1 Te kaotioti mai iroun Iesu Kristo nakon ana tia mwakuri ae Iotebwa Timiti te Ataei ao onoman unimwaane, ngke a botii nanoia ao a tabekarake bwanaia nako eta.

2 Eng, ana taeka te Uea ni kaineti ma ana ekaretia, are e kateaki ni boong aika kaitira ibukin kaokakiia ana aomata, ngkai e a tia n taetae man wiia ana burabeti, ao ibukin ikotakiia ana aomata aika itiaki bwa a na tei i aon te Maunga are Zion, are e na riki bwa te kaawa ae Ierutarem ae Boou.

3 Are te kaawa ae e na kateaki, ni moanaki man ana tabo te tembora, are e rineaki ni bain te Uea, n tiia ake i maeao n te Mwakoro n Aba ae Missouri, ao ni katabuaki ni bain Iotebwa Timiti te Ataei ao tabeman are e kukurei irouia te Uea.

4 E koaua aio ana taeka te Uea, bwa te kaawa ae Ierutarem ae Boou e na kateaki man ikotakiia aomata aika itiaki, ni moanaki man te tabo aei, ae nnen te tembora, are te tembora are e na kateaki n te roro aei.

5 Bwa e koaua te roro aei e na aki mauna nako ni kabane ni karokoa e kateaki te auti ibukin te Uea, ao e na tiku te nang i aona, are te nang ae mimitongin te Uea, are e na kaona te auti.

6 Ao natin Mote, ni kaineti ma te Nakoanibonga ae Tabu are e karekea i aan bain taman kaain abana, ae Ietero;

7 Ao Ietero e karekea i aan bain Kareba;

8 Ao Kareba e karekea i aan bain Eriu;

9 Ao Eriu i aan bain Ieremia;

10 Ao Ieremia i aan bain Kata;

11 Ao Kata i aan bain Etaiati;

12 Ao Etaiati e karekea i aan bain te Atua.

13 Etaiati e maiu naba n ana tai Aberaam, ao e kakabwaiaki irouna—

14 Are Aberaam e karekea te nakoanibonga mai iroun Merekitereka, are e karekea rinanon rikiia ana bakatibu, ni karokoa Noa;

15 Ao mai iroun Noa ni karokoa Enoka, rinanon rikiia aia bakatibu;

16 Ao mai iroun Enoka nakon Abera, are e tiringaki n ana boraraoi tarina, are e karekea te nakoanibonga man ana tua te Atua, ni bain tamana ae Atam, are bon te moan aomata—

17 Te nakoanibonga are e reitinako n ana ekaretia te Atua n rooro nako, ao bon akea moan ana bong ke tokin ana ririki.

18 Ao te Uea e kamatoa naba te nakoanibonga i aon Aaron ao ana kariki, i nanon aia roro nako, te nakoanibonga are e reitinako ao ni waaki nako naba n aki toki ma te nakoanibonga are katootongan ana botaki te Atua ae moan te tabu.

19 Ao te nakoanibonga ae korakora aei e kamwakura te euangkerio ao n taua kiingin bwain te abanuea aika raba, are kiingin te atatai ibukin te Atua.

20 Ngaia are, e kaotaki mwaakan te aro n Atua n taian otenanti mai iai.

21 Ao n akean taian otenanti mai iai, ao te kariaiakaki n te nakoanibonga, te mwaaka n te aro n Atua e aki kaotaki nakoia aomata n te iriko;

22 Bwa n akean aei akea te aomata ae e kona n noora ubun te Atua, ao e maiu.

23 Ngkai Mote e karaua n reiakina raoi aio nakoia tibun Iteraera n te rereua, ao n teimatoa n ukoukora katabuaia ana aomata bwa aonga n noora ubun te Atua;

24 Ma a kamatoai nanoia ao a aki kona n tei n aki rotaki imatana; ngaia are, te Uea n unna, bwa e kauraaki unna nakoia, e tuea bwa a na aki rin i nanon ana motirawa ngkai a mena n te rereua, are te motirawa are bwaninin mimitongina.

