Mwakoro 96
Kaotioti ae kaotaki nakon Iotebwa Timiti te Burabeti, are e kaota bairean kaawan ke titeikin Tion i Kirtland, Ohio, n Tuun 4, 1833, bwa te katoto nakoia Aomata aika Itiaki i Kirtland. Te tai anne bon tain aia maungatabu ibonga aika rietata, ao oin te maroro ae e na maroroakinaki bon tibwatibwaan tabeua aaba, ae e ataaki bwa te nne ni man ae arana French, are e bwainaki iroun te Ekaretia i rarikin Kirtland. Bukina ngkai e aki booraoi i aona te maungatabu bwa antai ae e na tararua te nne ni man, a bane ni booraoi bwa a na butiia te Uea ni kaineti ma aio.
1, Titeikin Tion i Kirtland e riai ni kamatoatoaaki; 2–5, E riai te bitiobi n tibwauai bwaai ni bwaibwai ibukiia Aomata aika Itiaki; 6–9, John Johnson e riai n riki bwa kaain te botaki ni katiteuanaaki.
1 Nooria, I tuangkami, aio te wanawana, mai iai kam aonga n ataia bwa tera ae kam na karaoia ni kaineti ma aio, bwa e riai irou bwa te atiteiki aio are I a tia ni kateia ibukin kakorakoraan Tion e na kakorakoraaki.
2 Ngaia are, e riai au tia mwakuri ae Newel K. Whitney n tararua te tabo are kam a tia n taekinna, i aona are I iangoia ni katea au auti ae tabu.
3 Ao teuana riki, e riai n tibwatibwaaki nakon mwakorokoro n aba, ni kaineti nakon te wanawana, ibukin rakaia naake a ukoukora te bwaibwai, n aron ae e na iangoaki iroumi n tain ami bowi.
4 Ngaia are, taraia raoi ngkai kam tabe ma aio, ao te mwakoro anne are e riai ibukin kanakoraoan au abotaki, ibukin taekinan au taeka nakoia natiia aomata.
5 Bwa nooria, e koaua ae I tuangkami, aio e rang riai irou, bwa au taeka e na waaki nakoia natiia aomata, ibukin kamarauan nanoia natiia aomata ibukin ae raoiroi ibukimi. Eng. Amen.
6 Ao teuana riki, e koaua ae I tuangkami, aio te wanawana ao e riai irou, bwa au tia mwakuri ae John Johnson are ana anganano I a tia ni butimwaia, ao ana tataro I a tia n ongo, nakoina I anganna te berita ibukin te maiu ae akea tokina ngkana e teimatoa ni kawakini au tua man te tai aei—
7 Bwa ngaia bon kanoan aIotebwa ao te tia karekei kakabwaia n te berita are e karaoaki nakoia ana bakatibu—
8 E koaua ae I tuangkami, e riai irou bwa e na riki bwa kaain te botaki, bwa e aonga ni ibuobuoki n tataekinan au taeka nakoia natiia aomata.
9 Ngaia are kam na katabua nakon te kakabwaia aei, ao e na teimatoa n ukoukora kanakoan taian taarau ake a kaaitara te auti are kam a tia n taekinna, bwa e aonga ni maeka iai. Eng. Amen.