelesen i mekim kamap “singaut bilong ol twelpela aposol long dispela ol las de, na tu ol toksave bilong kamapim dispela Sios.”

1–5, Ol skripsa i soim wei long kamapim dispela Sios; 6–8, Dispela ples graun i wok long kamap mau wantaim pasin nogut; 9–16, Pe bilong ol sol em i bikpela tru long ai bilong God; 17–25, Long kisim salvesen, ol manmeri mas kisim nem bilong Krais antap long ol yet; 26–36, Bikpela i soim ol wok na misin bilong ol Twelpela Aposol; 37–39, Oliver Cowdery na David Whitmer bai lukluk na painim ol dispela Twelpela; 40–47, Long kisim salvesen, ol manmeri i mas tanim bel, baptais, na holim pas ol komanmen.

1 Nau, lukim, long wanem yu wokman bilong mi Oliver Cowdery i bin gat laik long lainim long mi, mi givim yu ol dispela toktok.

2 Lukim, mi bin soim klia long yu, long Spirit bilong mi long planti taim nau, olsem ol dispela samting em yu bin raitim ol i tru; olsem na yu save olsem ol i tru.

3 Na sapos yu save olsem dispela ol samting i tru, lukim, mi givim yu wanpela komanmen, olsem yu bai trastim ol dispela samting i stap pinis;

4 Long wanem insait long ol em ol samting i stap pinis long as bilong sios bilong mi, gospel bilong mi na bikpela ston bilong mi.

5 Na nau, sapos yu kamapim sios bilong mi, antap long as tingting bilong gospel bilong mi na antap long ston bilong mi, ol dua bilong hel bai no inap long winim yu.

6 Lukim, dispela ples graun i wok long kamap mau wantaim pasin nogut; na em i mas kamap olsem ol pikinini manmeri bilong dispela graun i mas pilim laik long tanim bel, ol Jentail na tu ol lain bilong haus bilong Israel.

7 Na nau, long wanem yu bin baptais pinis long han bilong wokman bilong mi Joseph Smith Jnr., long olsem em mi bin tok strong long em, em i mekim pinis dispela samting mi tok strong long em long mekim.

8 Na nau, noken kirap nogut olsem mi singautim em long as tingting bilong mi yet, dispela as tingting em mi yet mi save; na nau sapos em i wok hat long holim pas ol komanmen bilong mi em bai Bikpela i blesim em wantaim laip oltaim oltaim; na nem bilong em Joseph.

9 Na nau, Oliver Cowdery, mi tokim yu, na tu long yu David Whitmer, long dispela strongpela toktok; olsem, lukim, mi tok strong long olgeta manmeri long olgeta hap long tanim bel, na mi tokim yu, wankain olsem mi bin tokim Pol em aposol bilong mi, long wanem mi singautim yu wankain olsem mi bin singautim em.

10 Holim long tingting olsem pe bilong sol em i bikpela tru long ai bilong God;

11 Olsem na, lukim, Bikpela em Ridima bilong yu i karim bikpela pen na dai; na nau em i karim dispela bikpela pen bilong olgeta manmeri, olsem olgeta manmeri inap tanim bel na kam long em.

12 Na em i kirap gen long dai, olsem em inap bringim olgeta manmeri i kam long em, sapos tasol ol i tanim bel.

13 Na bikpela hamamas tru Bikpela bai pilim taim wanpela sol i tanim bel!

14 Olsem na, Bikpela i singautim yu long tokaut long ol dispela lain long tanim bel.

15 Na sapos em i olsem yu bai wok long olgeta de bilong yu long dispela graun long tokaut long tanim bel long ol dispela lain, na bringim, inap olsem wanpela sol tasol i kam long mi, bikpela hamamas tru bai yu gat wantaim em insait long kingdom bilong Papa bilong mi!

16 Na nau, sapos hamamas tru bilong yu i bikpela stret wantaim wanpela sol husat yu bringim i kam long mi long kingdom bilong Papa bilong mi, hamamas tru bilong yu bai bikpela moa yet sapos yu bai bringim planti sol i kam long mi!

17 Lukim, yu gat gospel bilong mi long ai bilong yu, na bikpela ston bilong mi, na salvesen bilong mi.

18 Askim Papa long nem bilong mi wantaim feit, na bilip olsem yu bai kisim, na yu bai gat Holi Gos, husat i save mekim kamap klia olgeta samting em i gutpela long ol pikinini manmeri bilong dispela graun.

19 Na sapos yu nogat feit, hop, na siariti, yu i no inap wokim wanpela samting.

20 Noken kirapim pait wantaim ol narapela sios, tasol sios bilong satan tasol.

21 Kisim nem bilong Krais antap long yu yet, na tokaut long ol toktru wantaim gutpela na strongpela tingting.

22 Na olgeta lain husat i tanim bel na baptais long nem bilong mi, husat em Jisas Krais, na stap strong i go inap long pinis, ol dispela lain bai mi kisim bek ol.