25 Ngaia are, e anaa Mote mai i buakoia, ao te Nakoanibonga ae Tabu naba;

26 Ao e reitinako te nakoanibonga are rinano, are te nakoanibonga ae taua kiingin aia mwakuri n ibuobuoki anera ao te euangkerio ni katauraoi;

27 Are te euangkerio ae te euangkerio n rairannano ao ni bwabetito, ao kamaunaan bure, ao te tua ake tuan te rabwata, are e karaoia te Uea n unna bwa e na reitinako n ana auti Aaron i buakoia tibun Iteraera ni karokoa Ioane, are e katauraoia te Atua, n tia ni kaonaki n te Tamnei ae Raoiroi mai i nanon biroton tinana.

28 Bwa e bwabetitoaki ngke e uarereke, ao e katabuaki iroun ana anera te Atua nakon te mwaaka aei n te tai are wanua ana bong ni maiu, bwa e na kabwaka ueaia Iutaia, ao ni kaeta kawain te Uea i mataia ana aomata, ni katauraoia ibukin rokon te Uea, are a mena i nanon baina mwaaka ni kabane.

29 Ao teuana riki, nakoaia unimwaane ao bitiobi bon taian reita aika a kakawaki aika ana bwai te nakoanibonga ae rietata.

30 Ao teuana riki, nakoaia taan reirei ao rikan bon taian reita aika kakawaki aika ana bwai te nakoanibonga are rinano, are te nakoanibonga are e kamatoaki nako aon Aaron ao natina mwaane.

31 Ngaia are, n aron are I taekinna ni kaineti nakoia natin Mote aika mwaane—ibukiia natin Mote aika mwaane ao natin naba Aaron aika mwaane a na anga te angabwai ao te karea ae butimwaeaki n umwan te Uea, are te auti ae e na kateaki nakon te Uea n te roro aei, i aon te tabo ae katabuaki n aron ae I a tia n rineia—

32 Ao natin Mote ao Aaron aika mwaane a na kaonaki ni mimitongin te Uea, n ana auti te Uea i aon te Maunga are Tion, are natina ae ngkami; ao a mwaiti naba ake I a tia ni weteia ao ni kanakoia bwa a na katea au ekaretia.

33 Bwa ane e kakaonimaki bwa aonga ni karekei nakoanibonga aika uoua aikai ake I a tia n taekin, ao kakorakoraan nakoaia, a katabuaki iroun te Tamnei ibukin kabouan rabwataia.

34 A riki bwa natin Mote ao Aaron ao kanoan Aberaam, ao te ekaretia ao te abanuea, ao ake a rineaki iroun te Atua.

35 Ao ni kabane naba naake a karekea te nakoanibonga aei a butimwaeai, e taku te Uea;

36 Bwa ane e butimwaea au tia mwakuri e butimwaeai;

37 Ao ane e butimwaeai e butimwaea Tamau;

38 Ao ane e butimwaea Tamau e na karekea abanuean Tamau; ngaia are ni kabane are ana bwai Tamau e na anganaki.

39 Ao aio e bon kaineti nakon te tuea ao te berita ae tabu ake bwain te nakoanibonga.

40 Ngaia are, ni kabane naake a karekea te nakoanibonga, a karekea te tuea ao te berita ae tabu mai iroun Tamau, are e aki kona n urua, ao e aki kona ni kamwaingaki.

41 Ma ane e urua te berita ae tabu aei i mwin rekena irouna, ao n tannako raoi mai iai, e na aki karekea kabwaraan ana bure n te aonaba aei ao n te aonaba ae e na roko.

42 Ao a na reke kaia ni kabane naake a aki karekea te nakoanibonga aei are kam a tia ni karekea, are I a kamatoa ngkai i aomi ake kam roko n te bong aei, n oin bwanaau mai karawa; ao I a tia n anganiia kaaini karawa ao au anera te mwiokoaki ibukimi.

43 Ao ngkai I anganingkami te tua bwa kam na tarataraingkami ni kaineti ma ngkami, ni botumwaaka ni kakauongo raoi nakon taekan te maiu ae akea tokina.

