Seksen 36
Revelesen i go long Profet Joseph Smith bilong Edward Partridge, klostu long Fayette, New York, 9 Disemba 1830 (lukim het tok long Seksen 35). Histori bilong Joseph Smith i tok olsem Edward Partridge “bin wanpela man bilong lotu, na wanpela long ol bikpela man bilong Bikpela.”
1–3, Bikpela i putim han bilong em antap long Edward Partridge wantaim han bilong Sidney Rigdon; 4–8, Olgeta wanwan man husat i kisim dispela gospel na prishud Bikpela bai singautim ol long go aut na autim toktok long gospel.
1 Olsem Bikpela God i tok, Em Wanpela Strongpela bilong Isrel i tok: Lukim, mi tokim yu, wokman bilong mi Edward, olsem mi blesim yu, na ol sin bilong yu mi fogivim, na mi singautim yu long autim toktok long gospel bilong mi wantaim nek bilong biugel;
2 Na bai mi putim han bilong mi antap long yu wantaim han bilong wokman bilong mi Sidney Rigdon, na yu bai kisim Spirit bilong mi, dispela Holi Gos, em dispela Spirit bilong Bel Isi, em bai tisim yu ol samting bilong bringim gutpela sindaun bilong dispela kingdom;
3 Na yu bai tokaut long en wantaim wanpela bikpela nek, na tok: Hosana, blesim nem bilong God em i antap moa yet.
4 Na nau dispela singaut na komanmen mi givim long yu bilong olgeta man—
5 Olsem olgeta husat bai kam long ol wokman bilong mi Sidney Rigdon na Joseph Smith Jnr., na holim pas dispela singaut na komanmen, bai kisim odinesen na bai salim kamaut long autim toktok long dispela gospel bilong oltaim oltaim long ol nesen—
6 Singaut stap long tanim bel, na tok: Seivim yupela yet long dispela krungut lain bilong dispela taim, na kamaut long paia, no laikim tu ol kolos i gat mak bilong bodi.
7 Na dispela komanmen bai i go long ol elda bilong sios bilong mi, olsem olgeta wanwan man husat bai holim pas dispela wantaim wanbel bai inap kisim odinesen na salim kamaut, wankain olsem mi bin tok pinis.
8 Mi Jisas Krais, Pikinini Man bilong God, olsem na, yupela mas redi na kirap i go na mi bai kam kwiktaim long temple bilong mi. Em tasol. Amen.