23 Lukim, Jisas Krais em dispela nem em Papa i bin givim, na i nogat wanpela narapela nem we bai ol man inap kisim salvesen;

24 Olsem na, olgeta manmeri mas kisim antap long ol yet dispela nem Papa i bin givim em, long wanem long dispela nem tasol bai Papa i singautim ol long las de.

25 Olsem na, sapos ol i no save long dispela nem husat i singautim ol, ol i no inap long stap long kingdom bilong Papa bilong mi.

26 Na nau, lukim, i gat ol narapela lain husat mi singautim ol long autim gospel bilong mi, long ol Jentail na tu long ol Ju;

27 Na moa yet, olsem twelpela; na dispela Twelpela bai kamap olsem ol disaipol bilong mi, na ol bai kisim antap long ol yet nem bilong mi; na dispela Twelpela em ol husat i laik tru long kisim antap long ol yet nem bilong mi wantaim olgeta laik long bel bilong ol.

28 Na sapos ol i laik tru long kisim nem bilong mi antap long ol yet wantaim olgeta promis long lewa bilong ol, bai mi singautim ol long go insait long olgeta hap long ples graun long autim toktok long gospel bilong mi i go long olgeta manmeri.

29 Na ol em ol lain husat mi odenim ol long baptais long nem bilong mi, olsem dispela ol i raitim;

30 Na yu gat pinis ol skripsa long ai bilong yu; olsem na, yu mas wokim baptisim olsem long ol toktok ol i bin raitim.

31 Na nau mi tokim yupela, ol Twelpela—Lukim, marimari bilong mi em inap long yupela; yupela mas wokabaut stret long ai bilong mi na noken wokim sin.

32 Na, lukim, yupela ol lain husat mi odenim yupela long makim ol pris na ol tisa; long autim gospel bilong mi, olsem dispela pawa bilong Holi Gos i stap insait long yu, na olsem long ol dispela singaut na spesol pawa bilong God long ol manmeri;

33 Na mi, Jisas Krais, Bikpela bilong yupela na God bilong yupela, mi toktok pinis.

34 Ol dispela toktok ol i no toktok bilong ol man tasol ol i toktok bilong mi; olsem na yupela bai tokaut olsem dispela ol toktok bilong mi na ol i no toktok bilong ol man;

35 Long wanem em long nek bilong mi na mi mekim ol dispela toktok long yupela; em long Spirit bilong mi na mi givim toktok long yupela, na em long pawa bilong mi yu ken ridim i go long wanpela narapela; na sapos i no long pawa bilong mi yupela bai i no inap kisim ol;

36 Olsem na, yupela ken tokaut olsem yupela harim pinis nek bilong mi, na save long ol toktok bilong mi.

37 Na nau, lukim, mi givim long yu, Oliver Cowdery, na tu long yu David Whitmer, olsem yutupela bai lukluk na painim ol dispela Twelpela, husat bai gat dispela laik em mi bin toktok pinis long en;

38 Na long ol laik bilong ol na ol wok bilong ol bai yutupela ken luksave long ol.

39 Na taim yutupela painim ol pinis bai yutupela soim ol dispela samting long ol.

40 Na yutupela bai pundaun na lotuim Papa long nem bilong mi.

41 Na yupela mas autim toktok i go long dispela ples graun, na tok: Yu mas tanim bel na baptais, long nem bilong Jisas Krais;

42 Long wanem olgeta man mas tanim bel na baptais, na i no ol man tasol, ol meri tu na ol pikinini husat i kamap long yia bilong save long pasin.

43 Na nau, bihain long taim yutupela kisim dispela, yu mas holim pas ol komanmen bilong mi long olgeta samting yu wokim;

44 Na long han bilong yutupela bai mi mekim kamap wanpela gutpela wok namel long ol pikinini manmeri bilong dispela graun, olsem ol bai kirapim planti long ol sin bilong ol, olsem bai ol i ken tanim bel, na olsem ol i ken kam insait long kingdom bilong Papa bilong mi.

45 Na nau, dispela ol blesing em mi givim long yutupela ol i antap moa long ol narapela samting.

46 Na nau, bihain long yutupela kisim dispela, sapos yutupela i no holim pas ol komanmen bilong mi yutupela i no inap kisim salvesen insait long kingdom bilong Papa bilong mi.

47 Lukim, mi, Jisas Krais, Bikpela bilong yupela na God bilong yupela, na Ridima bilong yupela, na mi tokaut long dispela wantaim pawa long Spirit bilong mi. Amen.