44 Bwa kam na maiuakini taeka ni kabane are a otinako mai wiin te Atua.

45 Bwa ana taeka te Uea bon te koaua, ao bwaai ni kabane ake a koaua bon te oota, ao bwaai ni kabane ake a oota bon te Tamnei, are Tamnein Iesu Kristo.

46 Ao te Tamnei e anga te oota nakoia aomata ni kabane ake a roko nakon te aonaba; ao te Tamnei e kaotaia aomata ni kabane n taabo nako n te aonaba, ake a ongo nakon bwanaan te Tamnei.

47 Ao ni kabane ake a ongo nakon bwanaan te Tamnei a nakon te Atua, are te Tama.

48 Ao te Tama e reireinia taekan te berita ae tabu are e a tia ni kabooua ao ni kamatoa i aomi, are e kamatoaki i aomi ibukimi, ao tiaki tii ibukimi, ma ibukin te aonaba ae bwanin.

49 Ao te aonaba ae bwanin e wene n te bure, ao ni ngirangira i aan te rootongitong ao i aan te tautoronaki n te bure.

50 Ao man aio kam aonga ni kona n ataia bwa a mena i aan te tautoronaki n te bure, ibukina bwa a aki nakoiu.

51 Bwa ane e aki nakoiu e mena i aan te tautoronaki n te bure.

52 Ao ane e aki butimwaea bwanaau e aki ataa bwanaau, ao bon tiaki ngaia mai irou.

53 Ao man aio kam aonga ni kona n ataa te raoiroi man te buakaka, ao bwa te aonaba ae bwanin e ngirangira naba ngkai i aan te bure ao te rootongitong.

54 Ao ami iango n taai aika nako a tia n karooaki ibukin te aki kakoaua, ao ibukina bwa kam a tia ni kaakea manenan bwaai ake kam a tia ni karekei—

55 Are te kaibwabwaru ao te aki kakoaua a tia ni uota te ekaretia ae bwanin nakon te kabuakakaki.

56 Ao te kabuakakaaki aei e toka i aoia natin Tion, ni kabane.

57 Ao a na tiku i nanon te kabuakakaaki aei ni karokoa a raira nanoia ao n uringa te berita ae tabu ae boou, are Ana Boki Moomon ao tua ake mai i mwaaina ake I a tia n angania, tiaki n ti taekinna, ma a na karaoi ni kaineti nakon are I a tia ni koreia—

58 Bwa a aonga ni kariki uaa aika a riai ibukin abanuean Tamaia; bwa ngkana a aki e na tiku te karawawataaki ao te motikitaeka ni bwaro nako aoia natin Tion.

59 Bwa a na kabareka abau ae tabu natin te abanuea? E koaua, I tuangkami, A aki.

60 E koaua, e koaua, ae I tuangkami ake kam ongo ngkai au taeka, ake bwanaau, kam a kakabwaiaki ngkana kam teimatoa ni karekei bwaai aikai;

61 Bwa N na kabwarai ami bure n te tua aei—bwa kam na teimatoa ni matoatoa n ami iango n aki manikangare ma te nano n tataro, ni kaoti ami koaua nakon te aonaba ni kabane ni bwai akekei ake a taekinaki nakoimi.

62 Ngaia are, nako ngkami ni kabuta te aonaba; ao nakon taabo nako ake kam aki kona n nako iai kam na kanakoa, bwa e aonga te kakoaua n nako mai iroumi ni kabuta te aonaba nakoia aomata nako.

63 Ao n aron ae I taekinna nakoia au abotoro, I taekinna naba nakoimi, bwa ngkami au abotoro, ae ana ibonga ae rietata te Atua; ngkami aika e anganai Tamau; raou ngkami;

64 Ngaia are, n aron are I taekinna nakoia au abotoro I a manga taekinna naba nakoimi, bwa ni kabane aomata ake a kakoauai au taeka, ao ni bwabetitoaki n te ran ibukin kamaunaan bure, a na karekea te Tamnei ae Raoiroi.

