1 Em i laik bilong mi olsem wokman bilong mi Warren A. Cowdery ol sios lida i mas makim na odenim olsem hai pris bilong lukautim ol samting long sios bilong mi, long dispela ples bilong Freedom na ol ples raun nambaut;

2 Na i mas autim toktok bilong oltaim oltaim gospel bilong mi, na litimapim nek bilong em na tok lukaut long ol pipol, i no long ples bilong em yet, tasol long ol county klostu long en;

3 Na givim olgeta taim bilong em long dispela singaut i antap tru na i holi, em mi givim nau long em, wantaim olgeta strong painim kingdom bilong heven na stretpela pasin bilong en, na olgeta samting em i nidim Bikpela bai givim i go long em; long wanem wokman i gat pe long wok bilong em.

4 Na gen, tru mi tokim yu, kam bilong Bikpela i wok long kam klostu, na i kam long kisim dispela wol olsem wanpela stilman long nait—

5 Olsem na, pasim strong namel bilong yu, olsem yupela bai kamap ol pikinini bilong lait, na dispela de bai no inap long kam na kisim yupela olsem wanpela stilman.

6 Na gen, tru mi tokim yu, i bin i gat hamamas long heven taim wokman bilong mi Warren i daunim het long stik king bilong mi, na em yet i bin stap longwe long ol kainkain rabis pasin bilong ol man;

7 Olsem na, wokman bilong mi Warren bai kisim blesing, long wanem mi bai soim marimari long em; na maski long pasin bikhet bilong bel bilong em, mi bai litimapim em go antap sapos em i daunim em yet long ai bilong mi.

8 Na mi bai givim em marimari na promis long we em inap sanap; na sapos em i go het yet long kamap wanpela witnes long stap wantaim feit na kamap wanpela lait long dispela sios mi bin redim wanpela kraun bilong em long ol bikpela naispelahaus bilong Papa bilong mi. Em tasol. Amen.