Seksen 34
Revelesen i go long Profet Joseph Smith bilong Orson Pratt, long Fayette, New York, 4 Novemba 1830. Brada Pratt bin naintin krismas long dispela taim. Em i bin konvet na baptais nambawan taim em bin harim bikpela brata bilong em, Parley P. Pratt, autim toktok long dispela gospel em i kambek gen, sikspela wik bipo long dispela taim. Dispela revelesen Profet i bin kisim long haus bilong Peter Whitmer Snr.
1–4, Ol lain stap wantaim feit bai kamap olsem ol pikinini manmeri bilong God long Atonmen; 5–9, Autim toktok bilong gospel bai redim rot bilong Nambatu Kam bilong Bikpela; 10–12, Profesi bai kam long pawa bilong Holi Gos.
1 Pikinini man bilong mi Orson, harim gut na lukim dispela mi, Bikpela God, bai tokim yu, mi Jisas Krais Ridima bilong yu.
2 Lait na laip bilong dispela wol, dispela lait em i lait long tudak, na tudak i no save long dispela lait.
3 Husat i lavim dispela wol olsem na em i givim laip bilong em yet, olsem planti bilong ol husat i bilip bai kamap ol piknini man bilong God. Olsem na yu pikinini man bilong mi;
4 Na mi blesim yu long wanem yu bin bilip;
5 Na bai mi blesim yu moa long wanem mi singautim yu long autim toktok long gospel bilong mi—
6 Long litimapim nek bilong yu olsem wantaim krai bilong wanpela biugel, longpela na bikpela wantaim, na singaut tanim bel i go long dispela krungut na giaman lain bilong dispela taim, long redim rot bilong Bikpela long nambatu kam bilong em.
7 Long wanem lukim, tru tru, mi tokim yu, taim i klostu nau olsem mi bai kam long wanpela kilaut wantaim pawa na bikpela glori.
8 Na em bai wanpela bikpela de long taim bilong kam bilong mi, long wanem olgeta nesen bai guria.
9 Tasol pastaim long dispela bikpela de bai kam, san bai kamap tudak, na mun bai tanim i go olsem blut; na ol sta bai no laik long lait; na sampela bai pundaun, na bikpela bagarap bai wetim ol lain nogut.
10 Olsem na, litimapim nek bilong yu na noken holim bek, long wanem Bikpela God i bin tok pinis; olsem na tokaut long samting em bai kam bihain na yu bai kisim long pawa bilong Holi Gos.
11 Na sapos yu stap wantaim feit, lukim, mi bai stap wantaim yu inap mi kam—
12 Na tru, tru, mi tokim yu, mi kam kwiktaim. Mi Bikpela bilong yu na Ridima bilong yu. Em tasol. Amen.