65 Ao kanikina aikai a na iriiria naake a kakoauaa—

66 N arau a na karaoi mwakuri aika mwaiti aika kamiimi;

67 N arau a na kanakoi taian riaboro;

68 N aarau a na kamarurungiia aoraki;

69 N arau a na kauki mataia mataki, ao ni kauka taningaia ake a bonotaninga;

70 Ao newen ane e bae newena e na taetae;

71 Ao ngkana iai te aomata ae e anga te bwai ni kamamate nakoia e na bon aki kaikoakiia;

72 Ao ana bwai ni kamamate te naeta e na akea mwaakana ni kaikoakiia.

73 Ma te tua ae I anganiia, bwa a na aki kamoamoaia ni bwaai aikai, ke n taekinii i matan te aonaba; bwa bwaai aikai kam anganaki ibukin kabwaiami ao ibukin kamaiuakimi.

74 E koaua, e koaua, I tuangkami, naake a aki kakoauai ami taeka, ao a aki bwabetitoaki n te ran n arau, ibukin kamaunaan aia bure, bwa a aonga ni karekea te Tamnei ae Raoiroi, a na kabuakakaaki, ao a na aki roko nakon abanuean Tamau ike Tamau ao Ngai ti mena iai.

75 Ao te kaotioti aei nakoimi, ao te tua, e na kamanenaaki man te aoa naba aei i aon te aonaba ni kabuta, ao te euangkerio bon nakoia ni kabane ake a tuai ni karekea.

76 Ma, e koaua I taekinna nakoia ni kabane naake a tia n anganaki te abanuea—mai iroumi e riai n tataekinaki nakoia, bwa a na rairi nanoia man aia mwakuri ake ngkoa aika buakaka; bwa a riai ni boaaki ibukin nanoia ae buakaka ae e aki kakoauaa, ao tarimi ake i Tion ibukin aia kaitara nakoimi n te tai are I kanakoingkami.

77 Ao I a manga tuangkami, raou, bwa man te tai aio N na araningkami bwa raou, e riai bwa N na anganingkami te tua aei, bwa kam na riki n aroia raou ni boong akekei ngke I mena irarikiia, ni mwamwananga n tataekina te euangkerio ni mwaakau;

78 Bwa I aki kariaia bwa a na iai aia bwauti ni mwane ke te baeki, ke uoua aia kabaraaki.

79 Nooria, I kanakoingkami ni kata te aonaba, ao te tia mwakuri bwa e tau ni karekea boona.

80 Ao aomata nako ake a na nako n tataekina euangkerion te abanuea aei, ao n aki bwaka n reitinako ni kakaonimaki ni bwaai ni kabane, a na aki kua n te iango, ke ni karooaki, n te rabwata, baina ma waena, ke te toma n rii; ao e na aki bwaka teuana iran atuuna nako aontano n aki nooraki. Ao a na aki baki, ke n taka.

81 Ngaia are, tai tabeakina te ingabong, bwa tera ae kam na kanna, ke tera ae kam na nimma, ke tera ae kam na karabaningkami iai.

82 Bwa, noora kiebun tawaana, bwa a bwebwerake, ao a aki mwammwakuri, ke ni bibiri; ao abanuean te aonaba, ma tamaroaia ni kabane, a bon aki kunnikaiaki n aron tamaroan te kaina mai i buakoia.

83 Bwa Tamami, are i karawa, e ataia bwa kam kainanoi bwaai ni kabane aikai.

84 Ngaia are, tai tabeakina te ingabong bwa e na bon tabeakinna i bon irouna.

85 Ke ni iangoia i mwaain taina bwa tera ae kam na taekinna; ma kaikoa n ami iango n taai nako taekan te maiu, ao kam na anganaki n te tai naba arei te mwakoro are e na tibwauaaki nakoia aomata n tatabemania nako.

86 Ngaia are, akea temanna i buakomi, man te tai aio ae na uota ana bwauti ni mwane ke te baeki, are e na waaki nako ni katanoata euangkerion te abanuea aei, bwa te tua aei bon nakoia ni kabane ake a kakaonimaki ake a weteaki iroun te Atua n te ekaretia nakon te mwakuri n ibuobuoki.

