Seksen 60
Revelesen i go long Profet Joseph Smith, long Independence, Jackson County, Missouri, 8 Ogas 1831. Long dispela taim ol elda husat i bin raun i go long Jackson County na stap insait long dedikesen bilong dispela graun ol i bai sanapim temple i bin laik long save long wanem samting ol i bai mas wokim.
1–9, Ol elda bai autim toktok bilong gospel long kongrigesen bilong ol lain nogut; 10–14, Ol i mas noken westim nating taim bilong ol, na tu noken haitim talen bilong ol insait long graun; 15–17, Na ol i ken wasim lek bilong ol olsem wanpela testimoni agensim ol lain husat i no laikim dispela gospel.
1 Lukim, olsem Bikpela i tokim ol elda bilong sios bilong em, husat i bai kam bek kwiktaim long ples we ol i bin kam long en: Lukim, em i mekim mi hamamas, olsem yupela i kamap long hia;
2 Tasol long sampela mi no hamamas tumas, long wanem ol i no opim maus bilong ol, tasol ol i haitim talen bilong ol em mi bin givim i go long ol, bikos long poret bilong ol long man. Wo i go long ol dispela lain, long wanem kros bilong mi i kamap bikpela long ol dispela lain.
3 Na em i bai kamap olsem, sapos ol i nogat feit moa long mi, bai mi rausim long ol, ol dispela samting ol i gat.
4 Bikos mi Bikpela, bos long heven antap, na long ol ami bilong dispela ples graun; na long dispela de taim mi mekim ol bilas i dia tru long mi, olgeta man bai i save wanem em dispela samting i save soim pawa bilong God.
5 Tasol, tru, mi tokim yu long raun bilong yu i go long graun we yu bin kam long en. Yupela i mas wokim o baim wanpela bot, olsem i luk gut long yu, em i no samting mi wari long en, na kisim raun bilong yu na go kwiktaim long ples ol i kolim St. Louis.
6 Na long dispela hap larim ol wokman bilong mi, Sidney Rigdon, Joseph Smith Jnr., na Oliver Cowdery, kisim dispela raun bilong ol long ples Cincinnati;
7 Na long dispela ples larim ol litimapim nek bilong ol na tokaut long gospel bilong mi wantaim bikpela nek, wantaim nogat belhat tru na pasin bilong holim tupela tingting, litimapim ol han i holi antap long ol. Long wanem mi inap long mekim yu holi, na ol sin bilong yu mi bai fogivim ol.
8 Na larim ol dispela narapela elda mekim raun bilong ol long ples St. Louis, tupela tupela, na autim toktok bilong gospel, i no hariap, namel long kongrigesen bilong ol lain nogut, inap ol i kamap bek long ol brens bilong sios we ol i bin kam.
9 Na olgeta dispela em long bilong gutpela bilong ol brens bilong sios; long dispela samting mi bin salim ol.
10 Na larim wokman bilong mi Edward Partridge i givim hap bilong dispela mani mi bin givim em, long ol elda bilong mi husat mi bin tokim ol long go bek;
11 Na em husat inap, larim em givim bek long dispela man husat i save lukautim ol samting bilong ol narapela man; na em husat i no inap, long em i nogat nid long em i givim bek.
12 Na nau mi toktok long ol narapela lain husat bai kam long dispela graun.
13 Lukim, Mi bin salim ol i go long autim toktok bilong gospel bilong mi namel long ol kongrigesen bilong ol lain nogut; olsem na, mi givim i go long ol wanpela komanmen, olsem: Yu noken westim nating taim bilong yu, na tu noken haitim talen bilong yu olsem bai ol narapela i no luk save long en.
14 Na bihain long taim yu bin kam long graun long Zion, na bin tokaut long gospel bilong mi, yu bai go bek kwiktaim, na tokaut long gospel bilong mi namel long ol kongrigesen bilong ol lain nogut, i no hariap, na tu wantaim nogat belhat tru na tu i no wantaim bel hevi.
15 Na rausim pipia graun i stap long lek bilong yu agensim ol dispela lain husat i no welkamim yu, i no long ai bilong ol, nogut yu mekim ol belhat, tasol long hait; na wasim lek bilong yu, olsem wanpela testimoni agensim ol long de bilong jasmen.
16 Lukim, dispela em inap long yu, na em i laik bilong em husat i salim yu.
17 Na long maus bilong wokman bilong mi Joseph Smith Jnr., Bikpela bai tokaut long Sidney Rigdon na Oliver Cowdery. Ol narapela toktok bai kam bihain. Em tasol. Amen.