Seksen 113
Ol bekim long sampela askim long ol raiting bilong Aisaia, Profet Joseph Smith i bin givim, long o klostu long Far West Missouri, March 1838.
1–6, As Diwai bilong Jesi, dispela han diwai i kam long en, na dispela rop bilong diwai bilong Jesi Bikpela i soim; 7–10, Ol hap lain bilong Zion husat i stap nambaut i gat rait long dispela prishud na Aisea i singautim ol long kam bek long Bikpela.
1 Husat ol dispela As Diwai bilong diwai bilong Jesi ol i toktok long ol insait long namba 1, namba 2, namba 3, namba 4, na namba 5 ves bilong namba 11 sapta bilong Aisaia?
2 Tru olsem Bikpela i tok: Em i Krais.
3 Wanem em dispela han diwai ol i toktok long en insait long nambawan ves bilong namba 11 sapta bilong Aisaia, dispela i mas kam long As Diwai bilong Jesi?
4 Lukim, olsem Bikpela i tok: Dispela em i wanpela wokman aninit long ol han bilong Krais, husat i hap tumbuna pikinini bilong Jesi na tu bilong Ifraim, o long haus bilong Joseph, long husat Bikpela i givim planti pawa.
5 Wanem em dispela rop bilong diwai bilong Jesi ol i toktok long en insait long namba 10 ves bilong namba 11 sapta?
6 Lukim, olsem Bikpela i tok, dispela em i wanpela tumbuna pikinini bilong Jesi, na tu bilong Joseph, husat i gat rait long gat dispela prishud, na dispela ol ki bilong dispela kingdom, long wanpela simbol, na long bungim bilong ol pipol bilong mi long ol dispela las de.
7 Askim i kam long Elias Higbee: Wanem mining bilong dispela tok strong long Aisaia, sapta 52, ves 1, dispela i tok: Putim strong bilong yu, O Zion—na wanem ol pipol Aisaia bin wok long toktok long ol?
8 Em bin wok long toktok long dispela lain husat God i mas singautim long ol dispela las de, husat i mas holim dispela pawa bilong prishud long bringim gen Zion, na dispela ridemsen bilong Israel; na long putim strong bilong em, em long putim atoriti bilong dispela prishud, we em, Zion, i gat rait long en thru long blut; na tu long go bek long dispela pawa em i bin lusim.
9 Wanem samting bai yumi mas save long en long Zion i lusim em yet long dispela ol rop long nek bilong em; namba 2 ves?
10 Yumi i mas save olsem dispela ol hap lain husat i stap nambaut Aisaia i strongim bel bilong ol long go bek long Bikpela long we ol i bin pundaun; we sapos ol i mekim, dispela promis bilong Bikpela em olsem em bai toktok wantaim ol, o givim ol revelesen. Lukim ol dispela ves namba 6, namba 7, na namba 8. Ol rop long nek bilong em em ol tok nogut bilong God antap long em, o dispela hap lain bilong Israel husat i stap nambaut namel long ol Jentail.