87 Nooria, I kanakoko bwa ko na takua te aonaba man aia mwakuri ni kabane aika aki raoiroi, ao n reireiniia te motikitaeka ae e nang roko.

88 Ao ane e butimwaingkami, ao N na mena naba ikekei, bwa N na rimoami. N na mena i angataimi ao n angamaingimi, ao Tamneiu e na mena inanomi, ao au anera a mena i buakomi, n tabekiko rake.

89 Ane e butimwaingkami e butimwaeai; ao te aomata anne e na kamwarakeingkami, ao ni kunnikaingkami, ao n anganingkami ami mwane.

90 Ao ane e kamwarekeingkami, ke ni kunnikaingkami, ke n anganingkami te mwane, e na bon aki kona ni kabua kanuangana.

91 Ao ane e aki karaoi bwaai aikai bon tiaki au tia reirei; man aio kam na kona n ataia au taan reirei.

92 Ane e aki butimwaingkami, naako mai irouna n ti ngkami, ao kaitiaka waemi n te ran, te ran ae moan te itiaki, n tain te kabuebue ke te mwaitoro, ao kaota kakoauana nakon Tamami are i karawa, ao tai manga oki nakon te aomata anne.

93 Ao n te kaawa nako ke kaawa aika bubura are kam rin iai, karaoa naba anne.

94 E ngae n anne, ukeuke ma te botumwaka ao tai rawa ni karaoia; ao e na reke kain te auti anne, ke te kaawa ke te kaawa ae bubura anne are a rawa n ongo iroumi, ke ami taeka, ke ami koaua ni kaineti ibukiu.

95 Te rekenikai, I a manga taekinna, nakon te auti anne, ke te kaawa ke te kaawa ae bubura anne are e kaitaraingkami, ke ami taeka, ke ami koaua ibukiu.

96 Bwa Ngai, are Moan te Mwaaka, I a tia ni kawenei baiu i aon aaba, ni karawawataia ibukin buakakaia.

97 Ao e na waaki kabuanibwai, ao a na aki anaaki man te aonaba ni karokoa I a tia ni katiaa au mwakuri, are e na kauarerekeaki n te raoiroi—

98 Ni karokoa a na bane n ataai, ake nikiraia, mai irouia aika moan te mangori ni karokoa ake a moa ni kakannato, ao a na kaonaki n ataakin te Uea, ao a na nooria n oin mataia, ao a na tabekarake bwanaia, ao ma bwanaia a botaki n anenea te anene aei ae boou, ae kangai:

99 Te Uea e a tia ni manga kaoka Tion;Te Uea e a tia ni kabooia ana aomata, Iteraera,Ni kaineti ma te rinerine n akoi,Are e kakoroaki bukina n aia onimakiAo aia berita ae tabu aia bakatibu.

100 Te Uea e a tia ni kaboia ana aomata;Ao Tatan e kabaeaki ao ai akea te tai.Te Uea e a tia n botii bwai ni kabane n teuana.Te Uea e a tia ni karuoa Tion mai eta.Te Uea e a tia ni uotarake Tion mai i nano.

101 Te aonaba e a tia n rawawata ao ni kaoka korakorana;Ao e kaotaki te koaua i nanona;Ao e wingare karawa i aona;Ao e kunnikaiaki ni mimitongin Atuana;Bwa e tei i buakoia ana aomata.

102 Te mimitong, te karineaki, ao te mwaaka, ao te korakora,E na anganaki Atuara; bwa e onrake n te nanoanga,Te motiraoi, te akoi ao te koaua, ao te rau,N aki tootoki, Amen.

103 Ao, e koaua, e koaua, I a manga tuangkami, e riai bwa aomata nako ake a nako ni katanoata au euangkerio ae akea tokina, bwa ngkana iai aia utu, ao a karekea te mwane bwa te bwaintangira, bwa a riai ni kanakoa nakoia ke ni kamanena raoi ibukin kabwaiaia, n aron ae e na kairiia te Uea, bwa e nooraki raoiroina irou.

