Seksen 55
Revelesen i go long Profet Joseph Smith bilong William W. Phelps, long Kirtland, Ohio, 14 Jun 1831. William W. Phelps, wanpela printa na famili bilong em i bin kamap tasol long Kirtland, na Profet i go painim aut long Bikpela long ol samting long em.
1–3, Bikpela i makim na singautim William W. Phelps long baptais, na long kisim odinesen olsem wanpela elda, na long autim toktok bilong gospel; 4, Na tu em i mas raitim ol buk bilong ol pikinini long ol skul bilong Sios; 5–6, Em i mas raun i go long Missouri, dispela hap em i bai mekim wok bilong Bikpela.
1 Lukim, olsem Bikpela i tokim yu, wokman bilong mi William, tru, olsem Bikpela bilong olgeta dispela ples graun, yu em i makim na singautim yu; na bihain long yu bin baptais pinis long wara, sapos yu wokim wantaim olgeta samting long bringim glory long God, Bikpela i bai lusim sin bilong yu na yu bai kisim Holi Spirit taim ol i putim han bilong ol antap long het bilong yu;
2 Na bihain wokman bilong mi Joseph Smith Jnr., bai odenim yu long han bilong em, long kamap olsem wanpela elda long dispela sios, long autim toktok bilong tanim bel pasin na long Bikpela i lusim sin long pasin bilong baptisim long nem bilong Jisas Krais, em Pikinini Man bilong God i stap laip.
3 Na long husat lain yu putim han bilong yu antap long het bilong ol, sapos ol i buruk wantaim sori long ai bilong mi, yu bai gat pawa long givim Holi Spirit long ol.
4 Na gen, ol i bai odenim yu long halivim wokman bilong mi Oliver Cowdery long wokim wok bilong printim, na makim na raitim ol buk bilong ol skul insait long dispela sios, olsem bai ol liklik pikinini bai kisim tu toksave long ai bilong mi olsem em i mekim mi hamamas.
5 Na gen, tru mi tokim yu, long dispela as yu bai kisim dispela raun wantaim ol wokman bilong mi Joseph Smith Jnr., na Sidney Rigdon, olsem yu inap sindaun long dispela graun bilong yu long wokim dispela wok.
6 Na gen, larim wokman bilong mi Joseph Coe tu bai kisim dispela raun wantaim ol. Na ol narapela skul mi bai soim yupela bihain, olsem tasol mi bai wokim. Amen.