104 Ao a riai ni kabane naake akea aia utu, ake a karekei mwaane, ni kanakoa nakon te bitiobi i Tion, ke nakon te bitiobi i Ohio, bwa e aonga ni katabuaki ibukin kaotakin taian kaotioti ao boreetiakiia, ao ibukin katean Tion.

105 Ao ngkana te aomata temanna e na anganiko te kabaraaki, ke kunnikai, anaa are e a mane ao anganiia kainano, ao wakina kawaim ni kimwareirei.

106 Ao ngkana temanna mai i buakomi ae e korakora n te Tamnei, e riai n airi ma temanna are e mamaara, bwa e aonga ni karikirakeaki n te nimamannei ni kabane, bwa e aonga n riki ni korakora naba.

107 Ngaia are, kairiia naake a katabuaki nakon te nakoanibonga are rinano, ao kanakoia ni karimoaia bwa a na karaoa te tai ni kaitibo, ao ni katauraoa te kawai, ao ni karaoi taai ni kaitibo are ngkami kam aki kona ni karaoia.

108 Nooria, aio te kawai are au abotoro, ni boong ake ngkoa, a katea au ekaretia nakoiu.

109 Ngaia are, a riai aomata nako n tei n oin nakoaia, ao ni mwakuri n oin weteaia; ao e aki riai te atu n tuanga te wae bwa e aki kainnanoaki te wae; bwa n akean te wae e na kanga te rabwata ni kona n tei?

110 Te rabwata naba e kainnanoi bwaina ni kabane, bwa aonga ni kabane ni uaia ni karikirakeaki, bwa e aonga te rabwata ni kateimatoaaki ni kororaoi.

111 Ao nooria, a riai ni mwananga ibonga aika rietata, ao unimwaane naba, ao ibonga naba ake a rinano; ma rikan ao taan reirei a riai n rineaki bwa a na taratara te ekaretia, bwa taan ibuobuoki aika aki mwamwananga nakon te ekaretia.

112 Ao te bitiobi, ae Newel K. Whitney, e na mwananga naba nakon taabo aika uakaan ao i buakoia ni kabane mwanga n te ekaretia, ni kakaeia kainnano n angania te ibuobuoki ibukin kainnanoia ni kananorinanoia kaubwai ao naake a kamoamoa.

113 E na kamwakura naba te tia tei bwa e na tararua ao ni karaoi mwakuri ibukin te maiu n rabwata n aron ae e baireia.

114 E ngae n anne, e riai te bitiobi n nako nakon kaawan New York, nakon naba kaawan Albany, ao nakon naba kaawan Boston, ao ni kauringiia aomatan kaawa akanne ma bwanaan te euangkerio, ma te bwanaa ae korakora, ibukin te kananoanga ao te urubwai ae korakora ae e tataningaia ngkana a totokoi bwaai aikai.

115 Bwa ngkana a totokoi bwaai aikai ao aoan motikan taekaia e a kan roko, ao aia auti a na tiku ni kananoanga.

116 E riai n onimakinai ao e na aki kamangaoaki; ao iran atuuna teaina e na aki bwaka nako aontano n aki nooraki.

117 Ao e koaua ae I tuangkami, nikiraia au taan mwakuri, waaki nako n ami konaa ma aron maiumi, ni weteami aika kakaokoro, nakon kaawa aika bubura ao a uarereke aika kakannato ao a tanoata taekaia, ni boaa te aonaba n te raoiroi n aia mwakuri ni kabane aika aki raoiroi ao ni buakaka, ni kabwarabwarai raoi ma ni kamataatai urubwain mwakuri ae bati n ribaki ni boong aika kaitira.

118 Bwa mai iroumi, e taku te Uea ae Moan te Mwaaka, N na urui ueaia; N na aki tii ioioa te aonaba, ma e na ruru naba karawa ae kaonaki ni itoi.

119 Bwa Ngai, te Uea, I a tia n arora baiu ni kaota mwaakan karawa; kam aki kona n nooria ngkai, ma n te tai ae aki maan ao kam na nooria, ao n ataia bwa boni Ngai, ao bwa N na bon roko ao n tautaeka ma au aomata.

120 Ngai te Arebwa ao te Omeka, te moan ao te kabane. Amen.